Ku Famba eTindleleni Ta Yehovha Swa Vuyerisa Swinene

XANA u tshame u khandziya tintshava? Loko swi ri tano, handle ko kanakana a wu titwa onge u le tilweni. Hakunene a a swi tsakisa swinene ku hefemula moya wo tenga, ku vona le kule swinene ni ku vona vuxongi bya ntumbuluko! Kumbexana u sungule ku xiya leswaku swiphiqo leswi nga kona lahaya hansi emisaveni, a swi fanelanga swi va mhaka yikulu.

Vanhu vo tala a va tali ku teka maendzo yo tano, kambe loko u ri Mukreste la tinyiketeleke, swi nga ha endleka se u ri ni nkarhi wo leha swi ri karhi swi ku fambela kahle—hi tlhelo ra moya. Ku fana ni mupisalema wa khale, handle ko kanakana u khongerile u ku: “Oho Yehovha, ndzi tivise tindlela ta wena; ndzi dyondzise mintila ya wena.” (Pisalema 25:4) Xana wa ha yi tsundzuka ndlela leyi u titweke ha yona loko u sungula ku khandziya ntshava ya yindlu ya Yehovha kutani u sungula ku famba etindhawini leti tlakukeke? (Mikiya 4:2; Habakuku 3:19) A swi kanakanisi leswaku hi ku famba ka nkarhi u swi xiyile leswaku ku famba etindleleni leti leti tlakukeke ta vugandzeri byo tenga, swi ku tisele ntsako ni nsirhelelo. U sungule ku titwa hilaha mupisalema a titweke hakona loko a ku: “Va tsaka vanhu lava tivaka ku huwelela ka ku tsaka. Oho Yehovha, va hambeta va famba hi ku landza ku vonakala ka xikandza xa wena.”—Pisalema 89:15.

Hambiswiritano, minkarhi yin’wana lava khandziyaka tintshava va boheka ku famba etindhawini leti khupukelaka swinene. Milenge ya vona yi sungula ku pandza, naswona va titwa va karhele. Na hina hi nga langutana ni swiphiqo loko hi ri karhi hi tirhela Xikwembu. Swi nga ha endleka leswaku sweswi, milenge ya hina ya tika. Xana hi nga endla yini leswaku hi tlhela hi chivirika ni ku vuyeriwa hi ntsako wa hina? Goza ro sungula i ku xiya leswaku tindlela ta Yehovha ti tlakukile.

Milawu Ya Yehovha Leyi Tlakukeke

Tindlela ta Yehovha ‘ti tlakukile ku tlula tindlela ta vanhu,’ naswona vugandzeri bya yena byi ‘simekiwe byi tiya ehenhla ka tintshava naswona byi tlakuseriwe ehenhla ka switsunga.’ (Esaya 55:9; Mikiya 4:1) Vutlhari bya Yehovha i “vutlhari lebyi humaka ehenhla.” (Yakobo 3:17) Milawu yakwe yi tlakukile ku tlula milawu leyin’wana hinkwayo. Hi xikombiso, hi nkarhi lowu Vakanana a va endla nsele hi ku endla switlhavelo hi vana, Yehovha u nyike Vaisrayele milawu leyi tlakukeke ni leyi fambisanaka ni ntwela-vusiwana. U te: “U nga tshuki u va ni xihlawuhlawu eka la nga xisiwana naswona u nga tshuki u tsakela munhu wa xiyimo xa le henhla. . . . Muluveri . . . u fanele a va tanihi munhu la tumbulukeke eka n’wina; mi fanele mi n’wi rhandza kukota n’wina.”—Levhitika 19:15, 34.

Endzhaku ka malembe-xidzana ya khume-ntlhanu, Yesu u nyike swikombiso swo tala swa ‘nawu lowukulu’ wa Yehovha. (Esaya 42:21) Eka  Dyondzo ya le Ntshaveni, u byele vadyondzisiwa va yena a ku: “Hambetani mi rhandza valala va n’wina, mi khongelela lava mi xanisaka; leswaku mi tikombisa mi ri vana va Tata wa n’wina la nge matilweni.” (Matewu 5:44, 45) U engeterile a ku: “Hikokwalaho, swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona. Leswi, entiyisweni hi leswi vuriwaka hi Nawu ni Vaprofeta.”—Matewu 7:12.

Milawu leyi leyi tlakukeke yi tirha eka vanhu va timbilu letinene, yi va susumetela ku tekelela Xikwembu lexi va xi gandzelaka. (Vaefesa 5:1; 1 Vatesalonika 2:13) Anakanya hi nhluvuko lowu endliweke hi Pawulo. Loko hi sungula ku twa hi yena a a “seketela ku dlayiwa ka” Stefano naswona a a khoma “vandlha hi tihanyi.” Kambe, eka malembe ma nga ri mangani lama landzeleke, a a hanyisana kahle ni Vakreste va le Tesalonika, a va khoma kahle ku fana ni ‘manana loyi a khathalelaka vana vakwe.’ Dyondzo leyi humaka eka Xikwembu yi hundzule Pawulo loyi a a ri muxanisi kutani a va Mukreste la khathalelaka. (Mintirho 8:1, 3; 1 Vatesalonika 2:7) Hakunene a a tsake ngopfu hikwalaho ka leswi vumunhu bya yena byi hundzuriweke hi tidyondzo ta Kreste. (1 Timotiya 1:12, 13) Xana ku tlangela loku fanaka ni loku ku nga hi pfuna njhani leswaku hi hambeta hi famba etindleleni ta Xikwembu leti tlakukeke?

