Tshamani Mi Hitekile, Mi Ya eMahlweni Hi Vurhena!

Xiviko xa Minhlangano Yo Hlawuleka

I MANI la nga alaka leswaku hi hanya “[eminkarhini] ya mangava leyi swi nonon’hwaka ku langutana na yona”? Hina tanihi Timbhoni ta Yehovha a hi sirhelelekanga eka mintshikilelo yo hanya “emasikwini yo hetelela.” (2 Timotiya 3:1-5) Kambe ha swi xiya leswaku vanhu va lava mpfuno. A va swi twisisi leswi swiyimo swa misava swi vulaka swona. Va lava nchavelelo ni ntshembo. Hi byihi vutihlamuleri lebyi nga emakatleni ya hina malunghana ni ku pfuna vanhu-kulorhi?

Hi na ntirho lowu hi wu nyikiweke hi Xikwembu wo avelana ni van’wana mahungu lamanene ya Mfumo wa Xikwembu lowu simekiweke. (Matewu 24:14) Vanhu va fanele va swi tiva leswaku Mfumo lowu wa le matilweni hi wona ntsena ntshembo wu ri woxe wa vanhu. Hambiswiritano, rungula ra hina a ri nge amukeriwi hi vanhu hinkwavo. Etindhawini tin’wana ntirho wa hina wu yirisiwile naswona vamakwerhu va xanisiwile. Hambiswiritano, a hi wi mapa. Tanihi leswi hi tshembaka Yehovha hi ku helela, hi tiyimisele ku tshama hi hitekile ni ku ya emahlweni hi vurhena, hi vula mahungu lamanene handle ko hela matimba.—Mintirho 5:42.

Ku tiyimisela koloko ku vonake eminhlanganweni yo hlawuleka leyi veke kona hi October 2001. Hi Mugqivela, October 6, nhlangano wa lembe na lembe wa Watch Tower Bible and Tract Society of Pennsylvania wu ve kona eHolweni ya Tinhlengeletano ya Timbhoni ta Yehovha eJersey City, New Jersey, le United States. * Eka siku leri landzeleke, ku ve ni minhlangano yin’wana etindhawini ta mune, yinharhu yi ve kona eUnited States, kasi wun’wana wu khomeriwe le Canada. *

Eka marito yakwe yo sungula eka nhlangano wa lembe na lembe, mutshama-xitulu, Samuel F. Herd, xirho xa Huvo leyi Fumaka ya Timbhoni ta Yehovha, u vulavule hi Pisalema 92:1, 4 kutani a ku: “Hi lava ku tikombisa hi ri lava nkhensaka.” Hakunene, swivangelo swo va lava nkhensaka swi nyikeriwile eka swiviko swa ntlhanu swo huma emisaveni hinkwayo.

Swiviko Swo Huma eTindhawini Hinkwato

Makwerhu Alfred Kwakye u vulavule hi nhluvuko wa ntirho wa ku chumayela etikweni ra Ghana leri khale a ri vitaniwa Gold Coast. Ntirho wa hina endhawini yoleyo a wu yirisiwile ku ringana  malembe yo tala. Vanhu a va vutisa: “Hikwalaho ka yini mi yirisiwa? Mi endle yini?” Leswi swi pfulele tindlela to nyikela vumbhoni, ku hlamusela Makwerhu Kwakye. Hi lembe ra 1991 loko ku yirisiwa ku fika emakumu, a ku ri ni Timbhoni ta Yehovha to ringana 34 421 eGhana. Hi August 2001, nhlayo ya tona a yi ri 68 152—ku andza ka 98 wa tiphesente. Sweswi ku endliwa makungu ya ku aka Holo ya Tinhlengeletano leyi nga ni switulu swa 10 000. Swi le rivaleni leswaku vamakwerhu va moya va le Ghana va tirhisa ntshunxeko wa vona wa vukhongeri hi ndlela leyi vuyerisaka.

