Xana Vurhangeri Bya Kreste I Bya Xiviri Eka Wena?

“Naswona mi nga vuriwi ‘varhangeri,’ hikuva Murhangeri wa n’wina i wun’we, i Kreste.”—MATEWU 23:10.

1. I mani Murhangeri la ngo va yexe wa Vakreste va ntiyiso?

A KU ri Ravumbirhi, Nisan 11. Endzhaku ka masiku manharhu, Yesu Kreste a a ta dlayiwa. A a ya ro hetelela etempeleni. Hi rona siku leri, Yesu u dyondzise mintshungu leyi a yi hlengeletanile kwalaho swin’we ni vadyondzisiwa vakwe dyondzo ya nkoka. U te: “Mi nga tshuki mi vuriwa Rabi, hikuva mudyondzisi wa n’wina i un’we, kasi n’wina hinkwenu mi vamakwavo. Ku tlula kwalaho, mi nga tshuki mi vitana hambi ku ri mani leswaku i tata wa n’wina la misaveni, hikuva Tata wa n’wina i un’we, Wa le tilweni. Naswona mi nga vuriwi ‘varhangeri,’ hikuva Murhangeri wa n’wina i wun’we, i Kreste.” (Matewu 23:8-10) Swi le rivaleni leswaku Yesu Kreste i Murhangeri wa Vakreste va ntiyiso.

2, 3. Ku yingisa Yehovha ni ku amukela Murhangeri loyi a n’wi vekeke swi ni vuyelo byihi evuton’wini bya hina?

² Vurhangeri bya Yesu bya hi vuyerisa swinene evuton’wini bya hina loko hi byi amukela! Hi nomu wa muprofeta Esaya, Yehovha Xikwembu u profete hi ta ku ta ka Murhangeri loyi, a ku: “N’wina hinkwenu lava nga ni torha! Tanani ematini. Ni lava nga riki na mali! Tanani, mi ta xava mi dya. Ina, tanani, mi ta xava vhinyo ni ntswamba handle ka mali, handle ka nxavo. . . . Ndzi yingiseni kahle, mi dya leswinene, moya-xiviri wa n’wina wu kuma ntsako lowu heleleke emafurheni. . . . Maswivo! Ndzi n’wi veke a va mbhoni eka vanhu va matiko, a va murhangeri ni ndhuna ya vanhu va matiko.”—Esaya 55:1-4.

³ Esaya u tirhise swihalaki leswi tolovelekeke—mati, ntswamba ni vhinyo—tanihi swifananisi swo kombisa ndlela leyi vutomi bya hina byi khumbekaka ha yona loko hi yingisa Yehovha hi tlhela hi landzela Murhangeri ni Ndhuna leyi a hi nyikeke yona. Vuyelo bya kona bya phyuphyisa. Swi fana ni loko u nwa mati yo titimela loko dyambu ri vavula. Torha ra hina ra ntiyiso ni ra leswinene ra timeka. Tanihi leswi ntswamba wu tiyisaka vana wu tlhela wu va pfuna leswaku va kula, “ntswamba wa rito” wa hi tiyisa wu tlhela wu hi endla hi kula hi tlhelo ra moya ni ku kurisa vuxaka bya hina ni Xikwembu. (1 Petro 2:1-3) Naswona xana u kona la nga alaka leswaku vhinyo yi tisa ntsako hi nkarhi wa minkhuvo? Hilaha ku fanaka, ku gandzela Xikwembu xa ntiyiso ni ku landzela mikondzo ya Murhangeri la vekiweke hi xona swi endla vutomi byi ‘tsakisa hilaha ku heleleke.’ (Deteronoma 16:15) Kutani, i swa nkoka leswaku hinkwerhu ka hina—lavatsongo ni lavakulu, vavanuna ni vavasati—hi kombisa leswaku vurhangeri bya Kreste i bya xiviri eka hina. Kambe, hi nga swi kombisa njhani siku na siku leswaku Mesiya i Murhangeri wa hina?

Vantshwa—Hambetani Mi “Kula eVutlharini”

4. (a) Ku humelele yini loko Yesu wa malembe ya 12 hi vukhale a endzele eYerusalema hi nkarhi wa Paseka? (b) Yesu a a ri ni vutivi byo tani hi kwihi loko a ri ni malembe ya 12 ntsena hi vukhale?