Ku Kombisa Ku Tlangela

Vakhandziyi va tintshava va tsaka loko va vona vuxongi bya ntumbuluko, loko va ri ehenhla. Va tlhela va nyanga ni swilo leswitsongo loko va ri karhi va famba endleleni, swo tanihi maribye lama nga tolovelekangiki, swiluva swo xonga kumbe loko va vonanyana swiharhi swa nhova. Ni timhaka ta moya ti tano, hi fanele hi xalamukela ku vona tihakelo ta moya—letikulu ni letitsongo—leti kumiwaka hi ku famba ni Xikwembu. Ku xalamuka loku ku nga hi pfuna leswaku hi tlhela hi va ni matimba yo kota ku ba magoza. Hi ta phindha marito ya Davhida lama nge: “Ndzi twise musa wa wena wa rirhandzu nimixo, hikuva ndzi tshembe wena. Ndzi tivise ndlela leyi ndzi faneleke ndzi famba ha yona.”—Pisalema 143:8.

Mary loyi a heteke malembe yo tala a ri karhi a famba etindleleni ta Yehovha, u ri: “Loko ndzi languta ntumbuluko wa Yehovha, a ndzi voni ku rharhangana ka wona ntsena kambe ndzi vona ni rirhandzu ra Xikwembu. Ku nga khathariseki leswaku ndzi vona xiharhi, xinyenyana kumbe xitsotswana, xin’wana ni xin’wana xa swona xi hlawulekile naswona xa tsakisa. Ntsako lowu fanaka wa kumiwa eka mintiyiso ya moya leyi yaka yi twisiseka hi ku famba ka nkarhi.”

Xana hi nga ku hlakulela njhani ku tlangela ka hina? Ndlela yin’wana, i ku va hi nga swi tekeli hansi leswi Yehovha a hi endlelaka swona. Pawulo u tsarile: “Khongelani minkarhi hinkwayo. Nkhensani mayelana ni hinkwaswo.”—1 Vatesalonika 5:17, 18; Pisalema 119:62.

Ku va ni dyondzo ya munhu hi yexe swi nga hi pfuna leswaku hi kurisa ku tlangela ka hina. Pawulo u khongotele Vakreste va le Kolosa a ku: “Hambetani mi famba evun’weni na [Kreste Yesu], . . . mi khapakhapa ripfumelo hi ku nkhensa.” (Vakolosa 2:6, 7) Loko hi hlaya Bibele hi tlhela hi anakanyisisa hi leswi hi swi hlayaka, ripfumelo ra hina ri ta tiya naswona hi ta tshinela ekusuhi swinene ni Mutsari wa Bibele. Endzeni ka yona ku ni swilo swa risima leswi nga hi susumetelaka leswaku hi ‘khapakhapa hi ku nkhensa.’

Ku tirhela Yehovha exikarhi ka vamakwerhu na swona swi endla leswaku ndlela leyi yi olova. Loko a vulavula hi yena n’wini, mupisalema u te: “Ndzi munghana wa vanhu hinkwavo lava ku chavaka.” (Pisalema 119:63) Minkarhi yin’wana leyi yi hi tsakisaka ngopfu, hi leyi hi yi hetaka hi ri ni vamakwerhu etinhlengeletanweni ta Vukreste kumbe loko hi endla swilo swo karhi na vona. Ha swi xiya leswaku ndyangu wa hina wa risima wa Vukreste bya misava hinkwayo, wu kona hikwalaho ka  Yehovha ni tindlela ta yena leti tlakukeke.—Pisalema 144:15b.

Handle ka ku tlangela, ku va ni vukheta swi ta hi pfuna leswaku hi hambeta hi famba etindleleni ta Yehovha leti tlakukeke.

Ku Famba Hi Vukheta

Vakhandziyi va tintshava lava nga ni vukheta va swi tiva leswaku i swa nkoka ku tivonela leswaku va nga lahleki kumbe va tikuma va ri ekusuhi ni riwa leri nga ni khombo. Leswi hi nga ni ntshunxeko wa ku tihlawulela, Yehovha u hi pfumelela leswaku hi va ni ntshunxeko lowu ringaniseriweke ni leswaku hi tiendlela swilo swo karhi. Kambe ntshunxeko wo tano, wu lava leswaku hi va ni vukheta loko hi ri karhi hi hetisisa vutihlamuleri bya hina bya Vukreste.

