Ku Tiyisela “Mutwa Enyameni”

“Musa wa mina lowu nga faneriwiki wu enele ha wena.”—2 VAKORINTO 12:9.

1, 2. (a) Ha yini hi nga fanelanga hi hlamarisiwa hi miringo ni swiphiqo swa hina? (b) Ha yini hi fanele hi va ni ntshembo hambiloko hi langutane ni miringo?

“HINKWAVO lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Timotiya 3:12) Ha yini swi ri tano? Hikuva Sathana u vula leswaku vanhu va tirhela Xikwembu hikwalaho ka swivangelo swa vutianakanyi, naswona u tiyimiserile ku tiyisekisa mhaka ya yena. Yesu u tshame a tsundzuxa vaapostola va yena vo tshembeka a ku: “Sathana u lava hi matimba leswaku a mi sefa kukotisa koroni.” (Luka 22:31) Yesu a a swi tiva kahle leswaku Xikwembu xi pfumelela Sathana leswaku a hi ringa hi swiphiqo leswi vavisaka ngopfu. Kambe, sweswo a swi vuli swona leswaku ku nonon’hwa kun’wana ni kun’wana loku hi langutanaka na kona evuton’wini ku huma hi ku kongoma eka Sathana kumbe madimona yakwe. (Eklesiasta 9:11) Kambe Sathana u tiyimisele swinene leswaku a tirhisa xin’wana ni xin’wana lexi a nga xi kotaka leswaku a herisa vutshembeki bya hina.

² Bibele yi hi byela leswaku a hi fanelanga hi hlamarisiwa hi miringo ya hina. Ndzingo wun’wana ni wun’wana lowu nga hi welaka, wu ta va wu nga ri nchumu wuntshwa naswona hi tshama hi swi languterile leswaku wu nga hi wela. (1 Petro 4:12) Entiyisweni, “ku xaniseka loku fanaka ku karhi ka endleka enhlengeletanweni hinkwayo ya [vamakwerhu] emisaveni.” (1 Petro 5:9) Namuntlha, Sathana u tshikilela nandza wun’wana ni wun’wana wa Xikwembu. Diyavulosi u tsakela ku hi vona hi xanisiwa hi swiphiqo swo tala swinene leswi fanaka ni mitwa. Leswaku a endla sweswo, u tirhisa mafambiselo yakwe ya swilo hi ndlela leyi nyanyisaka ku vava ka ‘mitwa yihi na yihi leyi nga enyameni ya hina.’ (2 Vakorinto 12:7) Nilokoswiritano, minhlaselo ya Sathana a yi fanelanga yi tshova vutshembeki bya hina. Leswi Yehovha a nga ta hi “nyika ndlela yo huma” leswaku hi kota ku tiyisela ndzingo, u ta endla leswi fanaka loko hi langutane ni swiphiqo leswi fanaka ni mitwa enyameni ya hina.—1 Vakorinto 10:13.

Ndlela Yo Tiyisela Mutwa

3. Yehovha u n’wi hlamule njhani Pawulo loko a n’wi kombela leswaku a susa mutwa lowu a wu ri enyameni ya yena?

³ Muapostola Pawulo u kombele Xikwembu leswaku xi susa mutwa lowu a wu ri enyameni ya yena. “Hikwalaho ka leswi ndzi kombele Hosi kanharhu leswaku wu suka eka mina.” Yehovha u xi hlamule njhani xikombelo xa Pawulo lexi humaka embilwini? “Musa wa mina lowu  nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” (2 Vakorinto 12:8, 9) A hi kambisiseni nhlamulo leyi kutani hi vona ndlela leyi yi nga hi pfunaka ha yona leswaku hi langutana ni swiphiqo swihi na swihi leswi fanaka ni mutwa leswi nga hi vavisaka.

4. Pawulo u vuyeriwe hi tindlela tihi eka musa lowu nga faneriwiki wa Yehovha?

⁴ Xiya leswaku Xikwembu xi khutaze Pawulo ku tlangela musa lowukulu ngopfu lowu ana se a kombisiweke wona ha Kreste. Hakunene, Pawulo a a katekisiwe swinene hi tindlela to tala. Hambileswi a a ri mukaneti lonkulu wa valandzeri va Yesu, Yehovha hi rirhandzu u n’wi nyike lunghelo ra ku va mudyondzisiwa. (Mintirho 7:58; 8:3; 9:1-4) Endzhaku ka sweswo, Yehovha hi tintswalo u nyike Pawulo swiavelo ni malunghelo yo tala lama tsakisaka. Swi le rivaleni leswaku hi nga dyondza yini. Hambiloko swilo swi nonon’hwa, ha ha ri ni mikateko yo tala leyi hi nga yi tlangelaka. Miringo ya hina a yi fanelanga yi hi endla hi rivala vunene lebyikulu lebyi Yehovha a byi kombisaka.—Pisalema 31:19.

