Mphalalo Wa Ndlala Wu Le Ndleleni!

U NGA ha tivutisa leswaku ‘i ndlala ya muxaka muni?’ I ndlala ya swakudya swa moya! Muprofeta wa khale wa Muheveru u profete hi ta ndlala leyi: “‘Waswivo! Masiku ma ta,’ ku vula Yehovha, Hosi leyi Lawulaka, ‘kutani ndzi ta rhumela ndlala etikweni, ndlala, ku nga ri ya xinkwa, ni torha, ku nga ri ra mati, kambe ra ku twa marito ya Yehovha.’” (Amosi 8:11) Leswaku ku herisiwa ndlala leyi ya moya, swirho swa 48 swa ntlawa wa vu-112 wa Xikolo xa Bibele xa Gilead xa Watchtower, lexi kumekaka ePatterson, le New York, swi rhumeriwe ematikweni ya 19 eka matiko-nkulu ya 5 ni le swihlaleni.

Va ya va ri ni swo tala, ku nga ri nyama ni mavele ya xiviri, kambe va ya va ri ni vutivi, ntokoto ni ndzetelo. Va dyondze Bibele hi vuenti ku ringana tin’hweti ta ntlhanu leswaku va tiyisa ripfumelo ra vona tanihi leswi a va ta va varhumiwa ematikweni mambe. Hi March 9, 2002, vanhu vo ringana 5 554 lava veke kona eka nongonoko wa ku thwasa va rhiye ndleve hi ntsako.

Stephen Lett, loyi a nga xirho xa Huvo leyi Fumaka ya Timbhoni ta Yehovha, u sungule nongonoko hi ku hiseka. U va amukele hi mandla mambirhi vaendzi vo tala lava a va huma etindhawini to hambana-hambana ta misava. Kutani u ye emahlweni a vula marito ya Yesu lama nge, “N’wina mi ku vonakala ka misava” eka ntirho wa nkarhi lowu taka wa varhumiwa. (Matewu 5:14) U te: ‘Eswiavelweni swa n’wina mi ta “voninga” eka timhaka to hambana-hambana ta mintirho yo hlamarisa ya Yehovha, mi endla vanhu va timbilu letinene leswaku va vona ku saseka ka Yehovha ni swikongomelo swakwe.’ Makwerhu Lett u khutaze varhumiwa ku tirhisa ku vonakala ka Rito ra Xikwembu leswaku va paluxa munyama wa tidyondzo ta mavunwa kutani va kongomisa lava lavaka ntiyiso.

Langutelo Lerinene I Ra Nkoka Leswaku Mi Humelela

Endzhaku ka marito yo pfula ya mutshama-xitulu, Baltasar Perla, xirho xa Komiti ya Rhavi ya le United States, u nyikele nkulumo yo sungula eka leti a ti ri nxaxamelo leti a ti vekeriwa ku pfuna mathwasana leswaku ma va varhumiwa lava humelelaka. U vulavule hi nhloko-mhaka leyi nge “Vana Ni Xivindzi, U Tiya Naswona U Teka Goza.” (1 Tikronika 28:20) Hosi Solomoni wa le Israyele wa khale a a nyikiwe xiavelo lexi tikaka xa ku endla nchumu lowu a a nga si tshama a wu endla—ku aka tempele eYerusalema. Solomoni u yi akile naswona hi nseketelo wa Yehovha tempele yi hetiwile. Loko a kombisa ndlela leyi ntlawa wu nga vuyeriwaka ha yona, Makwerhu Perla u te: ‘Mi nyikiwe xiavelo lexintshwa, xa ku va varhumiwa, kutani mi fanele mi va ni xivindzi mi tlhela mi tiya.’ Handle ko kanakana swichudeni swi chaveleriwe hi xitiyisekiso xa leswaku Yehovha a nge swi fularheli ntsendze loko swi tshama swi ri ekusuhi na yena. Makwerhu Perla u khumbe timbilu ta vayingiseri hi marito yakwe yo gimeta lama nge: ‘Leswi se mi nga varhumiwa mi nga endla swilo swo tala. Varhumiwa hi vona va nga dyondzisa mina ni ndyangu wa ka hina ntiyiso!’

