Xana Vuhlayiseki Bya Wena Byi Titshege Hi Yini?

Muntshwa la vuriwaka Josué la tshamaka endhawini ya le makaya eAfrika Vupela-dyambu u lelane ni vandyangu wa ka vona swin’we ni vanghana vakwe. * Hiloko a famba a ya edorobeni leswaku a ya lava mali. Hambiswiritano, endzhakunyana ka loko a fikile u heleriwe hi ntshembo loko a vona leswaku edorobeni rero a swi nga ta n’wi olovela ku hatla a kuma rifuwo.

LOKO a ri karhi a lwela ku cinca vutomi bya yena leswaku byi fambisana ni bya le dorobeni, Josué u heleriwe hi ntshembo. Doroba leri a ri hambanile ni leswi a a swi anakanya ha rona. Hi nkarhi lowu fanaka Josué a a swi navela hi mbilu hinkwayo ku tlhelela ekaya ni le ka vanghana va yena endhawini ya ka vona leyi a yi nga nyawuli. Kambe a a chava leswaku varikwavo va ta n’wi hlekula. A a karhateka a ku: ‘Va ta ndzi vula sirha ra le handle hileswi ndzi tsandziweke hi vutomi bya le dorobeni.’

Lexi a xi n’wi karhata swinene hileswi a a ta khomisa vatswari va yena tingana. Phela, a va langutele yena leswaku a va pfuna hi mali. Loko a ri karhi a ringeta ku lwa ni xiyimo lexi xi hetaka matimba, Josué u tirhe tiawara to tala a endla ntirho lowu nga nyawuriki, naswona a kuma mali yo ka yi nga nyawuli. Ntirho wakwe wu n’wi siye a hlakarile. Naswona nkarhi lowu a wu vekeleke mintirho ya Vukreste, leyi nga ya nkoka swinene eka yena, a wu ya wu hunguteka vhiki rin’wana ni rin’wana. U titwe a ri ni gome ni xivundza hikuva a ri ekule ni ndyangu ni vanghana lava rhandzekaka. U kume leswaku doroba a ri n’wi nyikanga ku hlayiseka loku a ku navela swinene.

Hambileswi mavito ni tindhawu swi hambanaka, mhaka yo vava ya Josué yi tshama yi ri karhi yi humelela. A swi vuli swona leswaku Josué a a tsakisiwa hi ku rhurhela edorobeni ntsena—a a lava vuhlayiseki. A a anakanya leswaku ku tshama edorobeni a swi antswa ku tlula ku tshama endhawini ya ka vona. I ntiyiso, minkarhi yin’wana munhu a nga ha kuma swilo leswi vonakaka, kambe sweswo a swi nge n’wi nyiki nsirhelelo wa xiviri. Eka Josué ni van’wana vo tala lava ringeteke ku ya tshama edorobeni sweswo a swi vanga tano. Leswi swi hi susumetela ku vutisa xivutiso lexi nge, ‘Xana vuhlayiseki i yini?’

Vanhu va byi twisisa hi ndlela yo hambana vuhlayiseki. Xihlamusela-marito xin’wana xi vula leswaku vuhlayiseki i “ku hanya u nga chavi khombo” kumbe “ku hanya handle ko chava kumbe ku karhateka.” Vanhu vo tala va swi xiya leswaku “ku hanya u nga chavi khombo” hi ku helela a swi koteki namuntlha. Lexi va enerisaka i ku titwa va hlayisekile ntsena, hambiloko va hanya endhawini leyi nga ni khombo.

Ku vuriwa yini hi wena? Xana u byi lavela kwihi vuhlayiseki? Xana byi kumeka edorobeni ku ri ni le ndhawini ya le makaya hilaha Josué a anakanyeke hakona? Xana byi tisiwa hi mali, ku nga khathariseki lomu u yi kumaka kona ni ndlela leyi u yi kumaka ha yona? Kumbe, xana u nga byi kuma hi ku fikelela xikhundla xa le henhla? Ku nga khathariseki ndlela leyi wena u hlawulaka ku kuma vuhlayiseki ha yona, xana wena ni ndyangu wa wena mi ta hlayiseka ku fikela rini ehansi ka xiyimo xo tano?

A hi kambisiseni tindlela tinharhu leti vanhu vo tala va lavaka vuhlayiseki ha tona—ndhawu; mali; xikhundla. Endzhaku hi ta kambisisa ndlela yo kuma vuhlayiseki bya ntiyiso lebyi nga heriki.

[Nhlamuselo ya le hansi]