5, 6. (a) Yehovha u n’wi dyondzise njhani Pawulo leswaku matimba ya yena ma “endliwa lama hetisekeke eku tsaneni”? (b) Xikombiso xa Pawulo xi paluxe Sathana tanihi muhembi hi ndlela yihi?

⁵ Musa lowu nga faneriwiki wa Yehovha wu enele hi tindlela to tala. Matimba ya Xikwembu i makulu swinene lerova a ma nge tsandzeki ku hi pfuna eka miringo ya hina. (Vaefesa 3:20) Yehovha u dyondzise Pawulo leswaku matimba ya Xikwembu “ma endliwa lama hetisekeke eku tsaneni.” Njhani? Hi rirhandzu u nyike Pawulo matimba hinkwawo lawa a ma pfumalaka leswaku a kota ku langutana ni miringo yakwe. Eku heteleleni, ku tiyisela ka Pawulo ni ku titshega hi ku helela hi Yehovha ku ve vumbhoni eka vanhu hinkwavo leswaku matimba ya Xikwembu ma tirha hilaha ku humelelaka eka munhu la tsaneke ni la nga ni xidyoho. Nakambe anakanya hi ndlela leyi a titweke ha yona Diyavulosi, loyi a vulaka leswaku vanhu va tirhela Xikwembu ntsena loko swilo swi va fambela kahle. Ku tshembeka ka Pawulo a ku fana ni ku makariwa ka mulumbeti yoloye exikandzeni!

⁶ Byebyo i vuyelo bya Pawulo, khale ka munghana wa Sathana eku lwisaneni ni Xikwembu, muxanisi lonkulu wa Vakreste, Mufarisi loyi a a hiseka loyi handle ko kanakana a tshameke a hanya emafurheni hikwalaho ka leswi a tswaleriweke endyangwini lowu fuweke. Sweswi Pawulo a a tirhela Yehovha na Kreste tanihi “lontsongo eka vaapostola.” (1 Vakorinto 15:9) Hikwalaho, a a titsongahatela vulawuri bya huvo leyi fumaka ya Vukreste ya lembe-xidzana ro sungula. Naswona a a tiyisela hi ku tshembeka ku nga khathariseki mutwa wakwe enyameni. Lexi dyiseke Sathana mbitsi swinene hileswaku miringo ya vutomi a yi ku hungutanga ku hiseka ka Pawulo. Pawulo a nga kalanga a wu rivala ntshembo wa leswaku u ta hlanganyela eMfun’weni wa le tilweni wa Kreste. (2 Timotiya 2:12; 4:18) A ku nga ri na mutwa lowu a wu ta hunguta ku hiseka ka yena ku nga khathariseki ndlela leyi wu vavaka ha yona. Onge ku hiseka ka hina ku nga hambeta ku tiyile! Hi ku hi tiyisa emiringweni ya hina, Yehovha u hi nyika lunghelo ra ku pfuneta eku kombiseni ka leswaku Sathana i muhembi.—Swivuriso 27:11.

Malunghiselelo Ya Yehovha I Ya Nkoka

7, 8. (a) Yehovha u ma tiyisa hi yini malandza ya yena namuntlha? (b) Ha yini ku hlaya ni ku dyondza Bibele siku na siku swi ri swa nkoka swinene leswaku hi ta kota ku tiyisela mutwa lowu nga enyameni ya hina?

⁷ Namuntlha, Yehovha u nyika Vakreste lava tshembekaka matimba hi ku tirhisa moya wakwe lowo kwetsima, Rito ra yena ni vumakwerhu bya hina bya Vukreste. Ku fana na muapostola Pawulo, hi nga lahlela mindzhwalo ya hina eka Yehovha hi xikhongelo. (Pisalema 55:22) Hambileswi Xikwembu xi nga ha tshikaka miringo ya hina xi nga yi susi, xi nga hi nyika vutlhari bya ku langutana na yona, hambi ku ri leyi swi nonon’hwaka ku langutana na yona. Yehovha a nga tlhela a hi nyika xivindzi—a hi nyika “matimba lama tlulaka lama tolovelekeke”—leswaku a hi pfuna ku tiyisela.—2 Vakorinto 4:7.

