Kreste U Rhangela Vandlha Rakwe

“Maswivo, ndzi na n’wina masiku hinkwawo ku fikela emakumu ka mafambiselo ya swilo.”—MATEWU 28:20.

1, 2. (a) Loko a nyikela xileriso xa leswaku ku endliwa vadyondzisiwa, xana Yesu la pfuxiweke u va tshembise yini valandzeri vakwe? (b) Yesu u ri rhangele njhani hi ku hiseka vandlha ro sungula ra Vukreste?

LOKO a nga si tlhandlukela etilweni, Yesu Kreste, Murhangeri wa hina la pfuxiweke eku feni, u humelele eka vadyondzisiwa vakwe, kutani a ku: “Ndzi nyikiwe vulawuri hinkwabyo etilweni ni le misaveni. Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona. Kutani, maswivo, ndzi na n’wina masiku hinkwawo ku fikela emakumu ka mafambiselo ya swilo.”—Matewu 23:10; 28:18-20.

² Yesu a nga nyikanga vadyondzisiwa va yena ntirho lowu ponisaka vutomi wa ku endla vadyondzisiwa lava engetelekeke ntsena, kambe u tlhele a va tshembisa leswaku u ta va na vona. Matimu ya Vakreste vo sungula, lama tsariweke ebukwini ya Bibele ya Mintirho, ma swi kombisa kahle leswaku Kreste u tirhise vulawuri lebyi a nyikiweke byona byo rhangela vandlha leri a ra ha ku simekiwa. U rhumele “mupfuni” loyi a a va tshembise yena—ku nga moya lowo kwetsima—leswaku a ta tiyisa valandzeri vakwe ni ku kongomisa matshalatshala ya vona. (Yohane 16:7; Mintirho 2:4, 33; 13:2-4; 16:6-10) Yesu la pfuxiweke u tirhise tintsumi leti a ti rhumeke leswaku ti seketela vadyondzisiwa vakwe. (Mintirho 5:19; 8:26; 10:3-8, 22; 12:7-11; 27:23, 24; 1 Petro 3:22) Ku tlula kwalaho, Murhangeri wa hina u nyikele nkongomiso evandlheni hi ku hlela leswaku vavanuna lava fanelekaka va va huvo leyi fumaka.—Mintirho 1:20, 24-26; 6:1-6; 8:5, 14-17.

3. Hi swihi swivutiso leswi nga ta kambisisiwa exihlokweni lexi?

³ Kambe, ku vuriwa yini hi nkarhi wa hina wa “makumu ya mafambiselo ya swilo”? Xana Yesu Kreste u ri rhangela njhani vandlha ra Vukreste namuntlha? Naswona hi nga swi kombisa njhani leswaku hi amukela vurhangeri byakwe?

N’wini U Ni Hlonga Ro Tshembeka

4. (a) I vamani lava vumbaka “hlonga ro tshembeka ni ro tlhariha”? (b) Hi swihi swilo leswi hlonga ri byarhisiweke swona hi N’wini wa rona leswaku ri swi khathalela?

⁴ Loko a hlamusela vuprofeta lebyi vulavulaka hi xikombiso xa vukona byakwe, Yesu u te:  “Kahle-kahle i mani hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke? Ra tsaka hlonga rero loko n’wini wa rona a fika a nga ta ri kuma ri endla tano! Ndzi tiyisile ndzi ri eka n’wina, U ta ri veka ehenhla ka hinkwaswo leswi nga swa yena.” (Matewu 24:45-47) “N’wini” i Murhangeri wa hina, Yesu Kreste, naswona u veke “hlonga ro tshembeka ni ro tlhariha”—ku nga ntlawa wa Vakreste lava totiweke lava nga laha misaveni—leswaku ri khathalela swilo swa yena hinkwaswo swa laha misaveni.

5, 6. (a) Exivonweni lexi voniweke hi muapostola Yohane, xana “swo tlhoma timboni swa nsuku swa nkombo” ni “tinyeleti ta nkombo” swi fanekisela yini? (b) Leswi “tinyeleti ta nkombo” ti nga evokweni ra xinene ra Yesu swi kombisa yini?

