Xana Wa Ri Twisisa Rirhandzu Ra Xikwembu?

WANUNA la vuriwaka Yobo u tshame a hlamusela xiyimo xa munhu la nga hetisekangiki hi marito lawa: “Munhu la velekiweke hi wansati, u hanya nkarhi wo koma naswona u taleriwe hi ku karhateka. U huma kukota xiluva kutani a khatluriwa, naswona u baleka ku fana ni ndzhuti kutani a nga ha vi kona.” (Yobo 14:1, 2) Vutomi bya Yobo hi nkarhi wolowo a byi tele hi maxangu ni nhlomulo. Xana u tshame u titwa hi ndlela yoleyo?

Hambiswiritano, ku nga khathariseki swiphiqo hinkwaswo leswi hi nga ha langutanaka na swona, hi ni ntshembo lowu tiyeke lowu sekeriweke eka ntwela-vusiwana wa Xikwembu ni rirhandzu ra xona. Xo sungula, Tata wa hina wa le matilweni loyi a nga ni rirhandzu u hi nyike gandzelo ra nkutsulo leswaku a kutsula vanhu exidyohweni. Hi ku ya hi Yohane 3:16, 17, Yesu Kreste u te: “Xikwembu xi rhandze misava [ya vanhu] swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki. Hikuva Xikwembu xi rhume N’wana wa xona [Yesu] emisaveni, ku nga ri leswaku a ta avanyisa misava, kambe leswaku misava yi ponisiwa ha yena.”

Nakambe anakanya hi langutelo ra tintswalo leri Xikwembu xi nga na rona hi hina vanhu lava nga hetisekangiki. Muapostola Pawulo u te: “Hi munhu un’we xi endle matiko hinkwawo ya vanhu, leswaku va tshama ehenhla ka vuandlalo hinkwabyo bya misava, kutani xi yimise minkarhi leyi vekiweke ni ku veka maava ya lomu ku tshamaka vanhu, leswaku va lava Xikwembu, loko vo tshuka va xi ambamba kutani va xi kuma hakunene, hambileswi, entiyisweni, xi nga riki kule ngopfu ni un’wana ni un’wana wa hina.” (Mintirho 17:26, 27) Anakanya hi leswi sweswo swi vulaka swona eka hina! Hambileswi hi nga vanhu lava nga hetisekangiki hi nga ha va ni vuxaka na Yehovha Xikwembu, Muvumbi wa hina la nga ni rirhandzu.

Kutani ke, hi nga langutela vumundzuku hi ri karhi hi tiyiseka leswaku Xikwembu xa hi khathalela naswona hi rirhandzu xi endle lunghiselelo ra leswaku hi vuyeriwa hilaha ku nga heriki. (1 Petro 5:7; 2 Petro 3:13) Kutani a swi kanakanisi leswaku hi nga va ni xivangelo lexi twalaka hi ku dyondza swo tala eBibeleni, ku nga Rito ra Xikwembu xa hina lexi nga ni rirhandzu.