Tivonele Eka Moya Wa Ku Titlakusa

MUNHU wo titlakusa hi loyi a tivonaka a ri ni xindzhuti naswona a tlakukile ehenhla ka van’wana. Hikwalaho, munhu wo tano hi ntolovelo u lava ku kombisiwa xichavo ni ku nyikiwa nyingiso lowu tlulaka mpimo naswona u delela van’wana ni ku va tekela ehansi.

Ku titlakusa i rito-fularha ra ku titsongahata. Marito ya Xigriki ni Xiheveru lama hundzuluxeriweke ma va “ku titlakusa” kahle-kahle ma vula ku tiveka “ehenhla” ni ku “tikukumuxa.”

Xiyimo Xa Mbilu

Ku titlakusa i mfanelo yo biha leyi nga humiki emianakanyweni ntsena. Yesu Kreste u ku xaxamete ni ku dlaya, vukhamba, xisandzu ni swidyoho swin’wana, a vula leswaku swilo swo tano swi huma “endzeni, etimbilwini ta vanhu.” (Marka 7:21, 22) Mariya mana wa laha misaveni wa Yesu u vule leswi hi Yehovha: “U va hangalasele ekule lava titlakusaka emakungwini ya timbilu ta vona.” (Luka 1:51) Davhida u khongele eka Yehovha, a ku: “Mbilu ya mina a yi tikurisanga.”—Pisalema 131:1.

Hambi ku ri munhu loyi a a tirhela Xikwembu hi ku titsongahata, a nga ha titlakusa hikwalaho ko kuma rifuwo kumbe matimba kumbe hikwalaho ka ku saseka ka yena, ku humelela, vutlhari kumbe ku dzunisiwa hi van’wana. Hosi Uzhiya wa le Yuda u ve munhu wo tano. U fume kahle a tlhela a kuma mikateko ya Yehovha ku ringana malembe yo tala.—2 Tikronika 26:3-5.

Hambiswiritano, rungula ra Bibele ri ri: “Kambe, hi ku hatlisa loko a va ni matimba, mbilu yakwe yi titlakusa kukondza a vanga ku onhaka, lerova a endla hi ndlela leyi pfumalaka ku tshembeka eka Yehovha Xikwembu xakwe, a fika etempeleni ya Yehovha ku ta hisa mirhi ya risuna ehenhla ka alitari ya murhi wa risuna.” (2 Tikronika 26:16) Uzhiya u titlakusile a endla mintirho ya vuprista, lunghelo leri Xikwembu a xi nga ri nyikanga tihosi ta Israyele hi ku kongoma, hi xikongomelo xo hambanisa vuhosi na vuprista.

Hosi Hezekiya lonene u tshame a titlakusa embilwini ya yena hi nkarhi wun’wana, naswona swi vonaka onge u tlulete ni vanhu lava a a va fuma. A a ri hosi ya ndhuma hileswi Yehovha a n’wi katekiseke, kambe u tsandzeke ku lemuka leswaku  ku dzuneka hinkwako a ku fanele ku ya eka Xikwembu. N’wamatimu u tsale leswi hi yena: “Kambe Hezekiya a nga tlheriselanga hi ku ya hi ndlela leyi a pfuniweke ha yona, mbilu yakwe yi titlakusa, a hlundzukeriwa yena na Yuda na Yerusalema.”

Lexi tsakisaka, u tshike langutelo leri ra khombo. Rungula ri ya emahlweni ri ku: “Kambe, Hezekiya a titsongahata eku titlakuseni ka mbilu yakwe, yena ni vaaki va Yerusalema, Yehovha a nga va hlundzukelanga emasikwini ya Hezekiya.”—2 Tikronika 32:25, 26.

Xikwembu Xi Venga Moya Wa Ku Titlakusa

Vanhu lava titlakusaka a va nyangatsi vanhu vo tshembeka ntsena kambe na Yehovha Xikwembu wa va venga. (Yakobo 4:6) Ku titlakusa i vuphukuphuku ni vudyoho naswona Yehovha u lwisana ni vanhu lava titlakusaka leswaku a va tsongahata.—Swivuriso 14:3; 2 Samuwele 22:28; Yobo 40:11.

Loko vanhu va nga tshiki ku titlakusa va nga tivitanela ndzoviso. Tiko ra Vamowabu ra khale ri lovisiwile hileswi ri titlakuseke emahlweni ka Xikwembu ni vanhu va xona. (Esaya 16:6; 25:10, 11) Hambi ku ri mfumo wa Israyele wa tinyimba ta khume a wu tsetseleriwanga loko wu sungula ku titlakusa ni ku tinyungubyisa.—Esaya 9:8-12.

Tivonele Eka Moya Wa Ku Titlakusa

Hikokwalaho munhu u fanele a tivonela leswaku a nga ngheniwi hi moya wa ku titlakusa. U fanele a tivonela ngopfu loko a fikelele pakani ya yena kumbe loko a nyikiwe vutihlamuleri lebyikulu. U fanele a tsundzuka leswaku “ku tinyungubyisa ku le kusuhi ni ku wa, ni moya lowu titlakusaka wu le kusuhi ni ku khunguvanyeka.”—Swivuriso 16:18.

Loko a tshika moya wa ku titlakusa wu kula, wu nga sungula ku n’wi lawula ku fikela laha Yehovha a n’wi katsaka ni vanhu va mianakanyo leyi A nga yi amukeliki, lava faneriwaka hi rifu. (Varhoma 1:28, 30, 32) Xitsundzuxo xexo xi fanela swinene “emasikwini yo hetelela,” laha ku titlakusa ku nga xin’wana xa swilo leswi funghaka minkarhi leyi ya mangava, hilaha muapostola a tsundzuxeke hakona.—2 Timotiya 3:1, 2.

Ku engetela kwalaho, munhu loyi a navelaka ku tsakeriwa hi Xikwembu u fanele ku papalata ku tlhoma van’wana tinsiva, moya lowu wu hlohlotelaka van’wana leswaku va titlakusa. Xivuriso xi ri: “Munhu la tiyeke emirini la kurisaka nakulobye u tiandlalela rikoka emilengeni.”—Swivuriso 29:5.

Loyi a tlhomaka van’wana tinsiva wa va onha naswona Xikwembu a xi n’wi tsakeli. (Swivuriso 26:28) Muapostola Pawulo a a ringeta hi tindlela hinkwato ku papalata mukhuva wa ku tlhoma van’wana tinsiva ni wa ku titlakusa. (1 Vatesalonika 2:5, 6) Na hina hi fanele hi tshama hi ri karhi hi tivonela leswaku hi nga ngheniwi hi moya lowu wo biha.