Engetela Ku Tinyiketela Loku Nga Ni Vukwembu Eka Ku Tiyisela Ka Wena
Engetela Ku Tinyiketela Loku Nga Ni Vukwembu Eka Ku Tiyisela Ka Wena
“Eripfumelweni ra n’wina engetelani . . . ku tiyisela, eku tiyiseleni ka n’wina ku tinyiketela loku nga ni vukwembu.”—2 Petro 1:5, 6.
1, 2. (a) I ku kula ka muxaka muni loku languteriweke eka n’wana? (b) Ku kula hi tlhelo ra moya i ka nkoka hi ndlela yihi?
I SWA nkoka leswaku n’wana a kula, kambe a hi ku kula ka miri ntsena loku laviwaka. Ku languteriwe leswaku a tlhela a kula emianakanyweni ni le mintlhavekweni. Hi ku famba ka nkarhi, n’wana u ta tshika swa vuhlangi kutani a va wanuna kumbe wansati la kuleke hi ku helela. Muapostola Pawulo a a vulavula hi mhaka leyi loko a tsala leswi: “Loko ndza ha ri xihlangi, a ndzi vulavula tanihi xihlangi, ndzi ehleketa tanihi xihlangi, ndzi anakanya tanihi xihlangi; kambe leswi sweswi ndzi nga wanuna, ndzi tshike mikhuva ya xihlangi.”—1 Vakorinto 13:11.
2 Marito ya Pawulo ma kombisa yinhla ya nkoka malunghana ni ku kula hi tlhelo ra moya. Vakreste va fanele va nga ha vi swihlangi hi tlhelo ra moya, kambe va “va lava kuleke hi ku helela ematimbeni ya ku twisisa.” (1 Vakorinto 14:20) Va fanele va tikarhata swinene va tlhela va ringeta ku kuma “mpimo wa vukulu lebyi nga bya ku tala ka Kreste.” Kutani a va nge he vi “swihlangi, onge hi loko [va] ndlengandlengisiwa hi magandlati ni ku yingayingisiwa hi mheho yin’wana ni yin’wana ya ku dyondzisa.”—Vaefesa 4:13, 14.
3, 4. (a) Xana hi fanele hi endla yini leswaku hi kula hi ku helela hi tlhelo ra moya? (b) Hi tihi timfanelo leti tsakisaka Xikwembu leti hi faneleke hi tikombisa, naswona i ta nkoka ku fikela kwihi?
3 Xana hi nga kula njhani hi ku helela hi tlhelo ra moya? Hambileswi hakanyingi miri wu tikulelaka, kambe leswaku munhu a kula hi tlhelo ra moya swi lava matshalatshala. Hi fanele hi rhanga hi nghenisa vutivi lebyi kongomeke bya Rito ra Xikwembu, kutani hi hanya hi ku pfumelelana ni leswi hi swi dyondzaka. (Vaheveru 5:14; 2 Petro 1:3) Hikwalaho, leswi swi hi endla hi kota ku kombisa timfanelo leti tsakisaka eka Xikwembu. Ku kula ka timfanelo to hambana-hambana leti tsakisaka Xikwembu hakanyingi ku endleka hi nkarhi wun’we, ku fana ni ku kula ka miri. Muapostola Petro u tsarile: “Leswi mi angulaka hi ku endla matshalatshala hinkwawo ya ku gingiriteka, eripfumelweni ra n’wina engetelani vunene, evuneneni bya n’wina vutivi, evutivini bya n’wina ku tikhoma, eku tikhomeni ka n’wina ku tiyisela, eku tiyiseleni ka n’wina ku tinyiketela loku nga ni vukwembu, eku tinyiketeleni ka n’wina loku nga ni vukwembu xinakulobye xa vumakwenu, eka xinakulobye xa n’wina xa vumakwenu rirhandzu.”—2 Petro 1:5-7.
4 Mfanelo yin’wana ni yin’wana leyi Petro a yi vuleke i ya nkoka. U engeterile a ku: “Loko swilo leswi swi va kona eka n’wina swi tlhela swi khapakhapa, swi ta endla leswaku mi nga vi lava tsaneke kumbe lava nga vekiki mihandzu malunghana ni vutivi lebyi kongomeke lebyi khumbaka Hosi ya hina Yesu Kreste.” (2 Petro 1:8) A hi xiyeni xilaveko xo engetela ku tinyiketela loku nga ni vukwembu eka ku tiyisela ka hina.
