Xiviko Xa Vahuweleri Va Mfumo

A Ndzi Lava Ku Tirhela Xikwembu”

“HUMANI eka yena, vanhu va mina.” Xolexo a ku ri xileriso lexi a xi vuriwa hi ntsumi, lexi twiweke hi muapostola Yohane hi lembe-xidzana ro sungula C.E. Namuntlha vanhu va timiliyoni lava nga ni timbilu letinene va xi yingisile xileriso xexo kutani va baleka eka “Babilona Lonkulu,” mfumo wa misava wa vukhongeri bya mavunwa. (Nhlavutelo 18:1-4) Un’wana wa vona i Wilner wa le Haiti, loyi a hlamuselaka leswi n’wi humeleleke.

“Ndzi velekiwe hi 1956 endyangwini lowu tinyiketeleke swinene eka Khatoliki, lowu a wu tshama exidorobanini xa St. Marc le Haiti. Anakanya ndlela leyi ndyangu wa ka hina a wu tsake ha yona loko mina ni van’wana vambirhi lava humaka edorobeni ra ka hina hi hlawuriwile, leswaku hi ya exikolweni xo dyondzela vufundhisi le St. Michel de l’Atalaye, le Haiti. Kutani, hi 1980 hi rhumeriwe le Stavelot, eBelgium, leswaku hi ya kuma ndzetelo lowu engetelekeke. Loko hi ri kwalaho hi tlhele hi ya eyunivhesiti ya Khatoliki.

“Eku sunguleni a ndzi swi hisekela swinene ku dyondzela vufundhisi. Siku rin’wana loko hi ri ekamareni ro dyela eka rona, mufundhisi loyi a a khathalela ntlawa wa hina u ndzi kombele leswaku ndzi sala katsongo hikuva a a lava ku ndzi byela swin’wana. Anakanya ndlela leyi ndzi tsemekeke nhlana ha yona loko a ndzi byela hi ku kongoma leswaku a a ndzi rhandza! Ndzi arile kambe a ndzi pfilunganyekile ngopfu. Ndzi tsalele va ka hina ndzi va byela hi mhaka leyi ivi endzhaku ka tin’hweti ti nga ri tingani ndzi vuya ndzi tshika xikolo lexi, hambileswi a va nga tsakanga. Ndzi kume ndhawu yo tshama eximutanini xin’wana kutani ndzi dyondzela ntirho wun’wana.

“Loko ndzi tlhelela le St. Marc, a ndzi nga ha yi tshembi Kereke ya Khatoliki. Hambiswiritano, a ndzi lava ku tirhela Xikwembu, kambe a ndzi nga swi tivi leswaku ndzi nga endla yini. Ndzi ye ekerekeni ya Maadventist, ekerekeni ya Ebenezer ni le kerekeni ya Mormon. A ndzi nga ri na nchumu lowu a wu ta ndzi kongomisa hi tlhelo ra moya.

“Kutani ndzi tsundzuke leswaku loko ndza ha dyondzela vufundhisi le Belgium, a ndzi tolovele ku hlaya Bibele ya Crampon. Loko ndzi ri karhi ndzi yi hlaya ndzi kume leswaku Xikwembu xi ni vito. Kutani ndzi khongele eka Xikwembu hi mbilu hinkwayo, ndzi tirhisa vito ra xona, ndzi kombela leswaku xi ndzi pfuna ndzi kuma vukhongeri bya ntiyiso.

“Endzhakunyana ka sweswo, Timbhoni ta Yehovha timbirhi ti rhurhele emugangeni lowu a ndzi tshama eka wona. A ti ri vanhu vo rhula, lava xiximekaka va tlhela va va ni xindzhuti. Ndzi tsakisiwe hi ndlela leyi a va hanya ha yona. Siku rin’wana, yin’wana ya Timbhoni toleto yi ndzi rhambile leswaku ndzi ya eXitsundzuxweni xa rifu ra Kreste xa lembe na lembe. Ndzi wu tsakele swinene nhlangano lowu, kutani ndzi pfumela ku fambiseriwa dyondzo ya Bibele ya nkarhi na nkarhi hi Timbhoni. Hi tin’hweti leti lavaka ku va tsevu, a ndzi khorwisekile leswaku ndzi yi kumile ndlela leyinene ya ku tirhela Xikwembu. Ndzi nyiketele vutomi bya mina eka Yehovha kutani ndzi khuvuriwa hi November 20, 1988.”

Hi ku famba ka nkarhi, Wilner u nghenele ntirho wa nkarhi hinkwawo. Namuntlha, i nkulu wa vandlha. Yena ni nsati wakwe, swin’we ni vana va vona vambirhi va tirha va tsakile evandlheni.

[Xifaniso lexi nga eka tluka 9]

Wilner u tive leswaku vito ra Xikwembu i Yehovha hikwalaho ko hlaya Bibele