Hambeta U Tirhela Yehovha Hi Mbilu Leyi Tiyeke
Hambeta U Tirhela Yehovha Hi Mbilu Leyi Tiyeke
“Oho Xikwembu, mbilu ya mina yi yime yi tiya, mbilu ya mina yi yime yi tiya.”—PISALEMA 57:7.
1. Hi nga swi kotisa ku yini ku va ni ripfumelo leri fanaka ni ra Davhida?
YEHOVHA a nga tiyisa ripfumelo ra hina ra Vukreste leswaku hi ta namarhela Vukreste bya ntiyiso tanihi malandza ya yena lama tinyiketeleke. (Varhoma 14:4) Hikwalaho, hi nga va ni ripfumelo leri fanaka ni leriya ra mupisalema Davhida, loyi a susumetelekeke ku yimbelela a ku: “Oho Xikwembu, mbilu ya mina yi yime yi tiya.” (Pisalema 108:1) Loko mbilu ya hina yi yime yi tiya, hi ta susumeteleka ku hetisisa ku tinyiketela ka hina eka Xikwembu. Naswona loko hi lava nkongomiso ni matimba eka xona, hi ta tikombisa hi ri lava nga tsekatsekiki, hi tiyimisele swinene tanihi vahlayisi va vutshembeki naswona hi khorwiseka swinene hi vupfumeri bya hina, “nkarhi hinkwawo [hi] va ni swo tala swo swi endla entirhweni wa Hosi.”—1 Vakorinto 15:58.
2, 3. Hi wihi nkoka wa xikhongotelo xa Pawulo lexi kumekaka eka 1 Vakorinto 16:13?
2 Muapostola Pawulo loko a khongotela valandzeri va Yesu va le Korinto wa khale hi marito lama tirhaka ni le ka Vakreste va namuntlha, u te: “Tshamani mi hitekile, yimani mi tiyile eripfumelweni, yanani emahlweni tanihi vavanuna, vanani ni matimba.” (1 Vakorinto 16:13) Hi Xigriki, xin’wana ni xin’wana xa swileriso leswi xi le nkarhini wa sweswi, leswi vulaka leswaku swi fanele swi tirhisiwa nkarhi hinkwawo. Hi wihi nkoka wa xitsundzuxo lexi?
3 Hi nga ‘tshama hi hitekile’ hi tlhelo ra moya hi ku kaneta Diyavulosi na hi ku tshama hi ri ekusuhi ni Xikwembu. (Yakobo 4:7, 8) Ku titshega hi Yehovha swi hi endla leswaku hi tshama hi ri ni vun’we ni ku ‘yima hi tiyile eripfumelweni ra Vukreste.’ Hina—ku katsa ni vavasati vo tala lava nga exikarhi ka hina—‘hi ya emahlweni tanihi vavanuna’ hi ku tirhela Xikwembu hi xivindzi tanihi vahuweleri va Mfumo. (Pisalema 68:11) Hi ‘va ni matimba’ hi ku hambeta hi kombela matimba eka Tata wa hina wa le tilweni leswaku hi ta endla ku rhandza ka yena.—Vafilipiya 4:13.