Hi xikombiso, Yehovha u rindzele leswaku malandza yakwe ma va ni vukheta loko ma hetisisa vutihlamuleri bya wona. A nga hi pimeli matimba ni nkarhi lowu hi faneleke hi wu heta emintirhweni ya Vukreste kumbe leswaku hi fanele hi nyikela hi mali muni. Ematshan’weni ya sweswo, marito lawa Pawulo a ma tsaleleke Vakorinto, ma tirha eka hinkwerhu: “Un’wana ni un’wana a a endle hilaha a boheke hakona embilwini yakwe.”—2 Vakorinto 9:7; Vaheveru 13:15, 16.

Ku nyika ka Vakreste ku katsa ku byela van’wana mahungu lamanene. Hi tlhela hi kombisa leswaku ha byi byarha vutihlamuleri hi ku nyikela minyikelo yo seketela ntirho wa Mfumo wa misava hinkwayo. Gerhardt, la nga nkulu, u vula leswaku yena ni nsati wakwe va sungule ku nyikela swinene endzhaku ka loko va ye enhlengeletanweni le Yuropa Vuxa. U ri: “Hi xiye leswaku vamakwerhu va ndhawu yoleyo, a va na swilo swo tala leswi vonakaka; kambe va ti tlangela swinene tibuku ta hina leti sekeriweke eBibeleni, kutani hi kunguhate leswaku hi va pfuna hilaha hi nga kotaka hakona vamakwerhu lava sweleke, va le matikweni man’wana.”

Hi Fanele Hi Tiyisela Swinene

Ku famba etintshaveni swi lava ntamu. Lava khandziyaka tintshava va endla vutiolori loko va ri ni nkarhi, vo tala va famba mimpfhuka yo koma leswaku va tilunghiselela ku famba maendzo yo leha. Hilaha ku fanaka, Pawulo u bumabumela leswaku hi tshama hi khomekile emintirhweni ya swa le tilweni leswaku hi ta kota ku tshama hi tiyile hi tlhelo ra moya. Pawulo u te, lava va navelaka ku “famba hi mukhuva lowu fanelaka eka Yehovha” ni ku “endliwa lava nga ni matimba,” va fanele va “veka mihandzu entirhweni wun’wana ni wun’wana lowunene.”—Vakolosa 1:10, 11.

Ku tivekela tipakani swi pfuna munhu loyi a tekaka riendzo leswaku a tiyisela. Njhani? Ku tivekela pakani ya nchumu lowu u wu vonaka, tanihi ntshava leyi nga lahaya, swi nyika munhu matimba. Loko mufambi a fika a yima endhawini yo karhi leyi nga exikarhi ka mpfhuka, a nga kota ku vona leswaku u salele hi mpfhuka wo tanihi kwihi leswaku a fikelela pakani yakwe. Loko a languta mpfhuka lowu a wu fambeke, u titwa a enerisekile.

Hilaha ku fanaka, ntshembo wa hina wo kuma vutomi lebyi nga heriki, wu hi nyika matimba. (Varhoma 12:12) Loko hi ri karhi hi famba etindleleni ta Yehovha, ha eneriseka loko hi tivekela tipakani ta Vukreste hi tlhela hi ti fikelela. Mawaku ntsako lowu hi vaka na wona loko hi languta malembe lawa hi ma heteke hi tirha hi tshembekile kumbe loko hi vona mindzulamiso leyi hi yi endleke eka vumunhu bya hina!—Pisalema 16:11.

Leswaku vafambi va famba mpfhuka wo leha, va famba hi rivilo leri faneleke, a va hatlisi ngopfu. Hilaha ku fanaka, ku landzela mukhuva lowunene lowu katsaka ku hamba hi va kona eminhlanganweni ni le nsin’wini, swi ta hi pfuna leswaku hi tiyisela kukondza hi fikelela pakani ya hina. Xisweswo, Pawulo u khutaze Vakreste-kulobye a ku: “A hi hambeteni hi famba hilaha ku hlelekeke eka ntila lowu fanaka.”—Vafilipiya 3:16.

Ina, a hi fambi hi ri hexe etindleleni ta Yehovha. Pawulo wa tsala: “A hi laveni tindlela to khutazana erirhandzwini ni le mintirhweni leyinene.” (Vaheveru 10:24, New International Version) Ku va ni vanakulobye lavanene va moya, swi ta hi pfuna leswaku hi fambisana ni vapfumeri-kulorhi.—Swivuriso 13:20.

Nchumu wo hetelela, lowu nga wa nkoka swinene, a hi fanelanga hi rivala matimba lawa Yehovha a hi nyikaka wona. Lava matimba ya vona ma humaka eka Yehovha va ta “famba ku suka eka ntamu lowukulu ku ya eka ntamu lowukulu.” (Pisalema 84:5, 7) Hambiloko minkarhi yin’wana hi langutana ni swiyimo leswi nonon’hwaka, kambe hi mpfuno wa Yehovha hi ta humelela.