“Tanani Eka Mina, . . . Ndzi Ta Mi Phyuphyisa”

“A Hi Endleleni Hinkwavo Leswi Nga Swinene”

NTIRHO lowukulu wa Yesu a ku ri ku chumayela ni ku dyondzisa mahungu lamanene ya Mfumo wa Xikwembu. (Marka 1:14; Luka 8:1) Leswi valandzeri va Kreste va navelaka ku n’wi tekelela, va wu teka wu ri wa nkoka swinene evuton’wini bya vona ntirho lowu wo dyondzisa rungula ra Bibele leri vulavulaka hi Mfumo wa Xikwembu. (Luka 6:40) Hakunene Timbhoni ta Yehovha ta tsaka loko ti vona ndlela leyi ha yona rungula ra Mfumo ri tisaka vuyelo lebyi nga heriki eka lava ri amukelaka—hilaha ri endleke hakona loko Yesu a ha ri emisaveni.—Matewu 11:28-30.

Yesu u dyondzise Rito ra Xikwembu a tlhela a endla ni mintirho yin’wana leyinene, yo fana ni ku hanyisa vavabyi ni ku phamela lava nga ni ndlala. (Matewu 14:14-21) Hilaha ku fanaka, Timbhoni ta Yehovha ti endla ntirho wa tona wo dyondzisa Bibele ti tlhela ti pfuna vanhu lava pfumalaka. Kahle-kahle, Matsalwa ma hlomisa Vakreste leswaku va endla “ntirho wun’wana ni wun’wana lowunene” ma tlhela ma va khutaza ku endlela “hinkwavo leswi nga swinene.”—2 Timotiya 3:16, 17; Vagalatiya 6:10.

“Vamakwerhu Va Hi Pfunile”

Hi September 1999, eTaiwan ku ve ni ku tsekatseka lokukulu ka misava. Endzhaku ka tin’hweti ti nga ri tingani, mpfula leyi maboboma ni ndzhope lowu khulukaka swi vange makhombo ya ntumbuluko lamakulu ngopfu ematin’wini ya le Venezuela. A hi khale tiko ra Mozambhiki ri khukhule hi tindhambhi. Eka swiendlakalo leswi swinharhu, Timbhoni ta Yehovha a ti hlwelanga ku phalala hi mphakelo wa swakudya, mati, mirhi, swiambalo, matende ni swo sweka ha swona. Vatirhi vo tirhandzela lava nga ni vutshila byo tshungula va cincanile hi ku tshungula lava vavisekeke, ni vatirhi vo tirhandzela lava akaka va ake tindlu ta lava nga sala va nga ha ri na makaya.

Vahlaseriwa va khumbiwe ngopfu hi mpfuno wa xihatla lowu va nga wu kuma. “Leswi a hi nga swi tivi leswaku hi to swi yini, vamakwerhu va hi pfunile,” ku vula Malyori, loyi yindlu yakwe a yi onhiwe hi ndzhope lowu khulukaka le Venezuela. Endzhaku ka loko vatirhi vo tirhandzela va n’wi akele yindlu leyintshwa swin’we ni ndyangu wakwe, hi ntsako Malyori u te: “Hi heleriwa hi marito yo nkhensa Yehovha hikwalaho ka hinkwaswo leswi a hi endleleke swona!” Kasi loko lava hlaseriweke hi ndhambi le Mozambhiki va nyikiwe makhiya ya tindlu ta vona letintshwa,  hinkwavo va sungule ku yimbelela risimu ra Mfumo leri nge “Yehovha I Vuchavelo Bya Hina.” *

Ku pfuna lava pfumalaka a swi phyuphyisa ni vatirhi va ku tirhandzela. “A ndzi tsake ngopfu ku va ndzi pfune vamakwerhu lava hlaseriweke ngopfu,” ku vule Marcelo, loyi a a ri muongori etikampeni ta vahlapfa eMozambhiki. Huang, loyi a nga mutirhi wo tirhandzela le Taiwan, yena u te: “A swi tsakisa ngopfu ku tirha ku phakela vamakwerhu swakudya ni matende. A swi tiyisa ripfumelo.”