4. I yini lexi hi susumeteleke ku khuvuriwa hi va Vakreste?
4 Loko hi tinyiketela hi ku helela eka Yehovha kutani hi khuvuriwa ematini a hi kombisa leswaku hi amukele ripfumelo ra ntiyiso. Kambe i yini lexi endleke leswaku hi khuvuriwa? Hi rhange hi tswonga vutivi lebyi kongomeke bya Rito ra Xikwembu. (Yohane 17:3) Leswi swi endle leswaku hi va ni ripfumelo kutani swi hi susumetela ku hundzuka, hi kombisa ku tisola ka xiviri eka swidyoho swa hina swa nkarhi lowu hundzeke. (Mintirho 3:19; Vaheveru 11:6) Endzhaku ka sweswo hi cincile, hikuva hi tshike ku endla swilo leswo biha leswaku hi ta hanya hi ku pfumelelana ni ku rhandza ka Xikwembu. (Varhoma 12:2; Vaefesa 4:23, 24) Leswi swi landzeriwe hi ku tinyiketela hi mbilu hinkwayo eka Yehovha hi xikhongelo. (Matewu 16:24; 1 Petro 2:21) Hi kombele ripfalo lerinene eka Xikwembu kutani hi khuvuriwa hi kombisa ku tinyiketela ka hina eka xona. (1 Petro 3:21) Loko hi tshama hi ri karhi hi tsundzuka magoza lawa hi ta kota ku anakanya hi xilaveko xa ku tshama hi ri karhi hi endla matshalatshala ya ku hetisisa ku tinyiketela ka hina ni ku hambeta hi tirhela Yehovha hi mbilu leyi tiyeke.
Hambeta U Va Ni Torha Ra Vutivi Lebyi Kongomeke
5. Ha yini hi fanele hi hambeta hi tswonga vutivi bya Matsalwa?
5 Leswaku hi hambeta hi hanya hi ku pfumelelana ni ku tinyiketela ka hina eka Xikwembu, hi fanele hi hambeta hi kuma vutivi lebyi akaka ripfumelo bya Matsalwa. A swi tsakisa swinene ku dya swakudya swa moya loko hi sungula ku twa ntiyiso wa Xikwembu! (Matewu 24:45-47) “Swakudya” swoleswo a swi nandziha—naswona swi hi xurhisile swinene hi tlhelo ra moya. Sweswi i swa nkoka leswaku hi hambeta hi dya swakudya leswi fuweke swa moya leswaku hi ta va ni mbilu leyi tiyeke tanihi malandza lama tinyiketeleke eka Yehovha.
6. U nga ha va u pfuniwe njhani leswaku u tlangela ntiyiso wa Bibele swi huma embilwini?
6 Ku laveka matshalatshala leswaku hi va ni vutivi lebyi engetelekeke bya Matsalwa. Swi fana ni ku lavisisa xuma lexi fihliweke—leswi lavaka matshalatshala lamakulu. Kambe swa vuyerisa swinene ku kuma “vutivi bya Xikwembu”! (Swivuriso 2:1-6) Loko muhuweleri wa Mfumo a sungula ku dyondza Bibele na wena, kumbexana a mi tirhisa buku leyi nge Vutivi Lebyi Yisaka eVuton’wini Lebyi Nga Heriki. Kumbexana mi hete masiku yo hlayanyana mi nga si heta ndzima yin’we. U vuyeriwile loko matsalwa lama kombisiweke ma hlayiwa ma tlhela ma tlhuvutsiwa. Loko ku ri ni yinhla leyi u nga yi twisisiki, a wu hlamuseriwa yona. Loyi a a ku fambisela dyondzo ya Bibele a a lunghiselela kahle, a khongelela moya wa Xikwembu kutani a ku pfuna leswaku u tlangela ntiyiso swi huma embilwini.
7. I yini lexi endlaka leswaku munhu a fanelekela ku dyondzisa van’wana ntiyiso wa Xikwembu?
7 Matshalatshala lawa a ma fanerile, hikuva Pawulo u tsarile: “Mani na mani loyi a dyondzisiwaka rito hi nomu a a avelane swilo leswinene hinkwaswo ni loyi a nyikaka dyondzo yo tano ya nomu.” (Vagalatiya 6:6) Laha ndzimana ya Xigriki yi kombisa leswaku tidyondzo ta Rito ra Xikwembu a ti nghenisiwa emianakanyweni ni le mbilwini ya loyi ‘a dyondzisiwaka hi nomu.’ Ku dyondzisiwa hi ndlela yoleyo swi ta ku pfuna leswaku u fanelekela ku va mudyondzisi wa van’wana. (Mintirho 18:25) Leswaku u hanya hi ku pfumelelana ni ku tinyiketela ka wena, u fanele u hlayisa rihanyo ra wena ra moya u tlhela u tiya hi ku hambeta u dyondza Rito ra Xikwembu.—1 Timotiya 4:13; Tito 1:13; 2:2.
