Ku Fanele Ku Ndlandlamuxiwa Hi Xihatla Hikwalaho Ka Ku Andza Lokukulu
“Tanani Eka Mina, . . . Ndzi Ta Mi Phyuphyisa”
Ku Fanele Ku Ndlandlamuxiwa Hi Xihatla Hikwalaho Ka Ku Andza Lokukulu
YESU KRESTE u te: “Tanani eka mina, . . . ndzi ta mi phyuphyisa.” (Matewu 11:28) Hakunene xa tsakisa xirhambo lexi humaka eka Nhloko ya vandlha ra Vukreste! (Vaefesa 5:23) Loko hi anakanyisisa kahle hi marito wolawo a hi nge tshiki ku tlangela xihlovo xa nkoka lexi phyuphyisaka—ku nga ku hlengeletana ni vamakwerhu va moya eminhlanganweni ya Vukreste. Hakunene hi pfumelelana ni mupisalema la yimbeleleke a ku: “Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we!”—Pisalema 133:1.
Hakunene, ku hlengeletana ka hina eminhlanganweni yo tano ya vugandzeri i swa nkoka, naswona hi tlhelo ra moya xiyimo xa tsakisa. Hikwalaho ka xivangelo lexinene muntshwa un’wana la nga Mukreste u te: “Ndzi heta siku hinkwaro ndzi ri exikolweni naswona ndza karhala. Kambe minhlangano yi fana ni xihlovo lexi nga emananga laha ndzi phyuphyisiwaka kona kutani ndzi lunghekela siku leri landzelaka.” Muntshwa wa le Nigeria u te: “Ndzi kume leswaku ku endla xinghana ni vanhu lava rhandzaka Yehovha swi ndzi pfuna leswaku ndzi tshama ndzi ri munghana wa yena.”
Holo ya Mfumo ya Timbhoni ta Yehovha yi tirha tanihi xivindzi xa vugandzeri bya ntiyiso etikweni. Etindhawini to tala minhlangano yi khomeriwa eHolweni ya Mfumo kambirhi hi vhiki naswona swichudeni swa Bibele swi khutaziwa ku va kona hi ku hatlisa leswaku swi ta vuyeriwa hi xinghana lexi phyuphyisaka kona kwale.—Vaheveru 10:24, 25.
Xilaveko Xa Xihatla
Hambiswiritano, ku xiyiwe leswaku a hi Timbhoni ta Yehovha hinkwato leti tiphinaka hi ku tirhisa Holo ya Mfumo leyi fanelekaka. Ku andza lokukulu ka nhlayo ya vahuweleri va Mfumo emisaveni hinkwayo ku endle leswaku ku va ni xilaveko xa xihatla. Ka ha laveka Tiholo ta Mfumo ta magidi, ngopfu-ngopfu ematikweni lama ha hluvukaka.—Esaya 54:2; 60:22.
Hi xikombiso: A ku ri na khume wa Tiholo ta Mfumo ntsena ehenhla ka mavandlha ya 290 entsindza wa Democratic Republic of Congo. Tiko rero ri ni xilaveko xa xihatla xa Tiholo ta Mfumo to tala. Le Angola mavandlha yo tala ma hlanganyela ehandle hikuva Tiholo ta Mfumo ta kayivela. Ku ni xilaveko xo fana na xexo ematikweni yo tala.
Hikokwalaho, ku sukela hi 1999 ku endliwe matshalatshala lamakulu leswaku ku hoxiwa xandla entirhweni wo aka Tiholo ta Mfumo ematikweni lama pfumalaka. Leswaku ti pfuna eka tsima ro aka ematikweni yo tano Timbhoni leti nga ni ntokoto ti tirhe hi ku tirhandzela. Loko matshalatshala yo tano ma fambisana ni moya wa ku tinyiketa naswona ku ri ni vatirhi va kwalaho vo tirhandzela, vuyelo bya kona byi khutaza swinene. Hikwalaho, Timbhoni ta kwalaho ta vuyeriwa eka ndzetelo lowu ti wu kumaka. Leswi hinkwaswo swi pfuneta eku hlangavetaneni ni swilaveko swa ku akiwa ka Tiholo ta Mfumo ematikweni ya ka vona.
