Vulema A Byi Hlawuli

CHRISTIAN la tshamaka etikweni ra le Afrika u tlhakisiwe hi masocha lama ringeteke ku n’wi sindzisa leswaku a joyina vusocha, kambe u arile hikwalaho ka ripfalo rakwe leri leteriweke hi Bibele. Kutani ya n’wi yise ekampeni ya masocha, endzhaku ka loko a biwe ku ringana mune wa masiku, rin’wana ra wona ri n’wi duvule nenge. Christian u swi kotile ku ya exibedlhele, kambe u fike a tsemiwa nenge hi le hansi ka tsolo. Etikweni rin’wana ra le Afrika, hambi ku ri swihlangi swi tsemiwe swirho hi vuthu ra vaxandzuki. Naswona ku suka eCambodia ku ya eMatikweni ya Balkan, ku suka eAfghanistan ku ya eAngola, tibomo leti celeriweke ti hambeta ti tsema swirho swa vana ni lavakulu ti va siya va ri swilema.

Swin’wana leswi vangaka vulema i timhangu ni mavabyi yo tanihi vuvabyi bya chukele. Hambi ku ri chefu leyi nga embangwini yi nga vanga vulema. Hi xikombiso, endhawini ya le kusuhi ni doroba ra Yuropa Vuxa, ku ni vana vo hlaya lava tswariweke voko ra vona rin’we ri nga helelanga. Vo va ni xipimbi ehansi ka xikokola. Ndzavisiso wu komba leswaku xitekela xi onhiwe hi nthyakiso wa tikhemikhali. Nhlayo yin’wana ya vanhu va ntsandza-vahlayi va ha ri ni swirho swa vona hinkwaswo kambe va tswariwe swi lamarile kasi van’wana va lamatiwe hi khombo ro karhi. Hakunene, vulema a byi hlawuli.

Ku nga khathariseki leswaku byi vangiwa hi yini, vulema bya onha. Junior u tsemeke nenge wa le ximatsini loko a ri ni malembe ya 20. Endzhakunyana u te: “A ndzi tshikilelekile. Ndzi rile ngopfu hi ku tiva leswaku a ndzi nge he pfuki ndzi kume nenge. A ndzi nga swi tivi leswaku ndzi to swi yini. A ndzi pfilunganyekile.” Hambiswiritano, hi ku famba ka nkarhi langutelo ra Junior ri cince ngopfu. U sungule ku dyondza Bibele kutani a dyondza swilo leswi nga n’wi pfuna leswaku a tolovela vulema bya yena, swi tlhela swi n’wi nyika ntshembo lowu hlamarisaka wa vumundzuku lebyi tsakisaka laha misaveni. Loko u lamarile, xana u nga swi tsakela ku va ni ntshembo wolowo?

Kutani loko swi ri tano, hi kombela u hlaya xihloko lexi landzelaka. Hi ku khutaza leswaku u languta Matsalwa eBibeleni ya wena leswaku u tivonela hi ya wena, leswi enkarhini lowu taka Muvumbi a nga ta swi endlela lava va dyondzaka hi xikongomelo xa yena ni ku hanya hi ku pfumelelana na xona.