⁸ Mpfuno wo tano hi wu kumisa ku yini? Hi fanele hi hisekela ku dyondza Rito ra Xikwembu hikuva eka rona hi ta kuma nchavelelo wa xona lowukulu. (Pisalema 94:19) EBibeleni, hi hlaya marito lama khumbaka mbilu ya malandza ya Xikwembu loko ma kombela mpfuno wa xona. Tinhlamulo ta Yehovha, leti hakanyingi ti katsaka ku tirhisa marito lama chavelelaka i swilo leswi hi faneleke hi anakanyisisa ha swona. Loko hi dyondza marito wolawo hi ta kota ku kuma “matimba lama tlulaka lama  tolovelekeke . . . ya Xikwembu, ku nga [ri] ya hina.” Tanihi leswi hi faneleke hi dya swakudya swa nyama siku ni siku leswaku hi xurha naswona hi va ni matimba, kutani hi fanele hi tiwundla hi marito ya Xikwembu nkarhi na nkarhi. Xana ha swi endla leswi? Loko hi swi endla hi ta swi xiya leswaku “matimba lama tlulaka lama tolovelekeke” ma hi pfuna leswaku hi tiyisela mitwa yihi na yihi yo fanekisela leyi nga ha hi tlhavaka sweswi.

9. Vakulu va nga va seketela njhani lava langutaneke ni swiphiqo?

⁹ Vakulu lava nga Vakreste lava chavaka Xikwembu va nga va “ndhawu ya ku tifihla emhehweni,” kumbe “vutumbelo exidzedzeni,” hileswaku va va xisirhelelo eka mintshikilelo ni swiphiqo. Vakulu lava lavaka ku yi fanelekela nhlamuselo yoleyo leyi huhuteriweke, hi ku titsongahata na hi mbilu hinkwayo va kombela Yehovha leswaku a va nyika “ririmi ra lava dyondzisiweke” leswaku va ta va hlamula hi marito lamanene lava xanisekaka. Marito ya vakulu ma nga fana ni mpfula leyi naka kahle leyi horisaka mianakanyo ya hina yi tlhela yi hi chavelela loko swilo swi hi tikela evuton’wini. Hi ku vulavula “hi ku chavelela eka mimoya-xiviri leyi karhatekeke,” vakulu va va seketela hakunene vamakwavo va vona va moya lava nga ha karhalaka kumbe va hetiwa matimba hi mutwa lowu nga enyameni ya vona.—Esaya 32:2; 50:4; 1 Vatesalonika 5:14.

10, 11. Malandza ya Xikwembu ma nga va khutaza njhani vanhu van’wana lava nga ehansi ka miringo leyikulu?

¹⁰ Malandza hinkwawo ya Yehovha i xiphemu xa ndyangu wakwe wa Vukreste lowu nga ni vun’we. Ina, “un’wana ni un’wana wa hina i xirho xa un’wana,” naswona hi “boheka ku rhandzana.” (Varhoma 12:5; 1 Yohane 4:11) Hi xi hetisisa njhani xiboho lexi? Hi ku ya hi 1 Petro 3:8, sweswo hi swi endla hi ku “kombisa ntlhaveko wa xinakulobye, [hi] va ni xinakulobye xa vumakwerhu, [hi tlhela hi] va ni ntsetselelo lowukulu” eka hinkwavo lava hi pfumelaka na vona. Hinkwerhu hi nga va pfuna hi ndlela yo hlawuleka vanhu lava langutaneke ni mutwa wo karhi lowu nga enyameni lowu vavaka, ku nga khathariseki leswaku i vatsongo kumbe i vakulu. Njhani?

¹¹ Hi fanele hi xalamukela ku xaniseka ka vona. Loko hi nga va tweli vusiwana kumbe hi nga ri na mhaka na vona, hi nga ha nyanyisa ku xaniseka ka vona hi nga swi xiyi. Loko se hi tiva miringo ya vona hi fanele hi va ni vuxiyaxiya malunghana ni leswi hi swi vulaka, ndlela leyi hi swi vulaka ha yona ni ndlela leyi hi endlaka swilo ha yona. Loko hi ri ni langutelo lerinene hi tlhela hi va khutaza hi nga pfuneta eku hunguteni ka xitlhavi lexikulu xa mutwa wihi na wihi lowu wu nga ha vaka wu va karhata. Hi ndlela yoleyo hi nga tikombisa hi ri mpfuno lowu tiyisaka eka vona.—Vakolosa 4:11.

