Swivutiso Swa Vahlayi

I swiyimo swihi leswi lavaka leswaku wansati loyi a nga Mukreste a ambala xo funengeta nhloko leswaku a endla mintirho leyi fambisanaka ni timhaka ta moya?

Muapostola Pawulo u tsarile: “Wansati un’wana ni un’wana loyi a khongelaka kumbe ku profeta a nga funengelanga nchumu enhlokweni u tsongahata nhloko ya yena.” Ha yini? Hikuva nsinya wa nawu wa Xikwembu hi vunhloko wu ri: “Nhloko ya wansati i wanuna.” Hi ntolovelo ku khongela kumbe ku dyondzisa evandlheni ra Vukreste i vutihlamuleri bya wanuna. Hikwalaho, loko wansati loyi a nga Mukreste a fambisa timhaka leti fambisanaka ni vugandzeri leti hi ntolovelo ti fambisiwaka hi nuna wakwe kumbe hi wanuna la khuvuriweke, u fanele a ambala xo funengeta nhloko.—1 Vakorinto 11:3-10.

Laha swiyimo swi nga ha lavaka leswaku wansati loyi a nga Mukreste a ambala xo funengeta nhloko ku nga ha va loko a ri ni nuna wakwe. Hi xikombiso, loko ndyangu wu khome dyondzo ya Bibele kumbe wu lava ku dya, hi ntolovelo nuna wa yena hi yena a va dyondzisaka a tlhela a va yimela hi xikhongelo eka Xikwembu. Hambiswiritano, loko a nga ri mupfumeri, vutihlamuleri lebyi byi nga ha byarhiwa hi nsati wa yena. Hikwalaho, loko a yimela van’wana hi xikhongelo kumbe loko a fambisa dyondzo ya Bibele ni vana va yena ematshan’weni ya nuna wakwe, swi fanerile leswaku wansati loyi a nga Mukreste a ambala xo funengeta nhloko. Loko nuna wakwe a nga ri kona, wansati a nga boheki ku ambala xo funengeta nhloko, tanihi leswi Xikwembu xi nga n’wi nyika vutihlamuleri byo dyondzisa vana.—Swivuriso 1:8; 6:20.

Kambe ku vuriwa yini hi loko mufana wa kwala ndyangwini a ri nandza wa  Yehovha Xikwembu la khuvuriweke? Leswi mufana yoloye a nga xirho xa vandlha ra Vukreste u fanele a kuma ndzetelo eka swirho swa rona swa xinuna. (1 Timotiya 2:12) Loko tata wa yena a ri mupfumeri, mufana loyi u fanele a dyondzisiwa hi tata wakwe. Hambiswiritano, loko tatana a nga ri kona, kutani manana u fanele a ambala xo funengeta nhloko loko a fambisela n’wana wakwe wa mufana la khuvuriweke ni vana lavan’wana dyondzo ya Bibele. Loko a swi lava a nga ha kombela n’wana wakwe wa mufana leswaku a khongela eka dyondzo yoleyo kumbe hi nkarhi wa swakudya, kambe sweswo swi siyeriwa eka yena. A nga ha vona onge n’wana wa yena wa mufana a nga si va ni vuswikoti lebyi eneleke, kutani a hlawula ku khongela hi yexe. Loko a hlawula ku khongela etimhakeni to tano, u fanele a ambala xo funengeta nhloko.

Loko wansati loyi a nga Mukreste a fambisa nhlangano wun’wana wa vandlha, swi nga ha lava leswaku a ambala xo funengeta nhloko. Hi xikombiso, eka nhlangano wa ntirho wa nsimu wa le xikarhi ka vhiki, ku nga ha va ku ri ni vamakwerhu va xisati va Vakreste ntsena, ku nga ri na makwerhu wa xinuna la khuvuriweke. Ku nga ha va ni minkarhi leyi ku nga riki na vamakwerhu va xinuna lava khuvuriweke enhlanganweni wa vandlha. Loko makwerhu wa xisati a fanele a fambisa minhlangano leyi hi ntolovelo yi fambisiwaka hi makwerhu wa xinuna evandlheni kumbe eka nhlangano wa ntirho wa nsimu, u fanele a ambala xo funengeta nhloko.