Hikwalaho ku nyikeriwa mpfuno lowu pfumelelanaka ni swiyimo loko ku akiwa Tiholo ta Mfumo, ku tirhisiwa maakelo ni switirho swa ndhawu ya kwalaho. Pakani ya kona a hi ku fikelela xilaveko lexikulu xa Tiholo ta Mfumo ntsena kambe ni ku va ni nongonoko wo pfuxeta miako lowu pfumelelanaka ni swiyimo swa kwalaho.—2 Vakorinto 8:14, 15.
Vuyelo Lebyi Khutazaka
Hi byihi vuyelo bya matshalatshala lawa yo lunghiselela tindhawu ta vugandzeri? Eku sunguleni ka 2001, xiviko lexi humaka eMalawi xi te: “Swilo leswi endliweke etikweni leri swa hlamarisa hakunene. Eka tin’hweti timbirhi leti nga ta landzela, hi ta hetisa Tiholo tin’wana ta Mfumo.” (Swifaniso 1 na 2) Sweswinyana le Togo vatirhi vo tirhandzela va swi kotile ku aka Tiholo ta Mfumo to hlayanyana ta xiyimo xa le hansi. (Xifaniso 3) Ntirho lowunene lowu endliwaka hi vatirhi vo tirhandzela wu tlhela wu pfuneta eku akiweni ka Tiholo ta Mfumo leti faneleke le Mexico, Brazil ni le matikweni man’wana.
Mavandlha ma swi xiya leswaku loko ku akiwe Holo ya Mfumo, vanhu va kwalaho va swi vona leswaku Timbhoni ta Yehovha ti ta tshama ti ri kona. Swi tikomba onge vo tala a va kanakana ku hlanganyela ni Timbhoni ku kondza ku va ni ndhawu leyi faneleke ya vugandzeri. Vandlha ra le Nafisi le Malawi ri ri: “Leswi se hi nga ni Holo ya Mfumo leyi
faneleke, sweswo swi nyikela vumbhoni lebyinene. Hikwalaho, swa olova ku sungula tidyondzo ta Bibele.”Swirho swa le Vandlheni ra Krake le Benin swi tiyisele ku hlekuriwa swinene enkarhini lowu hundzeke hikuva Holo ya Mfumo yo sungula a yi ri ya xikhale loko yi pimanisiwa ni tikereke tin’wana. (Xifaniso 4) Sweswi vandlha rero ri ni Holo ya Mfumo leyintshwa yo saseka leyi yimelaka vugandzeri bya ntiyiso hi ndlela leyi xiximekaka. (Xifaniso 5) Vandlha leri ri na vahuweleri va Mfumo va 34 naswona hi Sonto ku va ni vanhu va 73 hi xiringaniso, kambe loko ku nyiketeriwa Holo ya Mfumo a ku ri ni vanhu va 651. Vo tala va vona a ku ri vanhu va kwalaho lava va tsakisiweke hi ku
vona leswaku Timbhoni ti swi kotile ku aka holo hi xinkarhana. Loko rhavi ra le Zimbabwe ri hlamusela leswi se swi endliweke ri tsale ri ku: “Ku nga si hela ni n’hweti ku ri karhi ku akiwa Holo ya Mfumo, nhlayo ya lava a va va kona hakanyingi a yi andzisiwe kambirhi.”—Swifaniso 6 na 7.A swi kanakanisi leswaku Tiholo ta Mfumo to tala letintshwa ti va ndhawu yo phyuphyisiwa emoyeni eka Vakreste lava tinyiketeleke ni le ka vanhu lava tsakelaka. Endzhaku ka loko vandlha rin’wana ra le Ukraine ri sungule ku tirhisa Holo ya rona ya Mfumo leyintshwa, Mbhoni yin’wana ya kwalaho yi te: “Hi tsake ngopfu. Hi tivonele hi mahlo ya hina ndlela leyi Yehovha a pfunaka vanhu va yena ha yona.”
[Bokisi/Swifaniso leswi nga eka tluka 10, 11]
Ku Tlangeriwa Ka Nseketelo Lowukulu
Timbhoni ta Yehovha ta tsaka loko ti vona nhluvuko wa xihatla lowu endliweke leswaku ku hetisisiwa xilaveko xa xihatla xa Tiholo ta Mfumo letintshwa emisaveni hinkwayo. Ku andza loku yaka emahlweni ka vagandzeri va Yehovha ematikweni yo hambana-hambana, ku endle leswaku ku va na xilaveko xo aka Tiholo ta Mfumo letintshwa enkarhini lowu taka. Phela, hi lembe ra ntirho ra 2001, hi xiringaniso ku vumbiwe mavandlha lamantshwa ya 32 vhiki na vhiki! Mavandlha yo tano ma lava tindhawu to hlanganela eka tona ni to gandzela eka tona.