Tsundzuka Ku Hundzuka Ni Ku Cinca Ka Wena
8. Xana swi kotekisa ku yini leswaku munhu a hanya hi ndlela leyi kombisaka xichavo eka Xikwembu?
8 Xana wa ha yi tsundzuka ndlela leyi u tsakeke ha yona loko u dyondze ntiyiso, u hundzuka kutani u titwa leswaku Xikwembu xi ku rivalerile hikwalaho ka leswi u veke ni ripfumelo egandzelweni ra nkutsulo ra Yesu? (Pisalema 32:1-5; Varhoma 5:8; 1 Petro 3:18) Swi le rivaleni leswaku a wu swi lavi ku tlhelela evudyohweni. (2 Petro 2:20-22) Xin’wana lexi u faneleke ku xi endla i ku khongela eka Yehovha nkarhi na nkarhi leswaku a ku pfuna ku hanya hi ndlela leyi kombisaka xichavo eka yena, u namarhela ku tinyiketela ka wena naswona u hambeta u tirhela Yehovha hi ku tshembeka.—2 Petro 3:11, 12.
9. Leswi se hi fularheleke swiendlo swa vudyoho, hi yihi ndlela leyi hi faneleke hi famba ha yona?
9 Leswi se u hundzukeke u tshika swiendlo swa vudyoho, hambeta u lava mpfuno wa Xikwembu leswaku u hlayisa mbilu ya wena yi tiyile. Kahle-kahle, a wu famba hi gondzo leri hoxeke kambe u kambisise mepe lowu tshembekaka kutani u sungula ku famba hi gondzo leri lulameke. Sweswi u nga ha hambuki. Tshama u ri karhi u titshega hi nkongomiso wa Xikwembu kutani u tiyimisela ku tshama endleleni leyi yisaka evuton’wini.—Esaya 30:20, 21; Matewu 7:13, 14.
U Nga Ku Rivali Ku Tinyiketela Ni Ku Khuvuriwa Ka Wena
10. Hi tihi tinhla leti hi faneleke hi ti tsundzuka malunghana ni ku tinyiketela ka hina eka Xikwembu?
10 Tsundzuka leswaku u tinyiketele eka Yehovha hi xikhongelo, u tiyimisele ku n’wi tirhela hi ku tshembeka vutomi bya wena hinkwabyo. (Yudha 20, 21) Ku tinyiketela swi vula ku hlawuleriwa ku endla ntirho wo kwetsima. (Levhitika 15:31; 22:2) Ku tinyiketela ka wena a ku nga ri ntwanano wa xinkarhana kumbe ku tiboha evanhwini. A ku ri ku tinyiketela loku nga heriki eka Hosi ya Vuako Hinkwabyo, naswona ku hanya hi ku pfumelelana na kona swi lava leswaku u tshembeka eka Xikwembu vutomi bya wena hinkwabyo. Ina, ‘hambi ha hanya hambi hi file, hi va Yehovha.’ (Varhoma 14:7, 8) Lexi nga ta endla leswaku hi tshama hi tsakile i ku tiyimisela ku endla ku rhandza ka yena ni ku hamba hi n’wi tirhela hi mbilu leyi tiyeke.
11. Ha yini u fanele u tsundzuka ku khuvuriwa ka wena ni nkoka wa kona?
11 Minkarhi hinkwayo tsundzuka ku khuvuriwa ka wena loku kombiseke ku tinyiketela ka wena hi mbilu hinkwayo eka Xikwembu. A wu nga sindzisiwi ku khuvuriwa hikuva hi wena u nga tiendlela xiboho xa kona. Xana sweswi u tiyimiserile ku endla leswaku ku rhandza ka wena ku pfumelelana ni ku rhandza ka Xikwembu evuton’wini bya wena hinkwabyo? U kombele ripfalo lerinene eka Xikwembu kutani u khuvuriwa u kombisa ku tinyiketela ka wena eka xona. Hlayisa ripfalo ra wena lerinene hi ku hanya hi ku pfumelelana ni ku tinyiketela ka wena naswona u ta kuma nkateko lowu fuweke wa Yehovha.—Swivuriso 10:22.