⁴ Xiya xikombiso lexi Murhangeri wa hina a xi vekeleke vantshwa. Hambileswi ku nga tiviwiki swo tala malunghana ni vutsongwana bya Yesu, ku ni xiendlakalo xin’wana lexi paluxaka mhaka ya nkoka. Loko Yesu a ri ni malembe ya 12 hi vukhale, vatswari vakwe va fambe na yena eka riendzo ra lembe na lembe ro ya eYerusalema va ya tlangela Paseka. Hi nkarhi wolowo u hlanganyele ebulwini ra Matsalwa kutani va ndyangu wa ka vona va famba va nga swi xiyi leswaku u sele. Endzhaku ka masiku manharhu, Yosefa na Mariya, vatswari vakwe lava a va karhatekile va n’wi kume etempeleni, “a tshame exikarhi ka vadyondzisi, a va yingisela ni ku va vutisa.” Ku tlula kwalaho,  “hinkwavo lava a va n’wi yingisile a va hlamala va nga heti hikwalaho ka ku twisisa kakwe ni tinhlamulo takwe.” Anakanya, loko a ri ni malembe ya 12 ntsena, Yesu a nga vutisanga swivutiso leswi tlhontlhaka mianakanyo ni leswi vulavulaka hi swilo swa moya ntsena, kambe u tlhele a nyikela tinhlamulo ta vutlhari! A swi kanakanisi leswaku u pfuniwe hi ndzetelo wa vatswari.—Luka 2:41-50.

5. Vantshwa va nga ri kambisisa njhani langutelo ra vona eka dyondzo ya ndyangu ya Bibele?

⁵ Kumbexana u muntshwa. Loko vatswari va wena va ri malandza lama tinyiketeleke ya Xikwembu, kumbexana ku ni xiyimiso xa nkarhi na nkarhi xa dyondzo ya Bibele ekaya ka n’wina. Xana u yi tekisa ku yini dyondzo yoleyo ya ndyangu? Ha yini u nga anakanyisisi hi swivutiso swo tanihi leswi nge: ‘Xana ndzi ri seketela hi mbilu hinkwayo lunghiselelo ra dyondzo ya Bibele endyangwini wa ka hina? Xana ndzi fambisana na rona, ndzi ringeta hi matimba leswaku ndzi nga ri kavanyeti?’ (Vafilipiya 3:16) ‘Xana ndzi hlanganyela hi ku hiseka edyondzweni ya kona? Loko swi fanerile, xana ndzi vutisa swivutiso malunghana ni mhaka leyi dyondziwaka kutani ndzi hlamusela ndlela leyi yi tirhaka ha yona? Loko ndzi ri karhi ndzi kula hi tlhelo ra moya, xana ndzi hlakulela ku navela “swakudya leswi tiyeke [swa] vanhu lava wupfeke”?’—Vaheveru 5:13, 14.

6, 7. Xiyimiso xa ku hlaya Bibele siku na siku xi nga va pfuna njhani vantshwa?

⁶ Xiyimiso xa ku hlaya Bibele siku na siku na xona i xa nkoka. Mupisalema u yimbelerile: “Wa tsaka munhu la nga fambangiki hi xitsundzuxo xa lavo homboloka, . . . kambe u tsakela nawu wa Yehovha, naswona nawu wakwe u wu hlaya hi rito ra le hansi vusiku ni nhlikanhi.” (Pisalema 1:1, 2) Yoxuwa, mutlhandlami wa Muxe ‘u hlaye buku ya nawu hi rito ra le hansi vusiku ni nhlikanhi.’ Leswi swi n’wi pfune ku endla swilo hi vutlhari naswona u kote ku endla xiavelo lexi a nyikiweke xona hi Xikwembu. (Yoxuwa 1:8) Yesu Kreste, Murhangeri wa hina u te: “Ku tsariwile, ‘Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.’” (Matewu 4:4) Tanihi leswi hi lavaka swakudya swa nyama siku na siku, swakudya swa moya hi fanele hi swi lava swinene nkarhi na nkarhi!

⁷ Hi ku xiya xilaveko xakwe xa moya, Nicole wa malembe ya 13 hi vukhale u sungule ku hlaya Bibele siku na siku. * Sweswi u ni malembe ya 16 naswona u hlaye Bibele hinkwayo kan’we kasi sweswi u le xikarhi ka yona laha a nga ta va a yi heta ra vumbirhi. Endlelo leri a ri tirhisaka ra olova. U ri: “Ndza tiyiseka leswaku ndzi hlaya ndzima yin’we kumbe ku tlula hi siku.” Xana ku hlaya ka yena Bibele siku na siku ku n’wi pfune njhani? U ri: “Namuntlha ku tele minkucetelo yo biha. Siku na siku ndzi langutana ni mintshikilelo leyi xungetaka ripfumelo ra mina exikolweni ni le tindhawini tin’wana. Ku hlaya Bibele siku na siku swi ndzi pfuna ku hatla ndzi tsundzuka milawu ni  misinya ya milawu ya Bibele leyi ndzi khutazaka ku lwisana ni mintshikilelo leyi. Hikwalaho, ndzi titwa ndzi ri kusuhi na Yehovha na Yesu.”