Nhloko-mhaka ya nkulumo leyi nyikeriweke hi Samuel Herd, xirho xin’wana xa Huvo  leyi Fumaka a yi ku “Titshege Hi Yehovha Leswaku U Humelela.” Swichudeni leswi swi sungula ntirho-vutomi wa vurhumiwa, naswona ku humelela ka swona ku titshege swinene hi vuxaka bya swona na Yehovha. Makwerhu Herd u swi tsundzuxile a ku: ‘Mi hlengelete vutivi byo tala bya Bibele eka leswi mi swi dyondzeke eGilead. Mi nyikiwe swona hi ntsako. Kambe sweswi, leswaku mi humelela hakunene, mi fanele mi sungula ku byela van’wana leswi mi swi dyondzeke.’ (Mintirho 20:35) Varhumiwa va ta va ni nkarhi wo tala wo endla leswi loko va ‘tichulula’ hikwalaho ka van’wana.—Vafilipiya 2:17.

Valeteri a va ta swi lela hi ndzayo yihi swichudeni? Mark Noumair u sekele nhloko-mhaka yakwe eka Rhuti 3:18, “Tshamiseka Kukondza U Vona Lomu Mhaka Leyi Yi Nga Ta Helela Kona.” Loko xivulavuri xi tirhisa xikombiso xa Nawomi na Rhuti, xi khutaze mathwasana leswaku ma va ni ntshembo lowu tiyeke eka malunghiselelo lama endliweke hi nhlengeletano ya Xikwembu ya laha misaveni ni ku xixima vulawuri bya le tilweni. Makwerhu Noumair u khumbe timbilu ta swichudeni hi ku vula marito lawa: ‘Minkarhi yin’wana swi nga ha endleka u nga swi twisisi leswaku ha yini ku endliwe xiboho lexi khumbaka wena kumbe nkarhi wun’wana u vona onge ku fanele ku endliwa swin’wana hi ndlela yin’wana.  U ta endla yini loko u vona sweswo? Xana u ta yima-yima u lunghisa timhaka hi wexe kumbe u ta “tshamiseka” u ri karhi u tshemba nkongomiso wa Xikwembu, u ri ni ntshembo wa leswaku hi ku famba ka nkarhi xi ta tisa vuyelo lebyinene ntsena.’ (Varhoma 8:28) Xitsundzuxo xo ‘nyikela nyingiso wo yisa timhaka ta Mfumo emahlweni, ku veka tihlo eka leswi nhlengeletano ya Yehovha yi swi endlaka ematshan’weni yo karhateka hi timhaka ta munhu hi xiyexe,’ handle ko kanakana swi ta pfuna varhumiwa eswiavelweni swa vona swa le matikweni mambe.

Wallace Liverance, loyi na yena a a ri murhumiwa kambe sweswi a nga muleteri eGilead, u nyikele nkulumo yo hetelela eka nxaxamelo wo sungula. Nhloko-mhaka ya nkulumo yakwe a yi ku, “Tshama U Xalamukile, Tshama eNtirhweni Wa Xikwembu.” U kombise leswaku muprofeta Daniyele u twisisile loko a vona ku wa ka Babilona a tlhela a twisisa ni leswi Yeremiya a profeteke leswaku ku ntshunxiwa ka Vaisrayele evuhlongeni a ku ri kusuhi. (Yeremiya 25:11; Daniyele 9:2) Daniyele a a wu xalamukerile nkarhi lowu Yehovha a a endla swilo ha wona, naswona sweswo swi n’wi pfune ku tshama a xalamukele ku hetiseka ka xikongomelo xa Xikwembu. Ku hambana ni sweswo Vaisrayele va le sikwini ra muprofeta Hagayi va te: “Nkarhi a wu si fika.” (Hagayi 1:2) A va nga yi xalamukelanga minkarhi leyi a a va hanya eka yona, kambe a va xalamukele timhaka ta vona ni ku humelela ka vona, kutani va ku wu thya, ntirho lowu va ntshunxeriweke wona eBabilona, ku nga ntirho wa ku aka tempele. Makwerhu Liverance u gimete hi ku: “Kutani ke, tshamani mi xalamukile hi ku tshama mi ri karhi mi tsundzuka xikongomelo xa Yehovha.”

