Landzela Xikombiso Xa Tihosi

“U fanele a titsalela buku, kopi ya nawu [lowu] . . . Yi fanele yi tshama na yena, naswona u fanele a yi hlaya masiku hinkwawo ya vutomi byakwe.”—Deteronoma 17:18, 19.

1. I vamani lava Mukreste a nga tsakelaka ku fana na vona?

KUMBEXANA a wu si tshama u lorha u ri hosi kumbe u ri hosi ya xisati. Xana swi nga koteka leswaku Mukreste la tshembekeke naswona a ri xichudeni xa Bibele, a tivona a ri Hosi leyinene ku fana na Davhida, Yosiya, Hezekiya kumbe Yoxafati? Ina swi nga koteka, na wena u nga fana na vona hi ndlela yin’we yo hlawuleka. Hi yihi ndlela ya kona? Naswona ha yini u fanele u fana na vona hi ndlela yoleyo?

2, 3. I yini leswi Yehovha ana se a swi vonile malunghana ni hosi, naswona i yini leswi loyi a nga ta va hosi a a fanele a swi endla?

² Esikwini ra Muxe, khale ka khaleni Xikwembu xi nga si pfumelela Vaisrayele leswaku va va ni hosi, ana se a xi swi vonile leswaku vanhu va xona va ta navela ku hlawula un’wana exikarhi ka vona leswaku a va hosi. Hiloko xi huhutela Muxe leswaku eka ntwanano wa Nawu a katsa ni swiletelo leswi a swi kongomisiwe eka lava va nga ta va tihosi.

³ Xikwembu xi te: “Loko u hetelela u fika etikweni leri Yehovha Xikwembu xa wena a ku nyikaka rona, . . . kutani u te, ‘Inge ndzi tivekela hosi ehenhla ka mina ku fana ni matiko hinkwawo lawa ma ndzi rhendzeleke’; hakunene u fanele u tivekela hosi leyi Yehovha Xikwembu xa wena a nga ta ku hlawulela yona. . . . Kutaku loko a tshama exiluvelweni xa mfumo wakwe, yena u fanele a titsalela buku, kopi ya nawu [lowu] . . . Yi fanele yi tshama na yena, naswona u fanele a yi hlaya masiku hinkwawo ya vutomi byakwe, ku endlela leswaku a dyondza ku chava Yehovha Xikwembu xakwe, leswaku a hlayisa marito hinkwawo ya nawu lowu ni swileriso leswi, a swi endla.”—Deteronoma 17:14-19.

4. Xana Xikwembu a xi lerise leswaku tihosi ti endla yini?

⁴ Ina, loyi Yehovha a nga ta n’wi hlawula ku fuma vagandzeri va yena a a fanele a tiendlela kopi ya matsalwa lawa u nga ma kumaka eBibeleni ya wena. Kutani hosi a yi fanele yi hlaya matsalwa wolawo siku ni siku, hi ku phindha-phindha. Xikongomelo xa ku ma hlaya a ku nga ri ku ma tiva hi nhloko. A yi fanele yi ma kambisisa naswona a swi ta yi pfuna. Leswaku hosi leyi Yehovha a nga ta yi hlawula yi tshama yi ri ni mbilu leyinene a yi fanele yi dyondza kopi yoleyo. Nakambe a yi fanele ku kambisisa matsalwa wolawo lama huhuteriweke leswaku yi humelela ni ku va ni vutlhari.—2 Tihosi 22:8-13; Swivuriso 1:1-4.