Ndlela Leyi Van’wana Va Swi Koteke Ha Yona Ku Tiyisela

12-14. (a) Mukreste un’wana u endle yini leswaku a hlangavetana ni vuvabyi bya khensa? (b) Vamakwavo va moya va wansati loyi va n’wi seketerile va tlhela va n’wi khutaza njhani?

¹² Leswi hi nga ekusuhi ni makumu ya masiku  lawa yo hetelela, “switlhavi swa maxangu” swa engeteleka siku na siku. (Matewu 24:8) Xisweswo, miringo yi ta hlasela un’wana ni un’wana emisaveni, ngopfu-ngopfu malandza lama tshembekaka ya Yehovha, lama lavaka ku endla ku rhandza ka yena. Hi xikombiso, anakanya hi Mukreste loyi a a ri mutirheli wa nkarhi hinkwawo. Loko a kamberiwa u kumeke a ri na vuvabyi bya khensa naswona a a fanele a susiwa tinhlaribya ta marha ni ta ngati. Loko yena ni nuna wakwe va twa leswaku u ni vuvabyi lebyi, hi ku hatlisa va khongele eka Yehovha hi xikhongelo xo leha lexi humaka embilwini. Endzhakunyana u vule leswaku va ve ni ku rhula loku hlamarisaka. Hambiswiritano, u tiyiselele minkarhi yo nonon’hwa, ngopfu-ngopfu loko a langutana ni vuyelo bya vutshunguri bya yena.

¹³ Leswaku a langutana ni xiyimo xa yena, makwerhu loyi wa xisati u ringete ku kuma rungula ro tala malunghana ni vuvabyi bya nkhensa. U vulavurisane ni madokodela yakwe. Eka Xihondzo xo Rindza, Xalamuka! ni tibuku tin’wana leti yelanaka na tona ta Vukreste, u kume timhaka ta vutomi leti kombisaka ndlela leyi vanhu va langutaneke ha yona ni vuvabyi lebyi. U tlhele a hlaya tindzimana leti faneleke ta Bibele leti kombisaka vuswikoti bya Yehovha byo tiyisa vanhu vakwe loko va ri eku nonon’hweriweni, a tlhela a kuma ni rungula rin’wana leri pfunaka.

¹⁴ Xihloko xin’wana lexi vulavulaka hi ku langutana ni gome xi tshahe marito lawa ya vutlhari: “Loyi a tihambanisaka ni van’wana u tilavela swa yena ntsena.” (Swivuriso 18:1) Hikwalaho xihloko lexi xi nyikele ndzayo leyi: “U nga tihambanisi ni van’wana.” * Makwerhu loyi wa xisati u ri: “Vanhu vo tala a va ndzi byela leswaku a va ndzi khongelela; van’wana a va ndzi bela riqingho. Vakulu vambirhi a va tshamela ku ndzi bela riqingho va ndzi pfuxela. Ndzi nyikiwe swiluva ni makhadi yo tala. Van’wana a va sweka ni swakudya. Naswona van’wana va tinyikerile leswaku va ta ndzi heleketa loko ndzi ya tshunguriwa.”

15-17. (a) Mukreste un’wana u ku tiyiselele njhani ku nonon’hweriwa loku vangiweke hi mhangu? (b) Lava va nga evandlheni va nyikele mpfuno wihi?

¹⁵ Nandza la nga ni nkarhi wo leha a tirhela Yehovha le New Mexico, eU.S.A., u katseke eka timhangu timbirhi ta movha. U vaviseke nhlana ni makatla, swi nyanyisa vuvabyi bya yena bya mahlangano lebyi se a a ri ni malembe ya 25 a ri na byona. U ri: “A swi ndzi tikela swinene ku tlakusa nhloko ni ku tlakula nchumu wihi na wihi lowu tikaka tikhilogiramu timbirhi. Kambe xikhongelo lexi yaka eka Yehovha lexi humaka embilwini xi ndzi tiyisile swinene. Ni swihloko leswi nga eka Xihondzo xo Rindza leswi hi swi dyondzeke swi ndzi tiyisile. Xin’wana a xi vulavula hi Mikiya 6:8, xi vula leswaku ku titsongahata loko hi famba ni Xikwembu swi vula ku tiva laha u tsandzekaka kona. Leswi swi ndzi pfune ku twisisa leswaku ku nga khathariseki xiyimo xa mina, a ndzi fanelanga ndzi hela matimba, hambileswi nkarhi lowu a ndzi wu heta ensin’wini a wu ri ehansi ka lowu a ndzi navela ku wu heta. Ku xi tirhela hi nsusumeto lowunene hi swona swi nga swa nkoka swinene.”