Hambileswi ku nga ni mpfilumpfilu wa tipolitiki, vamakwerhu eIreland va hlanganyela hi ku chivirika ensin’wini, naswona va xiximiwa hikwalaho ka vukala-tlhelo bya vona. Ireland ri ni 115 wa mavandlha eka swifundzha swa 6, ku vula Mulanguteri wa Rhavi, ku nga Peter Andrews. Makwerhu Andrews u vulavule hi ntokoto wa Liam, jaha ra malembe ya khume leri handle ko chava ri nyikelaka vumbhoni exikolweni. Liam u fambise Buku Yanga Ya Timhaka Ta Bibele, leyi kandziyisiweke hi Timbhoni ta Yehovha, eka vadyondzi-kulobye va 25 kun’we ni mudyondzisi wakwe. Liam a a lava ku khuvuriwa, kambe un’wana u vutisile malunghana ni vutsongo bya yena. Liam u hlamurile: “A swi yi hi malembe ya mina kambe swi ya hi rirhandzu leri ndzi nga na rona eka Yehovha. Ku khuvuriwa ka mina ku ta kombisa ndlela leyi ndzi n’wi rhandzaka ha yona.” Pakani ya Liam i ku va murhumiwa.

Hi lembe ra 1968 a ku ri ni vahuweleri va mahungu lamanene vo ringana 5 400 eVenezuela. Kambe sweswi ku ni vahuweleri vo tlula 88 000, ku vula Stefan Johansson, Mulanguteri wa Rhavi. Naswona swi nga endleka leswaku nhlayo yi engeteleka hikuva ku ve ni vanhu vo tlula 296 000 eXitsundzuxweni hi lembe ra 2001. Hi December 1999, timpfula letikulu ti vange ndzhope lowu dlayeke vanhu va kwalomu ka 50 000, ku katsa ni Timbhoni to hlaya. Holo ya Mfumo yin’wana a yi tele hi ndzhope, lerova ku sala mpfhuka wo ringana hafu ya mitara ku suka esilingini. Loko un’wana a ringanyete leswaku muako lowu wu nga ha tirhisiwi, vamakwerhu va hlamurile: “Wo namba u rivala hi sweswo! Leyi i Holo ya hina ya Mfumo, naswona a hi lavi ku yi tshika.” Va sungule ku tirha, va susa ndzhope, maribye ni swilo swin’wana swo tala. Muako wu lunghisiwile, naswona vamakwerhu va vula leswaku sweswi wu sasekile swinene, ku tlula loko wu nga si weriwa hi mhangu!

Ku vulavuriwa tindzimi to ringana 87 etikweni ra Philippines, ku vula Makwerhu Denton Hopkinson, Mulanguteri wa Rhavi. Eka lembe ra ntirho leri hundzeke, Vuhundzuluxeri Bya Misava Leyintshwa Bya Matsalwa Yo Kwetsima byi humesiwile hi tindzimi tinharhu leti tirhisiwaka ngopfu  etikweni rero—Xicebuano, Xiiloko ni Xitagalog. Makwerhu Hopkinson u vulavule hi ntokoto wa jaha ra malembe ya kaye leri hlayeke buku leyi nge Good News—To Make You Happy, leyi kandziyisiweke hi Timbhoni ta Yehovha. U kume minkandziyiso yin’wana erhavini, leyi na yona a yi hlayeke, kambe vandyangu wa yena a va n’wi kaneta. Endzhaku ka malembe loko se a ri exikolweni xa vutshunguri, u vulavurisane ni rhavi a kombela dyondzo ya Bibele. U khuvuriwile hi lembe ra 1996 naswona hi ku hatlisa u nghenele vutirheli bya nkarhi hinkwawo. Sweswi u tirha ni nsati wa yena erhavini.

‘Puerto Rico ri le ntirhweni wo “rhumela Timbhoni” ematikweni man’wana,’ ku hlamusela Mulanguteri wa Rhavi, Ronald Parkin. Ku na vahuweleri va kwalomu ka 25 000 exihlaleni lexi naswona swi teke malembe nhlayo yoleyo yi nga cinci. Hikwalaho ka yini? Ku ringanyetiwa leswaku Puerto Rico ri “rhumela” vahuweleri va kwalomu ka 1 000 hi lembe eUnited States, laha vo tala va yaka kona hi swivangelo swa ikhonomi. Makwerhu Parkin u rungule hi ta xiboho xo hlawuleka xa huvo lexi katsaka Luis, Mbhoni ya malembe ya 17, loyi a a ri ni khensa ya le ngatini. Leswi Luis a aleke mpompelo wa ngati, mhaka ya yena yi yisiwe ehubyeni. Muavanyisi a a lava ku vulavula na yena hi ku kongoma, hikwalaho u n’wi endzerile exibedlhele. Luis u n’wi vutisile: “Swi tisa ku yini leswaku, loko a ndzi endle vugevenga lebyikulu, a wu ta ndzi avanyisa tanihi munhu lonkulu, kambe loko ndzi lava ku yingisa Xikwembu, u ndzi languta ndzi ri n’wana?” Muavanyisi u khorwisekile leswaku a a ri n’wana la wupfeke naswona wa swi kota ku tiendlela swiboho hi yexe.