Landzela Xikombiso Xa Tihosi

5. Hi tihi tibuku ta Bibele leti Hosi Davhida a ti kopululeke ni ku ti hlaya, naswona u titwise ku yini hi sweswo?

⁵ Xana u ehleketa leswaku Davhida a a fanele a endla yini loko a va hosi ya Israyele? A a fanele a endla kopi ya Tibuku ta Ntlhanu to Sungula ta Matsalwa (Genesa, Eksoda, Levhitika, Tinhlayo na Deteronoma). Ehleketa ndlela leyi Davhida a faneleke a khumbeke ha yona emianakanyweni ni le mbilwini ku va a tirhise matihlo ni mavoko yakwe ku tsala kopi ya Nawu. Swi nga ha endleka leswaku Muxe u tlhele a tsala buku ya Yobo swin’we ni Tipisalema 90 na 91. Xana swi nga endleka leswaku Davhida u kopulule ni tibuku leti? Kumbexana. Nakambe swi nga ha endleka leswaku  u kopulule ni buku ya Yoxuwa, Vaavanyisi ni ya Rhuti. Xisweswo wa swi vona leswaku Hosi Davhida a a ri ni xiphemu lexikulu xa Bibele lexi a a fanele a xi hlaya ni ku anakanyisisa ha xona. Loko u xiya leswi a swi vuleke malunghana ni Nawu wa Xikwembu, leswi kumekaka eka Pisalema 19:7-11, u ni xivangelo lexi twalaka xo pfumela leswaku u endle tano.

6. Xana hi swi tivisa ku yini leswaku Yesu a a rhandza Matsalwa ku fana ni kokwa wakwe Davhida?

⁶ Davhida Lonkulu—ku nga Yesu, N’wana wa Davhida—u tekelele xikombiso lexi fanaka. Yesu a a tshamela ku ya esinagogeni ya le ndhawini ya ka vona vhiki ni vhiki. Loko a ri kwalaho a a yingisa loko ku hlayiwa Matsalwa ma tlhela ma hlamuseriwa. Tlhandlakambirhi, minkarhi yin’wana Yesu hi byakwe a a hlayela vanhu Rito ra Xikwembu a tlhela a ri hlamusela. (Luka 4:16-21) Swi le rivaleni leswaku a a ma tiva kahle Matsalwa. Loko u hlaya marungula ya Tievhangeli, u ta swi vona leswaku Yesu u xi tirhise ngopfu xiga lexi nge “ku tsariwile” naswona etindhawini tin’wana u kombetele hi ku kongoma eka Matsalwa yo karhi. Phela, eDyondzweni yakwe ya le Ntshaveni leyi tsariweke hi Matewu, Yesu u tshahe ka 21 eMatsalweni ya Xiheveru.—Matewu 4:4-10; 7:29; 11:10; 21:13; 26:24, 31; Yohane 6:31, 45; 8:17.

7. Xana Yesu a a hambane njhani ni varhangeri va vukhongeri?

⁷ Yesu u yingise xitsundzuxo lexi kumekaka eka Pisalema 1:1-3: “Wa tsaka munhu la nga fambangiki hi xitsundzuxo xa lavo homboloka, . . . kambe u tsakela nawu wa Yehovha, naswona nawu wakwe u wu hlaya hi rito ra le hansi vusiku ni nhlikanhi. . . . Hinkwaswo leswi a swi endlaka swi ta humelela.” Sweswo a swi hambane ngopfu ni leswi a swi endliwa hi varhangeri va vukhongeri va le nkarhini wa yena, lava a “va tiveke exitshan’weni xa Muxe” kambe va honiseke “nawu wa Yehovha”!—Matewu 23:2-4.

