I Vamani Lava Nga Ta Pona Siku Ra Yehovha?
I Vamani Lava Nga Ta Pona Siku Ra Yehovha?
“Ra ta siku leri ri hisaka ku fana ni khele ra ndzilo.”—MALAKIYA 4:1.
1. Xana Malakiya u ku hlamusela njhani ku herisiwa ka mafambiselo lawa yo homboloka?
XIKWEMBU xi huhutele muprofeta Malakiya leswaku a tsala hi ta swiendlakalo swo chavisa leswi nga ta endleka ku nga ri khale. Swiendlakalo swa kona swi ta khumba vanhu hinkwavo emisaveni. Malakiya 4:1 yi profeta yi ku: “‘Waswivo, ra ta siku leri ri hisaka ku fana ni khele ra ndzilo, hinkwavo lava va tikukumuxaka ni hinkwavo lava va endlaka vuhomboloki va fanele va va mahlanga. Kunene siku leri ri taka ri ta va lovisa,’ Yehovha wa mavuthu u vurile, ‘lerova eka vona a ri nge siyi rimitsu kumbe rhavi.’” Xana wu ta va wu ri njhani ndzoviso wa mafambiselo lawa ya swilo yo homboloka? Wu ta fana ni timitsu ta murhi leti khutuleriweke ti hela ti ku bi, leswaku wu nga ha tlheli wu mila.
2. Xana matsalwa man’wana ma ri hlamusela njhani siku ra Yehovha?
2 U nga ha vutisa, ‘Hi rihi “siku” leri muprofeta Malakiya a vulavulaka ha rona?’ I siku leri ku vulavuriwaka ha rona eka Esaya 13:9, leyi nge: “Waswivo! Siku ra Yehovha ra ta, ri ni tihanyi ta vukarhi ni ta ku hlundzuka lokukulu, leswaku ri endla tiko ri va xihlamariso, nileswaku ri lovisa vadyohi va tiko eka rona.” Sofaniya 1:15 yi nyikela nhlamuselo leyi: “Siku rero i siku ra ku hlundzuka, siku ra maxangu ni ra ku vaviseka, siku ra xidzedze ni ku onhetela, siku ra munyama ni ku dzwihala, siku ra mapapa ni ra ku dzwihala lokukulu.”
“Nhlomulo Lowukulu”
3. Xana “siku ra Yehovha” i yini?
3 Loko swi ta eku hetisekeni lokukulu ka vuprofeta bya Malakiya, “siku ra Yehovha” i nkarhi wa “nhlomulo lowukulu.” Yesu u profete leswi: “Endzhaku ka sweswo ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.” (Matewu 24:21) Ehleketa hi maxangu lama weleke misava, ngopfu-ngopfu ku sukela hi 1914. (Matewu 24:7-12) Nyimpi ya Vumbirhi ya Misava yi ri yoxe yi dlaye vanhu vo tlula 50 wa timiliyoni! Kambe, “nhlomulo lowukulu” wu ta va wu tlula maxangu wolawo. Nhlomulo wolowo, ku fana ni siku ra Yehovha, wu ta gimeta hi Armagedoni, leyi nga ta chaputa masiku lawa yo hetelela kutani yi herisa mafambiselo lawa yo homboloka.—2 Timotiya 3:1-5, 13; Nhlavutelo 7:14; 16:14, 16.
4. Loko siku ra Yehovha ri chaputa ku ta va ku endleke yini?
4 Emakumu ka siku rero ra Yehovha, misava ya Sathana ni vaseketeri va yona va ta va va lovisiwile. Ku ta rhanga ku lovisiwa vukhongeri hinkwabyo bya mavunwa. Endzhaku ka sweswo Yehovha u ta lovisa mafambiselo ya Sathana ya politiki ni ya mabindzu. (Nhlavutelo 17:12-14; 19:17, 18) Ezekiyele u profetile: “Silivhere ya vona va ta yi lahlela eswitarateni, naswona nsuku wa vona wu ta va nchumu lowu nyenyetsaka. Hambi ku ri silivhere ya vona kumbe nsuku wa vona a swi nge swi koti ku va kutsula esikwini ra ku hlundzuka ka Yehovha.” (Ezekiyele 7:19) Malunghana ni siku rero Sofaniya 1:14 yi ri: “Siku lerikulu ra Yehovha ri le kusuhi. Ri le kusuhi, naswona ra hatlisa swinene.” Malunghana ni leswi Bibele yi swi vulaka hi siku ra Yehovha, hi fanele hi tiyimisela ku hanya hi ku pfumelelana ni swilaveko swo lulama swa Xikwembu.