Ntshunxeko Wa Wena Wu Hoxa Xandla
12, 13. Ku navela ka hina ku fambisana njhani ni ku tinyiketela ka hina ni nkhuvulo?
12 Hakunene, ku tinyiketela ni ku khuvuriwa ku tisele vanhu va timiliyoni emisaveni hinkwayo mikateko leyikulu. Loko hi kombisa ku tinyiketela ka hina eka Xikwembu hi ku khuvuriwa ematini, ha fa eka ndlela leyi a hi hanya hi yona khale kambe ntshunxeko hi va ha ha ri na wona. Tanihi vapfumeri lava leteriweke kahle, entiyisweni hi kombise ku navela ka hina loko hi tinyiketela eka Xikwembu hi xikhongelo kutani hi khuvuriwa. Ku tinyiketela ni ku khuvuriwa swi lava leswaku hi va hi tiva ku rhandza ka Xikwembu kutani hi tihlawulela ku ku endla. (Vaefesa 5:17) Xisweswo hi ta va hi tekelela Yesu, loyi a kombiseke ku navela ka yena kutani a tshika ntirho wa ku vatla, a khuvuriwa, ivi a tinyikela hi ku hetiseka leswaku a endla ku rhandza ka Tata wa yena wa le tilweni.—Pisalema 40:7, 8; Yohane 6:38-40.
13 Yehovha Xikwembu a a tiyimisele leswaku N’wana wa yena a endliwa a “hetiseka hi ku xaniseka.” Hikwalaho Yesu a a fanele a kombisa leswaku wa swi navela ku tiyisela ku xaniseka hi ku tshembeka. Hikwalaho u endle “swikombelo ni swikhongelo . . . hi swirilo swa matimba ni mihloti, naswona u twiwe hi tindleve timbirhi hikwalaho ka nchavo wakwe lowu nga ni vukwembu.” (Vaheveru 2:10, 18; 5:7, 8) Loko na hina hi chava Xikwembu hi ndlela yoleyo, ha tiyiseka leswaku hi ta ‘twiwa hi tindleve timbirhi,’ naswona hi nga tiyiseka leswaku Yehovha u ta hi endla hi tiya tanihi Timbhoni ta yena leti tinyiketeleke.—Esaya 43:10.
U Nga Yi Hlayisa Mbilu Leyi Tiyeke
14. Ha yini hi fanele hi hlaya Bibele siku na siku?
14 I yini lexi nga ta ku pfuna ku hlayisa mbilu leyi tiyeke xisweswo u hanya hi ku pfumelelana ni ku tinyiketela ka wena eka Xikwembu? Hlaya Bibele siku na siku hi xikongomelo xo engetela vutivi bya wena bya Rito ra Xikwembu. Sweswo hi leswi “hlonga ro tshembeka ni ro tlhariha” ri tshamelaka ku hi khutaza leswaku hi swi endla. Ndzayo yo tano yi nyikeriwa hikwalaho ka leswi ku hanya hi ku pfumelelana ni ku tinyiketela ka hina swi lavaka leswaku hi hambeta hi famba entiyisweni wa Xikwembu. Loko nhlengeletano ya Yehovha a yi dyondzisa tidyondzo ta mavunwa, Timbhoni ta Yehovha swin’we ni lava ti va chumayelaka a va nga ta tsundzuxiwa leswaku va hlaya Bibele.
15. (a) I yini leswi faneleke swi kambisisiwa loko ku endliwa swiboho? (b) Ha yini ku nga vuriwaka leswaku ntirho wa ku tihanyisa a hi nchumu wa nkoka ngopfu eka Mukreste?