⁵ Buku ya Bibele ya Nhlavutelo yi kombisa leswaku hlonga ro tshembeka ni ro tlhariha ri lawuriwa hi ku kongoma hi Yesu Kreste. Exivonweni xa ‘siku ra Hosi,’ muapostola Yohane u vone “swo tlhoma timboni swa nsuku swa nkombo, naswona exikarhi ka swo tlhoma timboni a ku ri ni un’wana wo fana ni n’wana wa munhu” loyi “evokweni ra yena ra xinene a a tamele tinyeleti ta nkombo.” Loko Yesu a hlamusela Yohane xivono lexi u te: “Loko ku ri xihundla xo kwetsima xa tinyeleti ta nkombo leti u ti voneke ti ri evokweni ra mina ra xinene, ni xa swo tlhoma timboni swa nsuku swa nkombo: Tinyeleti ta nkombo ti vula tintsumi ta mavandlha ya nkombo, kasi swo tlhoma timbhoni swa nkombo swi vula mavandlha ya nkombo.”—Nhlavutelo 1:1, 10-20.

⁶ “Swo tlhoma timboni swa nsuku swa nkombo” swi fanekisela mavandlha hinkwawo ya Vukreste bya ntiyiso lama nga kona “esikwini ra Hosi,” leri sunguleke hi 1914. Kambe ku vuriwa yini hi “tinyeleti ta nkombo”? Eku sunguleni, a ti fanekisela valanguteri hinkwavo lava totiweke hi moya lava a va langutela mavandlha ya lembe-xidzana ro sungula. * Valanguteri a va ri evokweni ra xinene ra Yesu—a va lawuriwa hi yena va tlhela va kongomisiwa hi yena. Ina, Kreste Yesu u rhangele ntlawa wa hlonga hinkwawo. Hambiswiritano, sweswi valanguteri lava totiweke va hungutekile. Xana vurhangeri bya Kreste byi ma fikelela njhani mavandlha lama tlulaka 93 000 ya Timbhoni ta Yehovha emisaveni hinkwayo?

7. (a) Yesu u yi tirhisa njhani Huvo leyi Fumaka leswaku yi rhangela mavandlha emisaveni hinkwayo? (b) Ha yini ku nga vuriwaka leswaku valanguteri lava nga Vakreste va hlawuriwa hi moya lowo kwetsima?

⁷ Ku fana ni hi lembe-xidzana ro sungula, ntlawa lowutsongo wa vavanuna lava fanelekaka lava nga va ntlawa wa valanguteri lava totiweke sweswi va tirha tanihi Huvo leyi Fumaka, leyi yimelaka ntlawa wa hlonga ro tshembeka ni ro tlhariha. Murhangeri wa hina u tirhisa Huvo leyi Fumaka leswaku yi hlawula vavanuna lava fanelekaka—hambi va totiwe hi moya kumbe e-e—va va vakulu emavandlheni ya ka vona. Emhakeni leyi, moya lowo kwetsima, lowu Yehovha a nyikeke Yesu matimba yo wu tirhisa, wu hetisisa xiphemu xa nkoka swinene. (Mintirho 2:32, 33) Xo sungula, valanguteri lava va fanele va fikelela swilaveko leswi hlamuseriweke eRitweni ra Xikwembu, leri huhuteriweke hi moya lowo kwetsima. (1 Timotiya 3:1-7; Tito 1:5-9; 2 Petro 1:20, 21) Swibumabumelo swin’we ni ku hlawuriwa swi endliwa endzhaku ka loko ku khongeriwile naswona swi endliwa ehansi ka nkongomiso wa moya lowo kwetsima. Ku engetela kwalaho, vanhu lava hlawuriweke va va va kombise mihandzu ya moya wolowo. (Vagalatiya 5:22, 23) Hikwalaho, ndzayo ya Pawulo yi tirha hilaha ku fanaka eka vakulu hinkwavo, hambi hi lava totiweke kumbe e-e: “Nyikelani nyingiso eka n’wina vini ni le ka ntlhambi hinkwawo, lowu moya lowo kwetsima wu mi vekeke ku va valanguteri va wona.” (Mintirho 20:28) Vavanuna lava va hlawuriweke va kuma nkongomiso eka Huvo leyi Fumaka kutani va risa vandlha hi ku swi rhandza. Hi ndlela leyi, Kreste u na hina sweswi naswona u rhangela vandlha hi ku hiseka.