Xilaveko Xo Tiyisela
5. Ha yini hi fanele hi tiyisela?
5 Petro na Pawulo va hlamusela ku tinyiketela loku nga ni vukwembu ku ri loku fambisanaka ni ku tiyisela. (1 Timotiya 6:11) Ku tiyisela a swo vula ntsena ku kondzelela ehansi ka nxaniso ni ku tshama u tiyile. Swi katsa ku lehisa mbilu, xivindzi ni ku tserhama u nga heleriwi hi ntshembo loko u langutane ni miringo, swihinga kumbe nxaniso. Leswi hi hanyaka hi “ku tinyiketela loku nga ni vukwembu hi ku fambisana na Kreste Yesu,” ha swi tiva leswaku hi ta xanisiwa. (2 Timotiya 3:12) Leswaku hi ta kombisa rirhandzu ra hina eka Yehovha ni ku hlakulela timfanelo leti lavekaka leswaku hi ponisiwa, hi fanele hi tiyisela. (Varhoma 5:3-5; 2 Timotiya 4:7, 8; Yakobo 1:3, 4, 12) Loko hi nga tiyiseli, a hi nge byi kumi vutomi lebyi nga heriki.—Varhoma 2:6, 7; Vaheveru 10:36.
6. Ku tiyisela ku ya fika emakumu swi vula ku endla yini?
6 Hambiloko ho va hi sungule kahle, xa nkoka ngopfu ku ta va ku tiyisela ka hina. Yesu u te: “Loyi a tiyiseleke ku fika emakumu hi yena la nga ta ponisiwa.” (Matewu 24:13) Ina, hi fanele hi tiyisela ku ya fika emakumu, hambiloko sweswo swi vula ku tiyisela kukondza hi fa kumbe ku fikela emakumu ya mafambiselo lawa yo homboloka ya swilo. Minkarhi hinkwayo hi fanele hi tshama hi ri karhi hi hlayisa vutshembeki bya hina eka Xikwembu. Hambiswiritano, loko hi nga engeteli ku tinyiketela loku nga ni vukwembu eka ku tiyisela ka hina, a hi nge n’wi tsakisi Yehovha naswona a hi nge byi kumi vutomi lebyi nga heriki. Kambe, xana ku tinyiketela loku nga ni vukwembu i yini?
Leswi Ku Tinyiketela Loku Nga Ni Vukwembu Swi Vulaka Swona
7. Ku tinyiketela loku nga ni vukwembu i yini, naswona ku hi susumetela ku endla yini?
7 Ku tinyiketela loku nga ni vukwembu i ku kombisa xichavo eka Yehovha Xikwembu, u n’wi gandzela ni ku n’wi tirhela hileswi u seketelaka vuhosi bya yena bya vuako hinkwabyo. Leswaku hi kombisa ku tinyiketela loku nga ni vukwembu eka Yehovha, hi fanele hi va ni vutivi lebyi kongomeke ha yena ni hi tindlela ta yena. Hi fanele hi navela ku tiva vumunhu bya Xikwembu hi ku helela. Leswi swi ta hi susumetela leswaku hi ya hi tinyiketela eka xona hi mbilu hinkwayo, ku nga ku tinyiketela loku kombisiwaka hi swiendlo na hi ndlela leyi hi hanyaka ha yona. Hi fanele hi navela ku fana na Yehovha hilaha hi nga kotaka hakona—hi tekelela tindlela takwe ni ku kombisa timfanelo ta yena ni vumunhu bya yena. (Vaefesa 5:1) Hakunene, ku tinyiketela loku nga ni vukwembu ku hi susumetela ku lava ku tsakisa Xikwembu eka hinkwaswo leswi hi swi endlaka.—1 Vakorinto 10:31.
8. Ku tinyiketela loku nga ni vukwembu ni ku tinyiketela loku heleleke swi fambisana hi ndlela yihi?
8 Leswaku hi kombisa ku tinyiketela ka ntiyiso loku nga ni vukwembu, hi fanele hi gandzela Yehovha ntsena, hi nga pfumeleli nchumu leswaku wu teka ndhawu ya yena etimbilwini ta hina. Leswi a nga Muvumbi wa hina, u faneriwa hi ku tinyiketela ka hina loku heleleke. (Deteronoma 4:24; Esaya 42:8) Nilokoswiritano, Yehovha a nga hi sindzisi leswaku hi n’wi gandzela. U lava leswaku hi tinyiketela hi ku swi rhandza. Rirhandzu ra hina eka Xikwembu leri sekeriweke eka vutivi lebyi kongomeke bya xona, hi rona ri hi susumetelaka ku hundzula vumunhu bya hina, hi tinyiketela eka xona hi ku helela kutani hi hanya hi ku pfumelelana na xona.