Ku nga ha tlakuka xivutiso lexi nge, ‘Xana ku akiwa ka Tiholo ta Mfumo letintshwa ku hakeleriwa njhani, ngopfu-ngopfu ematikweni lawa vamakwerhu va kona va nga riki na mali?’ Nhlamulo ya kona yi titshege hi nseketelo wa Xikwembu ni ku hanana ka vanhu.
Hi ku pfumelelana ni xitshembiso xa yena, Yehovha u chululela moya wakwe lowo kwetsima ehenhla ka malandza yakwe, a ma endla ma kota ku ‘endla leswinene, ma fuwa hi mintirho leyinene, ma hanana, ma tiyimisela ku avelana ni van’wana.’ (1 Timotiya 6:18) Moya wa Xikwembu wu susumetela Timbhoni ta Yehovha leswaku ti seketela ntirho wo chumayela hi Mfumo hi tindlela hinkwato—ti nyikela hi nkarhi wa tona, matimba ya tona ni hi swilo swin’wana swa tona emintirhweni ya Vukreste.
Moya wo hanana wu susumetela Timbhoni ni van’wana lava pfunetaka entirhweni wo ndlandlamuxa ni wo aka leswaku va nyikela hi timali. Ku tlhandlekela eka ku hakelela timali ta vandlha ra ka vona, va tlhela va nyikela eka ntirho wo aka ematikweni man’wana.
Evandlheni rin’wana ni rin’wana, ku ni mabokisi lama tsariweke leswaku “Minyikelo Ya Ntirho Wa Misava Hinkwayo—Matewu 24:14.” Emabokisini wolawo vanhu va nga hoxa minyikelo ya ku tirhandzela loko va swi rhandza. (2 Tihosi 12:9) Minyikelo hinkwayo, leyikulu ni leyitsongo ya tlangeriwa. (Marka 12:42-44) Minyikelo leyi yi tirhisiwa hi tindlela to hambana-hambana hi ku ya hi xilaveko xa kona, ku katsa ni ku akiwa ka Tiholo ta Mfumo. Minyikelo yo tano a hi yo hakela vakulukumba lava holeriwaka hikuva Timbhoni ta Yehovha a ti na vona.
Xana minyikelo ya ntirho wa misava hinkwayo ya xi hetisisa xikongomelo xa yona? Ina, ya xi hetisisa. Rhavi ra le Liberia—ku nga tiko leri hlaseriweke hi nyimpi ya xin’wana-manana—ri vika leswaku vunyingi bya Timbhoni ta kwalaho a ti tirhi naswona a ti na mali. Xana vanhu va Yehovha va le tikweni leri va ta tikuma njhani tindhawu leti faneleke ta vugandzeri? Hofisi ya rhavi yi ri: “Ku ta tirhisiwa minyikelo ya vamakwerhu va le matikweni man’wana leswaku ku hakeleriwa ntirho lowu. Hakunene i lunghiselelo ra vutlhari ni ra rirhandzu!”
Ni vamakwerhu va kwalaho na vona va nyikela, hambileswi va nga swisiwana. Tiko ra Sierra Leone leri nga eAfrika ra vika: “Vamakwerhu va laha va seketela matshalatshala lawa naswona va swi tsakela ku tirhisa matimba ya vona ni ku nyikela hi timali hilaha va nga kotaka hakona leswaku va seketela ku akiwa ka Tiholo ta Mfumo.”
Matshalatshala lawa yo aka, eku heteleleni ma yisa ku dzuneka eka Yehovha. Vamakwerhu va le Liberia va vula hi ku tsaka va ku: “Ku akiwa ka tindhawu leti faneleke ta vugandzeri etikweni hinkwaro swi ta kombisa vanhu leswaku vugandzeri bya ntiyiso byi ta tshama byi ri kona, naswona byi ta kwetsimisa ni ku xixima vito lerikulu ra Xikwembu xa hina.”