8. Kreste u ti tirhisa njhani tintsumi leswaku ti kongomisa valandzeri va yena?

⁸ Yesu u tlhela a tirhisa tintsumi ta xiviri leswaku ti rhangela valandzeri vakwe namuntlha. Hi ku ya hi xifaniso xa koroni ni mfava, nkarhi wo tshovela a wu ta fika ‘emakumu ya mafambiselo  ya swilo.’ I vamani lava N’wini a a ta va tirhisa entshovelweni? Kreste u te: “Vatshoveri i tintsumi.” U engeterile: “N’wana wa munhu u ta rhuma tintsumi takwe, kutani emfun’weni wakwe ti ta humesa swilo hinkwaswo leswi khunguvanyisaka ni vanhu lava endlaka swiendlo swo kala nawu.” (Matewu 13:37-41) Ku tlula kwalaho, tanihi leswi ntsumi yi kongomiseke Filipi leswaku a ya hlangana ni mutsheniwa wa Muetiyopiya, ku ni vumbhoni byo tala namuntlha bya leswaku Kreste u tirhisa tintsumi ta yena ku kongomisa ntirho wa Vakreste va ntiyiso leswaku va kuma vanhu va timbilu letinene.—Mintirho 8:26, 27; Nhlavutelo 14:6.

9. (a) Kreste u tirhisa yini leswaku a rhangela vandlha ra Vukreste namuntlha? (b) Hi xihi xivutiso lexi hi faneleke hi xi kambisisa loko hi lava ku vuyeriwa eka vurhangeri bya Kreste?

⁹ Swi tiyisa nhlana swonghasi leswi Yesu Kreste a rhangelaka vadyondzisiwa vakwe namuntlha hi ku tirhisa Huvo leyi Fumaka, moya lowo kwetsima na tintsumi! Hambiloko van’wana va vagandzeri va Yehovha vo hambanisiwa swa xinkarhana ni Huvo leyi Fumaka hikwalaho ka nxaniso kumbe swivangelo swin’wana, Kreste u ta hambeta a va rhangela hi ku tirhisa moya lowo kwetsima ni nseketelo wa tintsumi. Hambiswiritano, ha vuyeriwa eka vurhangeri byakwe loko ntsena hi byi amukela. Hi nga swi kombisa njhani leswaku hi amukela vurhangeri bya Kreste?

“Yingisani . . . Mi Titsongahata”

10. Hi nga swi kombisa njhani leswaku ha va xixima vakulu lava hlawuriweke evandlheni?

¹⁰ Murhangeri wa hina u nyike mavandlha “tinyiko leti nga vanhu”—“van’wana ku va vaevhangeli, van’wana ku va varisi ni vadyondzisi.” (Vaefesa 4:8, 11, 12) Ndlela leyi hi va langutaka ha yona ni leswi hi swi endlaka eka vona hi swona swi kombisaka loko hi byi amukela vurhangeri bya Kreste, kumbe hi nga byi amukeli. Swi fanerile leswaku hi ‘komba ku nkhensa ka hina’ hikwalaho ka vavanuna lava fanelekaka hi tlhelo ra moya lava Kreste a hi nyikeke vona. (Vakolosa 3:15) Na vona hi fanele hi va xixima. Muapostola Pawulo u tsarile: “Vavanuna lava kuleke lava ungamelaka hi ndlela leyinene a va tekiwe va ri lava faneriwaka hi ku xiximiwa loku andzisiweke kambirhi.” (1 Timotiya 5:17) Hi nga ku kombisa njhani ku tlangela ni xichavo eka vavanuna volavo lava kuleke—vakulu kumbe valanguteri—evandlheni? Pawulo wa hlamula: “Yingisani lava rhangelaka exikarhi ka n’wina naswona mi titsongahata.” (Vaheveru 13:17) Ina, hi fanele hi va yingisa hi tlhela hi titsongahata eka vona.

11. Ha yini ku xixima lunghiselelo ra vakulu ku ri mhaka ya ku hanya hi ku pfumelelana ni ku khuvuriwa ka hina?

¹¹ Murhangeri wa hina u hetisekile. Vavanuna lava a va nyikeleke tanihi tinyiko a va hetisekanga. Hikwalaho va nga ha endla swihoxo minkarhi yin’wana. Kambe, i swa nkoka leswaku hi tshama hi tshembekile eka lunghiselelo ra Kreste. Entiyisweni, ku hanya hi ku pfumelelana ni ku tinyiketela ni nkhuvulo wa hina swi vula leswaku hi xixima vulawuri lebyi faneleke bya moya evandlheni naswona hi titsongahatela byona hi mbilu hinkwayo. Ku khuvuriwa ka hina ‘evitweni ra moya lowo kwetsima’ i xikombiso xa le rivaleni xa leswaku ha swi tiva leswaku moya lowo kwetsima i yini naswona hi xixima vukongomisi bya wona eswikongomelweni swa Yehovha. (Matewu 28:19) Nkhuvulo wo tano wu komba leswaku hi tirhisana ni moya wolowo naswona a hi endli nchumu lowu sivelaka ku tirha ka wona exikarhi ka valandzeri va Kreste. Tanihi leswi moya lowo kwetsima wu hetisisaka xiyenge xa nkoka  eku bumabumeleni ni le ku hlawuriweni ka vakulu, xana hi ta va hi namarhela ku tinyiketela ka hina hakunene loko hi tsandzeka ku tirhisana ni lunghiselelo ra vakulu evandlheni?