Xana wansati loyi a nga Mukreste u fanele a ambala xo funengeta nhloko loko a toloka nkulumo ya le rivaleni kumbe a yi toloka hi ririmi ra mavoko kumbe loko a hlaya tindzimana ebukwini leyi sekeriweke eBibeleni leyi tirhisiwaka enhlanganweni wa vandlha? Doo. Vamakwerhu va xisati lava fambisaka minhlangano leyi a vo rhangela kumbe ku dyondzisa. Hilaha ku fanaka, a swi bohi leswaku vamakwerhu va xisati va ambala xo funengeta nhloko loko va endla minkombiso, va rungula mintokoto, kumbe loko va veka tinkulumo eXikolweni xa Vutirheli bya le Tilweni.

Hambileswi ku dyondzisa evandlheni swi faneleke swi endliwa hi vavanuna lava khuvuriweke, vavanuna ni vavasati va ni vutihlamuleri byo chumayela ni ku dyondzisa vanhu lava nga riki evandlheni. (Matewu 24:14; 28:19, 20) Kutani ke, loko wansati loyi a nga Mukreste a vulavula ni vanhu va le handle hi Rito ra Xikwembu ku ri ni wanuna la nga Mbhoni ya Yehovha, a swi bohi leswaku a ambala xo funengeta nhloko.

Hambiswiritano, swi hambanile loko ku tiwa eka dyondzo ya Bibele leyi hleriweke ya nkarhi na nkarhi leyi fambisiwaka ekaya, ku ri ni wanuna loyi a tinyiketeleke a tlhela a khuvuriwa. Lexi i xiyenge xa dyondzo leyi hleriweke ka ha ri ni nkarhi, laha kahle-kahle loyi a fambisaka dyondzo a rhangelaka. Ehansi ka swiyimo leswi dyondzo yi fana ni nhlangano wa vandlha. Loko wansati la nga Mbhoni leyi khuvuriweke a fambisa dyondzo yoleyo ku ri ni wanuna la nga Mbhoni leyi khuvuriweke, swo boha leswaku a ambala xo funengeta nhloko. Hambiswiritano, makwerhu wa xinuna la khuvuriweke hi yena a faneleke a khongela. Makwerhu wa xisati a nga fanelanga a khongela loko ku ri ni makwerhu wa xinuna la khuvuriweke, handle ka loko ku ri ni swiphiqo swin’wana, swo fana ni loko makwerhu a nga ha koti ku vulavula.

Nkarhi wun’wana makwerhu wa xisati a nga ha ya eka dyondzo yakwe ya Bibele ni muhuweleri wa Mfumo wa xinuna la nga khuvuriwangiki. Loko a swi tsakela a nga ha n’wi kombela leswaku a fambisa dyondzo. Kambe leswi a nga fanelekiki ku yimela makwerhu loyi wa xisati hi xikhongelo eka Yehovha, swi ta va swinene leswaku makwerhu wa xisati a khongela eka dyondzo yoleyo. Loko a fambisa dyondzo kumbe a khongela, makwerhu loyi wa xisati u fanele a ambala xo funengeta nhloko ehansi ka swiyimo leswi. Hambiloko makwerhu loyi wa xinuna a nga si khuvuriwa, vanhu va le handle va n’wi teka a ri xirho xa vandlha hikwalaho ka leswi a chumayelaka na rona.

Muapostola Pawulo u tsarile: “Wansati [u fanele] a va ni xikombiso xa vulawuri enhlokweni ya yena hikwalaho ka tintsumi.” Ina, vamakwerhu va xisati lava nga Vakreste va ni lunghelo ra ku va xikombiso lexinene lexi xiyiwaka ni hi tintsumi ta timiliyoni leti hambetaka ti titsongahata eka Yehovha. Wa nga vona ndlela leyi swi nga swinene ha yona loko vavasati lava chavaka Xikwembu va ambala xo funengeta nhloko loko xiyimo xi lava leswaku va endla tano!

[Swifaniso leswi nga eka tluka 26]

Xifunengeto xa nhloko i xikombiso xo xixima vunhloko