8. Ha yini varhangeri va vukhongeri va Vayuda va nga vuyeriwanga loko va dyondza ni ku kambisisa Bibele?

⁸ Hambiswiritano van’wana va nga ha hlamarisiwa hi marito lama twalaka onge Yesu a a nga khutazi leswaku vanhu va hlaya Bibele. Eka Yohane 5:39, 40, hi hlaya marito lawa Yesu a ma byeleke van’wana lava a va hanya enkarhini wakwe: “Mi kambisisa Matsalwa, hikuva mi ehleketa leswaku hikwalaho ka wona mi ta va ni vutomi lebyi nga heriki; kasi hi wona lama nyikelaka vumbhoni mayelana na mina. Kambe a mi swi lavi ku ta eka mina leswaku mi kuma vutomi.” Hi marito wolawo Yesu a a nga siveli vayingiseri vakwe lava nga Vayuda ku hlaya Matsalwa. Ematshan’weni ya sweswo, a a paluxa vuhomboloki ni vukanganyisi bya vona. A va swi tiva leswaku Matsalwa ma ta va kongomisa evuton’wini lebyi nga heriki, kambe wona Matsalwa wolawo a va ma kambisisa a ma fanele ma va kongomisa eka Mesiya, Yesu. Nilokoswiritano, va arile ku n’wi amukela. Xisweswo ku dyondza ka vona a ku va pfunanga nchumu hikuva a va hombolokile, a va nga swi landzeli leswi va swi dyondzaka.—Deteronoma 18:15; Luka 11:52; Yohane 7:47, 48.

9. Hi xihi xikombiso lexinene lexi vaapostola ni vaprofeta va khale va xi vekeke?

⁹ Vadyondzisiwa ni vaapostola va Yesu a va nga ri tano! A va dyondza ‘matsalwa yo kwetsima, lawa ma swi kotaka ku tlharihisa munhu leswaku a ta pona.’ (2 Timotiya 3:15) Hi ndlela leyi, a va fana ni vaprofeta va khale lava ‘va vutisiseke hi rixaladza naswona va endleke ndzavisiso wa vukheta.’ Vaprofeta volavo a va swi tiva leswaku a va fanelanga va endla ndzavisiso wolowo hi tin’hweti ti nga ri tingani ntsena kumbe hi lembe rin’we. Muapostola Petro u vula leswaku “va hambete va kambisisa,” ngopfu-ngopfu ha Kreste ni mikateko leyi nga ta tisiwa hi leswi a a ta swi endla leswaku a ponisa vanhu. Eka papila ra yena ro sungula, Petro u tshahe ka 34 etibukwini ta khume ta Bibele.—1 Petro 1:10, 11.

10. Ha yini un’wana ni un’wana wa hina a fanele a tsakela ku dyondza Bibele?

¹⁰ Kutani, swi le rivaleni leswaku lava a va ta va  tihosi ta Israyele wa khale a va fanele ku dyondza Rito ra Xikwembu hi vukheta. Yesu u landzele xikombiso lexi fanaka. Naswona lava a va ta va tihosi na Kreste etilweni a va fanele va endla leswi fanaka. (Luka 22:28-30; Varhoma 8:17; 2 Timotiya 2:12; Nhlavutelo 5:10; 20:6) Xikombiso lexi xa tihosi i xa nkoka namuntlha eka hinkwavo lava va languteleke ku kuma mikateko leyi nga ta tisiwa hi Mfumo emisaveni.—Matewu 25:34, 46.

Xiavelo Xa Tihosi Swin’we Na Wena

11. (a) Hi rihi khombo leri Vakreste va nga ha welaka eka rona loko swi ta eku dyondzeni? (b) Hi swihi swivutiso leswi swi nga ta va swinene leswaku hi tivutisa swona?