Lawrence Bowen muleteri wa le Gilead u veke nkulumo leyi nga ni nhloko-mhaka leyi nge “Yehovha U Katekisa Lava Tirhisaka Rito Leri Hanyaka.” (Vaheveru 4:12) Nkulumo leyi a yi vulavula hi mintokoto ya le nsin’wini ya ntlawa lowu, a yi kandziyisa ndlela leyi Yehovha a va katekisaka ha yona lava va tirhisaka Bibele loko va chumayela ni loko va dyondzisa. Makwerhu loyi u hlamusele leswaku Yesu Kreste u va vekele xikombiso lexinene vatirheli va Xikwembu hinkwavo, u te: ‘Yesu u vule leswaku leswi a swi dyondziseke a swi nga humi eka yena, kambe u vulavule Rito ra Xikwembu.’ Lava timbilu letinene va tive ntiyiso kutani va wu amukela. (Yohane 7:16, 17) Swi tano ni namuntlha.

Ndzetelo Wa Le Gilead Wu Hlomisela Munhu Ku Endla Ntirho Wun’wana Ni Wun’wana Lowunene

Ku landzele Richard Abrahamson na Patrick LaFranca lava ku nga khale va ri eBethele, va vulavurisane ni tsevu wa mathwasana ya Gilead lawa sweswi ma tirhaka eka swiavelo swo hambana-hambana swa vutirheli byo hlawuleka bya nkarhi hinkwawo. Mathwasana ya ntlawa wa vu-112 ma khutazekile loko ma twa leswaku sweswi endzhaku ka makume ya malembe mathwasana lawaya ya tsevu, ku nga khathariseki swiavelo swa wona swa nkarhi wa sweswi, ma ha ya emahlweni ma tirhisa ndzetelo lowu ma wu kumeke eGilead wa malunghana ni dyondzo ya Bibele, ku endla ndzavisiso ni ku hanyisana ni van’wana.

Theodore Jaracz, xirho xa Huvo leyi Fumaka, u nyikele nkulumo-nkulu ya nongonoko lowu. A yi ri ni nhloko-mhaka leyi nge “Leswi Swi Hetisisiwaka Hi Ku Tiyisela Rivengo Ra Sathana.” Eka tin’hweti ta ntlhanu leti hundzeke, swichudeni a swi tshama endhawini leyi sirhelelekeke ni leyi lawuriwaka hi Xikwembu. Hambiswiritano, hilaha swi kombisiweke hakona etidyondzweni leti swi ti dyondzeke, hi hanya emisaveni ya nala. Vanhu va Yehovha va hlaseriwa emisaveni hinkwayo. (Matewu 24:9) Loko a tirhisa timhaka to tala ta le Bibeleni, Makwerhu Jaracz u vule leswaku ‘hi vahlaseriwa vo hlawuleka va Diyavulosi. Hi fanele hi tiyisa vuxaka bya hina na Yehovha naswona hi tilunghiselela ku langutana ni miringo.’ (Yobo 1:8; Daniyele 6:4; Yohane 15:20; Nhlavutelo 12:12, 17) Makwerhu Jaracz u hetelele hi ku vula leswaku hambiloko vanhu va Xikwembu va hambeta va vengiwa, ‘ku hava tlhari leri endleriweke ku hi hlasela leri nga ta humelela, hilaha Esaya 54:17 yi vulaka hakona. Yehovha u ta tiyiseka leswaku ha kutsuriwa hi nkarhi wakwe ni hi ndlela yakwe.’

Mathwasana ya ntlawa wa vu-112 ya le Gilead lama ‘hlomisiweke hi ku helela,’ handle ko kanakana ma ta endla swo tala leswaku ma phalala lava nga ni ndlala ya swakudya swa moya ematikweni lawa ma nga ta tirha eka wona. (2 Timotiya 3:16, 17) Hi swi langutele hi mahlo-ngati swiviko swa ndlela leyi va ri nyikelaka ha yona rungula leri xurhisaka eka vanhu va le matikweni lawa.

[Bokisi leri nga eka tluka 23]

TINHLAYO TA NTLAWA

Nhlayo ya matiko lama yimeriweke: 6

Nhlayo ya matiko lawa va averiweke eka wona: 19

Nhlayo ya swichudeni: 48

Xiringaniso xa malembe: 33,2

Xiringaniso xa malembe entiyisweni: 15,7

Xiringaniso xa malembe evutirhelini bya nkarhi hinkwawo: 12,2

[Xifaniso lexi nga eka tluka 24]

Ntlawa Wa Vu-112 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.