Vana Ni Vuxaka Ni Xikwembu
9, 10. Hi nga byi kuma njhani vuxaka lebyikulu na Xikwembu hi tlhela hi byi hlayisa?
9 Endzhaku ko kombisa ku tinyiketela ka hina eka Xikwembu hi ku khuvuriwa, ha ha fanele hi va ni vuxaka lebyikulu na xona. Hikwalaho, ku navela ka hina ku endla leswi ni ku tirhela Yehovha hi ku tshembeka ku hi susumetela ku hambeta hi dyondza Rito ra yena ni ku anakanyisisa ha rona. Loko hi ri karhi hi pfumelela moya wa Xikwembu leswaku wu tirha emianakanyweni ni le timbilwini ta hina, rirhandzu leri hi rhandzaka Yehovha ha rona ra kula. Vuxaka bya hina na yena byi hambeta byi ri nchumu wa nkoka swinene evuton’wini bya hina. Hi teka Yehovha a ri Munghana wa hina lonkulu naswona hi lava ku n’wi tsakisa minkarhi hinkwayo. (1 Yohane 5:3) Ndlela leyi hi byi tsakelaka ha yona vuxaka lebyi hi nga na byona na Xikwembu ya kula, naswona ha tsaka hi leswi a hi dyondzisaka a tlhela a hi tsundzuxa hi ndlela ya rirhandzu loko swi laveka.—Deteronoma 8:5.
10 Loko hi nga hambeti hi tiyisa vuxaka bya hina bya risima na Yehovha, byi ta fa. Loko byi fa, ku ta va ku nga ri xihoxo xa Xikwembu, hikuva a xi le “kule ngopfu ni un’wana ni un’wana wa hina.” (Mintirho 17:27) Ha tsaka swonghasi leswi Yehovha a endlaka swi hi olovela ku tshinela eka yena! (1 Yohane 5:14, 15) Ina, hi fanele hi lwela ku hlayisa vuxaka bya hina lebyikulu na Yehovha. Hambiswiritano, wa hi pfuna leswaku hi tshinela eka yena hi ku hi nyika malunghiselelo hinkwawo lawa hi ma lavaka leswaku hi va ni ku tinyiketela loku nga ni vukwembu hi tlhela hi ku hlayisa. (Yakobo 4:8) Hi nga ma tirhisa njhani hi ku helela malunghiselelo lawa hinkwawo ya rirhandzu?
Tshama U Tiyile Hi Tlhelo Ra Moya
11. Hi swihi swiendlo swin’wana swa ku tinyiketela ka hina loku nga ni vukwembu?
11 Rirhandzu ra hina leri enteke hi Xikwembu ri ta hi susumetela ku kombisa mpimo wa ku tinyiketela ka hina loku nga ni vukwembu, hi ku pfumelelana ni ndzayo ya Pawulo leyi nge: “Endla hinkwaswo leswi u nga swi kotaka leswaku u tivonakarisa u amukeleka eka Xikwembu, u ri mutirhi la nga riki na nchumu wo khomiwa hi tingana ha wona, u ri tamela khwatsi rito ra ntiyiso.” (2 Timotiya 2:15) Leswaku hi endla leswi, hi fanele hi dyondza Bibele minkarhi hinkwayo, hi tshama hi ri kona eminhlanganweni hi tlhela hi hlanganyela evutirhelini bya nsimu. Nakambe hi nga tshama hi ri ekusuhi na Yehovha hi ‘ku khongela minkarhi hinkwayo.’ (1 Vatesalonika 5:17) Leswi i swiendlo leswi nga ni xikongomelo swa ku tinyiketela ka hina loku nga ni vukwembu. Loko hi honisa swin’wana swa swona hi nga ha vabya hi tlhelo ra moya ivi sweswo swi hi endla hi hlaseleka hi ku olova hi marhengu ya Sathana.—1 Petro 5:8.
