“Tanani Eka Mina, . . . Ndzi Ta Mi Phyuphyisa”

Minhlangano Leyi Khutazaka Rirhandzu Ni Mintirho Leyinene

KU SUKA eToronto ku ya eTokyo, ku suka eMoscow ku ya eMontevideo—minkarhi yi nga ri yingani evhikini, timiliyoni ta Timbhoni ta Yehovha ni vanghana va tona va khitikana va ya etindhawini ta vona ta vugandzeri. Vanhu lava va katsa vavanuna va mindyangu lava tirhaka hi matimba, lava vuyaka va karhele hikwalaho ko tirha siku hinkwaro; vavasati va migingiriko ni vamanana lava fambaka ni vana va vona lavatsongo; vantshwa lava tirhaka hi matimba lava hetaka dyambu hinkwaro va ri exikolweni; vadyuhari lava tsaneke emirini lava fambaka hi ku nonon’hweriwa hikwalaho ka switlhavi; tinoni leti nga ni vurhena ni vana lava pfumalaka vatswari; ni vanhu lava tshovekeke emoyeni lava lavaka ku chaveleriwa.

Timbhoni leti ta Yehovha ti tirhisa swo tala swo famba hi swona—ku sukela eka switimela swa rivilo lerikulu ku fikela eka mbhongolo yinene; ku sukela eka switimela swo famba ehansi ka misava leswi nga lo mphaa, hi vanhu ku fikela eka tilori letikulu. Van’wana va boheka ku pela milambu leyi teleke tingwenya, loko van’wana va fanele va famba va hupiwa hi swo famba emadorobeni lamakulu. Hikwalaho ka yini vanhu lava hinkwavo va endla matshalatshala lamakulu swonghasi?

Ngopfu-ngopfu hileswi ku va kona ni ku hlanganyela eminhlanganweni ya Vukreste ku nga ndlela ya nkoka yo gandzela Yehovha Xikwembu. (Vaheveru 13:15) Muapostola Pawulo u nyikele xivangelo xin’wana loko a tsala a ku: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, . . . kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Laha Pawulo u kandziyise ndlela leyi mupisalema Davhida a a titwa ha yona loko a yimbelela a ku: “Ndzi tsakile loko va ku eka mina: ‘A hi ye endlwini ya Yehovha.’”—Pisalema 122:1.

Hikwalaho ka yini Vakreste va tsaka loko va ri eminhlanganweni ya vona? Hikuva lava va nga kona a va fiki va hlalela ntsena. Ematshan’weni ya sweswo, minhlangano leyi yi va nyika nkarhi wa ku tivana ku antswa. Ngopfu-ngopfu minhlangano leyi yi hi pfuna ku nyika, ku nga ri ku nyikiwa ntsena, ni ku khutazana ku kombisa rirhandzu ni ku endla mintirho leyinene. Leswi swi endla leswaku minhlangano yi va leyi phyuphyisaka. Ku tlula kwalaho, minhlangano ya Vukreste i yin’wana ya tindlela leti Yesu a xi hetisisaka ha tona xitshembiso lexi nge: “Tanani eka mina, . . . ndzi ta mi phyuphyisa.”—Matewu 11:28.

 Xihlovo Xa Nchavelelo Ni Nkhathalelo

Timbhoni ta Yehovha ti ni swivangelo leswi twalaka swo teka minhlangano ya tona yi ri leyi phyuphyisaka. Xin’wana xa swona hileswaku eminhlanganweni, swakudya swa moya swi phamiwa hi nkarhi lowu faneleke hi “hlonga ro tshembeka ni ro tlhariha.” (Matewu 24:45) Minhlangano yi tlhela yi pfuna swinene eku endleni ka leswaku malandza ya Yehovha ma va vadyondzisi va Rito ra Xikwembu lava nga ni vutshila ni lava hisekaka. Nakambe, eHolweni ya Mfumo, u nga kuma ntlawa wa vanghana lava nga ni rirhandzu ni lava khathalaka, lava tshamaka va lunghekele ku pfuna ni ku chavelela van’wana eminkarhini ya ntshikilelo.—2 Vakorinto 7:5-7.

Lowu a wu ri ntokoto wa Phillis, loyi a feriweke hi nuna wa yena, loko n’wana wakwe wa mativula a ri ni malembe ya nhungu, lowa rikotse a ri ni malembe ya ntlhanu hi vukhale. Loko a hlamusela ku phyuphyisiwa loku yena ni vana vakwe va veke na kona hikwalaho ka minhlangano ya Vukreste, u te: “A swi chavelela ku ya eHolweni ya Mfumo hikuva vapfumeri-kulorhi minkarhi hinkwayo a va kombisa rirhandzu ni nkhathalelo wa vona hi ku hi angarha, ku hi khutaza hi Matsalwa kumbe ku hi qhavula hi rirhandzu. A ku ri ndhawu leyi nkarhi hinkwawo a ndzi lava ku va eka yona.”—1 Vatesalonika 5:14.