¹¹ Hi nga vula hi ku tiyiseka ni hi ku kongoma leswaku Mukreste un’wana ni un’wana wa ntiyiso u fanele ku kambisisa Bibele. Leswi a swi fanelanga swi endliwa ntsena loko munhu a dyondza Bibele ro sungula ni Timbhoni ta Yehovha. Un’wana ni un’wana wa hina u fanele a papalata moya lowu van’wana a va ri na wona hi nkarhi wa muapostola Pawulo, lava hi ku famba ka nkarhi a va nga ha yi hisekeli dyondzo ya vona vini. Va dyondze “swilo swa masungulo swa marito lama hlawulekisiweke ya Xikwembu,” swo kota “dyondzo ya masungulo malunghana na Kreste.” Kambe, dyondzo ya vona a yi yanga emahlweni xisweswo a va ‘chivirikanga leswaku va wupfa.’ (Vaheveru 5:12–6:3) Hikwalaho hi nga ha tivutisa: ‘Xana ndzi titwisa ku yini hi ku va ni dyondzo ya mina n’wini ya Rito ra Xikwembu, ku nga khathariseki leswaku ndza ha ku sungula ku hlanganyela ni vandlha ra Vukreste kumbe i khale ndzi ri karhi ndzi hlanganyela na rona? Pawulo u khongelele Vakreste va le nkarhini wa yena leswaku va hambeta va “kula eku tiveni ka Xikwembu hi ku kongoma.” Xana ndzi kombisa leswaku ndzi rhandza ku endla hilaha ku fanaka?’—Vakolosa 1:9, 10.

12. Ha yini swi ri swa nkoka ku va munhu a hambeta a rhandza Rito ra Xikwembu?

¹² Nchumu wa nkoka lowu nga ta ku pfuna ku va ni mikhuva leyinene yo dyondza i ku hlakulela ku rhandza Rito ra Xikwembu. Pisalema 119:14-16 yi vula leswaku minkarhi hinkwayo hi fanele hi anakanyisisa hi ndlela leyi nga ni xikongomelo hi Rito ra Xikwembu, hikuva hi yona ndlela leyi nga ta endla leswaku hi ri rhandza. Nakambe sweswo swi tano ku nga khathariseki leswaku u ni nkarhi wo tanihi kwihi u ri Mukreste. Ku kandziyisa sweswo, tsundzuka xikombiso xa Timotiya. Hambileswi nkulu loyi la nga Mukreste ana se a a ri “socha lerinene ra Kreste Yesu,” Pawulo u n’wi khutaze ku endla hinkwaswo leswi a nga swi kotaka leswaku a “ri tamela khwatsi rito ra ntiyiso.” (2 Timotiya 2:3, 15; 1 Timotiya 4:15) Swi le rivaleni leswaku ku endla hinkwaswo “leswi u nga swi kotaka” swi katsa ku va ni mikhuva leyinene yo dyondza.

13. (a) U nga wu kuma njhani nkarhi lowu engetelekeke wo dyondza Bibele? (b) U vona leswaku hi swihi leswi u nga swi endlaka leswaku u kuma nkarhi wo dyondza?

¹³ Ku vekela nkarhi etlhelo wo dyondza Bibele minkarhi hinkwayo swi ta ku pfuna leswaku u va ni mikhuva leyinene yo dyondza. Xana u endla njhani emhakeni leyi? Ku nga khathariseki leswaku u hlamula njhani, xana u anakanya leswaku u nga vuyeriwa hi ku tinyika nkarhi lowu engetelekeke edyondzweni ya wena n’wini? U nga ha vutisa u ku ‘Xana ndzi nga wu kuma kwihi nkarhi wo endla tano?’ Van’wana va kume nkarhi lowu engetelekeke wo vuyeriwa hi dyondzo ya Bibele, hi ku pfuka ka ha ri nimixo. Va nga ha heta timinete ta 15 va ri karhi va hlaya Bibele kumbe va ri eku dyondzeni. Kumbe, xana u nga endla ku cinca ko karhi eka xiyimiso xa wena xa vhiki ni vhiki? Hi xikombiso, loko u rhandza ku hlaya phepha-hungu siku ni siku kumbe u hlalela mahungu nimadyambu eka thelevhixini, xana swi nga koteka leswaku u tlula siku rin’we evhikini u nga swi endli sweswo? Nkarhi wolowo u nga wu tirhisela ku hlaya Bibele. Loko wo tshika ku hlalela mahungu siku rin’we kutani u tirhisa nkarhi wolowo wa timinete ta kwalomu ka 30 edyondzweni ya wena n’wini, u ta va u kume tiawara ta 25 hi lembe. Mawaku ndlela leyi u nga ta vuyeriwa ha yona, u ta va u kume tiawara leti engetelekeke ta 25 ta ku hlaya Bibele kumbe to dyondza! Hi lexi xiringanyeto xin’wana: Vhiki leri landzelaka, kambisisa leswi u swi endlaka siku ni siku. Xiya loko ku ri ni swilo leswi u nga swi tshikaka kumbe u hunguta nkarhi wa swona leswaku u kuma nkarhi lowu engetelekeke wo hlaya Bibele kumbe wo dyondza.—Vaefesa 5:15, 16.