Endzhaku ka swiviko swa le matikweni ya le kule, Harold Corkern, wa Komiti ya Rhavi ra le United States, u vulavurisane ni vamakwerhu va mune lava ku nga khale va tirhela Yehovha. Arthur Bonno u hete malembe ya 51 eka ntirho wa nkarhi hinkwawo naswona sweswi i xirho xa Komiti ya Rhavi ra le Ecuador. Angelo Catanzaro u hete 59 wa malembe eka ntirho wa nkarhi hinkwawo, laha yo tala ya wona a ma heteke a ri mulanguteri la famba-fambaka. Richard Abrahamson u thwase eXikolweni xa Gilead hi lembe ra 1953, naswona u ve ni lunghelo ro va mulanguteri wa ntirho eDenmark ku ringana malembe ya 26 a nga si tlhelela eBethele ya Brooklyn. Eku heteleleni hinkwavo a va tsakile ku twa Carey W. Barber wa malembe ya 96 hi vukhale. Makwerhu Barber la khuvuriweke hi lembe ra 1921, u hete 78 wa malembe a ri mutirheli wa karhi hinkwawo naswona u ve xirho xa Huvo leyi Fumaka ku sukela hi lembe ra 1978.

Tinkulumo Leti Khutazaka

Nhlangano wa lembe na lembe a wu ri ni ntlhandlamano wa tinkulumo leti tlhontlhaka mianakanyo. Makwerhu Robert W. Wallen u vulavule hi nhloko-mhaka leyi nge “Vanhu Lava Fambisanaka Na Vito Ra Xona.” Hi vitaniwa hi vito ra Xikwembu, naswona hi kumeka ematikweni yo tlula 230. Yehovha u hi nyike “vumundzuku ni ntshembo.” (Yeremiya 29:11) Hi fanele hi hambeta hi twarisa Mfumo wa Xikwembu, hi byela van’wana rungula lerinene ra nchavelelo. (Esaya 61:1) Makwerhu Wallen u gimete hi ku: “Onge siku na siku hi nga hambeta hi hanya hi vito leri hi vitaniwaka hi rona leri nge, Timbhoni ta Yehovha.”—Esaya 43:10.

Xiphemu xo hetelela xa nongonoko a ku ri ni tinkulumo tinharhu to siyerisana leti a ti nyikeriwa hi swirho swa Huvo leyi Fumaka. Nhloko-mhaka ya kona a yi ku “Sweswi I Nkarhi Wo Tshama Hi Hitekile, Hi Yima Hi Tiyile, Naswona Hi Va Ni Matimba.”—1 Vakorinto 16:13.

Xo sungula, Makwerhu Stephen Lett u vulavule hi nhloko-mhaka leyi nge “Tshama U Hitekile eNkarhini Lowu Wa Makumu.” Vurhongo bya xiviri i nyiko, ku hlamusela Makwerhu Lett. Loko hi pfuka hi va hi ri ni matimba. Kambe ku etlela hi tlhelo ra moya a swi vuyerisi. (1 Vatesalonika 5:6) Kutani hi ta endla yini leswaku hi tshama hi xalamukile hi tlhelo ra moya? Makwerhu Lett u xaxamete “maphilisi” manharhu ya moya: (1) Vana ni swo tala swo swi endla entirhweni wa Hosi. (1 Vakorinto 15:58) (2) Xalamukela xilaveko xa wena xa moya. (Matewu 5:3) (3) Amukela ndzayo leyi humaka eBibeleni leswaku u endla swilo hi vutlhari.—Swivuriso 13:20.