¹⁶ U tlhela a ku: “Minkarhi hinkwayo vakulu a va ndzi bumabumela hi matshalatshala ya mina ya ku ya eminhlanganweni ni le ensin’wini. Vantshwa a va ndzi xeweta hi ku ndzi angarha. Vatirheli lava nga maphayona a va ndzi lehisela mbilu swinene naswona hakanyingi a va cinca makungu ya vona loko vuvabyi byi tinyike matimba. Loko maxelo ma nga ri manene, hi tintswalo a va famba na mina eka maendzo yo vuyela kumbe va ndzi rhamba leswaku ndzi famba na vona eka tidyondzo ta vona ta Bibele. Naswona tanihi leswi a ndzi nga ta khoma nkwama wa tibuku, vahuweleri van’wana a va hoxa tibuku ta mina eminkwameni ya vona loko ndzi ya entirhweni wo chumayela.”

¹⁷ Xiya ndlela leyi vakulu va vandlha ni vapfumeri-kulobye va va pfuneke ha yona vamakwerhu lava vambirhi va xisati, leswaku va langutana ni ku tsana ka vona loku fanaka ni mitwa. Va nyikele mpfuno lowu lavekaka, wa tintswalo, wa ku fikelela swilaveko swo karhi swa moya, swa nyama ni swa mintlhaveko. Xana sweswo a swi ku khutazi leswaku u pfuna vamakwerhu van’wana lava nga ni swiphiqo? Na n’wina vantshwa mi nga va pfuna emavandlheni ya n’wina lava va tiyiselaka mitwa enyameni.—Swivuriso 20:29.

18. Hi nga kuma xikhutazo xihi eka timhaka ta vutomi leti kumekaka eka magazini wa Xihondzo xo Rindza ni wa Xalamuka!?

¹⁸ Magazini wa Xihondzo xo Rindza ni wa Xalamuka!  wu ni timhaka ta vutomi to tala ni mintokoto ya Timbhoni leti tiyiseleke swiphiqo swa vutomi naswona ta ha tiyisela. Loko u hlaya swihloko sweswo nkarhi na nkarhi, u ta swi xiya leswaku vamakwerhu vo tala va moya emisaveni hinkwayo va tiyisele swiphiqo swa timali, ku feriwa hi varhandziwa hikwalaho ka timhangu ni tinyimpi leti nga ni khombo. Van’wana va hanya ni mavabyi lama va lamateke. Vo tala a va swi koti ni ku endla swilo swo olova leswi vanhu lava hanyeke kahle va nga swi tekeliki enhlokweni. Mavabyi ya vona ma va ringa swinene, ngopfu-ngopfu loko va nga swi koti ku hlanganyela emintirhweni ya Vukreste hilaha va nga rhandzaka hakona. Va wu tlangela swinene mpfuno ni nseketelo lowu vamakwavo va vona va xinuna ni va xisati, lavatsongo ni lavakulu va va nyikaka wona!

