Swivutiso Swa Vahlayi

Xana swi fanerile leswaku Mukreste wa ntiyiso a ya enkosini kumbe emucatweni lowu khomeriwaka ekerekeni?

Yehovha a nga swi tsakeli leswaku hi hlanganyela eka nchumu wun’wana ni wun’wana lowu fambisanaka ni vukhongeri bya mavunwa naswona hi fanele hi wu papalata. (2 Vakorinto 6:14-17; Nhlavutelo 18:4) Nkosi lowu humelaka ekerekeni i ntirho wa vukhongeri lowu hakanyingi wu fambisanaka ni ku chumayeriwa ka tidyondzo leti nga riki ta Matsalwa to tanihi moya-xiviri lowu nga fiki ni leswaku vanhu lavanene va ta hakeriwa hi ku ya hanya etilweni. Wu nga ha katsa ni ku endla xihambano hi tintiho ni ku khongela swin’we ni mufundhisi. Swikhongelo kun’we ni mintirho yin’wana ya vukhongeri leyi nga fambisaniki na dyondzo ya Bibele na swona swi nga ha endliwa emucatweni lowu fambisiwaka hi mufundhisi lowu khomeriwaka ekerekeni kumbe kun’wana. Loko Mukreste a ri exikarhi ka vanhu lava endlaka xiendlo xo karhi xa vukhongeri, swi nga ha n’wi tikela ku papalata ku va joyina. Wa nga vona ndlela leyi ku nga vuphukuphuku ha yona ku ya tihoxa ethyakeni ro tano!

Ku vuriwa yini hi loko Mukreste a vona onge swa n’wi boha ku ya enkosini kumbe emucatweni lowu nga ekerekeni? Hi xikombiso, nuna la nga riki mupfumeri a nga ha sindzisa nsati wakwe la nga Mukreste leswaku a famba na yena kwale. Xana a nga famba na yena a ya va muhlaleri ntsena? Hikwalaho ko lava ku tsakisa nuna wakwe, nsati wa yena a nga ha anakanya ku famba na yena, kambe a tiyimisele leswaku a nge hlanganyeli eka xiendlo xihi na xihi xa vukhongeri byebyo. Hi hala tlhelo a nga ha vona swi antswa leswaku a nga yi, hikwalaho ka leswi a ehleketaka leswaku swiyimo swi nga ha n’wi tshikilela, kumbexana swi n’wi endla leswaku a tshova misinya ya milawu ya Xikwembu. Swi le ka yena leswaku u heta hi ku yini. A swi kanakanisi leswaku u ta lava ku va ni ripfalo leri baseke.—1 Timotiya 1:19.

Hambiswiritano, swi ta antswa loko o hlamusela nuna wakwe leswaku a nge hlanganyeli eka swiendlo swa vukhongeri kumbe ku yimbelela tinsimu kumbe ku nkhinsama loko ku khongeriwa. Hikwalaho ka leswi a n’wi hlamuseleke swona, nuna wakwe a nga ha gimeta hi leswaku loko swi ri tano swa antswa a nga yi hikuva a nga n’wi poyila. A nga ha hlawula ku famba a ri yexe hikwalaho ka leswi a rhandzaka nsati wakwe, a xiximaka vupfumeri byakwe, kumbe hi ku lava leswaku a nga khomisiwi tingana. Kambe loko a n’wi sindzisa leswaku a famba na yena, a nga ha famba na yena a ya va muhlaleri ntsena.

Hi fanele hi tlhela hi anakanya hi ndlela leyi swi nga ta va khumba ha yona vapfumeri-kulorhi loko hi ya ekerekeni. Xana swi nga ha karhata mapfalo ya van’wana? Xana va nga ha vona swi nga vuli nchumu ku hlanganyela eka ku gandzela swikwembu swa hava? Muapostola Pawulo u tsundzuxile: “Mi tiyiseka hi swilo swa nkoka swinene, leswaku mi pfumala xivati ni ku ka mi nga va khunguvanyisi van’wana ku fikela esikwini ra Kreste.”—Vafilipiya 1:10.

Loko xiendlakalo xa kona xi ri xa xaka ra le kusuhi, maxaka ma nga ha ku tshikilela swinene. Hambiswiritano, Mukreste u fanele a ehleketisisa hi ndlela leyi swi nga ta va khumba ha yona van’wana. Minkarhi yin’wana a nga ha ehleketa leswaku a ku nge vi na xiphiqo loko o ya enkosini kumbe emucatweni lowu khomeriweke ekerekeni, a ya va muhlaleri ntsena. Kambe, ku ya ka yena kwale swi ta karhata ripfalo ra yena ni ra van’wana, kasi a swi ta antswa loko a a nga yanga ekerekeni. Ku nga khathariseki leswaku xiyimo xa kona hi xihi, Mukreste u fanele a tiyiseka leswaku xiboho xa yena xi n’wi siya a ri ni ripfalo leri baseke emahlweni ka Xikwembu ni vanhu.