5. I yini lexi tsakeriwaka hi lava va chavaka vito ra Yehovha?
5 Endzhaku ka loko yi hlamusele leswi siku ra Yehovha ri nga ta swi endla hi misava ya Sathana, Malakiya 4:2 yi vula leswi Yehovha a swi vuleke loko a ku: “N’wina lava va chavaka vito ra mina, kunene dyambu ra ku lulama ri ta mi voningela, ri ri ni matimba yo tshungula etimpapeni ta rona; mi ta huma kutani mi handza misava kukota marhole lama nonisiweke.” “Dyambu ra ku lulama” i Yesu Kreste. I ‘ku vonakala ka moya ka misava.’ (Yohane 8:12) Ku vangama ka Yesu ka tshungula, ku rhanga ku tshungula hi tlhelo ra moya, ku nga loku hi ku vonaka namuntlha, kutani ku ta landzela ku tshunguriwa hilaha ku heleleke enyameni emisaveni leyintshwa. Hilaha Yehovha a vulaka hakona, lava tshunguriweke va ta “huma kutani [va] handza misava kukota marhole lama nonisiweke” lama tsakeleke ku ntshunxiwa evuhlongeni.
6. Malandza ya Yehovha ma ta hlanganyela eka nkhuvo wa ku hlula kwihi?
6 Ku vuriwa yini hi lava va honisaka leswi Yehovha a swi lavaka? Malakiya 4:3 yi ri: “‘Kunene n’wina [malandza ya Xikwembu] mi ta kandziyela lavo homboloka, hikuva va ta fana ni ritshuri ehansi ka mikondzo ya milenge ya n’wina esikwini leri ndzi tekaka goza ha rona,’ Yehovha wa mavuthu u vurile.” Vanhu lava gandzelaka Xikwembu a va nge hlanganyeli eku loviseni ka misava ya Sathana. Ku ri na sweswo, va “kandziyela lavo homboloka” hi ndlela yo fanekisela hi ku hlanganyela eku tlangeleni ka ku hlula loku nga ta ta endzhaku ka siku ra Yehovha. Endzhaku ka ku lovisiwa ka mavuthu ya Faro eLwandle ro Tshwuka ku endliwe nkhuvo lowukulu. (Eksoda 15:1-21) Ku susiwa ka Sathana ni misava ya yena hi nkarhi wa nhlomulo lowukulu na kona ku ta landzeriwa hi nkhuvo wo hlula. Vanhu vo tshembeka lava nga ta pona siku ra Yehovha va ta huwelela va ku: “A hi tsakeni, hi tsakela ku ponisiwa hi yena.” (Esaya 25:9) Ku ta khaniwa swinene loko vuhosi bya Yehovha byi lweriwile niloko misava yi basisiwile leswaku vanhu va ta tshama hi ku rhula!
Vujagana Byi Tekelela Vaisrayele
7, 8. Hlamusela xiyimo xa moya xa Vaisrayele enkarhini wa Malakiya.
7 Lava va amukeriwaka hi Yehovha hi lava va n’wi tirhelaka, ku nga ri lava nga n’wi tirheliki. Xiyimo a xi ri tano loko Malakiya a tsala buku yakwe. Hi 537 B.C.E., masalela ya Vaisrayele ma tlhelele ka rikwavo endzhaku ka loko ma hete malembe ya 70 ma ri evuhlongeni le Babilona. Hambiswiritano, endzhaku ka lembe-xidzana leri landzeleke, tiko leri ri sungule ku gwineha ni ku endla swo homboloka. Vanhu vo tala va delele vito ra Yehovha; va honisa milawu ya yena yo lulama; va thyakisa tempele ya yena hi ku tisa swifuwo leswi nga voniki, leswi khutaka ni leswi vabyaka leswaku swi ta va magandzelo; va tlhela va tshika vasati va vuntshwa bya vona.