12. Yudha u tshaha swikombiso swihi malunghana ni ku delela vulawuri, naswona swi hi dyondzisa yini?

¹² Matsalwa ma ni swikombiso leswi hi dyondzisaka nkoka wa ku yingisa ni ku titsongahata. Loko a vulavula hi lava a va vulavula swo biha hi vavanuna lava hlawuriweke evandlheni, mudyondzisiwa Yudha u boxe swikombiso swinharhu leswi nga xitsundzuxo, a ku: “Khombo eka vona, hikuva va famba endleleni ya Kayini, naswona va tsutsumele ndlela leyi hoxeke ya Balama leswaku va kuma hakelo, va lovile hikokwalaho ka mavulavulelo yo xandzuka ya Kora!” (Yudha 11) Kayini u honise ndzayo ya Yehovha ya rirhandzu kutani a va ni rivengo leri nga n’wi yisa eku dlayeni. (Genesa 4:4-8) Hambileswi a nyikiweke switsundzuxo swa Xikwembu hi ku phindha-phindha, Balama u ringete ku rhukana vanhu va Xikwembu leswaku a ta kuma mali. (Tinhlayo 22:5-28, 32-34; Deteronoma 23:5) Kora a a ri ni vutihlamuleri lebyikulu le Israyele, kambe a a nga eneriseki. U hlohlotele vanhu leswaku va xandzukela nandza wa Xikwembu Muxe, munhu wo rhula ku tlula vanhu hinkwavo emisaveni. (Tinhlayo 12:3; 16:1-3, 32, 33) Kayini, Balama na Kora va weriwe hi khombo. Swikombiso leswi swi hi dyondzisa kahle leswaku hi yingisela ndzayo ya vanhu lava nga ni vutihlamuleri lava Yehovha a va tirhisaka, naswona hi fanele hi va xixima!

13. Muprofeta Esaya u profete hi ta mikateko yihi leyi a yi ta kumiwa hi lava va titsongahatelaka lunghiselelo ra vakulu?

¹³ I mani la nga swi laviki ku vuyeriwa eka lunghiselelo lerinene ra vulanguteri leri Murhangeri wa hina a ri simekeke evandlheni ra Vukreste? Muprofeta Esaya u profete ndlela leyi lunghiselelo rero ri pfunaka ha yona, a ku: “Waswivo! Hosi yi ta fuma hi ku tshembeka; kasi tihosana, ti ta va tihosana hi vululami. Kutani un’wana ni un’wana u ta va ndhawu ya ku tifihla emhehweni ni vutumbelo exidzedzeni, ku fana ni swinambyana swa mati etikweni leri nga riki na mati, ku fana  ni ndzhuti wa ribye lerikulu etikweni leri omeke.” (Esaya 32:1, 2) Vakulu hinkwavo va fanele va va “ndhawu” yo tano leyi sirhelelaka. Hambiloko swi hi tikela ku titsongahatela vulawuri, a hi ringeteni hi matimba leswaku hi yingisa ni ku titsongahata eka vulawuri lebyi simekiweke hi Xikwembu evandlheni.

Ndlela Leyi Vakulu Va Titsongahatelaka Vurhangeri Bya Kreste Ha Yona

14, 15. Xana lava va rhangelaka evandlheni va swi kombisa njhani leswaku va titsongahatela vurhangeri bya Kreste?

