Xana U Rhanga U Anakanya U Nga Si Endla Xiboho?

YESU KRESTE u nyike vadyondzisiwa va yena ntshembo wa vutomi lebyi nga heriki, kambe u tlhele a va khutaza leswaku va rhanga va anakanya leswi ku va Mukreste swi vulaka swona. U kombise yinhla yoleyo hi ku va vutisa a ku: “I mani eka n’wina loyi loko a lava ku aka xihondzo a nga rhangiki a tshama ehansi a hlayela ntsengo [kumbe a sungula hi ku anakanyisisa], a vona loko wu ringene ku xi heta?” (Luka 14:28) Xana i ntsengo wihi lowu Yesu a a vulavula ha wona?

Vakreste hinkwavo va langutana ni miringo—naswona yin’wana ya yona i yikulu. (Pisalema 34:19; Matewu 10:36) Hikwalaho hi fanele hi tshama hi lunghekile emianakanyweni ni le moyeni leswaku hi nga hlamali loko hi langutana ni ku kanetiwa kumbe swiphiqo swin’wana. Hi fanele ana se hi anakanyisise hi swiphiqo swo tano leswi katsekaka loko u ri mudyondzisiwa wa Kreste, hi ri karhi hi tiva leswaku hakelo ya kona—i ku ponisiwa eka xidyoho ni rifu—i ya nkoka swinene ku tlula nchumu wihi ni wihi lowu mafambiselo lawa ma nga hi nyikaka wona. Ina, swilo leswi Xikwembu xi swi pfumelelaka—hambi ku ri rifu—swi nge hi twisi ku vava hilaha ku nga heriki loko hi ya emahlweni hi tirhela Xikwembu.—2 Vakorinto 4:16-18; Vafilipiya 3:8.

Xana ripfumelo ra hina ri nga swi kotisa ku yini ku tiya hi ndlela yoleyo? Ripfumelo ra hina ra tiya loko hi endla swiboho leswinene ni loko hi namarhela misinya ya milawu ya Vukreste, kumbe hi teka goza ro karhi hi ku pfumelelana ni ku rhandza ka Xikwembu—ngopfu-ngopfu loko hi ri ehansi ka ntshikilelo wo endla leswi hambaneke. Loko hina hi hexe hi kuma mikateko ya Yehovha hikwalaho ka ku tshembeka ka hina, ripfumelo ra hina ra tiya. Hi ndlela yoleyo hi ta va hi landzela xikombiso xa Yesu, ni vadyondzisiwa va yena vo sungula ni vavanuna ni vavasati hinkwavo va ripfumelo lava enkarhini lowu hundzeke ‘va anakanyeke’ kahle hi leswi ku tirhela Xikwembu swi vulaka swona.—Marka 1:16-20; Vaheveru 11:4, 7, 17, 24, 25, 32-38.