8 Hikwalaho, Yehovha u te: “Ndzi ta tshinela eka n’wina ndzi ta avanyisa, ndzi ta va mbhoni ya xihatla ku kanetana ni valoyi, ku kanetana ni vaoswi, ku kanetana ni lava va hlambanyaka hi vunwa, ni ku kanetana ni lava va kanganyisaka ehakelweni ya mutirhi la hakeriwaka, ni noni ni n’wana la nga riki na tatana, ni lava va hlongolaka muluveri, kasi a va ndzi chavanga, . . . hikuva hi mina Yehovha; a ndzi hundzukanga.” (Malakiya 3:5, 6) Kambe, Yehovha u rhambe mani na mani la nga ta hundzuka etindleleni ta yena to biha, u te: “Tlhelelani eka mina, kutani mina ndzi ta tlhelela eka n’wina.”—Malakiya 3:7.
9. Vuprofeta bya Malakiya byi hetiseke njhani ro sungula?
9 Marito wolawo ma tlhele ma hetiseka hi lembe-xidzana ro sungula C.E. Masalela ya Vayuda ma tirhele Yehovha kutani ma va xiphemu xa “tiko” lerintshwa ra Vakreste lava totiweke hi moya, lava hi ku famba ka nkarhi a va ta katsa ni Vamatiko. Vunyingi bya Vaisrayele va ntumbuluko byi landzule Yesu. Hikwalaho Yesu u byele tiko ra Israyele a ku: “Maswivo! Yindlu ya n’wina yi tshikeriwa n’wina.” (Matewu 23:38; 1 Vakorinto 16:22) Hilaha swi profetiweke hakona eka Malakiya 4:1, hi 70 C.E., “siku leri ri hisaka ku fana ni khele ra ndzilo” ri wele Vaisrayele va nyama. Muti wa Yerusalema ni tempele ya wona swi lovisiwile, naswona ku vikiwe leswaku ku fe vanhu vo tlula miliyoni hikwalaho ka ndlala, hasahasa ya ku hlunga vuhosi ni ku hlaseriwa hi mavuthu ya Varhoma. Hambiswiritano, lava a va tirhela Yehovha va pone nhlomulo wolowo.—Marka 13:14-20.
10. Vanhu ni vafundhisi va tekelele Vaisrayele va lembe-xidzana ro sungula hi ndlela yihi?
10 Vanhu, ngopfu-ngopfu Vujagana va tekelele tiko ra Israyele ra lembe-xidzana ro sungula. Varhangeri ni vanhu va Vujagana hi ntolovelo va rhandza tidyondzo ta vona ta vukhongeri ku ri ni ku rhandza mintiyiso ya Xikwembu leyi Yesu a yi dyondziseke. Vafundhisi hi vona va nga ni vutihlamuleri bya leswi. Va ala ku tirhisa vito ra Yehovha, va tlhele va ri susa eka vuhundzuluxeri bya Tibibele ta vona. Va nyamisa Yehovha hi tidyondzo leti nga riki ta matsalwa, to fana ni tidyondzo ta vuhedeni ta nxaniso lowu nga heriki endzilweni wa tihele, Vunharhu-un’we, moya lowu nga fiki ni hundzuluko. Xisweswo va tshika ku dzunisa Yehovha hi ndlela leyi n’wi fanelaka, hilaha vaprista va le sikwini ra Malakiya va endleke hakona.
11. Vukhongeri bya misava byi swi kombise njhani leswaku i mani loyi byi n’wi tirhelaka?
11 Loko ku sungula masiku ya makumu hi 1914, vukhongeri bya misava leyi, lebyi rhangelaka hi lava va tivulaka Vakreste, byi tikombise kahle leswaku byi tirhela mani. Enkarhini wa tinyimpi ta misava hatimbirhi, va khutaze vanhu va vona ku ya enyimpini va ya lwela tiko ra vona, hambiloko sweswo swi vula ku dlaya vanhu va vukhongeri bya vona. Rito ra Xikwembu ri swi veka erivaleni leswaku i vamani lava va yingisaka Yehovha ni lava va nga n’wi yingisiki: “Vana va Xikwembu ni vana va Diyavulosi va vonaka hi leswi: Mani na mani la nga hambetiki a famba hi ku lulama a nga humi eka Xikwembu, hambi ku ri loyi a nga rhandziki makwavo. Hikuva leri i rungula leri mi ri tweke ku sukela eku sunguleni, leswaku hi fanele hi rhandzana; hi nga fani na Kayini, loyi a humeke eka lowo homboloka ivi a dlaya makwavo.”—1 Yohane 3:10-12.