15 Loko u endla swiboho, minkarhi hinkwayo anakanya hi ndlela leyi swi nga ku khumbaka ha yona ku tinyiketela ka wena eka Yehovha. Leswi swi nga ha khumba ni ntirho wa wena wa ku tihanyisa. Xana u lwela leswaku wu ku pfumelela ku yisa vugandzeri bya ntiyiso emahlweni? Hambileswi vathori hi ntolovelo va kumaka leswaku Vakreste lava tinyiketeleke va tshembeka naswona va tirha hi matimba, va tlhela va swi xiya leswaku Timbhoni ta Yehovha a ti tilaveli swikhundlha emisaveni naswona a ti phikizani ni van’wana leswaku ti kuma swikhundlha swa le henhla swinene. Leswi swi vangiwa hileswi pakani ya Timbhoni ku nga riki ku kuma rifuwo, ndhuma, xikhundlha kumbe vulawuri. Nchumu wa nkoka swinene eka lava va hanyaka hi ku pfumelelana ni ku tinyiketela ka vona eka Xikwembu, i ku endla ku rhandza ka Xikwembu. Ntirho wa ku tihanyisa lowu endlaka leswaku va kota ku ya emahlweni ni vutomi a hi wa nkoka ngopfu. Ku fana na muapostola Pawulo, ntirho wa vona lowukulu i vutirheli bya Vukreste. (Mintirho 18:3, 4; 2 Vatesalonika 3:7, 8; 1 Timotiya 5:8) Xana u rhangisa timhaka ta Mfumo evuton’wini bya wena?—Matewu 6:25-33.
16. Hi nga endla yini loko mivilelo leyi nga fanelangiki yi endla swi hi tikela ku hanya hi ku pfumelelana ni ku tinyiketela ka hina eka Xikwembu?
16 Van’wana va nga ha va va tshame va lava ku hluriwa hi mivilelo yo hambana-hambana loko va nga si dyondza ntiyiso. Kambe timbilu ta vona ti khape swinene hi ntsako, ku tlangela ni ku rhandza Xikwembu loko va amukele ntshembo wa Mfumo! Loko va anakanyisisa hi mikateko leyi va yi kumeke ku sukela hi nkarhi wolowo swi nga ha va pfuna leswaku va hanya hi ku pfumelelana ni ku tinyiketela ka vona eka Yehovha. Hi hala tlhelo, ku vuriwa yini loko ku vilela lokukulu malunghana ni swiphiqo leswi nga kona evuton’wini emafambiselweni lawa ya swilo swi lava ku kamanyeta “rito ra Xikwembu,” ku fana ni mitwa leyi yi nga ha sivelaka mbewu leswaku yi nga kuli kahle? (Luka 8:7, 11, 14; Matewu 13:22; Marka 4:18, 19) Loko u vona onge leswi se swa endleka eka wena kumbe endyangwini wa wena, lahlela ku vilela ka wena eka Yehovha kutani u khongelela leswaku a ku pfuna ku hlakulela rirhandzu ni ku tlangela ka wena. Loko u lahlela ndzhwalo wa wena eka yena, u ta ku tiyisa a tlhela a ku nyika matimba ya ku hambeta u n’wi tirhela u tsakile hi mbilu leyi tiyeke.—Pisalema 55:22; Vafilipiya 4:6, 7; Nhlavutelo 2:4.
