Swivutiso Swa Vahlayi

Xana swipimelo swa ku tekana ka maxaka leswi kumekaka eNawini wa Muxe swi tirha ku fikela kwihi eka Vakreste namuntlha?

Nawu lowu Yehovha a wu nyikeke tiko ra Israyele a wu yi hlamuseli hi vuenti minkhuvo ya vukati ni mafambiselo ya yona. Kambe yi veka swipimelo swo karhi malunghana ni vuxaka byo karhi bya vukati. Hi xikombiso, eka Levhitika 18:6-20, hi kuma nxaxamelo wa vuxaka lebyi yirisiweke na “xaka.” Tindzimana leti ti hlamusela hi vuenti leswaku hi wahi maxaka lawa ma nga fanelangiki ma va ni vuxaka bya rimbewu. Ina, Vakreste a va le hansi ka Nawu wa Muxe naswona a va bohiwi hi swileriso swa wona. (Vaefesa 2:15; Vakolosa 2:14) Hambiswiritano, leswi a swi vuli leswaku Vakreste va nga honisa mhaka leyi hi ku olova loko va hlawula munghana wa vukati. Ku ni swivangelo swo hlayanyana.

Xo sungula, ku ni milawu ya tiko malunghana ni ku tekana ka maxaka, kutani Vakreste va boheka ku yingisa milawu ya tiko leri va tshamaka eka rona. (Matewu 22:21; Varhoma 13:1) Ina, milawu yo tano ya hambana hi ku ya hi tindhawu. Milawu yo tala ya manguva lawa ya muxaka lowu yi endliwe ku ri karhi ku anakanyiwa hi timhaka ta xitekela. Swa tiviwa leswaku ku tekana ka maxaka ya le kusuhi ku nga vanga leswaku n’wana la tswariwaka a va a tsanile kumbe a vabya hikwalaho ka timhaka ta xitekela. Hikwalaho ka leswi ni hikwalaho ka ku “[tiveka] ehansi ka valawuri lava tlakukeke,” Vakreste lava nghenelaka vukati va yingisa milawu ya vukati ya le tikweni ra ka vona.

Kutani ku ni mhaka ya leswi amukelekaka ni leswi nga amukelekiki endhawini leyi munhu a tshamaka eka yona. Tinxaka hinkwato ti ni milawu ni mikhuva leyi yirisaka ku tekana ka vanhu lava nga maxaka ya le kusuhi swinene, naswona hakanyingi ti teka vuxaka byo tano byi ri ndzhukano. The Encyclopædia Britannica yi vula leswaku hambiloko vuxaka lebyi yirisiweke byi hambana swinene hi ku ya hi mindhavuko, “hi ntolovelo loko vanhu vambirhi va tekana va ri maxaka lamakulu na vanhu va lwisana swinene ni vuxaka bya vona bya rimbewu, lebyi va byi tekaka ku ri ndzhukano.” Xisweswo, ni loko va nga tekananga hi xixaka, Vakreste a va fanelanga va lwisana ni mikhuva kumbe mintlhaveko ya vanhu va ndhawu ya kona, leswaku va nga tisi xisandzu evandlheni ra Vukreste kumbe evitweni ra Xikwembu.—2 Vakorinto 6:3.

Xin’wana lexi nga fanelangiki xi honisiwa i ripfalo leri hi nyikiweke rona hi Xikwembu. Vanhu hinkwavo va velekiwa va tiva leswi faneleke ni leswi hoxeke, leswinene ni leswo biha. (Varhoma 2:15) Mapfalo ya vona ma va byela leswi tolovelekeke ni leswi faneleke ni leswi nga riki swa ntumbuluko ni leswi nyenyetsaka, handle ka loko ma tlanyarile kumbe ma dlayiwe hi mikhuva leyi soholotiweke. Yehovha u vulavule hi mhaka leyi loko a nyika Vaisrayele nawu wakwe lowu lwisanaka ni ku tekana ka maxaka ya le kusuhi. Ha hlaya: “Mi nga tshuki mi endla hi ku landza ndlela leyi tiko ra Egipta, leri a mi tshama eka rona, ri endlaka ha yona; ni ndlela leyi tiko ra Kanana ri endlaka ha yona laha ndzi mi yisaka kona, mi nga tshuki mi endla ha yona; mi nga tshuki mi famba hi ku landza milawu ya vona.” (Levhitika 18:3) Vakreste va ri tlangela ripfalo ra vona leri leteriweke hi Bibele naswona a va ri tshiki ri onhiwa hi mavonelo lama soholotiweke ya leswi nga swinene ni leswo biha eka matiko.—Vaefesa 4:17-19.

Kutani, hi nga gimeta hi ku yini? Hambileswi Vakreste va nga riki ehansi ka Nawu wa Muxe, mapfalo ya vona ma va byela kahle leswaku vukati bya maxaka ya le kusuhi—byo tanihi bya tatana ni n’wana wa yena, manana ni n’wana wa yena, vamakwavo—a byi amukeleki eka Vakreste. * Loko vuxaka byi ri karhi byi kula, Vakreste va swi xiya leswaku ku ni milawu leyi lawulaka vukati bya le nawini nileswaku ku ni mimpimanyeto leyi amukelekaka etikweni ni le ndhawini. Leswi swi fanele swi anakanyiwa hi vukheta leswaku hi ta fambisana ni xileriso xa Matsalwa lexi nge: “Vukati a byi xiximeke exikarhi ka hinkwavo.”—Vaheveru 13:4.

[Nhlamuselo ya le hansi]