Ku Hetiseka Ka Vuprofeta
12, 13. Hi byihi vuprofeta lebyi hetisisiweke hi malandza ya Xikwembu enkarhini wa hina?
12 Eku heleni ka Nyimpi yo Sungula ya Misava hi 1918, malandza ya Yehovha ma swi lemukile leswaku Xikwembu xi avanyise Vujagana swin’we ni vukhongeri lebyin’wana hinkwabyo bya mavunwa. Ku sukela kwalaho ku hume xirhambo xi ya eka vanhu va timbilu letinene xi ku: “Humani eka yena, vanhu va mina, loko mi nga lavi ku hlanganyela na yena eswidyohweni swa yena, ni loko mi nga lavi ku amukela xiphemu xa makhombo ya yena. Hikuva swidyoho swa yena swi tlhandlekelane ku ya fika ehenhla etilweni, naswona Xikwembu xi tsundzuke swiendlo swa yena swa ku kala vululami.” (Nhlavutelo 18:4, 5) Lava rhandzaka ku tirhela Yehovha va sungule ku rhidimbiwa thyaka hinkwaro ra vukhongeri bya mavunwa, kutani va sungula ku chumayela mahungu lamanene emisaveni hinkwayo ya Mfumo lowu simekiweke, ku nga ntirho lowu wu nga ta hetiwa ku nga si fika makumu ya mafambiselo lawa ya swilo yo homboloka.—Matewu 24:14.
13 Hikwalaho a ku hetiseka vuprofeta bya Malakiya 4:5, laha Yehovha a nga te: “Maswivo! Ndzi rhuma Eliya lowa muprofeta eka n’wina, ku nga si fika siku lerikulu ni leri chavisaka ra Yehovha.” Vuprofeta byebyo byi hetiseke ro sungula entirhweni wa Yohane Mukhuvuri, loyi a a fanekiseriwa hi Eliya. Yohane u endle ntirho wo fana ni wa Eliya loko a khuvula Vayuda lava a va hundzuke eswidyohweni swa vona leswi a swi lwisana ni ntwanano wa Nawu. Xa nkoka ngopfu, Yohane hi yena a nga basisela Mesiya tindlela. Hambiswiritano, ntirho wa Yohane a wu ri masungulo ya ku hetiseka ka vuprofeta bya Malakiya. Loko Yesu a vulavula hi Yohane tanihi Eliya wa vumbirhi, a a komba leswaku ntirho wa “Eliya” a wa ha to endliwa.—Matewu 17:11, 12.
14. I ntirho wihi wa nkoka lowu faneleke wu endliwa ku nga si herisiwa mafambiselo lawa?
14 Vuprofeta bya Malakiya byi kombisa leswaku ntirho lowu lowukulu wa Eliya a wu ta endliwa ku nga si fika “siku lerikulu ni leri chavisaka ra Yehovha.” Siku rero ri chaputa hi nyimpi leyi hisaka ya siku lerikulu ra Xikwembu xa Matimba Hinkwawo, eArmagedoni. Leswi swi vula leswaku a ku ta rhanga ku endliwa ntirho wo fana ni wa Eliya, ku nga si fika makumu ya mafambiselo lawa ya swilo yo homboloka ni Mfumo wa Xikwembu wa le tilweni wa Gidi ra Malembe lowu rhangeriwaka hi Yesu Kreste. Hilaha vuprofeta lebyi byi vulaka hakona, loko Yehovha a nga si lovisa mafambiselo lawa yo homboloka, ntlawa wa Eliya wa manguva lawa, lowu seketeriwaka hi Vakreste-kulobye va timiliyoni lava nga ni ntshembo wo hanya emisaveni, wu hisekela ntirho wa ku vuyetela vugandzeri lebyi tengeke, ku tlakusa vito ra Yehovha ni ku dyondzisa vanhu lava fanaka ni tinyimpfu mintiyiso ya Bibele.