12. Hi nga langutana njhani ni miringo hilaha ku humelelaka?
12 Ku tshama hi tiyile hi tlhelo ra moya ni ku hiseka swi tlhela swi hi pfuna ku langutana ni miringo leyi hi welaka. Miringo yi nga ha huma eka vanhu lava va nga ha hi ringaka swinene. Swi nga ha tika ku tiyisela rivengo, nkaneto ni nxaniso loko swi huma eka vandyangu, maxaka kumbe vaakelani. Entirhweni kumbe exikolweni va nga ha hi yenga leswaku hi tlula misinya ya milawu ya Vukreste. Ku hela matimba, vuvabyi ni ntshikilelo swi nga hi tsanisa emirini kutani swi endla leswaku swi hi tikela ngopfu ku langutana ni miringo ya ripfumelo. Kambe hi ta langutana ni miringo hinkwayo hi laha ku humelelaka loko hi phikelela eka “swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, [hi] ri karhi [hi ]rindzela ni ku hamba [hi] tsundzuka vukona bya siku ra Yehovha.” (2 Petro 3:11, 12) Naswona hi nga tshama hi tsakile loko hi endla sweswo, hi ri karhi hi tiyiseka leswaku Xikwembu xi ta hi katekisa.—Swivuriso 10:22.
13. Xana hi fanele hi endla yini leswaku hi tshama hi ri ni ku tinyiketela loku nga ni vukwembu?
13 Hambiloko Sathana a hlasela lava nga ni ku tinyiketela loku nga ni vukwembu, a hi fanelanga hi chava. Ha yini? Hikuva “Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu.” (2 Petro 2:9) Leswaku hi tiyisela miringo hi tlhela hi kutsuriwa hi ndlela yoleyo, hi fanele “hi hambana ni ku nga xiximi Xikwembu ni ku navela ka misava, ni ku hanya hi mianakanyo yo hluteka ni ku lulama ni ku tinyiketela loku nga ni vukwembu exikarhi ka mafambiselo lawa ya swilo ya sweswi.” (Tito 2:12) Tanihi Vakreste, hi fanele hi tshama hi xalamukile leswaku ku tsana loku katsaka ku navela ni swiendlo swihi na swihi swi nga kavanyeti ku tinyiketela ka hina ka vukwembu kutani swi ku herisa. Sweswi a hi xiyeni yin’wana ya minxungeto leyi.
Tivonele Eka Minxungeto Ya Ku Tinyiketela Loku Nga Ni Vukwembu
14. I yini lexi hi faneleke hi xi tsundzuka loko hi yengiwa hi ntlhamu wa swilo leswi vonakaka?
14 Ku rhandza swilo leswi vonakalaka i ntlhamu eka vo tala. Hi nga ha tikanganyisa, hi “ehleketa leswaku ku tinyiketela loku nga ni vukwembu i ndlela yo pindzula [hi swilo leswi vonakalaka].” Xisweswo, hi va ni xivindzi xo tlanga hi vapfumeri-kulorhi hileswi va hi tshembaka. (1 Timotiya 6:5) Hi xihoxo hi nga ha anakanya leswaku a swi bihanga ku sindzisa Mukreste loyi a fuweke leswaku a hi lomba mali leyi hi nga taka hi nga swi koti ku yi hakela. (Pisalema 37:21) Kambe i ku tinyiketela loku nga ni vukwembu, ku nga ri ku vungelela swilo leswi vonakaka, leswi “nga ni xitshembiso xa vutomi bya sweswi ni lebyi nga ta ta.” (1 Timotiya 4:8) Leswi ‘hi nga tangiki na nchumu emisaveni, naswona a hi nge fambi na nchumu,’ a hi tiyimiseleni ku lava “ku tinyiketela loku ku nga ni vukwembu swin’we ni ku eneriseka i ndlela leyi pindzurisaka swinene” kutani hi ‘eneriseka hi swilo leswi hi nga na swona.’—1 Timotiya 6:6-11.
15. Xana hi nga endla yini loko ku tsutsumisa ntsako ku lava ku hi endla leswaku hi nga vi na nkarhi wa ku tinyiketela loku nga ni vukwembu?
15 Ku tsutsumisa ntsako swi nga endla leswaku hi nga vi na nkarhi wa ku tinyiketela loku nga ni vukwembu. Xana ku laveka leswaku hi endla mindzulamiso yo karhi hi xihatla mayelana ni ntlhamu lowu? Ina, vutiolori ni vuhungasi swa pfuna. Kambe swo pfunanyana loko hi swi ringanisa ni vutomi lebyi nga heriki. (1 Yohane 2:25) Namuntlha, vo tala ‘i varhandzi va mintsako ku ri ni ku rhandza Xikwembu, va ni xivumbeko xa ku tinyiketela loku nga ni vukwembu kambe va tikomba va nga tshembeki eka matimba ya kona,’ kutani hi fanele hi fularhela vanhu vo tano. (2 Timotiya 3:4, 5) Lava va kandziyisaka ku tinyiketela loku nga ni vukwembu “va tivekela hi ku hlayiseka masungulo lamanene ya nkarhi lowu taka, leswaku va ta khomelela swinene evuton’wini bya xiviri.”—1 Timotiya 6:19.