Makwerhu Theodore Jaracz u nyikele nkulumo leyi khutazaka leyi nge “Tshama U Tiyile eHansi Ka Ndzingo.” Loko a kombetela eka Nhlavutelo 3:10, Makwerhu Jaracz u vutisile: “Hi wihi ‘nkarhi wa ndzingo’?” Ndzingo wolowo wu ta “esikwini ra Hosi,” laha hi nga kona. (Nhlavutelo 1:10) Ndzingo wa kona wu katsa mhaka ya nkoka—xana hi  seketela Mfumo wa Xikwembu lowu simekiweke kumbe mafambiselo ya swilo ya Sathana lama hombolokeke? Loko nkarhi wolowo wu nga si hela, hi boheka ku langutana ni miringo kumbe swiphiqo. Xana hi ta tshama hi tshembekile eka Yehovha ni nhlengeletano ya yena? Makwerhu Jaracz u te: ‘Un’wana ni un’wana u fanele a kombisa ku tshembeka koloko hi yexe.’

Eku heteleleni Makwerhu John E. Barr u vulavule hi nhloko-mhaka leyi nge “Vana Ni Matimba Tanihi Munhu Wa Moya.” Loko a kombetela eka Luka 13:23-25, u vule leswaku hi fanele hi tikarhata hi matimba leswaku hi “nghena hi nyangwa yo khuma.” Vo tala va tsandzeka hikuva a va tikarhateli ku kuma matimba. Leswaku hi va Vakreste lava kuleke hi ku helela, hi fanele hi dyondza ku tirhisa misinya ya milawu ya Bibele etimhakeni hinkwato leti khumbaka vutomi bya hina. Makwerhu Barr u khutazile: “Ndza tshemba leswaku u ta pfumela leswaku sweswi i nkarhi wa ku (1) rhangisa Yehovha emahlweni; (2) hi va ni matimba; naswona (3) hi tikarhatela ku endla ku rhandza ka Yehovha. Hi ndlela leyi hi ta swi kota ku nghena hi nyangwa yo khuma leyi yisaka evuton’wini lebyi tsakisaka lebyi nga heriki.”

Loko nhlangano wa lembe na lembe wu hela, a ku ri ni xivutiso xin’we lexi a xi nga hlamuriwanga: Hi yihi ndzimana ya lembe ra 2002? Xivutiso xolexo xi hlamuriwe eka siku leri landzelaka.

Nhlangano Wun’wana

A ku languteriwe leswikulu hi Sonto nimixo loko ku sungula nongonoko wa nhlangano wun’wana. Ku sunguriwe hi nkomiso wa dyondzo ya Xihondzo xo Rindza ya vhiki, ku landzela nkatsakanyo wa tinhla-nkulu ta nhlangano wa lembe na lembe. Endzhaku, hinkwavo a va tsakile ku twa nkulumo ya ndzimana ya lembe ra 2002: “Tanani eka mina, . . . ndzi ta mi phyuphyisa.” (Matewu 11:28) Nkulumo leyi a yi sekeriwe eka swihloko leswi endzhakunyana swi humesiweke enkandziyisweni wa Xihondzo xo Rindza xa December 15, 2001.

Endzhaku ka sweswo, van’wana lava yeke eMintsombanweni yo hlawuleka ya “Vadyondzisi Va Rito Ra Xikwembu” le Furwa ni le Italiya hi August 2001, va hlamusele leswi va tivoneleke swona. * Eku heteleleni, nongonoko wa siku leri wu hlawulekisiwe hi tinkulumo timbirhi to hetelela leti nyikeriweke hi swivulavuri swimbirhi swo huma eBethele ya Brooklyn.