8. Yesu a a tolovele ku endla yini esinagogeni, naswona vantshwa va nga n’wi tekelela njhani?

⁸ Yesu a a tolovele ku yingisela ni ku hlanganyela eku hlayeni ka Matsalwa esinagogeni. (Luka 4:16; Mintirho 15:21) Swa vuyerisa swonghasi leswaku vantshwa va landzela xikombiso xexo hi ku va kona eminhlanganweni ya Vukreste nkarhi na nkarhi, laha ku hlayiwaka ku tlhela ku dyondziwa Bibele! Richard wa malembe ya 14 hi vukhale, loko a phofula ku tlangela ka yena minhlangano yo tano, u ri: “Minhlangano i ya nkoka eka mina. Nkarhi hinkwawo ndzi tsundzuxiwa hi leswi nga swinene ni leswo biha, hi mahanyelo lamanene ni layo biha, leswaku ku fana na Kreste swi njhani nileswaku ku nga fani na yena swi njhani. A ndzi boheki ku dyondza swilo hi ndlela yo vava—hi ku swi tokota kunene.” Ina, “xitsundzuxo xa Yehovha xa tshembeka, xi tlharihisa la nga riki na ntokoto.” (Pisalema 19:7) Nicole na yena wa tiyiseka leswaku a va kona eka minhlangano ya ntlhanu ya vandlha ya vhiki na vhiki. Nakambe u heta tiawara timbirhi ku ya eka tinharhu a ri karhi a lunghiselela leswi nga ta dyondziwa eka minhlangano leyi.—Vaefesa 5:15, 16.

9. Vantshwa va nga hambeta njhani va “kula evutlharini”?

⁹ Loko wa ha ri muntshwa u ni nkarhi lowunene wa ku kuma ‘vutivi bya Xikwembu xi ri xin’we xa ntiyiso, ni loyi xi n’wi rhumeke, Yesu Kreste.’ (Yohane 17:3) U nga ha va u tiva vantshwa lava hetaka nkarhi wo leha va hlaya tibuku leti nga ni swihungwana leswi hlekisaka, va hlalela thelevhixini, va tlanga mintlangu ya le ka vhidiyo, kumbe va lavisisa rungula eka Internet. Ha yini u va tekelela kasi u nga landzela xikombiso lexi hetisekeke xa Murhangeri wa hina? Loko a ha ri jaha, u tsakele ku dyondza ha Yehovha. Vuyelo byi ve byihi? Hikwalaho ka ku rhandza ka yena swilo swa moya, ‘Yesu u hambete a kula evutlharini.’ (Luka 2:52) Na wena u nga swi kota.

“Tivekeni eHansi Ka Van’wana”

10. I yini lexi nga ta endla leswaku vutomi bya ndyangu byi va xihlovo xa ku rhula ni ntsako?

¹⁰ Kaya ri nga va ndhawu leyi rhuleke ni leyi enerisaka kumbe ri hundzuka ndhawu ya madzolonga ni ya timholovo. (Swivuriso 21:19; 26:21) Ku amukela ka hina vurhangeri bya Kreste swi kondletela ku rhula ni ntsako endyangwini. Entiyisweni, xikombiso xa Yesu i ntila wa vuxaka lebyinene endyangwini. Matsalwa ma ri: “Tivekeni ehansi ka van’wana hi ku chava Kreste. Vavasati a va tiveke ehansi ka vanuna va vona hilaha va endlaka hakona eHosini, hikuva wanuna i nhloko ya nsati wakwe tanihi leswi Kreste na yena a nga nhloko ya vandlha, leswi yena a nga muponisi wa miri lowu. . . . Vavanuna, hambetani mi rhandza vasati va n’wina, hilaha Kreste na yena a rhandzeke vandlha hakona kutani a tinyiketa hikwalaho ka rona.” (Vaefesa 5:21-25) Muapostola Pawulo u tsalele vandlha ra le Kolosa a ku: “N’wina vana, yingisani vatswari va n’wina eka xin’wana ni xin’wana, hikuva leswi swa tsakisa swinene eHosini.”—Vakolosa 3:18-20.

