Munhu Wa Dyondza Hambiloko A Dyuhele

KSENIYA u velekiwe hi 1897. A a ri ni vana vanharhu va xisati, jaha rin’we, 15 wa vatukulu, ni 25 wa vatukulu-xinguwe. Evuton’wini bya yena hinkwabyo u endle leswi vatswari va yena va n’wi dyondziseke swona. Hambileswi a yeke a ya tshama eMoscow a ri mubaleki la humaka eRiphabliki ra Abkhaz leri hlakatiweke hi nyimpi, leri kumekaka exikarhi ka Lwandle ra Ntima na Caucasus, a a enerisekile swinene hi vutomi bya yena, ngopfu-ngopfu hi leswi a a swi vula ripfumelo leri a siyeriweke rona tanihi ndzhaka.

Hi lembe ra 1993, Meri, loyi ku nga n’wana wa nhwanyana wa Kseniya u ve un’wana wa Timbhoni ta Yehovha. Meri u sungule ku vulavula na Kseniya mayelana na Yehovha Xikwembu ni Bibele, kambe a nga lavanga ku yingisa. Kseniya a a tshamela ku byela n’wana wa yena a ku, “Ndzi siyiwe hi nkarhi wo dyondza swilo leswintshwa.”

Hambiswiritano, n’wana wa yena Meri; nsati wa ntukulu wa yena, Londa; ni vatukulu-xinguwe va yena ku nga Nana na Zaza, lava hinkwavo va veke Timbhoni ta Yehovha, va ye emahlweni va vulavula na yena hi Bibele. Siku rin’wana nimadyambu hi lembe ra 1999, va hlayele Kseniya tsalwa leri n’wi khumbeke mbilu. A ri tamele marito lama khutazaka lawa Yesu a ma byeleke vaapostola vo tshembeka loko a simeka Xilalelo xa Hosi. (Luka 22:19, 20) Hi madyambu wolawo, Kseniya u endle xiboho xo dyondza Bibele, a ri ni malembe ya 102.

Kseniya u ri: “Endzhaku ko hanya malembe ya 102, ndzi hetelele ndzi tive xikongomelo xa vutomi. Sweswi ndza swi xiya leswaku a ku na nchumu xo antswa ku tlula ku tirhela Yehovha, Xikwembu xa hina xo hlamarisa ni lexi nga ni rirhandzu. Mianakanyo ya mina ya ha tirha kahle naswona ndzi hanye kahle emirini. Ndzi kota ku hlaya handle ko tirhisa manghilazi ya mahlo naswona ndzi hlanganyela hi ku chivirika ni vandyangu wa mina.”

Hi November 5, 2000, Kseniya u khuvuriwile. U ri: “Sweswi ndzi nyikela vutomi bya mina eka Yehovha leswaku ndzi n’wi tirhela hi rirhandzu. Ndzi fambisa timagazini ni swiphephana ndzi tshame ehansi exiticini xa mabazi ekusuhi ni kaya ra mina. Maxaka ma tala ku endza, naswona ndzi tsakela ku ma byela ntiyiso mayelana na Yehovha.”

Kseniya u ri langutele hi mahlo-ngati siku leri ‘nyama yakwe yi nga ta va yintshwa ku tlula evuntshweni, naswona a vuyela emasikwini ya matimba yakwe ya vuntswa.’ (Yobo 33:25) Loko munhu la nga ni malembe yo tlula dzana a titwa a nga siyiwanga hi nkarhi wa ku dyondza xikongomelo xa vutomi eBibeleni, ku vuriwa yini hi wena?