Swivutiso Swa Vahlayi

Xana ma vula yini marito lama nga eka Vaheveru 12:4, lama nge: “A mi si tshama mi lwisana ni xidyoho xexo ngati yi kala yi huma”?

Xiga lexi nge ‘ku lwa ngati yi kala yi huma’ xi vula ku tiyisela kukondza u fa, ku halata ngati ya wena n’wini hi ku kongoma.

Muapostola Pawulo a a swi tiva leswaku hikwalaho ka ripfumelo ra vona, Vakreste van’wana va Vaheveru ana se va “[tiyiselele] mphikizano lowukulu ehansi ka ku xaniseka.” (Vaheveru 10:32, 33) Loko a kombisa sweswo, swi tikomba onge Pawulo a a tirhisa xigego xa mphikizano wa mintlangu wa le Grikiya, lowu katsaka ku tsutsuma, ku kamana, ku lwa nyimpi ya swibakele, ku hoxa diskhasi ni javhelini. Hikwalaho, eka Vaheveru 12:1 u khutaze Vakreste-kulobye a ku: “A hi hluvuleni ntiko wun’wana ni wun’wana ni xidyoho lexi hi phasaka hi ku olova, a hi tsutsumeni hi ku tiyisela eka mphikizano lowu vekiweke emahlweni ka hina.”

Loko u tlula tindzimana timbirhi u ya eka Vaheveru 12:4, u kuma leswaku swi nga ha endleka Pawulo a a suka eka xifaniso xa ntlangu wa ku tsutsuma a ya eka ntlangu wa swibakele. (Vatlangi havambirhi va boxiwa eka 1 Vakorinto 9:26.) Vabi va swibakele va khale a va boha swibakele ni mahlakala ya vona hi tindzwa ta dzovo. Minkarhi yin’wana tindzwa leti a ti hoxiwa ni “ntsopfu, nsimbi, kumbe swibolwana swa ntsompfu, leswi a swi endla leswaku vabi va swibakele va vavisana swinene.” Mintlango yo tano ya tihanyi a yi vanga leswaku munhu a mpfempfa ngati, minkarhi yin’wana a fa.

Hambiswiritano, Vakreste va Vaheveru a va ri ni swikombiso swo tala swa malandza ya Xikwembu lama tshembekaka lama xanisiweke ma tlhela ma khomiwa hi ndlela ya tihanyi, hambi ku ri ku dlayiwa, “ngati yi kala yi huma.” Xiya mongo wa leswi Pawulo a vulaka leswaku vanhu va khale vo tshembeka va langutane na swona:

“Va khandliwe hi maribye, va ringiwile, va saheleriwile, va file hi ku tlhaviwa hi banga, va famba-fambe va ambale madzovo ya tinyimpfu, va ambale madzovo ya timbuti, loko va ri eku pfumaleni, enhlomulweni, eku xanisiweni.” Endzhaku ka sweswo, Pawulo u kombise Muhetisekisi wa ripfumelo ra hina, ku nga Yesu a ku: “U tiyisele mhandzi ya nxaniso, a tsan’wa tingana, kutani a tshama evokweni ra xinene ra xiluvelo xa Xikwembu.”—Vaheveru 11:37; 12:2.

Ina, vo tala va ‘lwe ngati yi kala yi huma,’ hileswaku va kala va fa. Nyimpi ya vona a yi nga ri nyimpi ya le ndzeni ntsena ya ku lwisana ni xidyoho xa ku pfumala ripfumelo. Va yime va tshembekile loko va xanisiwa, kukondza va fa.

Vanhu lavantshwa evandlheni ra le Yerusalema, kumbexana lava va veke Vakreste endzhaku ka loko nxaniso lowukulu se wu herile, a va nga si tshama va langutana ni miringo yo tano leyikulu. (Mintirho 7:54-60; 12:1, 2; Vaheveru 13:7) Kambe, hambi ku ri miringo leyi nga riki yikulu ngopfu a yi heta van’wana va vona matimba leswaku va nga ha yi emahlweni ni nyimpi; a va ‘karhala va wa mapa eka mimoya-xiviri ya vona.’ (Vaheveru 12:3) A va fanele va endla nhluvuko va va vanhu lava vupfeke. Sweswo a swi ta kurisa vuswikoti bya vona byo tiyisela xin’wana ni xin’wana lexi nga ha humelelaka, hambiloko ku ri ku xanisiwa ku fikela eku feni.—Vaheveru 6:1; 12:7-11.

Vakreste vo tala va manguva lawa va ‘lwe ngati yi kala yi huma,’ va dlayiwa hikwalaho ka leswi va aleke ku landzula Vukreste. Ematshan’weni yo chavisiwa hi marito ya Pawulo eka Vaheveru 12:4, hi nga ma teka ma ri lama kombisaka mpimo lowu hi tiyimiseleke ku fika eka wona leswaku hi tshama hi tshembekile eka Xikwembu. Endzhakunyana eka papila leri fanaka leri yaka eka Vaheveru, Pawulo u tsarile: “A hi yeni emahlweni hi kuma musa lowu nga faneriwiki, lowu ha wona hi nga ha endlelaka Xikwembu ntirho wo kwetsima hilaha ku amukelekaka hi nchavo lowu nga ni vukwembu ni ku xixima.”—Vaheveru 12:28.