11. Wanuna a nga swi kombisa njhani leswaku vurhangeri bya Kreste i bya xiviri eka yena?

¹¹ Ku landzela ndzayo leyi swi vula leswaku wanuna u rhangela ndyangu wakwe, nsati wakwe a n’wi seketela hi ku tshembeka kasi vana va yingisa vatswari va vona. Kambe, vunhloko bya wanuna byi tisa ntsako ntsena loko byi tirhisiwa kahle. Wanuna la tlhariheke u fanele a dyondza ku tirhisa vunhloko byakwe hi ku tekelela Nhloko ya yena tlhelo Murhangeri wakwe, Kreste Yesu. (1 Vakorinto 11:3) Hambileswi endzhakunyana Yesu a veke “nhloko ya swilo hinkwaswo evandlheni,” a nga tanga emisaveni ‘leswaku a ta tirheriwa, kambe  leswaku a ta tirhela van’wana.’ (Vaefesa 1:22; Matewu 20:28) Hilaha ku fanaka, wanuna la nga Mukreste u tirhisa vunhloko byakwe, ku nga ri hi ndlela ya vutianakanyi, kambe leswaku a ta khathalela swilaveko swa nsati wakwe ni swa vana vakwe—ina, swa ndyangu hinkwawo. (1 Vakorinto 13:4, 5) U lava ku tekelela timfanelo letinene ta nhloko yakwe, Yesu Kreste. Ku fana na Yesu, u ni moya wo rhula ni mbilu yo titsongahata. (Matewu 11:28-30) A swi n’wi tikeli ku vula marito yo tanihi lama nge “ndzi khomele” kumbe “a wu tiyisile” loko a hoxisile. Xikombiso xa yena lexinene xi endla leswaku swi olovela wansati ku va “mupfuni,” “muhetisisi” ni “nghamu” ya wanuna wo tano, a dyondza eka yena a tlhela a tirhisana na yena.—Genesa 2:20; Malakiya 2:14.

12. I yini lexi nga ta pfuna wansati leswaku a pfumelelana ni nsinya wa nawu wa vunhloko?

¹² Wansati na yena u fanele a tiveka ehansi ka nuna wa yena. Hambiswiritano, loko se a ngheniwe hi moya wa misava, a nga ha sungula ku wu tekela ehansi nsinya wa nawu wa vunhloko, kasi mhaka ya ku tiveka ehansi ka wanuna yi nga ha n’wi nyenyetsa. Matsalwa a ma vuli swona leswaku wanuna u fanele a va makhonya, kambe ma vula leswaku vavasati va fanele va titsongahatela vavanuna va vona. (Vaefesa 5:24) Bibele yi tlhela yi lava leswaku wanuna kumbe tatana a va ni vutihlamuleri, naswona loko ndzayo ya yona yi tirhisiwa, leswi swi endla leswaku ku va ni ku rhula ni ku hleleka endyangwini.—Vafilipiya 2:5.

13. Hi xihi xikombiso lexi vekiweke hi Yesu xa ku titsongahata?

¹³ Vana va fanele va yingisa vatswari va vona. Yesu u veke xikombiso lexinene ngopfu emhakeni leyi. Endzhaku ka xiendlakalo lexi humeleleke etempeleni loko Yesu wa malembe ya 12 hi vukhale a sale kona ku ringana masiku manharhu, “[u rhelele ni vatswari vakwe] ivi va fika eNazareta, naswona a hambeta a tiveka ehansi ka vona.” (Luka 2:51) Ku titsongahata ka vana eka vatswari va vona swi endla leswaku ku va ni ku rhula ni ntwanano endyangwini. Loko un’wana ni un’wana a tiveka ehansi ka vurhangeri bya Kreste, ku va ni ndyangu lowu tsakeke.

14, 15. I yini lexi nga ta hi pfuna leswaku hi humelela loko hi langutane ni xiyimo lexi tikaka ekaya? Nyika xikombiso.