16. I ku navela kwihi ka vudyoho loku sivelaka van’wana leswaku va nga swi koti ku hanya hi ku pfumelelana ni mimpimanyeto yo lulama ya Xikwembu, naswona hi nga ku hlula njhani ku navela loku?
16 Ku tirhisa xihoko ni swidzidzirisi hi ndlela yo biha, mahanyelo yo biha, ku navela ka vudyoho swi nga ha herisa ku tinyiketela ka hina loku nga ni vukwembu. Ku tinyiketela eka leswi swi nga hi sivela ku hanya hi ku landzelela swilaveko swa Xikwembu. (1 Vakorinto 6:9, 10; 2 Vakorinto 7:1) Hambi ku ri Pawulo u boheke ku hambeta a lwisana ni nyama leyi nga ni vudyoho. (Varhoma 7:21-25) Ku fanele ku tekiwa magoza lamakulu leswaku ku tsuvuriwa ku navela loko biha. Xo sungula, hi fanele hi va hi tiyimiserile ku tshama hi basile emahanyelweni. Pawulo wa hi byela: “Dlayani swirho swa miri wa n’wina leswi nga emisaveni malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava.” (Vakolosa 3:5) Leswaku hi dlaya swirho swa miri wa hina eka swilo swo tano swa vudyoho hi fanele hi va hi tiyimiserile ku swi tsuvula. Ku khongela Xikwembu swi huma embilwini swi ta hi pfuna leswaku hi fularhela ku navela loko biha kutani hi lava ku lulama ni ku tinyiketela loku nga ni vukwembu eka mafambiselo lawa yo biha ya swilo.
17. Hi fanele hi ku teka njhani ku tshinyiwa?
17 Ku hela matimba ku nga tsanisa ku tiyisela ka hina kutani ku vanga vuyelo byo biha eka ku tinyiketela ka hina loku nga ni vukwembu. Malandza yo tala ya Yehovha ma tshame ma hela matimba. (Tinhlayo 11:11-15; Ezra 4:4; Yonasi 4:3) Ku hela matimba ku nga va ni vuyelo byo biha swinene eka hina loko ku fambisana ni ku hlundzukisiwa hileswi hi titwaka hi dyoheriwile kumbe hileswi hi holoveriweke swinene kumbe hileswi hi tshinyiweke. Hambiswiritano, loko hi tshinyiwa swi kombisa leswaku Xikwembu xa hi tsakela naswona xa hi rhandza. (Vaheveru 12:5-7, 10, 11) Ku tshinyiwa ku fanele ku tekiwa ku ri nxupulo naswona ku ri nkhavi wa ku hi vuyisa endleleni yo lulama. Loko hi titsongahata hi ta tlangela ndzayo hi tlhela hi yi amukela, hi ta swi xiya leswaku “ku tshinya ka ndzayo i ndlela ya vutomi.” (Swivuriso 6:23) Leswi swi nga hi pfuna leswaku hi endla nhluvuko lowunene hi tlhelo ra moya loko hi ri karhi hi lwela ku kombisa ku tinyiketela loku nga ni vukwembu.