Nkulumo yo sungula a yi ku “Ku Tshemba Yehovha Hi Ku Helela eMinkarhini Leyi Ya Mangava.” Xivulavuri xi ndlandlamuxe tinhla-nkulu leti landzelaka: (1) Ku tshemba Yehovha hi ku helela minkarhi hinkwayo ku tshame ku ri mhaka ya nkoka eka vanhu va Xikwembu. Bibele yi tamele swikombiso swo tala swa lava va kombiseke vurhena ni ripfumelo loko va langutane ni nkaneto. (Vaheveru 11:1–12:3) (2) Yehovha u hi nyika xivangelo lexi twalaka xa ku n’wi tshemba hi ku helela. Mintirho ya yena ni Rito ra yena swi tiyisekisa leswaku wa khathala hi malandza ya yena naswona a nge ma rivali. (Vaheveru 6:10) (3) Vurhena ni ntshembo hi swona leswi lavekaka swinene namuntlha. Ha “vengiwa,” hilaha Yesu a vuleke hakona. (Matewu 24:9) Leswaku hi kota ku tiyisela, hi fanele hi tshemba Rito ra Xikwembu, hi tiyiseka leswaku moya wa xona wu na hina, hi tlhela hi va ni xivindzi xo hambeta hi chumayela mahungu lamanene. (4) Swikombiso swi komba leswaku sweswi hi langutane ni nkaneto. Hinkwavo va twe va khumbekile loko xivulavuri xi hlamusela leswi vamakwerhu va swi tiyiseleke eArmenia, Furwa, Georgia, Kazakhstan, Rhaxiya, ni le Turkmenistan. Entiyisweni, sweswi i nkarhi wo kombisa vurhena ni ntshembo eka Yehovha!

Xivulavuri xo hetelela xi ndlandlamuxe nhloko-mhaka leyi nge “Ku Fambisana Ni Nhlengeletano Ya Yehovha.” Nkulumo leyi yi hlanganise tinhla to hlaya leti nga enkarhini. (1) Nhluvuko wa vanhu va Yehovha wa xiyiwa swinene. Ntirho wa hina wo chumayela ni mintsombano ya hina swi endla leswaku vanhu va kota ku hi lemuka. (2) Yehovha u simeke nhlengeletano leyi nga ni vun’we.  Hi lembe ra 29 C.E., Yesu u totiwe hi moya lowo kwetsima leswaku a hlengeleta “swilo hinkwaswo”—lava nga ni ntshembo wa ku ya hanya ematilweni swin’we ni lava nga ni ntshembo wa ku hanya laha misaveni—leswaku swi vumba ndyangu wa Xikwembu lowu nga ni vun’we. (Vaefesa 1:8-10) (3) Mintsombano i xikombiso xo hlawuleka xa vun’we bya vamakwerhu emisaveni hinkwayo. Sweswo swi vonake kahle emintsombanweni yo hlawuleka leyi veke kona hi August eFurwa ni le Italiya. (4) Xiboho lexi nyanyulaka xi amukeriwile eFurwa ni le Italiya. Xivulavuri xi tshahe marito ma nga ri mangani ya xiboho xexo lexi nyanyulaka. Tinhlamuselo hinkwato ta xiboho ti kumeka laha hansi.

Emahetelelweni ya nkulumo yo gimeta, xivulavuri lexi endzeke xi hlaye xitiviso lexi khumbaka swinene lexi lunghiseleriweke hi Huvo leyi Fumaka. Hi ku komisa a xi ku: “Lowu i nkarhi wa ku tshama hi hitekile, hi twisisa leswi swiendlakalo swa misava swi vulaka swona. . . . Hi mi tivisa leswaku Huvo leyi Fumaka ya khathala swinene hi n’wina ni hi vanhu va Xikwembu hinkwavo. Onge xi nga mi katekisa swinene loko mi ri karhi mi endla ku rhandza ka xona hi moya-xiviri hinkwawo.” Etindhawini hinkwato vanhu va Yehovha va tiyimisele ku tshama va hitekile eminkarhini leyi ya mangava ni ku hambeta va famba hi vurhena ni nhlengeletano ya Yehovha leyi nga ni vun’we.

[Tinhlamuselo ta le hansi]

[Bokisi/Swifaniso leswi nga eka tluka 29-31]

Xiboho

Hi August 2001, ku ve ni Mintsombano yo hlawuleka ya “Vadyondzisi Va Rito Ra Xikwembu” eFurwa ni le Italiya. Eka mintsombano yoleyo, ku endliwe xiboho lexi nyanyulaka. Xiboho xa kona a xi vula leswi landzelaka.

