Xana U Nga Ma Pona Njhani Makumu Ya Misava Leyi?

BIBELE yi hlamusela makumu ya mafambiselo lawa ya swilo tanihi “siku ra ku hlundzuka, siku ra maxangu ni ra ku vaviseka, siku ra xidzedze ni ku onhetela, siku ra munyama ni ku dzwihala, siku ra mapapa ni ra ku dzwihala lokukulu.” (Sofaniya 1:15) Siku ra muxaka lowu, hakunene a hi rona leri hi ntolovelo u nga ri langutelaka hi mahlo-ngati! Kambe muapostola Petro u tsundzuxe Vakreste-kulobye ku “rindzela ni ku hamba [va] tsundzuka vukona bya siku ra Yehovha, leri ha rona matilo ma nga ta hela hi ku tshwa naswona swiaki swa wona leswi hisaka ngopfu swi nga ta n’oka! Kambe ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.”—2 Petro 3:12, 13.

Laha Petro a a nga vulavuli hi ndzoviso wa matilo ni misava ya xiviri. “Matilo” ni “misava” leswi Petro a a vulavula ha swona eka tsalwa leri swi fanekisela tihulumendhe leti hombolokeke ta namuntlha ta laha misaveni kun’we ni vanhu lava nga xi chaviki Xikwembu. “Siku ra Yehovha” a ri nge lovisi misava hi yoxe, kambe ri ta “lovisa vadyohi va tiko eka rona.” (Esaya 13:9) Hikwalaho, eka lava “nga ni nhlomulo, lava va konyaka hikwalaho ka swilo hinkwaswo leswi nyenyetsaka” leswi endliwaka namuntlha hi vanhu vo homboloka, siku ra Yehovha ri ta va siku ra ku ponisiwa.—Ezekiyele 9:4.

Kutani, xana munhu a nga ponisiwa njhani eka “siku lerikulu ni leri chavisaka ra Yehovha”? “Rito ra Yehovha” leri hlavuteriweke eka un’wana wa vaprofeta va yena ri hlamula xivutiso xexo: “Kutani un’wana ni un’wana loyi a vitanaka vito ra Yehovha u ta pona.” (Yuwele 1:1; 2:31, 32) Timbhoni ta Yehovha ti ta tsakela ku ku pfuna ku dyondza leswaku ku vitana vito ra Yehovha swi vula yini.