Nkarhi Lowunene Wa Ku Baleka

MISAVA ya namuntlha yi vonaka yi tele hi moya wa ku lava ku tiendla tinhenha, wa ku va ni rivengo kumbe ndzingo. Munhu la balekelaka xiyimo xo tano hi ntolovelo u tekiwa tanihi munhu la tsaneke kumbe toya. A nga ha hlekuriwa hikwalaho ka sweswo.

Hambiswiritano, Bibele yi swi veka erivaleni leswaku nkarhi wun’wana ku baleka i vutlhari naswona swi kombisa xivindzi. Loko a nga si rhuma vadyondzisiwa va yena evutirhelini, Yesu Kreste u kandziyise ntiyiso lowu hi ku byela vadyondzisiwa va yena a ku: “Loko va mi xanisa emutini wun’wana, balekelani eka wun’wanyana.” (Matewu 10:23) Ina, vadyondzisiwa va Yesu a va fanele va ringeta ku balekela vaxanisi va vona. A va nga fanelanga va hlanganyela eka swilo swo fana ni nyimpi ya vukhongeri, ni ku ringeta ku hundzula vanhu hi ku va sindzisa. A va byarhe rungula ra ku rhula. (Matewu 10:11-14; Mintirho 10:34-37) Ematshan’weni yo hlundzuka, Vakreste va fanele va balekela ekule ni vahlaseri. Hi ndlela leyi, va ta va va hlayisa ripfalo ra vona lerinene hambi ku ri vuxaka bya vona na Yehovha.—2 Vakorinto 4:1, 2.

Xikombiso lexi hambaneke xi kumeka eBibeleni ebukwini ya Swivuriso. Yi hi byela hi jaha leri landzeleleke wansati wa nghwavava “ku fana ni nkunzi leyi yaka eku dlayiweni,” ematshan’weni yo balekela ndzingo. Vuyelo byi ve byihi? Ku ve khombo, hikuva ri tinyiketele endzingweni lowu koxeke ni vutomi bya rona.—Swivuriso 7:5-8, 21-23.

Xana ku nga humelela yini loko u langutane ni ndzingo wo endla vuoswi kumbe khombo rin’wana leri nga ha vaka kona? Hi ku ya hi Rito ra Xikwembu, nchumu wo antswa i ku baleka, u va ekule ni ndzingo hi ku hatlisa.—Swivuriso 4:14, 15; 1 Vakorinto 6:18; 2 Timotiya 2:22.