“U Nga Ha Twa Ku Vava”

XANA u tshame u ma twa marito lawa? Swi nga ha endleka dokodela kumbe muongori a tshame a ku byela wona loko a lava ku ku tshungula.

Kumbexana ku chava ku twa ku vava a swi endlanga leswaku u ala vutshunguri bya kona. Ematshan’weni ya sweswo u tiyisele ku vava koloko leswaku u va ni rihanyo lerinene. Eka swiyimo swin’wana, ku pfumela kumbe ku ala vutshunguri lebyi vavisaka ku nga va mhaka ya vutomi ni rifu.

Hambileswi ku nga riki minkarhi hinkwayo laha hi lavaka ku pfuniwa hi dokodela, hinkwerhu ka hina tanihi vanhu lava nga hetisekangiki hi fanele hi kuma ndzayo kumbe nxupulo lowu minkarhi yin’wana wu nga ha vavaka. (Yeremiya 10:23) Loko yi kandziyisa xilaveko lexi eka vana, Bibele yi ri: “Vuphukuphuku byi tsimbiwe embilwini ya mufana; nhonga ya ndzayo hi yona yi nga ta byi susa byi ya ekule na yena.”—Swivuriso 22:15.

Emhakeni leyi, nhonga yi fanekisela vulawuri bya mutswari. I ntiyiso leswaku vana vo tala a va rhandzi ku tshinyiwa. Loko ku tshinya koloko ku katsa nxupulo wa muxaka wo karhi, va nga ha lwisana na kona. Hambiswiritano, vatswari lavo tlhariha ni lava nga ni rirhandzu a va anakanyi ntsena hi mintlhaveko ya n’wana leyi vavisekeke kambe va anakanya ni hi vuyelo lebyinene lebyi a nga ta byi kuma eku heteleleni. Vatswari lava nga Vakreste va swi tiva leswaku Rito ra Xikwembu ri vulavula ntiyiso loko ri ku: “Ku hava ku tshinyiwa loku vonakaka ku tsakisa enkarhini wolowo, kambe ku tisa gome; kasi endzhakunyana ku veka mbhandzu wo rhula eka lava leteriweke hi kona, ku nga ku lulama.”—Vaheveru 12:11; Swivuriso 13:24.

Ina, a hi vana ntsena lava lavaka ku tshinyiwa. Ni vanhu lavakulu va fanele va tshinyiwa. Bibele yi vulavula ni vanhu lavakulu loko yi ku: “Namarhela ndzayo; u nga yi tshiki yi famba. Yi hlayise, hikuva i vutomi bya wena.” (Swivuriso 4:13) Ina vanhu lavo tlhariha—lavakulu ni lavatsongo—va ta amukela ndzayo leyi sekeriweke eRitweni ra Xikwembu, ku nga Bibele, hikuva loko va endla tano va ta hetelela va londzovote vutomi bya vona.