“TANIHI Timbhoni ta Yehovha, hinkwerhu ka hina lava hi hlengeletaneke eNtsombanweni lowu wa ‘Vadyondzisi Va Rito Ra Xikwembu’ hi leteriwe hi dyondzo leyi vuyerisaka swinene. Xihlovo xa dyondzo leyi xi kombisiwe kahle. Dyondzo leyi a yi humi eka munhu wa nyama. Yi huma eka Loyi Esaya, muprofeta wa khale a n’wi vuleke ‘Muleteri wa hina Lonkulu.’ (Esaya 30:20) Xiya xitsundzuxo xa Yehovha lexi vuriweke eka Esaya 48:17: ‘Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.’ Xana leswi u swi hetisisa njhani? Ngopfu-ngopfu sweswo u swi endla hi ku tirhisa buku leyi hundzuluxeriweke ni ku hangalasiwa ku tlula hinkwato emisaveni, ku nga Bibele, leyi yi hi byelaka yi nga jikajiki yi ku: ‘Matsalwa hinkwawo ma huhuteriwe hi Xikwembu naswona ma pfuna.’—2 Timotiya 3:16.

“Namuntlha, vanhu va yi lava hakunene dyondzo yo tano leyi vuyerisaka. Ha yini hi vula sweswo? Loko vanhu lava twisisaka va languta xiyimo xa misava leyi lexi cincaka ni lexi rharhanganeke, xana va fikelela makumu wahi? Leswaku: Hambileswi vanhu va timiliyoni va dyondzisiweke hi mafambiselo ya dyondzo ya misava, a va na mahanyelo lamanene naswona a va swi koti ku hambanisa xilo xo saseka ni xo biha. (Esaya 5:20, 21) Vo tala a va tivi nchumu hi Bibele. Hambileswi thekinoloji yi kotaka ku hi nyika rungula ro tala hi ku tirhisa tikhompyuta, xana yi nga swi kota ku hlamula swivutiso swa nkoka swo fana ni leswi nge, Xikongomelo xa vutomi hi xihi? Xana hi nga swi twisisa njhani swiendlakalo swa minkarhi ya hina? Xana wu kona ntshembo lowu tiyeke hi vumundzuku? Xana ku rhula ni nsirhelelo swi ta pfuka swi ve kona? Ku tlula kwalaho, etilayiburari ku ni timiliyoni ta tibuku leti vulavulaka hi timhaka hinkwato ta munhu. Hambiswiritano, vanhu va ha phindha swihoxo swa le nkarhini lowu hundzeke. Vugevenga bya andza. Mavabyi lama a ku ehleketiwa leswaku ma fambile ma tlhele ma vuya, kasi man’wana yo tanihi AIDS (SIDA), ma hangalaka hi ndlela yo chavisa. Mindyangu yi hahluka hi ndlela leyi hetaka matimba. Mbango wa thyakisiwa. Vutherorisi ni matlhari yo  yayarhela vanhu swi xungeta ku rhula ni nsirhelelo. Swiphiqo leswi nga tlhantlhekiki swa engeteleka. Hi byihi vutihlamuleri bya hina lebyi faneleke bya ku pfuna vanhu-kulorhi eminkarhini leyi ya mangava? Xana yi kona dyondzo leyi hlamuselaka xivangelo xa maxangu lawa munhu a ma vonaka, yi tlhela yi kombisa ndlela yo kuma vutomi byo antswa sweswi kun’we ni ntshembo lowu tiyeke wa vumundzuku?

“Xileriso lexi hi xi kumaka eMatsalweni xi ri ‘fambani mi ya endla vanhu va matiko hinkwawo, va va vadyondzisiwa, mi va dyondzisa ku hlayisa swilo hinkwaswo leswi Kreste a swi leriseke.’ (Matewu 28:19, 20) Xileriso lexi xi vuriwe hi Yesu Kreste endzhaku ka rifu rakwe ni ku pfuxiwa ka yena, loko a nyikiwe vulawuri hinkwabyo ematilweni ni le misaveni. Ntirho lowu wu tlula mintirho hinkwayo leyi vanhu va yi bumabumelaka. Eka Xikwembu, ntirho wa hina wo khathalela swilaveko swa moya swa vanhu lava rhandzaka vululami, wu famba emahlweni. Hi ni swivangelo leswi twalaka swa Matsalwa swo hisekela ntirho lowu.