¹⁴ Mukreste un’wana ni un’wana—ngopfu-ngopfu vakulu—u fanele a landzela vurhangeri bya Kreste. Valanguteri kumbe vakulu va ni mpimo wo karhi wa vulawuri evandlheni. Kambe a va lavi ku va ‘valawuri va ripfumelo ra vapfumeri-kulobye’ hi ku ringeta ku lawula vutomi bya vona. (2 Vakorinto 1:24) Vakulu va yingisa marito ya Yesu lama nge: “Ma swi tiva leswaku vafumi va matiko va [tikisela van’wana] naswona vanhu lavakulu va [lawula van’wana]. A swi fanelanga swi va tano exikarhi ka n’wina.” (Matewu 20:25-27) Loko vakulu va hetisisa vutihlamuleri bya vona, va ringeta hi mbilu hinkwayo ku tirhela van’wana.

¹⁵ Vakreste va khutaziwa: “Tsundzukani lava rhangelaka exikarhi ka n’wina, . . . naswona loko mi ri karhi mi xiyisisa vuyelo bya ku tikhoma ka vona, mi tekelela ripfumelo ra vona.” (Vaheveru 13:7) Leswi a swi vuli leswaku vakulu i varhangeri. Yesu u te: “Murhangeri wa n’wina i wun’we, i Kreste.” (Matewu 23:10) Lexi faneleke ku tekeleriwa eka vakulu i ripfumelo ra vona, tanihi leswi va nga vatekeleri va Murhangeri wa hina wa xiviri, Kreste. (1 Vakorinto 11:1) Xiya tin’wana ta tindlela leti vakulu va lwelaka ku fana na Kreste ha tona eka vuxaka bya vona ni van’wana evandlheni.

16. Ku nga khathariseki vulawuri lebyi a a ri na byona, xana Yesu u va khome njhani valandzeri vakwe?

¹⁶ Hambileswi Yesu a a tlakukile hi tindlela hinkwato eka vanhu lava nga hetisekangiki nileswi a a ri ni vulawuri lebyikulu lebyi a byi nyikiweke hi Tata wakwe, a a va khoma kahle vadyondzisiwa vakwe. A a nga bombiseli vayingiseri vakwe vutivi lebyi a a ri na byona. Yesu u va twerile valandzeri vakwe, a anakanyela swilaveko swa vona. (Matewu 15:32; 26:40, 41; Marka 6:31) A a nga lavi swilo swo tlula mpimo eka vadyondzisiwa va yena, naswona a a nga va byarhisi swilo leswi a va ta tsandzeka ku swi rhwala. (Yohane 16:12) Yesu a a ri ni “moya wo rhula ni mbilu yo titsongahata.” Hikwalaho, a swi hlamarisi leswi vo tala va kumeke leswaku wa phyuphyisa.—Matewu 11:28-30.

17. Vakulu va fanele va ku kombisa njhani ku titsongahata loku fanaka ni ka Kreste eka ndlela leyi va hanyisanaka ha yona ni van’wana evandlheni?

¹⁷ Loko Kreste la nga Murhangeri a titsongahatile, lava va rhangelaka evandlheni va fanele va titsongahata swinene! Ina, va ta va ni vukheta leswaku va nga byi tirhisi hi ndlela yo biha vulawuri lebyi va nyikiweke byona. Naswona a va ‘ti ni mavulavulelo lama hlamarisaka,’ va ringeta ku tsakisa van’wana. (1 Vakorinto 2:1, 2) Ku ri na sweswo, va lwela ku vulavula marito ya ntiyiso wa Matsalwa hi ku olova na hi ku tshembeka. Ku tlula kwalaho, vakulu va lwela ku ringanisela eka leswi va swi languteleke eka van’wana ni ku anakanyela swilaveko swa vona. (Vafilipiya 4:5) Leswi va swi tivaka leswaku un’wana ni un’wana ku ni leswi a tsandzekaka ku swi endla, va tshama va ri karhi va tsundzuka mhaka leyi eka ndlela leyi va hanyisanaka ni vamakwavo ha yona. (1 Petro 4:8) Naswona, xana vakulu lava titsongahataka ni lava nga ni moya wo rhula a va phyuphyisi hakunene? Hakunene va phyuphyisa.

18. Vakulu va nga dyondza yini eka ndlela leyi Yesu a va khomeke ha yona vana?

¹⁸ Vanhu a va ya hi ku ntshunxeka eka Yesu,  hambiloko va ri va xiyimo xa le hansi. Xiya ndlela leyi a anguleke ha yona loko vadyondzisiwa vakwe va holovela vanhu loko va “n’wi tisela vana lavatsongo.” Yesu u te: “Tshikani vana lavatsongo va ta eka mina; mi nga ringeti ku va sivela.” Hiloko “a angarha vana, a va katekisa, a va tlhandleka mavoko.” (Marka 10:13-16) Yesu a a ri ni rirhandzu ni musa, naswona van’wana a va tsakela ku va na yena. Vanhu a va nga n’wi chavi Yesu. Ni vana a va titwa va ntshunxekile loko va ri na yena. Ni vakulu va tshineleleka, naswona loko va ri karhi va kombisa rirhandzu ni musa, van’wana—ni vana—va ta titwa va ntshunxekile loko va ri na vona.