Ku Tiyisela Swi Tisa Ntsako

19. Ha yini Pawulo a swi kotile ku tsaka hambiloko a ri ni miringo ni ku tsana loku fanaka ni mitwa?

¹⁹ Pawulo u tsakile loko a vone ndlela leyi Xikwembu xi n’wi tiyiseke ha yona. U te: “Hi ku tsaka lokukulu, swi nga antswa ndzi tibuma hi ku tsana ka mina, leswaku matimba ya Kreste ma tshama ehenhla ka mina ku fana ni ntsonga. Hikokwalaho ndza tsaka eku tsaneni, eku rhukaniweni, eswiyin’weni swa ku pfumala, eku xanisiweni ni le ku nonon’hweriweni, hikwalaho ka Kreste. Hikuva loko ndzi tsanile, hi kona ndzi vaka ni matimba.” (2 Vakorinto 12:9, 10) Hikwalaho ka leswi n’wi humeleleke, Pawulo u kote ku vula hi ku tiyiseka a ku: “Ku nga ri swona leswaku ndzi vulavula malunghana ni ku va eku pfumaleni, hikuva ndzi dyondzile, leswaku ndzi eneriseka eka xiyimo xin’wana ni xin’wana lexi ndzi nga eka xona. Kunene ndza swi tiva ku kayivela swilo, kunene ndza swi tiva ku va ni swo tala. Eka hinkwaswo ni le ka swiyimo hinkwaswo ndzi dyondze xihundla xa ku xurha ni ku va ni ndlala, ku va ni swo tala ni ku pfumala. Eka swilo hinkwaswo ndzi ni ntamu hikwalaho ka loyi a ndzi nyikaka matimba.”—Vafilipiya 4:11-13.

20, 21. (a) Ha yini hi ta kuma ntsako loko hi anakanyisisa hi “swilo leswi nga voniwiki”? (b) Hi swihi ‘swilo swin’wana leswi nga voniwiki’ leswi u nga ni ntshembo wa ku swi vona emisaveni leyi nga Paradeyisi?

²⁰ Hikwalaho, loko hi tiyisela mutwa wihi ni wihi wo fanekisela lowu nga enyameni ya hina, hi nga kuma ntsako lowukulu loko hi kombisa un’wana ni un’wana leswaku matimba ya Yehovha ma endliwa ma hetiseka loko hi tsanile. Pawulo u tsarile: “A hi tshiki . . . Hakunene munhu loyi hi nga yena endzeni wa pfuxetiwa siku ni siku. Hikuva hambileswi nhlomulo wu nga wa nkarhinyana naswona wu vevukaka, wu hi tisela ku vangama loku nga ni ntikelo lowukulu swinene ni loku nga heriki; hi ri karhi hi veka mahlo ya hina . . . eka swilo leswi nga voniwiki. Hikuva swilo leswi . . . nga voniwiki i swa hilaha ku nga heriki.”—2 Vakorinto 4:16-18.

²¹ Vo tala va vanhu va Yehovha namuntlha va ni ntshembo wa ku hanya emisaveni ya yena leyi nga Paradeyisi ni ku tiphina hi mikateko leyi a yi tshembiseke. Mikateko yo tano yi nga ha tekiwa tanihi leyi “nga voniwiki” eka hina namuntlha. Hambiswiritano, wa tshinela swinene nkarhi lowu hi nga ta yi vona hi mahlo ya hina mikateko yoleyo, ina, hi tiphina hi yona hilaha ku nga heriki. Nkateko wun’wana wo tano ku ta va ku hambana hi ku helela ni xiphiqo xihi na xihi lexi fanaka ni mutwa! N’wana wa Xikwembu u ta “herisa mintirho ya Diyavulosi” kutani a “herisa la nga ni tindlela to vanga rifu.”—1 Yohane 3:8; Vaheveru 2:14.

22. Hi fanele hi va ni ntshembo ni ku tiyimisela hi ndlela yihi?

²² Hikwalaho, ku nga khathariseki leswaku hi ni mutwa wihi enyameni ya hina lowu hi vavisaka namuntlha, a hi hambeteni hi wu tiyisela. Ku fana na Pawulo, hi ta kota ku endla tano hi matimba ya Yehovha loyi a hi nyikaka wona hi musa. Loko se hi hanya emisaveni leyi nga Paradeyisi, hi ta dzunisa Yehovha Xikwembu xa hina siku na siku hikwalaho ka mintirho ya yena hinkwayo yo hlamarisa leyi a hi endlelaka yona.—Pisalema 103:2.

[Nhlamuselo ya le hansi]

A Wu Ta Hlamurisa Ku Yini?

• Ha yini Diyavulosi a ringeta ku herisa vutshembeki bya Vakreste va ntiyiso, naswona sweswo u swi endla njhani?

• Matimba ya Yehovha “ma endliwa lama hetisekeke eku tsaneni” hi ndlela yihi?

• Vakulu ni van’wana va nga va khutaza njhani lava karhatiwaka hi swiphiqo?

[Swivutiso Swa Dyondzo]

[Xifaniso lexi nga eka tluka 18]

Pawulo u khongele kanharhu leswaku Xikwembu xi susa mutwa lowu a wu ri enyameni ya yena