14, 15. (a) Ha yini swi ri swa nkoka ku va ni tipakani loko swi ta emhakeni ya dyondzo ya munhu hi yexe? (b) Hi tihi tipakani leti munhu a nga tivekelaka tona loko swi ta emhakeni ya ku hlaya Bibele?

¹⁴ I yini leswi nga endlaka leswaku swi ku olovela ku dyondza naswona u ku tsakela? I ku tivekela  tipakani. Hi tihi tipakani leti faneleke leti u nga tivekelaka tona? Eka vo tala, pakani yo sungula leyinene leyi va tivekelaka yona, i ku hlaya Bibele hinkwayo. Kumbexana se u hlaye swiyenge swin’wana swa Bibele minkarhi yo hlayanyana naswona swi ku pfunile. Xana sweswi u nga tiyimisela ku hlaya Bibele hinkwayo? U nga ha sungula hi ku hlaya Tievhangeli ta mune, kutani ku landzela pakani ya wena ya vumbirhi, ku nga ku hlaya Matsalwa ya Vukreste ya Xigriki hinkwawo. Loko u heta ku ma hlaya naswona ma ku vuyerisile, pakani leyi landzelaka ku nga ha va ku hlaya tibuku ta Muxe ni tibuku ta matimu ku fikela eka Estere. Loko u heta, u ta swi vona leswaku u nga swi kota ku hlaya Bibele hinkwayo. Wansati un’wana, loyi a a ri ni malembe ya 65 loko a va Mukreste, u tsale endzeni ka xifunengeto xa Bibele yakwe siku leri a sunguleke ha rona ku yi hlaya kutani a tlhela a tsala siku leri a yi heteke ha rona. Sweswi se u yi hlaye ka ntlhanu! (Deteronoma 32:45-47) Naswona a a nga yi hlayeli eka khomphyuta kumbe eka maphepha lawa a ma kandziyiseke hi khomphyuta, kambe a a hlaya Bibele hi ku kongoma.

¹⁵ Van’wana lava se va swi koteke ku hlaya Bibele hinkwayo va teka magoza man’wana lama endlaka leswaku va akeka ni ku vuyeriwa edyondzweni ya vona. Ndlela yin’wana i ku hlaya minkandziyiso yin’wana leyi vulavulaka hi buku ya Bibele leyi u lavaka ku yi hlaya. Ebukwini leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna” ni leyi nge Insight on the Scriptures, u nga ha kuma rungula lerinene ngopfu malunghana ni matimu, ni ndlela leyi buku yin’wana ni yin’wana ya Bibele yi nga ku pfunaka ha yona. *