19. Ku va ni “mianakanyo ya Kreste” swi katsa yini, naswona leswi swi lava matshalatshala wahi?

¹⁹ Mpimo lowu vakulu va nga n’wi tekelelaka ha wona Kreste Yesu wu titshege hileswaku va n’wi tiva ku fikela kwihi. Pawulo u vutisile: “I mani loyi a tivaka mianakanyo ya Yehovha, leswaku a n’wi letela?” Kutani u engeterile a ku: “Kambe mianakanyo ya Kreste hi na yona.” (1 Vakorinto 2:16) Ku va ni mianakanyo ya Kreste swi katsa ku tiva ndlela leyi a anakanyaka ha yona ni swivumbeko hinkwaswo swa vumunhu byakwe leswaku hi ta tiva leswi a nga ha swi endlaka eka xiyimo xo karhi. Anakanya hi ku tiva Murhangeri wa hina hi ndlela yoleyo! Ina, leswi swi katsa ku nyikela nyingiso lowukulu eka marungula ya Tievhangeli ni ku tshamela ku tata mianakanyo ya hina hi ku twisisa vutomi ni xikombiso xa Yesu. Loko vakulu va tikarhata swinene leswaku va landzela vurhangeri bya Kreste hi mpimo wolowo, vandlha ri susumeteleka ku tekelela ripfumelo ra vona. Naswona vakulu va eneriseka loko va vona van’wana va landzela mikondzo ya Murhangeri hi ntsako.

Hambeta U Titsongahatela Vurhangeri Bya Kreste

20, 21. Loko hi ri karhi hi langutele misava leyintshwa leyi tshembisiweke, hi fanele hi tiyimisela yini?

²⁰ I swa nkoka leswaku hinkwerhu ka hina hi tshama hi titsongahatela vurhangeri bya Kreste. Leswi hi nga kusuhi ni makumu ya mafambiselo lawa ya swilo, xiyimo xa hina xa fana ni xa Vaisrayele lava a va ri eTimbaleni ta Mowabu hi 1473 B.C.E. A va ri ekusuhi ni Tiko leri Tshembisiweke, naswona hi nomu wa muprofeta Muxe Xikwembu xi te: “[Wena Yoxuwa] u ta nghenisa vanhu lava etikweni leri Yehovha a ri hlambanyeleke vatata wa vona ku va nyika rona.” (Deteronoma 31:7, 8) Yoxuwa a a ri murhangeri la vekiweke. Leswaku Vaisrayele va nghena eTikweni leri Tshembisiweke a va fanele va titsongahatela vurhangeri bya Yoxuwa.

²¹ Bibele yi hi byela leswi: “Murhangeri wa n’wina i wun’we, i Kreste.” I Kreste ntsena la nga ta hi rhangela a hi nghenisa emisaveni leyintshwa leyi tshembisiweke, laha ku nga ta va ni ku lulama. (2 Petro 3:13) Hikwalaho a hi tiyimiseleni ku titsongahatela vurhangeri bya yena evuton’wini bya hina hinkwabyo.

[Nhlamuselo ya le hansi]

Wa Tsundzuka Xana?

• Kreste u ri rhangele njhani vandlha ro sungula?

• Kreste u ri rhangela njhani vandlha namuntlha?

• Ha yini hi fanele hi titsongahatela lava va rhangelaka evandlheni?

• Vakulu va nga swi kombisa njhani leswaku Kreste i Murhangeri wa vona?

[Swivutiso Swa Dyondzo]

[Xifaniso lexi nga eka tluka 15]

Kreste u kongomisa vandlha rakwe naswona u khome valanguteri hi voko rakwe ra xinene

[Swifaniso leswi nga eka tluka 16]

“Yingisani lava rhangelaka exikarhi ka n’wina naswona mi titsongahata”

[Xifaniso lexi nga eka tluka 18]

Yesu a a ri ni rirhandzu naswona a a tshineleleka. Vakulu lava nga Vakreste va tikarhatela ku fana na yena