18. Hi fanele hi endla yini loko hi khunguvanyisiwa?
18 Timholovo ni ku khunguvanyisiwa swi nga vanga ntlhontlho eka ku tinyiketela ka hina loku nga ni vukwembu. Ku nga ha vanga ku vilela kumbe ku susumetela van’wana leswaku va teka magoza lama nga riki ya vutlhari ya ku tihambanisa ni vamakwavo va vona va moya. (Swivuriso 18:1) Kambe hi fanele hi tsundzuka leswaku ku va ni xikhomela kumbe ku venga van’wana swi nga byi onha vuxaka bya hina na Yehovha. (Levhitika 19:18) Kahle-kahle, “loyi a nga rhandziki makwavo, la n’wi vonaka, a nge swi koti ku rhandza Xikwembu lexi a nga si tshamaka a xi vona.” (1 Yohane 4:20) EDyondzweni ya yena ya le Ntshaveni, Yesu u kandziyise xilaveko xa ku teka magoza hi ku hatlisa leswaku ku tlhantlhiwa timholovo. U byele vayingiseri va yena a ku: “Hikwalaho, loko u tisa nyiko ya wena ealitarini kutani u tsundzuka kwalaho leswaku ku ni mhaka leyi makwenu a ku hehlaka ha yona, siya nyiko ya wena kwalaho mahlweni ka alitari, u famba; u rhanga u ya endla ku rhula ni makwenu, kutani loko u vuya, u nyikela nyiko ya wena.” (Matewu 5:23, 24) Ku kombela ku rivaleriwa ku nga ha horisa xitlhavi lexi vangiweke hi marito lama tlhavaka kumbe swiendlo leswi vavisaka. Vuxaka lebyi onhiweke byi nga pfuxetiwa naswona vuxaka lebyinene byi nga vuyeteriwa loko hi kombela ku rivaleriwa hi tlhela hi pfumela leswaku timhaka a hi ti fambisanga hi ndlela leyi faneleke. Yesu u tlhele a nyikela ndzayo yin’wana malunghana ni ku tlhantlha swiphiqo. (Matewu 18:15-17) Ha tsaka swonghasi loko matshalatshala ya hina yo tlhantlha swiphiqo ma humelela!—Varhoma 12:18; Vaefesa 4:26, 27.
Landzela Xikombiso Xa Yesu
19. Ha yini swi ri swa nkoka swinene ku tekelela xikombiso xa Yesu?
19 Miringo yi ta hi wela, kambe a yi fanelanga yi hi kavanyeta emphikizanweni wa vutomi lebyi nga heriki. Tsundzuka leswaku Yehovha a nga hi kutsula emiringweni. Loko hi ri karhi hi ‘hluvula ntiko wun’wana ni wun’wana’ kutani hi ‘tsutsuma hi ku tiyisela eka mphikizano lowu vekiweke emahlweni ka hina,’ a hi “[languteni] swinene-nene eka Murhangeri Lonkulu ni Muhetisekisi wa ripfumelo ra hina, Yesu.” (Vaheveru 12:1-3) Loko hi xi kambisisa hi vukheta xikombiso xa Yesu hi tlhela hi tikarhatela ku n’wi tekelela hi mavulavulelo ni hi swiendlo, sweswo swi ta hi pfuna leswaku hi hlakulela ku tinyiketela loku nga ni vukwembu kutani hi ku kombisa hi mpimo lowukulu.
20. Hi byihi vuyelo byo lava ku tiyisela ni ku tinyiketela loku nga ni vukwembu?
20 Ku tiyisela ni ku tinyiketela loku nga ni vukwembu swa fambisana leswaku swi hi pfuna hi tiyiseka leswaku hi ta ponisiwa. Loko hi kombisa timfanelo leti ta risima, hi ta hambeta hi tshembekile entirhweni wo kwetsima lowu hi wu endlelaka Xikwembu. Hambiloko hi ri ehansi ka ndzingo, hi ta tshama hi tsakile leswi hi kumaka rirhandzu lerikulu ra Yehovha ni mikateko, hikwalaho ka leswi hi tiyiseleke ni ku kombisa ku tinyiketela loku nga ni vukwembu. (Yakobo 5:11) Ku tlula kwalaho, Yesu u hi tiyisekisile: “Hi ku tiyisela ka n’wina mi ta londzovota mimoya-xiviri ya n’wina.”—Luka 21:19.
A Wu Ta Hlamurisa Ku Yini?
• Ha yini ku tiyisela swi ri swa nkoka?
• Ku tinyiketela loku nga ni vukwembu i yini, naswona ku kombisiwa njhani?
• Hi nga byi kuma njhani vuxaka lebyikulu na Xikwembu hi tlhela hi byi hlayisa?
• Hi yihi minxungeto yin’wana eka ku tinyiketela ka hina loku nga ni vukwembu, naswona hi nga yi papalata njhani?
[Swivutiso Swa Dyondzo]
[Swifaniso leswi nga eka tluka 12, 13]
Ku tinyiketela loku nga ni vukwembu ku kombisiwa hi tindlela to tala
[Swifaniso leswi nga eka tluka 14]
Tivoneleni eka minxungeto leyi xungetaka ku tinyiketela ka n’wina loku nga ni vukwembu