Yehovha U Katekisa Malandza Yakwe
15. Yehovha u ma tsundzuka njhani malandza ya yena?
15 Yehovha u katekisa lava n’wi tirhelaka. Malakiya 3:16 yi ri: “Enkarhini wolowo lava va chavaka Yehovha va vulavurisanile, un’wana ni un’wana ni nakulobye, Yehovha a hambeta a rhiya ndleve, a yingisa. Kutani buku ya xitsundzuxo yi sungula ku tsariwa emahlweni ka yena yi tsaleriwa lava va chavaka Yehovha ni lava va anakanyaka hi vito ra yena.” Ku sukela eka Avele ku ya emahlweni, Xikwembu a xi ri karhi xi tsala ebukwini, hi ndlela yo fanekisela, xi tsala mavito ya lava nga ta tsundzukiwa leswaku va kuma vutomi lebyi nga heriki. Yehovha u ri eka vona: “Tisani swiphemu hinkwaswo swa vukhume exitlatini, leswaku ku va ni swakudya endlwini ya mina; ndzi kombela mi ndzi ringa, emhakeni leyi . . . mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.”—Malakiya 3:10.
16, 17. Yehovha u va katekise njhani vanhu vakwe ni ntirho wa vona?
16 Kunene Yehovha u va katekisile lava n’wi tirhelaka. Njhani? Hi ku va endla va swi twisisa swinene swikongomelo swakwe. (Swivuriso 4:18; Daniyele 12:10) Hi ku tlhela a va nyika mihandzu leyi hlamarisaka entirhweni wa vona wo chumayela. Vanhu vo tala va timbilu letinene va tihlanganise na vona evugandzerini bya ntiyiso, kutani lava hinkwavo ka vona va vumba “ntshungu lowukulu . . . [wo] huma eka matiko hinkwawo ni tinyimba hinkwato ni vanhu hinkwavo ni tindzimi hinkwato, . . . kutani wu huwelela hi rito lerikulu wu phikelela, wu ku: ‘Ku ponisiwa hi ku kolota Xikwembu xa hina, lexi tshameke exiluvelweni, ni le ka Xinyimpfana.’” (Nhlavutelo 7:9, 10) Ntshungu lowu lowukulu wu vonake hi ndlela yo hlamarisa, naswona lava tirhelaka Yehovha hi ku hiseka sweswi nhlayo ya vona yi tlula timiliyoni ta tsevu emavandlheni yo tlula 93 000!
17 Mikateko ya Yehovha yi tlhela yi vonaka hileswi Timbhoni ta Yehovha ti kandziyiseke tibuku leti sekeriweke eBibeleni, leti hangalasiwaka ku tlula tibuku hinkwato leti tshameke ti hangalasiwa. Enkarhini wa sweswi, ku kandziyisiwa timagazini ta 90 wa timiliyoni ta Xihondzo xo Rindza ni Xalamuka! n’hweti na n’hweti, Xihondzo xo Rindza xi huma hi tindzimi ta 144, Xalamuka! hi tindzimi ta 87. Ku fambisiwe tikopi to tlula 107 wa timiliyoni hi tindzimi ta 117, ta buku yo pfuna ku dyondza Bibele leyi nge, Ntiyiso Lowu Yisaka eVuton’wini Lebyi Nga Heriki, leyi humesiweke hi 1968. Ku fambisiwe tikopi to tlula 81 wa timiliyoni hi tindzimi ta 131 ta buku leyi nge U Nga Hanya Hi Masiku aParadeyisini eMisaveni, leyi humesiweke hi 1982. Ku kandziyisiwe timiliyoni to tlula 85 ta buku leyi nge Vutivi Lebyi Yisaka eVuton’wini Lebyi Nga Heriki, leyi humesiweke hi 1995 hi tindzimi ta kwalomu ka 154. Se ku hangalasiwe tikopi ta kwalomu ka 150 wa timiliyoni hi tindzimi ta kwalomu ka 244 ta broxara leyi humesiweke hi 1996 leyi nge I Yini Leswi Xikwembu Xi Swi Languteleke Eka Hina?