Nongonoko Lowu Tswalaka Mihandzu Wa Ku Tirha Hi Ku Tirhandzela

Ntirho wa ku tirhandzela wu tlhele wu phyuphyisa vabohiwa va makume ya magidi hi tlhelo ra moya emisaveni hinkwayo. Njhani? Emalembeni ya sweswinyana, Timbhoni ta Yehovha ti fambise tibuku ta Bibele leti tlulaka 30 000 eka vabohiwa lava nga emakhotsweni ya kwalomu ka 4 000 le United States ntsena. Ku engetela kwalaho, laha swi kotekaka Timbhoni ti endzela makhotso leswaku ti ya dyondza Bibele ni vabohiwa ti tlhela ti khoma minhlangano ya Vukreste. Xana vabohiwa lava va vuyeriwa?

Vabohiwa van’wana lava dyondzaka Bibele va sungule ku byela vabohiwa-kulobye tidyondzo leti phyuphyisaka leti humaka eRitweni ra Xikwembu. Hikwalaho, emakhotsweni yo hlayanyana emisaveni hinkwayo se ku ni mintlawa ya vabohiwa lava gandzelaka Yehovha swin’we. Mubohiwa wa le Oregon, eU.S.A., hi 2001 u te: “Ntlawa wa hina wa kula. Hi ni vahuweleri va Mfumo va nkombo naswona hi fambisa tidyondzo ta Bibele ta 38. Eka nkulumo ya le rivaleni ni le ka Dyondzo ya Xihondzo xo Rindza ku ta vanhu vo tlula 25, naswona eXitsundzuxweni [xa rifu ra Kreste] a ku ri ni vanhu va 39. Ku nga ri khale ku ta khuvuriwa vanhu van’wana vanharhu!”

Ku Vuyeriwa Ni Ku Kuma Ntsako

Vatirhela-mfumo va le khotsweni va swi xiyile leswaku nongonoko lowu wa ku tirha hi ku tirhandzela wa pfuna. Kambe lexi va tsakisaka ngopfu vatirhela-mfumo i vuyelo lebyi nga heriki bya nongonoko lowu wa vatirhi lava va ku rhandzela. Xiviko xin’wana xi ri: “Endzhaku ka malembe ya khume nongonoko lowu wu ri karhi wu tirha, ku hava mubohiwa ni un’we loyi a nga khuvuriwa ekhotsweni tanihi un’wana wa Timbhoni ta Yehovha a nga tlhela a khomiwa endzhaku ka ku ntshunxiwa ka yena—ku hambana ni vabohiwa va mintlawa leyin’wana va tiphesente ta 50 ku ya eka 60 lava tlhelaka va khomiwa.” Hi ku susumetiwa hi vuyelo lebyi kumiwaka hi Timbhoni leti tirhaka hi ku tirhandzela, mufundhisi loyi a chumayelaka ekhotsweni ra le Idaho u vule leswi epapileni leri yaka eka yindlu-nkulu ya misava hinkwayo ya Timbhoni ta Yehovha: “Hambileswi ndzi nga pfumelelaniki ni tidyondzo ta n’wina, nhlengeletano ya n’wina ya ndzi tsakisa swinene.”

Ku pfuna lava nga ekhotsweni swi tlhela swi vuyerisa vatirhi lava vo tirhandzela. Endzhaku ko fambisa nhlangano ni ntlawa wa vabohiwa lava a vo sungula ku yimbelela risimu ra Mfumo, mutirhi wo tirhandzela u tsale a ku: “A swi khutaza ku vona vavanuna va 28 va yimbelelela Yehovha swidzuniso. Naswona a va yimbelelela ehenhla! Hakunene i lunghelo ro hlawuleka ku va eka xiendlakalo xo tano!” Mutirhi wo tirhandzela la endzelaka makhotso ya le Arizona u te: “Swi ve nkateko hakunene ku hlanganyela entirhweni lowu wo hlawuleka!”

Handle ko kanakana, Timbhoni leti tirhaka hi ku tirhandzela emisaveni hinkwayo, ti pfumelelana na Yesu, loyi a nga te: “Ku nyika swi tisa ntsako lowukulu ku tlula ku amukela.” (Mintirho 20:35) Ti tlhela ti tiyiseka leswaku ku landzela xitsundzuxo xa Bibele xa ku endlela hinkwavo leswinene xa phyuphyisa hakunene.—Swivuriso 11:25.

[Nhlamuselo ya le hansi]

[Xifaniso lexi nga eka tluka 8]

Venezuela

[Xifaniso lexi nga eka tluka 8]

Taiwan

[Xifaniso lexi nga eka tluka 8]

Mozambhiki