“Leswi swi lava leswaku hi rhangisa ntirho lowu evuton’wini bya hina. Ntirho lowu wu ta ya emahlweni hambileswi ku nga ni minkucetelo yo tala yo biha, swihinga ni ku kanetiwa hi vukhongeri ni tipolitiki, leswi endleriweke ku kavanyeta ntirho lowu wo dyondzisa emisaveni hinkwayo, hikuva Xikwembu xi ta hi katekisa xi tlhela xi hi pfuna. Ha tiyiseka naswona hi ni ntshembo wa leswaku ntirho lowu wu ta ya emahlweni ku kondza wu fika emakun’wini ya wona. I yini lexi hi endlaka leswaku hi tiyiseka swonghasi? Hikuva Hosi Yesu Kreste u tshembise leswaku u ta va na hina entirhweni lowu hi nyikiweke wona hi Xikwembu, ku fikela emakumu ya mafambiselo lawa ya swilo.

“Maxangu lawa vanhu va langutaneke na wona ma ta hela ku nga ri khale. Ntirho lowu hi wu endlaka sweswi wu fanele wu hela makumu ma nga si fika. Hikokwalaho, hina Timbhoni ta Yehovha, hi tiyimisele leswi:

“Xo sungula: Tanihi vatirheli lava tinyiketeleke, hi ti yimisele ku rhangisa swilaveko swa Mfumo evuton’wini bya hina ni ku ya emahlweni hi kula hi tlhelo ra moya. Leswaku hi kota ku endla leswi, swikhongelo swa hina swi fanele swi fambisana ni marito ya Pisalema 143:10: ‘Ndzi dyondzise ku endla ku rhandza ka wena, hikuva wena u Xikwembu xanga.’ Leswi swi lava leswaku hi va swichudeni leswinene, hi endla matshalatshala yo hlaya Bibele siku na siku, hi va ni dyondzo ya munhu hi xiyexe hi tlhela hi endla ndzavisiso. Leswaku ku ya emahlweni ka hina ku ta vonaka eka vanhu hinkwavo, hi fanele hi endla leswi hi nga swi kotaka leswaku hi lunghiselela, hi ta vuyeriwa swinene eka dyondzo ya le tilweni leyi kumekaka eminhlanganweni ya vandlha, etinhlengeletanweni ta xifundzha ni ta muganga, ni le mintsombanweni ya matiko hinkwawo.—1 Timotiya 4:15; Vaheveru 10:23-25.

“Xa vumbirhi: Leswaku hi dyondzisiwa hi Xikwembu, hi fanele hi dya etafuleni ra xona ntsena naswona hi xi yingisa swinene xitsundzuxo xa Bibele xa leswaku hi papalata tidyondzo leti hambukisaka ta madimona. (1 Vakorinto 10:21; 1 Timotiya 4:1) Hi fanele hi lwela ku papalata swilo swo biha, swo tanihi tidyondzo ta mavunwa ta vukhongeri, miehleketo leyi nga pfuniki nchumu, vuxaka bya rimbewu bya manyala, swilo swo navetisa rimbewu, vuhungasi lebyi thyakeke ni swilo hinkwaswo leswi nga ‘fambisaniki ni dyondzo leyinene.’ (Varhoma 1:26, 27; 1 Vakorinto 3:20; 1 Timotiya 6:3; 2 Timotiya 1:13) Loko hi xixima ‘tinyiko leti nga vanhu’ lava va fanelekaka ku dyondzisa leswi nga swinene, hi ta xixima ni matshalatshala ya vona hi tlhela hi tirhisana na vona hi mbilu hinkwayo leswaku hi seketela mikhuva leyinene ni mimpimanyeto ya moya ya Rito ra Xikwembu.—Vaefesa 4:7, 8, 11, 12; 1 Vatesalonika 5:12, 13; Tito 1:9.

“Xa vunharhu: Tanihi vatswari va Vakreste, hi tiyimisele hi mbilu hinkwayo ku letela vana va hina, ku nga ri hi rito ntsena kambe ni hi xikombiso. Xikongomelo xa hina lexikulu i ku va pfuna ku suka evutsongwanini leswaku va ‘dyondza matsalwa yo kwetsima lama nga ta va tlharihisa leswaku va kota ku pona.’ (2 Timotiya 3:15) Hi ta tshama hi ri karhi hi tsundzuka leswaku ku va kurisa hi ku tshinya ni nkongomiso wa mianakanyo wa Yehovha swi ta va nyika lunghelo ro fanelekela switshembiso swa Xikwembu, ‘leswaku swi va fambela kahle ni leswaku va tshama nkarhi wo leha emisaveni.’—Vaefesa 6:1-4.