¹⁴ Hambiloko ku va ni swiyimo leswi nonon’hwaka ekaya, xilotlelo xa ku humelela i ku tekelela Yesu ni ku amukela nkongomiso wakwe. Hi xikombiso, vukati lebyi a byi ri ni malembe ya 35 bya Jerry na Lana, mana wa nhwanyana wa kondlo-a-ndzi-dyi, byi ve ni xiphiqo lexi havambirhi a va nga xi anakanyi. Jerry u ri: “A ndzi swi tiva leswaku loko ndzi ta va nhloko leyinene ndzi fanele ndzi tirhisa misinya ya milawu ya le Bibeleni leyi endlaka leswaku mindyangu yin’wana yi humelela. Kambe ndzi hatle ndzi swi xiya leswaku ndzi fanele ndzi yi tirhisa hi vutlhari lebyikulu ni ku twisisa.” N’wana wa nhwanyana wa nsati wakwe a a n’wi teka tanihi munhu loyi a n’wi hambaniseke ni mana wakwe kutani a a n’wi venga swinene. Jerry a a fanele a twisisa leswaku langutelo leri a ri khumba leswi nhwanyana loyi a a swi vula ni ku swi endla. Xana u endle yini? Jerry u ri: “Mina na Lana hi pfumelelanile leswaku hi nkarhi wolowo, Lana hi yena la nga ta tshinya nhwanyana loyi tanihi mutswari kasi mina ndzi ta lwela ku aka vuxaka lebyinene na yena. Maendlelo lawa ma tswale mihandzu leyinene hi ku famba ka nkarhi.”

¹⁵ Loko hi langutane ni swiyimo swo tika ekaya, hi fanele hi twisisa leswaku hi ta kota ku kumisisa xivangelo xa ku va swirho swa ndyangu swi vulavula ni ku endla swilo hi ndlela leyi swi endlaka ha yona. Nakambe hi fanele hi va ni vutlhari leswaku hi ta tirhisa misinya ya milawu ya Xikwembu hi ndlela leyi faneleke. Hi xikombiso, Yesu u xi twisise kahle xivangelo lexi endleke leswaku wansati la karhatiwaka hi nkhuluko wa ngati a n’wi khumba, naswona u n’wi angule hi ndlela ya vutlhari ni ya ntwela-vusiwana. (Levhitika 15:25-27; Marka 5:30-34) Murhangeri wa hina u ni vutlhari naswona wa twisisa. (Swivuriso 8:12) Hi ta tsaka loko hi endla swilo hi ndlela leyi a a ta swi endla ha yona.

‘Hambetani Mi Lava Mfumo Ku Sungula’

16. I yini lexi faneleke xi rhanga evuton’wini bya hina, naswona Yesu u swi kombise njhani leswi hi xikombiso xa yena?

¹⁶ Yesu u swi hlamusele kahle leswaku i yini leswi faneleke swi rhanga evuton’wini bya lava va amukelaka vurhangeri byakwe. U te: “Kutani, hambetani mi lava mfumo ni ku lulama ka [Xikwembu] ku sungula.” (Matewu 6:33) Naswona hi xikombiso xakwe u hi kombise ndlela leyi  sweswo hi nga swi endlaka ha yona. Loko a hete masiku ya 40 a ri karhi a titsona swakudya, a anakanyisisa a tlhela a khongela endzhaku ka ku khuvuriwa kakwe, Yesu u ringiwile. Sathana Diyavulosi u n’wi tshembise vulawuri bya “mimfumo hinkwayo ya misava.” Anakanya leswaku loko Yesu a a amukele nyiko ya Diyavulosi a a ta va a hanye vutomi bya njhani! Hambiswiritano, Kreste a a tiyimisele ku endla ku rhandza ka Tata wakwe. U tlhele a swi xiya leswaku vutomi byo tano emisaveni ya Sathana a byi ta va byi komile. Xikan’we-kan’we u ale nyiko ya Diyavulosi, a ku: “Ku tsariwile, ‘U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.’” Endzhakunyana ka kwalaho, Yesu u “[sungule] ku chumayela a ku: ‘Hundzukani, hikuva mfumo wa matilo wu tshinele.’” (Matewu 4:2, 8-10, 17) Kreste u ve mutwarisi wa Mfumo wa Xikwembu vutomi bya yena hinkwabyo lebyi a byi hanyeke emisaveni.

