Nkarhi Wo Paluxa Xihundla

Ku hlayisa timhaka tin’wana ti ri xihundla swi nga hlayisa ku rhula swi tlhela swi sivela timholovo. Kambe xana wu kona nkarhi wo paluxa xihundla? Xiya leswi muprofeta Amosi a swi vulaka hi Xikwembu xakwe: “Yehovha . . . a nge endli nchumu a nga si hlavutela mhaka ya yena leyi nga xihundla eka malandza ya yena ku nga vaprofeta.” (Amosi 3:7) Eka marito lawa hi nga dyondza swo karhi malunghana ni ku hlayisa xihundla. Yehovha a nga ha hlayisa timhaka tin’wana ti ri xihundla ku fikela nkarhi wo karhi naswona hi ku famba ka nkarhi a ti paluxa eka vanhu vo karhi. Xana hi nga n’wi tekelela njhani Yehovha emhakeni leyi?

Minkarhi yin’wana varisi lava vekiweke evandlheni ra Vukreste, va hlayisa timhaka tin’wana ti ri xihundla. (Mintirho 20:28) Hi xikombiso, leswaku va hlayisa ku rhula evandlheni, va nga ha boha ku ka va nga ri byeli vandlha hi malunghiselelo yo karhi lama endliweke kumbe ku cinca ko karhi ka vutihlamuleri bya valanguteri va vandlha, ku fikela nkarhi wo karhi.

Hambiswiritano, etimhakeni to tano i swa nkoka leswaku lava va katsekaka va byeriwa leswaku mhaka leyi yi ta paluxiwa rini naswona yi ta paluxiwa njhani, loko ku ri leswaku yi ta paluxiwa. Ku tiva leswaku mhaka yi ta tivisiwa rini erivaleni swi nga va pfuna leswaku va hlayisa xihundla.—Swivuriso 25:9.