‘Va Rhelela’

“Magandlati ya mati ma va funengetile; va rhelele evuentweni ku fana ni ribye.”

MUXE ni Vaisrayele va yimbelele marito wolawo va tlangela ku ntshunxiwa ka vona eLwandle ro Tshwuka ni ku lovisiwa ka valala va vona va Vaegipta lava a va va hlongorisa—Faro ni mavuthu yakwe ya nyimpi.—Eksoda 15:4, 5.

Un’wana ni un’wana la voneke xiendlakalo xexo xo hlamarisa u hatle a twisisa dyondzo ya kona. A nga kona la nga tlhontlhaka kumbe a lwisana ni vulawuri bya Yehovha kutani a hambeta a hanya. Hambiswiritano, endzhaku ka tin’hweti ti nga ri tingani, Vaisrayele lava tivekaka—Kora, Dathani, Abirama swin’we ni vaseketeri va vona va 250—va tlhontlhe vulawuri lebyi Muxe na Aroni va byi nyikiweke hi Xikwembu.—Tinhlayo 16:1-3.

Hi nkongomiso wa Yehovha, Muxe u lemuxe Vaisrayele leswaku va fambela ekule ni mintsonga ya vaxandzuki. Dathani na Abirama swin’we ni mindyangu ya vona va arile ku cinca langutelo ra vona. Kutani Muxe u vule leswaku Yehovha u ta swi kombisa hi ndlela Yakwe leswaku vanhu lava “va tirhisane na Yehovha hi ndlela leyi nga kombisiki xichavo.” Hi nkarhi wolowo, Yehovha a pfula misava leyi a yi ri ehansi ka vona. “Hiloko va rhelela va ri karhi va hanya eSheol swin’we ni hinkwavo lava a va ri va vona, misava yi va funengeta.” Ku vuriwa yini hi Kora ni vaxandzuki lavan’wana? “Hiloko ku ta ndzilo wu huma eka Yehovha kutani wu herisa vavanuna lava va 250 lava a va nyikela murhi wa risuna.”—Tinhlayo 16:23-35; 26:10.

Faro ni mavuthu yakwe, swin’we ni vaxandzuki va le mananga va lovisiwile hikwalaho ko tsandzeka ku xixima vulawuri bya Yehovha swin’we ni ku nghenelela ka yena etimhakeni ta vanhu vakwe. Hikwalaho, i swa xihatla leswaku hinkwavo lava lavaka ku sirheleriwa hi Yehovha eminkarhini leyi ya mangava va dyondza va tlhela va yingisa Yehovha “La nge Henhla-henhla” ni “Lowa Matimba Hinkwawo.” Loko va endla tano, va nga yingisa marito ya Yehovha lama tiyisaka nhlana lama nge: “Vanhu va 1000 va ta wa etlhelo ka wena ni va 10000 evokweni ra wena ra xinene; a wu nge tshineli eka wena. U ta wu languta hi mahlo ya wena ntsena u vona ku rihisiwa ka lavo homboloka. Hikuva u te: ‘Yehovha i vutumbelo bya mina,’ La nge Henhla-henhla u n’wi endle vutshamo bya wena.”—Pisalema 91:1, 7-9.