17. Hi nga swi kotisa ku yini ku langutana ni miringo leyikulu?
17 Tshama u ri karhi u khongela eka Yehovha Xikwembu nkarhi na nkarhi, tanihi leswi u khongeleke loko u tinyiketela eka yena. (Pisalema 65:2) Loko u ringiwa leswaku u endla swilo leswi hoxeke kumbe loko u langutane ni ndzingo lowukulu, kombela nkongomiso ni mpfuno wa Xikwembu u tlhela u swi namarhela. Tsundzuka leswaku u fanele u va ni ripfumelo, hikuva mudyondzisiwa Yakobo u tsarile: “Loko mani na mani eka n’wina a kayivela vutlhari [bya ku kota ku langutana ni ndzingo], a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona. Kambe a a hambete a kombela hi ripfumelo, a nga kanakani nikatsongo, hikuva loyi a kanakanaka u fana ni gandlati ra lwandle leri fambisiwaka hi mheho ri hungeriwa hala ni hala. Entiyisweni, munhu yoloye a nga tshuki a ehleketa leswaku u ta amukela nchumu hambi wu ri wihi eka Yehovha; i munhu la nga tiyisekiki, loyi a nga yimangiki a tiya etindleleni ta yena hinkwato.” (Yakobo 1:5-8) Loko ndzingo wu tikomba wu ri wukulu ngopfu, hi nga tiyiseka hi mhaka leyi: “A mi si weriwa hi ndzingo loko wu nga ri lowu tolovelekeke evanhwini. Kambe Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.”—1 Vakorinto 10:13.
18. Hi nga endla yini loko xidyoho lexikulu lexi fihliweke xi tsanisa xiboho xa hina xa ku hanya hi ku pfumelelana ni ku tinyiketela eka Yehovha?
18 Ku vuriwa yini loko xidyoho lexikulu lexi tumbetiweke xi karhata ripfalo ra wena naswona xi tsanisa xiboho xa wena xa ku hanya hi ku pfumelelana ni ku tinyiketela eka Xikwembu? Loko u hundzuka, u nga chaveleleka hi ku tiva leswaku Yehovha ‘a nge yi languteli ehansi mbilu leyi tshovekeke yi tlhela yi pfotloseka.’ (Pisalema 51:17) Lava mpfuno wa vakulu va Vakreste lava nga ni rirhandzu, u ri karhi u swi tiva leswaku—hi ku tekelela Yehovha—a va nge ku tekeli ehansi ku navela ka wena ku tlhela u va ni vuxaka lebyinene na Tata wa wena wa le tilweni. (Pisalema 103:10-14; Yakobo 5:13-15) Tanihi leswi u nga ta va u ri ni matimba lamantshwa ya moya ni mbilu leyi tiyeke, u ta kota ku lulamisa tindlela ta wena, u hanya hi ku pfumelelana ni ku tinyiketela ka wena eka Xikwembu.—Vaheveru 12:12, 13.
Hambeta U Tirha Hi Mbilu Leyi Tiyeke
19, 20. Ha yini swi ri swa nkoka leswaku hi hambeta hi hanya hi ku pfumelelana ni ku tinyiketela ka hina?
19 Eminkarhini leyi yo nonon’hwa, hi fanele hi lwela ku hanya hi ku pfumelelana ni ku tinyiketela ka hina kutani hi hambeta hi tirhela Xikwembu hi mbilu leyi tiyeke. Yesu u te: “Loyi a tiyiseleke ku fika emakumu hi yena la nga ta ponisiwa.” (Matewu 24:13) Tanihi leswi hi hanyaka “emasikwini yo hetelela,” makumu ma nga ha fika nkarhi wun’wana ni wun’wana. (2 Timotiya 3:1) Ku tlula kwalaho, a nga kona ni un’we wa hina la nga tiyisekaka leswaku u ta va a hanya mundzuku. (Yakobo 4:13, 14) Hikwalaho i swa nkoka namuntlha leswaku hi hambeta hi hanya hi ku pfumelelana ni ku tinyiketela ka hina!