17. Hi nga swi kombisa njhani leswaku hi rhangisa timhaka ta Mfumo evuton’wini bya hina?

¹⁷ Hi fanele hi tekelela Murhangeri wa hina naswona hi nga pfumeleli misava ya Sathana leswaku yi hi yenga hi tshwekatshwekela ku kuma ntirho lowu hakelaka mali yo tala. (Marka 1:17-21) Hi ta va hi ri swiphukuphuku loko ho khomeka ngopfu hi ku hlongorisa swilo swa misava lerova timhaka ta Mfumo ti va endzhaku! Yesu u hi nyike ntirho wa ku chumayela hi Mfumo ni wa ku endla vadyondzisiwa. (Matewu 24:14; 28:19, 20) Ina, hi nga ha va hi ri ni ndyangu kumbe hi ri ni vutihlamuleri byin’wana lebyi hi faneleke hi byi byarha, kambe xana a hi tsaki loko hi tirhisa madyambu ni mahelo-vhiki leswaku hi hetisisa vutihlamuleri bya hina bya Vukreste bya ku chumayela ni ku dyondzisa? Naswona swa khutaza swinene leswi hi lembe ra ntirho ra 2001, vanhu va kwalomu ka 780 000 va swi koteke ku va vatirheli va nkarhi hinkwawo kumbe maphayona!

18. I yini lexi hi pfunaka leswaku hi kuma ntsako ensin’wini?

¹⁸ Rungula ra Tievhangeli ri kombisa Yesu tanihi munhu la hisekaka a tlhela a va ni ntwela-vusiwana. Loko a vona swilaveko swa moya swa vanhu lava a a hanya na vona, u va twele vusiwana kutani a va pfuna hi mbilu hinkwayo. (Marka 6:31-34) Vutirheli bya hina bya tsakisa loko hi byi endla hikwalaho ka leswi hi rhandzaka van’wana hi tlhela hi navela ku va pfuna hi mbilu hinkwayo. Kambe hi nga ku kuma njhani ku navela koloko? Jaha leri vuriwaka Jayson ri ri: “Loko ndzi ri emalembeni ya kondlo-a-ndzi-dyi a ndzi nga yi rhandzi kahle nsimu.” I yini lexi n’wi pfuneke ku hlakulela ku rhandza ntirho lowu? Jayson u ri: “Mixo wun’wana ni wun’wana hi Mugqivela ndyangu wa ka hina a wu ya ensin’wini. Leswi  swi ndzi pfunile hikuva loko ndzi ya swinene ensin’wini, ndzi vone vuyelo lebyinene naswona a ndzi ya ndzi yi rhandza.” Na hina hi fanele hi ya ensin’wini nkarhi na nkarhi naswona hi hiseka.

19. Hi fanele hi tiyimisela ku endla yini malunghana ni vurhangeri bya Kreste?

¹⁹ Swa phyuphyisa naswona swa vuyerisa hakunene ku amukela vurhangeri bya Kreste. Loko hi byi amukela, nkarhi wa vuntshwa wu va wa ku endla nhluvuko evutivini ni le vutlharini. Vutomi bya ndyangu byi va xihlovo xa ku rhula ni ntsako, naswona vutirheli byi va ntirho lowu tisaka ntsako ni ku eneriseka. Ina, a hi tiyimiseleni ku kombisa hi ndlela leyi hi hanyaka ha yona siku ni siku ni loko hi endla swiboho leswaku vurhangeri bya Kreste i bya xiviri eka hina. (Vakolosa 3:23, 24) Kambe, Yesu Kreste i murhangeri wa hina ni le ndhawini yin’wana—ku nga vandlha ra Vukreste. Xihloko lexi landzelaka xi ta hlamusela ndlela leyi hi nga vuyeriwaka ha yona eka lunghiselelo leri.

[Nhlamuselo ya le hansi]

Wa Tsundzuka Xana?

• Xana ku landzela Murhangeri wa hina la vekiweke hi Xikwembu swi hi vuyerisa njhani?

• Vantshwa va nga swi kombisa njhani leswaku va lava ku landzela vurhangeri bya Yesu?

• Vurhangeri bya Kreste byi va ni vuyelo byihi evuton’wini bya ndyangu bya lava va tivekaka ehansi ka byona?

• Vutirheli bya hina byi nga swi kombisa njhani leswaku vurhangeri bya Kreste i bya xiviri eka hina?

[Swivutiso Swa Dyondzo]

[Swifaniso leswi nga eka tluka 9]

Vuntshwa i nkarhi lowunene wa ku kuma vutivi bya Xikwembu ni Murhangeri la vekiweke hi xona

[Xifaniso lexi nga eka tluka 10]

Ku titsongahatela vurhangeri bya Kreste swi tisa ntsako endyangwini

[Swifaniso leswi nga eka tluka 12]

Yesu u lave Mfumo ku sungula. Xana wena wa wu rhangisa?