Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Loko swi ri tano, vona loko u nga hlamula swivutiso leswi landzelaka:

• Hi wihi nongonoko lowu u nga wu landzelaka lowu katsaka Dyondzo ya le Ntshaveni lowu u nga wu tirhisaka leswaku u hunguta ntshikilelo?

U nga hlaya yin’wana ya tidyondzo ta Yesu ta xisekelo hi siku, leti a ti vuleke loko a ri entshaveni kumbe leti hlamuseriweke eka Tievhangeli. Loko u anakanyisisa hi dyondzo ya kona u tlhela u hanya hi ku pfumelelana na yona, u nga ha tikuma u ri la tsakeke naswona ntshikilelo wa wena wu ta hunguteka.—12/15, matluka 12-14.

• Hi swihi swivangelo swinharhu swa nkoka leswi endlaka leswaku vakulu va vandlha va letela malandza ya vutirheli leswaku ma byarha vutihlamuleri lebyi engetelekeke?

Leswi Timbhoni ta Yehovha ti andzaka, ku laveka vavanuna lava engetelekeke leswaku va pfuna vanhu lavantshwa lava ha ku khuvuriwaka leswaku va endla nhluvuko. Ku dyuhala kumbe swiphiqo swa rihanyo swi endla leswaku vakulu lava nga ni nkarhi wo leha va nga ha koti ku endla leswi a va swi kota. Naswona vakulu van’wana lava nga ni vutshila va ya va ya pfuna ni le mavandlheni man’wana, hikwalaho swi nga ha endleka va nga ha swi koti ku endla swo tala ni le vandlheni ra ka vona ku fana ni khale.—1/1, tluka 29.

• Vanhu va tshembela eka swikwembu swa hava hi ndlela yihi?

Vo tala va gandzela swikwembu swa vukhongeri bya vona, kambe swikwembu leswi a swi hanyi, a swi nge koti ku va ponisa, swo tifanela na Bali wa le sikwini ra Eliya. (1 Tihosi 18:26, 29; Pisalema 135:15-17) Van’wana va gandzela vanhu vo karhi va vuhungasi kumbe vatlangi va mintlangu, lava va nga taka va nga va nyiki ntshembo wa xiviri hi vumundzuku. Ku hambana ni sweswo, Yehovha wa hanya hakunene naswona u hetisisa swikongomelo swa yena.—1/15, matluka 3-5.

• Hi nga dyondza yini eka ndlela leyi Kayini a hlamuleke Xikwembu ha yona loko xi n’wi lemukisa?

Xikwembu xi hi nyike ntshunxeko wa ku tihlawulela, naswona hi nga hlawula ku endla leswinene ematshan’weni yo endla leswo biha, ku fana na Kayini. Rungula ra Bibele ri kombisa leswaku Yehovha u ta avanyisa lava nga laviki ku hundzuka.—1/15, matluka 22-3.

• Ha yini ku basa ku ri ka nkoka sweswi?

Hikwalaho ka ku cinca ka swiyimo, vo tala va tirhisa nkarhi wutsongo loko va basisa makaya ya vona, ku hambana ni leswi khale a swi endlisiwa swona. Loko hi nga hlayisi swakudya swa hina ni mati swi basile, sweswo swi nga vanga khombo. Handle ko basa emirini, Bibele yi tlhele yi kandziyisa ku basa emoyeni, emahanyelweni ni le mianakanyweni.—2/1, matluka 3-6.

• Malunghana ni ku chumayela ka le mahlweni ka Vukreste, Pawulo u vule leswaku a va ‘nga ta endliwa lava hetisekeke handle ka hina.’ Xana a a vula yini? (Vaheveru 11:40)

Eka Ku Fuma ka Kreste ka Gidi ra Malembe, yena ni vamakwavo va yena lava totiweke lava nga etilweni, lava nga tihosi ni vaprista, va ta tirhisa nkutsulo eka lava pfuxiweke. Vanhu volavo vo tshembeka tanihi lava hlamuseriweke eka Vaheveru ndzima ya 11 ‘va ta endliwa lava hetisekeke.’—2/1, tluka 23.

• Pawulo a a vula yini loko a byela Vaheveru a ku: ‘A mi si tshama mi lwa ngati yi kala yi huma’? (Vaheveru 12:4)

A a vula ku tiyisela kukondza u fa. Ku ni swikombiso swa vanhu lava tshembekeke kukondza va fa. Hambileswi Vaheveru lava Pawulo a va tsaleleke a va nga si ringiwa hi ndlela yoleyo, a va fanele va endla nhluvuko va va vanhu lava vupfeke, va aka ripfumelo ra vona leswaku va kota ku tiyisela xin’wana ni xin’wana lexi nga ha va welaka.—2/15, tluka 29.

• Ha yini swi ri swinene ku papalata ku vula leswaku tintswalo ta Yehovha ti vevukisa vululami bya yena?

Hi tindzimi tin’wana, rito leri nge “ku vevukisa” ri nga vula ku hunguta kumbe ku sivela. Yehovha i Xikwembu xa vululami ni tintswalo, naswona loko a kombisa timfanelo teto, hatimbirhi ta fambisana. (Eksoda 34:6, 7; Deteronoma 32:4; Pisalema 116:5; 145:9) Vululami bya Yehovha a byi vevukisiwi hi tintswalo ta yena.—3/1, tluka 30.

• Xana swi fanerile leswaku Mukreste a omisa ntsumbu wa loyi a n’wi rhandzaka?

Ku omisa ntsumbu swi endleriwa leswaku wu nga boli. Vanhu van’wana va khale va landzele mukhuva lowu hikwalaho ka swivangelo swa vukhongeri. Vagandzeri va ntiyiso a va nge swi endli sweswo. (Eklesiasta 9:5; Mintirho 24:15) Ku omisa ntsumbu swo wu hlwerisa leswaku wu nga boli, wu tlhelela entshurini. (Genesa 3:19) Kambe a swi lavi u karhateka loko nawu wu lava leswaku u wu omisa, mindyangu yin’wana a yi swi lavisa sweswo, kumbexana a swi laveka hikwalaho ka leswi van’wana a va famba riendzo ro leha va ya enkosini.—3/15, matluka 29-31.

• Hi swihi swikombiso swa le Bibeleni leswi hi dyondzisaka leswaku Xikwembu xi amukela vanhu vamatiko hinkwawo?

Yehovha u rhume muprofeta Yonasi leswaku a ya tsundzuxa Vaninivha, naswona Xikwembu xi tsundzuxe Yonasi leswaku a amukela ku hundzuka ka vona. Yesu u khutaze leswaku Vasamariya va kombisiwa rirhandzu, hi rito ni hi swiendlo. Muapostola Petro ni muapostola Pawulo a va ri ni ntirho wo yisa mahungu lamanene eka lava nga riki Vayuda. Eka swikombiso swo tano, hi nga vona xilaveko xo ringeta ku pfuna vanhu va swiyimo hinkwaswo.—4/1, matluka 21-4.