16. Xana hi fanele hi papalata xikombiso xihi loko hi dyondza Bibele?

¹⁶ Loko u ri karhi u dyondza, u nga endli leswi vanhu vo tala lava tivulaka swichudeni swa Bibele va swi endlaka. Va heta nkarhi wo tala va xopaxopa Bibele onge hiloko yi tsariwe hi munhu. Van’wana va heta nkarhi wo leha va anakanyisisa hi muxaka wa vanhu lava buku ha yin’we yi vulavulaka ha vona kumbe va tiendlela swiboho leswi va anakanyaka leswaku mutsari ha un’we a a anakanye swona loko a tsala. Leswi swi endle leswaku Bibele yi tekiwa yi fana ni tibuku tin’wana ta matimu leti nga pfuniki nchumu kumbe yi ri ndlela yin’wana yo hlamusela vukhongeri. Swichudeni swin’wana swi heta nkarhi wo leha swi kambisisa ririmi leri tirhisiweke eBibeleni. Swi tshamela ku kambisisa tinhlamuselo ta marito ya Xiheveru ni Xigriki, swi nga ri na mhaka ni leswi rito ra Xikwembu ri vulaka swona. Xana u ehleketa leswaku ku dyondza hi ndlela yoleyo ku nga hi pfuna leswaku hi va ni ripfumelo lerikulu, leri hi khutazaka?— 1 Vatesalonika 2:13.

17. Ha yini hi fanele hi languta Bibele tanihi buku leyi nga ni rungula leri khumbaka vanhu hinkwavo?

¹⁷ Xana makumu lama fikeleriweke hi swichudeni ma twala? Xana i ntiyiso leswaku buku yin’wana ni yin’wana ya Bibele yi vulavula hi nchumu wun’we kumbe yi kongomisiwe eka vahlayi vo karhi? (1 Vakorinto 1:19-21) Ntiyiso hileswaku tibuku ta Rito ra Xikwembu i ta nkoka hilaha ku nga heriki eka vanhu lavakulu ni lavatsongo ni lava humaka eka mindhavuko yo hambana-hambana. Hambiloko buku yo karhi a yi kongomisiwe eka munhu wo karhi eku sunguleni, ku fana na Timotiya kumbe Tito, kumbe eka ntlawa wo karhi, kumbexana eka Vagalatiya kumbe eka Vafilipiya, hinkwerhu ka hina hi fanele hi ti dyondza tibuku teto. I ta risima eka hina hinkwerhu, naswona buku yin’we yi nga ha bula hi timhaka to hambana-hambana yi tlhela yi pfuna vanhu vo tala lava yi hlayaka. Ina, rungula ra Bibele ra tirha emisaveni hinkwayo, sweswo swi hi pfuna hi twisisa xivangelo lexi endleke leswaku yi hundzuluxeriwa hi tindzimi ta vanhu hinkwavo va misava.—Varhoma 15:4.

 Ndlela Leyi Yi Nga Ku Pfunaka Ha Yona Wena Ni Van’wana

18. Loko u ri karhi u dyondza Rito ra Xikwembu, xana hi swihi leswi u nga anakanyisisaka ha swona?

¹⁸ Loko u ri karhi u dyondza, u ta kuma leswaku swa pfuna ku endla leswi u nga swi kotaka leswaku u twisisa Bibele swin’we ni ku ringeta ku vona ndlela leyi yi pfumelelanaka ha yona. (Swivuriso 2:3-5; 4:7) Leswi Yehovha a swi paluxeke hi Rito rakwe swi fambisana ngopfu ni xikongomelo xakwe. Loko u ri hlaya, kuma leswi ri swi vulaka, swin’we ni ndzayo leyi ri yi nyikelaka. U nga ha anakanyisisa hi ndlela leyi xiendlakalo xo karhi, rungula ro karhi kumbe vuprofeta byo karhi, swi fambisanaka ha yona ni xikongomelo xa Yehovha. Tivutise: ‘Xana leswi swi ndzi byela yini hi Yehovha? Xana swi fambisana njhani ni xikongomelo xa Xikwembu lexi xi hetisisiwaka hi Mfumo wa xona?’ U nga ha tlhela u tivutisa u ku: ‘Xana ndzi nga ri tirhisa njhani rungula leri? Xana ndzi nga ri tirhisa loko ndzi dyondzisa kumbe ndzi nyika van’wana switsundzuxo hi ku tirhisa Matsalwa?’—Yoxuwa 1:8.

