Va Tlharihe Hi Ndlela Ya Vona

XIVURISO xa le Nigeria xi ri: “Vanhu lavakulu va tlharihile, kambe vana va tlharihe hi ndlela ya vona.” Edwin, nkulu la nga Mukreste le Nigeria u wu vonile ntiyiso wa marito lawa.

Siku rin’wana Edwin u kume bokisi ra ntsompfu ehansi ka desika ra yena ekaya.

Edwin u vutise vana va yena havanharhu a ku: “I bokisi ra mani leri?”

Emmanuel wa malembe ya nhungu hi vukhale u te: “I ra mina.” U tlhele a vula leswaku bokisi leri ra nsimbi leri a ri kurhile ra 12 wa swikwere-sentimitara, leri nga ni mbhovo ehenhla ka rona a ri ri ra minyikelo ya ntirho wa misava hinkwayo wa Timbhoni ta Yehovha. U te: “Leswi ndzi nga yiki masiku hinkwawo eHolweni ya Mfumo, ndzi anakanye leswaku ndzi endla bokisi leswaku loko ndzi nga yi tirhisanga mali ya mina yo xava malekere, ndzi yi hoxa ebokisini leri.”

Tata wa Emmanuel a a ri ni bokisi ekaya leri a a veka eka rona mali yo ya entsombanweni wa muganga wa lembe na lembe. Kambe a va yi tirhisile mali ya kona hikwalaho ka swilo leswi a swi lava ku lulamisiwa hi xihatla swa laha kaya. Leswaku a tiyiseka leswaku mali ya yena ya munyikelo a yi nge tirhiseriwi swilo swin’wana, Emmanuel u teke thini ra khale a ri yisa eka munhu la hiselelaka tinsimbi leswaku a ya ri lema. Muhiseleri wa tinsimbi loko a twe hi ta xikongomelo xa thini leri, u endlele Emmanuel bokisi hi nsimbi ya khale. Michael, ndzisana ya Emmanuel la nga ni malembe ya ntlhanu hi vukhale, na yena u kombele bokisi.

Hi ku hlamarisiwa hi leswi endliweke hi vana lava, Edwin u va vutisile leswaku ha yini va endle mabokisi lawa. Michael u te: “Ndzi lava ku humesa munyikelo!”

Emmanuel, Michael na Uchei, sesi wa vona wa malembe ya kaye hi vukhale, a va nga yi tirhisi hinkwayo mali leyi va longisiweke yona kutani a va yi hoxa emabokisini lawa, vatswari va vona va nga swi tivi. Mavonelo lawa va ma kume kwihi? Loko vana lava se va tlharihile naswona va kota ku khoma mali, vatswari va vona va va dyondzise ku hoxa mali ebokisini ra munyikelo eHolweni ya Mfumo. A swi kanakanisi leswaku vana lava va swi tirhisile leswi va dyondzisiweke swona.

Loko mabokisi lawa ma tele, ma pfuriwile. Mali ya kona a ku ri R27,42—a yi ri mali yo tala etikweni leri muholo wa lembe ku nga madzana ma nga ri mangani ya tirhandi. Minyikelo yoleyo ya ku tirhandzela yi seketela ntirho wo chumayela wa Timbhoni ta Yehovha lowu sweswi wu endliwaka ematikweni ya 235 emisaveni hinkwayo.