20 Muapostola Petro u swi kandziyisile leswi eka papila ra yena ra vumbirhi. U kombise leswaku tanihi leswi vanhu lava nga chaviki Xikwembu va lovisiweke hi Ndhambhi, kutani misava yo fanekisela, kumbe vanhu vo homboloka, va ta lovisiwa hi “siku ra Yehovha.” Hikwalaho Petro u te: “Mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu”! U tlhele a va khutaza: “N’wina varhandziwa, leswi mi kumeke vutivi lebyi ka ha ri emahlweni, tivoneleni leswaku mi nga hambukisiwi [hi vadyondzisi va mavunwa ni vanhu lava nga chaviki Xikwembu] kutani mi wa eku tserhameni ka n’wina.” (2 Petro 3:5-17) Swi nga khomisa gome hakunene loko munhu la khuvuriweke a hambuka kutani a fa a tsandzeke ku hlayisa mbilu leyi tiyeke!
21, 22. Marito ya Pisalema 57:7 ma tikombe njhani ma ri ntiyiso emhakeni ya Davhida ni le ka Vakreste va ntiyiso?
21 Xiboho xa wena xa ku hanya hi ku pfumelelana ni ku tinyiketela eka Xikwembu xi nga tiya loko u hambeta u tsundzuka siku leri tsakisaka ra ku khuvuriwa ka wena kutani u lava mpfuno wa Xikwembu leswaku marito ya wena ni swiendlo swa wena swi ta tsakisa mbilu ya xona. (Swivuriso 27:11) Yehovha a nga va khomisi tingana vanhu va yena kutani na hina hi fanele hi tshembeka eka yena. (Pisalema 94:14) U kombise musa ni ntwela-vusiwana hi ku herisa makungu ya valala va Davhida kutani a n’wi kutsula. Hi ku tlangela leswi, Davhida u vulavule hi rirhandzu leri tiyeke, leri nga tsekatsekiki leri a nga na rona eka Mukutsuri wa yena. U yimbelele a khumbeke swinene a ku: “Oho Xikwembu, mbilu ya mina yi yime yi tiya, mbilu ya mina yi yime yi tiya. Ndzi ta yimbelela ndzi ba miloti.”—Pisalema 57:7.
22 Ku fana na Davhida, Vakreste va ntiyiso a va tsekatsekanga eku tinyiketeleni ka vona eka Xikwembu. Hi timbilu leti tiyeke va vula leswaku va kutsuriwe hi Yehovha va tlhela va hlayisiwa hi yena, kutani va n’wi yimbelelela swidzuniso hi ntsako. Loko mbilu ya wena yi tiyile, yi ta titshega hi Xikwembu naswona xi ta ku pfuna leswaku u kota ku hetisisa ku tinyiketela ka wena eka xona. Ina, u nga fana ni “lowo lulama” loyi mupisalema a yimbeleleke ha yena a ku: “A nge ma chavi ni mahungu yo biha. Mbilu yakwe yi yime yi tiya, yi endliwe leswaku yi tshembela eka Yehovha.” (Pisalema 112:6, 7) Loko u ri ni ripfumelo eka Xikwembu naswona u titshege hi xona hi ku helela, u nga hanya hi ku pfumelelana ni ku tinyiketela ka wena eka Yehovha kutani u hambeta u n’wi tirhela hi mbilu leyi tiyeke.
Wa Tsundzuka Xana?
• Ha yini hi fanele hi hambeta hi tswonga vutivi lebyi kongomeke bya Bibele?
• Ha yini hi fanele hi tsundzuka ku hundzuka ni ku cinca ka hina?
• Hi vuyeriwa njhani hi ku tsundzuka ku tinyiketela ni ku khuvuriwa ka hina?
• I yini lexi nga ta hi pfuna leswaku hi hambeta hi tirhela Yehovha hi mbilu leyi tiyeke?
[Swivutiso Swa Dyondzo]
[Swifaniso leswi nga eka tluka 18]
Xana u hlayisa rihanyo ra wena ra moya hi ku hlaya Rito ra Xikwembu siku ni siku?
[Xifaniso lexi nga eka tluka 18]
Loko hi hambeta hi rhangisa vutirheli bya Vukreste swi ta hi pfuna leswaku hi ya emahlweni hi tirhela Yehovha hi mbilu leyi tiyeke