18. Ha yini hi tiphina hi tlhelo ra moya hambileswi ku nga ni nkaneto?
18 Hi humelerile hi tlhelo ra moya hambileswi misava ya Sathana yi hambetaka yi hi kaneta. Leswi swi hetisisa marito ya Esaya 54:17 lama nge: “‘Tlhari rihi ni rihi leri nga ta endleriwa ku ku hlasela a ri nge humeleli, ni ririmi rihi ni rihi leri nga ta kanetana na wena ehubyeni u ta ri gweva. Leyi i ndzhaka ya malandza ya Yehovha, naswona ku lulama ka wona ku huma eka mina,’ ku vula Yehovha.” Vona ndlela leyi malandza ya Yehovha ma chavelelekaka ha yona hi ku tiva leswaku Malakiya 3:17 yi hetiseka hi xitalo eka wona: “‘Va ta va va mina,’ Yehovha wa mavuthu u vurile, ‘esikwini leri ndzi humesaka ha rona ndzhaka yo hlawuleka.’”
Ku Tirhela Yehovha Hi Ntsako
19. Xana vanhu lava tirhelaka Yehovha ni lava nga n’wi tirheliki va hambana njhani?
19 Ku hambana loku nga kona exikarhi ka malandza ya Yehovha yo tshembeka ni lava nga emisaveni ya Sathana ku ya ku vonaka. Malakiya 3:18 yi profete leswi: “Kutani n’wina mi ta tlhela mi vona ku hambana exikarhi ka lowo lulama ni lowo homboloka, exikarhi ka loyi a tirhelaka Xikwembu ni loyi a nga xi tirheliki.” Ku hambana kun’wana hi leswaku, lava va tirhelaka Yehovha va n’wi tirhela hi ntsako lowukulu. Xin’wana xa swilo leswi va tiselaka ntsako i ntshembo lowu hlamarisaka lowu va nga na wona. Va tshemba Yehovha hi mbilu hinkwayo loko a ku: “Hikuva ndzi tumbuluxa matilo lamantshwa ni misava leyintshwa; swilo swo sungula a swi nge tsundzukiwi, hambi embilwini a swi nge ti. Kambe khanani, mi tsaka hi masiku hikwalaho ka leswi ndzi swi tumbuluxaka.”—Esaya 65:17, 18; Pisalema 37:10, 11, 29; Nhlavutelo 21:4, 5.
20. Ha yini hi ri vanhu lava tsakeke?
20 Ha xi tshemba xitshembiso xa Yehovha xa leswaku vanhu va yena lavo tshembeka va ta pona siku ra yena lerikulu kutani va hanya emisaveni leyintshwa. (Sofaniya 2:3; Nhlavutelo 7:13, 14) Hambiloko van’wana hikwalaho ku vudyuhari, vuvabyi, kumbe hikwalaho ka mhangu, vo fa siku rero ri nga si fika, Yehovha u tshembisa leswaku u ta va pfuxa a va nyika vutomi lebyi nga heriki. (Yohane 5:28, 29; Tito 1:2) Hambiloko hinkwerhu hi ri ni swiphiqo ni mintlhontlho loko siku leri ra Yehovha ri ri karhi ri tshinela, hi ni xivangelo lexi twalaka xo va vanhu lava tsakeke ku tlula hinkwavo emisaveni.
Xana U Nga Hlamurisa Ku Yini?
• Xana “siku ra Yehovha” i yini?
• Vukhongeri bya misava byi va tekelela njhani Vaisrayele va khale?
• Malandza ya Yehovha ma hetisisa vuprofeta byihi?
• Yehovha u va katekise njhani vanhu vakwe?
[Swivutiso Swa Dyondzo]
[Xifaniso lexi nga eka tluka 21]
Yerusalema wa lembe-xidzana ro sungula wu ‘pfurhe ku fana ni khele ra ndzilo’
[Swifaniso leswi nga eka tluka 23]
Yehovha u khathalela lava n’wi tirhelaka
[Swifaniso leswi nga eka tluka 24]
Hikwalaho ka leswi malandza ya Yehovha ma nga ni ntshembo lowu hlamarisaka, ma tsakile hakunene