19. I mani loyi a vuyeriwaka loko u byela van’wana leswi u swi dyondzeke? Hlamusela.

¹⁹ Ku ehleketa hi van’wana na swona swa pfuna hi ndlela yo karhi. Loko u ri karhi u hlaya ni ku kambisisa Bibele, u ta dyondza swilo leswintshwa u tlhela u languta swilo hi ndlela yin’wana. Ringeta ku swi katsa emabulweni lama akaka endyangwini kumbe loko u bula ni van’wana. Loko mabulo wolawo ma endliwa hi minkarhi leyi faneleke ni hi ndlela leyinene, ma ta mi vuyerisa hakunene. Loko u hisekela ku vulavula hi leswi u swi dyondzeke kumbe leswi u swi kumeke swi tsakisa, hakanyingi sweswo swi ta va tsakisa ni van’wana. Tlhandlakambirhi, swi ta ku pfuna na wena. Hi ndlela yihi? Vativi va vule leswaku loko munhu a ha ku dyondza swo karhi kutani a swi tirhisa kumbe a swi byela van’wana hi nkarhi wolowo a ha ku swi hlayaka, u ta heta nkarhi wo leha a ha swi tsundzuka. *

20. Ha yini swi pfuna ku hlaya Bibele hi ku phindha-phindha?

²⁰ A swi kanakanisi leswaku nkarhi ni nkarhi loko u hlaya buku ya Bibele u ta kuma rungula lerintshwa. U ta hlamala loko u kuma rungula leri ku tsakisaka, kasi eku sunguleni a ri vonaka ri nga ku khumbi. Sweswi u ta va u ri twisisa kahle.  Leswi swi kandziyisa kahle leswaku Bibele a hi buku leyi tsariweke hi vanhu, i buku ya risima leyi ku lulameleke leyi u faneleke ku yi dyondza hi ku phindha-phindha leswaku u ta vuyeriwa. Tsundzuka leswaku hosi yo kota Davhida, a yi fanele yi ‘yi hlaya masiku hinkwawo ya vutomi bya yona.’

21. Hi byihi vuyelo lebyi u nga langutelaka ku byi kuma hi ku tinyika nkarhi lowu engetelekeke wa ku dyondza Rito ra Xikwembu?

²¹ Ina, lava va tinyikaka nkarhi wa ku dyondza Bibele hi vurhon’wana va kuma vuyelo lebyikulu. Va kuma tindzalama ta moya ni vutlhari. Va va ni vuxaka lebyikulu ni lebyi fuweke ni Xikwembu. Va tlhela va va mpfuno lowukulu eka swirho swa ndyangu, eka vamakwerhu evandlheni ra Vukreste swin’we ni le ka lava va nga ta va vagandzeri va Yehovha.—Varhoma 10:9-14; 1 Timotiya 4:16.

[Tinhlamuselo ta le hansi]

Wa Tsundzuka Xana?

• Xana tihosi ta le Israyele a ti fanele ti endla yini?

• Xana Yesu ni vaapostola va veke xikombiso xihi emhakeni ya dyondzo ya Bibele?

• Hi swihi leswi u nga swi endlaka leswaku u kuma nkarhi lowu engetelekeke wa dyondzo ya wena n’wini?

• Hi rihi langutelo leri u faneleke u va na rona loko u dyondza Rito ra Xikwembu?

[Swivutiso Swa Dyondzo]

[Bokisi leri nga eka tluka 15]

“EMavokweni Ya Hina”

“Loko hi lava . . . nxaxamelo wa tibuku ta Bibele, hi nga wu kuma eka Internet. Kambe loko hi lava ku hlaya Bibele, ku yi kambisisa, ku ehleketa ha yona ni ku yi twisisa, yi fanele ku va emavokweni ya hina, hikuva hi yona ntsena ndlela yo yi nghenisa emianakanyweni ni le timbilwini ta hina.”—Gertrude Himmelfarb, khale ka profesa wa le City University, eNew York.