Ripfalo Leri Tengeke Ri Ni Hakelo Yihi?

“HULUMENDHE Yi Lerisiwa Ku Amukela Mali Yo Ringana R$20 000.” Xihloko lexi xo hlamarisa xi humelele eka phepha-hungu ra sweswinyana ra le Brazil leri nge Correio do Povo. Xihloko lexi a xi vulavula hi mhaka ya Luiz Alvo de Araújo, wanuna la tirhaka eposweni, la xaviseleke hulumendhe ndhawu ya yena. Endzhaku ko xavisa ndhawu, Luiz u hlamarisiwe hi ku kuma leswaku eka mali leyi va twananeke yona ku tlhandlekeriwe yin’wana yo ringana R$20 000 (kwalomu ka R79 000)!

Ku tlherisela mali leyin’wana a swi tika. Endzhaku ko gidela mahala eka tindzawulo to karhi ta hulumendhe, Luiz u khutaziwe ku qacha gqweta leswaku ri lulamisa xiphiqo lexi ni huvo ya nawu. “Swi le rivaleni leswaku un’wana u endle xihoxo, kutani hikwalaho ka ku rharhangana ka xiyimo, a ku ri hava munhu la tivaka leswaku xi ta lulamisiwa njhani,” ku hlamusela muavanyisi loyi a leriseke hulumendhe leswaku yi amukela mali yi tlhela yi hakela swikoxo swa ku tengiwa ka nandzu wa kona. “Ndza sungula ku hlangana ni mhaka ya muxaka lowu.”

Luiz, loyi a nga un’wana wa Timbhoni ta Yehovha, wa hlamusela: “Ripfalo ra mina leri leteriweke hi Bibele a ri nga ta ndzi pfumelela ku teka swilo leswi nga riki swa mina. A swi ndzi boha ku tlherisa mali yoleyo.’’

Langutelo leri ra hlamarisa eka vo tala kumbe ri nga ha va ri nga twisiseki. Kambe Rito ra Xikwembu ri kombisa leswaku Vakreste va ntiyiso va tirha hi matimba leswaku va va ni ripfalo leri baseke loko va tirhisana ni valawuri va tiko. (Varhoma 13:5) Timbhoni ta Yehovha ti tiyimisele ku va ni ‘ripfalo ro tshembeka ni ku hanya hi ndlela leyi tshembekeke eka swilo hinkwaswo.’—Vaheveru 13:18.