Endzhaku ka loko Marie a endliwe vuhandzuri lebyikulu, dokodela ra yena ri n’wi byele leswaku swi ta n’wi tekela mavhiki ya kwalomu ka tsevu leswaku a hola. Emavhikini ya yena yo sungula loko a ha hlakarhela, Marie a nga swi kotanga ku va kona eminhlanganweni. Dokodela ra yena ri lemuke leswaku a a nga ha tsakanga. Loko ri lemuka leswaku a nga vi kona eminhlanganweni, ri n’wi khutaze leswaku a ya. Marie u hlamusele leswaku nuna wa yena, loyi a nga riki eka vupfumeri byin’we na yena, a a nga ta n’wi pfumelela ku ya eminhlanganweni hikwalaho ko khathala hi rihanyo ra yena. Hikokwalaho dokodela ri tsale papila ra le nawini ri “lerisa” Marie leswaku a ya eHolweni ya Mfumo leswaku a kuma xikhutazo ni vunakulobye lebyi akaka. Marie u gimeta hi ku vula leswi: “Endzhaku ko ya enhlanganweni wun’we, ndzi titwe ndzi antswa swinene. Ndzi sungule ku dya, ndzi sungule ku kota ku etlela vusiku hinkwabyo, a ndzi nga ha boheki ku tshamela ku tirhisa murhi wa vutshunguri wo herisa switlhavi naswona ndzi tlhele ndzi kuma ntsako nakambe!”—Swivuriso 16:24.

Rirhandzu leri kombisiwaka eminhlanganweni ya Vukreste ri lemukiwa ni hi vanhu va le handle. Xichudeni xin’wana xa le kholichi xi hlawule ku kambisisa mahanyelo ya Timbhoni ta Yehovha leswaku xi kota ku tsala rungula leri a ri laveka entirhweni wa xikolo. Mayelana ni leswi humelelaka eminhlanganweni, u tsale leswi landzelaka eka phepha-hungu ra yena: “Ndlela ya rirhandzu leyi ndzi amukeriweke ha yona . . . [a yi] tsakisa swinene. . . . Xinghana xa Timbhoni ta Yehovha i nchumu lowu a wu xiyeka ngopfu naswona ndzi anakanya leswaku yoleyo i mfanelo ya nkoka swinene eminhlanganweni ya tona.”—1 Vakorinto 14:25.

Emisaveni leyi, leyi teleke ku karhateka, vandlha ra Vukreste i xihlovo xa moya. I ndhawu ya ku rhula ni rirhandzu. Loko u va kona eminhlanganweni, u ta tivonela hi ya wena ndlela leyi ma tiyiseke ha yona marito ya mupisalema lama nge: “Waswivo! Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we!”—Pisalema 133:1.

[Bokisi/Xifaniso lexi nga eka tluka 25]

KU ENERISA XILAVEKO XO HLAWULEKA

Xana vanhu lava feke tindleve va nga vuyeriwa njhani eka minhlangano ya Vukreste? Emisaveni hinkwayo, Timbhoni ta Yehovha ti le ku vumbeni ka mavandlha ya ririmi ra mavoko. Emalembeni ya 13 lama hundzeke, ku simekiwe mavandlha ya 27 ya ririmi ra mavoko ni mintlawa ya 43 eUnited States. Eka matiko man’wana lama nga riki ehansi ka 40, ku ni mavandlha ya kwalomu ka 140 ya ririmi ra mavoko. Rungula ra tibuku ta Vukreste ri hlamuseriwa hi tivhidiyo hi tindzimi ta 13.

Vandlha ra Vukreste ri nyika vanhu lava feke tindleve lunghelo ro dzunisa Yehovha. Odile, loyi khale ka yena a a nghena Kereke ya Khatoliki eFurwa naswona a tshikileleke swinene emianakanyweni lerova a anakanya ni ku tisunga, u yi tlangela swinene dyondzo ya Bibele leyi a yi kumaka eminhlanganweni ya Vukreste. U ri: “Ndzi tlhele ndzi kuma rihanyo lerinene ni ntsako wa vutomi. Kambe ku tlula kwalaho, ndzi kume ntiyiso. Sweswi ndzi ni xikongomelo evuton’wini.”