Papalata Ku Kanganyisiwa

VUKANGANYISI i khale byi ri kona. Xin’wana xa swiendlakalo swo sungula leswi tsariweke ematin’wini a ku ri vukanganyisi. Byi sungule loko Sathana a kanganyisa Evha entangeni wa Edeni.—Genesa 3:13; 1 Timotiya 2:14.

Hambileswi ku sukela hi nkarhi wolowo vukanganyisi byi hangalakeke emisaveni hinkwayo, namuntlha kona se byi lo nyanya. Loko Bibele yi vulavula hi minkarhi ya hina, yi ri: “Vanhu vo homboloka ni vaxisi va ta ya emahlweni va nyanya evubihini bya vona, va hambukisa, na vona va hambukisiwa.”—2 Timotiya 3:13.

Vanhu va kanganyisiwa hi swivangelo swo hambana-hambana. Vakanganyisi va xisa vanhu leswaku va va tekela mali ya vona. Van’watipolitiki van’wana va kanganyisa vanhu lava va vhoteleke, ku endlela leswaku va nga suki exikhundlheni xa vona. Vanhu na vona va tikanganyisa hi voxe. Ematshan’weni yo langutana ni ntiyiso lowu nga tsakisiki, va tibyela leswaku a swi na khombo ku endla swilo leswi nga ni khombo, swo tanihi ku dzaha, ku tirhisa swidzidzirisi hi ndlela yo biha, kumbe ku oswa.

Nakambe ku ni vukanganyisi etimhakeni ta vukhongeri. Varhangeri va vukhongeri va le nkarhini wa Yesu a va kanganyisa vanhu. Loko a vulavula hi vakanganyisi volavo, Yesu u te: “I vakongomisi lava feke mahlo. Kutani, loko munhu la feke mahlo a kongomisa munhu la feke mahlo, havambirhi va ta wela emugodini.” (Matewu 15:14) Ku tlula kwalaho, vanhu va tikanganyisa hi voxe etimhakeni ta vukhongeri. Swivuriso 14:12 yi ri: “Ku ni ndlela leyi lulameke emahlweni ka munhu, kambe endzhaku ka sweswo makumu ya yona i tindlela ta rifu.”

Ku fana ni le nkarhini wa Yesu, namuntlha vo tala va kanganyisiwa etimhakeni ta vukhongeri, naswona sweswo a swi hlamarisi! Muapostola Pawulo u vule leswaku “lava nga riki vapfumeri, [Sathana u va dlaye] mianakanyo, leswaku ku voninga ka mahungu lamanene lama vangamaka malunghana na Kreste, loyi a nga xifaniso xa Xikwembu, ku nga va voningeli.”—2 Vakorinto 4:4.

Loko hi xisiwa hi vakanganyisi, va ta hi dyela timali ta hina. Loko n’watipolitiki a hi kanganyisa, hi nga ha lahlekeriwa hi ntshunxeko wa hina. Kambe loko Sathana a hi kanganyisa leswaku hi fularhela ntiyiso malunghana na Yesu Kreste, a hi nge byi kumi vutomi lebyi nga heriki! Kutani ke, papalata ku kanganyisiwa. Kambisisa xihlovo xa vukhongeri bya ntiyiso, ku nga Bibele. Loko u nga yi kambisisi u ta lahlekeriwa hi vutomi.—Yohane 17:3.