“Xa vumune: Loko ku ri ni leswi swi hi vilerisaka kumbe hi langutane ni swiphiqo leswikulu, xo  sungula hi ta ‘tivisa Xikwembu swikombelo swa hina,’ hi ri ni ntshembo wa leswaku ‘ku rhula ka Xikwembu loku tlulaka miehleketo hinkwayo ya vanhu’ ku ta hi hlayisa. (Vafilipiya 4:6, 7) Hi ku va ehansi ka joko ra Kreste, hi ta kuma ku phyuphya. Loko hi tiva leswaku Xikwembu xa hi khathalela, a hi nge kanakani ku lahlela mivilelo ya hina eka xona.—Matewu 11:28-30; 1 Petro 5:6, 7.

“Xa vuntlhanu: Loko hi ri karhi hi kombisa ku tlangela ka hina eka Yehovha hikwalaho ka lunghelo leri a hi nyikeke rona ro va vadyondzisi va Rito ra yena, hi ta kuma matimba lama engetelekeke yo ‘ri tamela khwatsi rito ra yena ra ntiyiso’ ni ku ‘hetisisa vutirheli bya hina hi xitalo.’ (2 Timotiya 2:15; 4:5) Tanihi leswi se hi swi tivaka kahle leswaku sweswo swi katsa yini, lexi hi tiyimiseleke xona hi mbilu hinkwayo i ku kuma vanhu lava fanelekaka kutani hi hlakulela mbewu leyi byariweke. Ku tlula kwalaho, hi ta antswisa ndlela ya hina yo dyondzisa hi ku fambisa tidyondzo ta le kaya ta Bibele leti engetelekeke hi ndlela leyi humelelaka. Leswi swi ta endla leswaku hi fambisana swinene ni ku rhandza ka Xikwembu ka leswaku ‘vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.’—1 Timotiya 2:3, 4.

“Xa vutsevu: Eka lembe-xidzana leri hundzeke, ni le ka leri, Timbhoni ta Yehovha etindhawini to tala ti kanetiwile ni ku xanisiwa hi tindlela to hambana-hambana. Kambe Yehovha u ve na hina. (Varhoma 8:31) Rito ra yena ra ntiyiso ra hi tiyisekisa leswaku ‘tlhari rihi ni rihi leri endleriweke’ ku kavanyeta, ku nonokisa kumbe ku yimisa ntirho wa hina wo chumayela ni ku dyondzisa hi ta Mfumo a ri nge humeleli. (Esaya 54:17) Hambi ku ri hi nguva leyinene kumbe yo karhata, a hi nge tshiki ku vulavula ntiyiso. Lexi hi tiyimiseleke xona i ku hetisisa ntirho wa hina wa ku chumayela ni ku dyondzisa hi ku hatlisa. (2 Timotiya 4:1, 2) Xikongomelo xa hina i ku ringeta hi matimba ku avelana ni vanhu va matiko hinkwawo, mahungu lamanene ya Mfumo wa Xikwembu. Xisweswo va ta hambeta va va ni lunghelo ro dyondza hi lunghiselelo ro kuma vutomi lebyi nga heriki emisaveni leyintshwa yo lulama. Tanihi ntshungu lowu hlanganeke wa vadyondzisi va Rito ra Xikwembu, hi tiyimisele ku tshama hi ri karhi hi landzelela xikombiso xa Mudyondzisi wa hina Lonkulu, Yesu Kreste, ni ku kombisa timfanelo ta yena letinene. Hinkwaswo leswi hi ta swi endla hi xikongomelo xo xixima ni ku dzunisa Muleteri wa hina Lonkulu ni Munyiki wa Vutomi, Yehovha Xikwembu.

“N’wina hinkwenu lava mi nga kona entsombanweni lowu lava mi amukelaka xiboho lexi, hi kombela mi ku INA!”

Loko ku vutisiwe xivutiso xo hetelela xa xiboho lexi eka vanhu vo ringana 160 000 lava a va hlengeletane emintsombanweni yinharhu eFurwa ni van’wana vo ringana 289 000 lava hlengeletaneke eItaliya, vanhu volavo va tindzimi to hambana-hambana, va vule hi rito leri mbvungulaka va ku “Ina.”