Ku Susumetiwa Hi “Swilo Leswikulu Ngopfu Swa Xikwembu”

“Hi va twa va vulavula tindzimi ta hina malunghana ni swilo leswikulu ngopfu swa Xikwembu.”—Mintirho 2:11.

1, 2. Hi wihi nchumu lowu hlamarisaka lowu humeleleke eYerusalema hi Pentekosta ya 33 C.E.?

SIKU rin’wana nimixo hi ximun’wana hi lembe ra 33 C.E., ntlawa wun’wana wa vavanuna ni vavasati, lava nga vadyondzisiwa va Yesu Kreste, wu humeleriwe hi nchumu lowu hlamarisaka ekaya ra wun’wana wa vona eYerusalema. “Hi xitshuketa ku humelela huwa yi huma etilweni yi kotisa rimoyana leri hungaka hi rivilo ra matimba, yi tata yindlu hinkwayo leyi a va tshame eka yona. Hiloko ku vonaka tindzimi leti fanaka ni ndzilo eka vona . . . , kutani hinkwavo va tala moya lowo kwetsima, va sungula ku vulavula hi tindzimi to hambana-hambana.”—Mintirho 2:2-4, 15.

² A ku ri ni ntshungu lowu a wu hlengeletanile emahlweni ka yindlu yoleyo. Exikarhi ka wona a ku ri ni Vayuda lava velekiweke ematikweni mambe, “vavanuna va xichavo” lava teke eYerusalema va ta tlangela nkhuvo wa Pentekosta. Un’wana ni un’wana wa vona u hlamarisiwe hileswi a tweke vadyondzisiwa va vulavula tindzimi ta tiko-xikaya ra ka vona, “malunghana ni swilo leswikulu ngopfu swa Xikwembu.” Xana a va swi kotisa ku yini hikuva vanhu lava vulavulaka hinkwavo a va ri Vagaleliya?—Mintirho 2:5-8, 11.

3. Hi rihi rungula leri muapostola Petro a ri byeleke ntshungu hi Pentekosta?

³ Un’wana wa Vagaleliya volavo a a ku ri muapostola  Petro. U hlamusele leswaku mavhiki ma nga ri mangani lama nga hundza, Yesu Kreste u dlayiwe hi vavanuna vo biha. Hambiswiritano, Xikwembu xi n’wi pfuxile N’wana wa xona eka lava feke. Endzhaku ka sweswo, Yesu u humelele eka vadyondzisiwa va yena vo tala, ku katsa na Petro swin’we ni van’wana lava a va ri kona sweswi. Sweswi se a ku hundze masiku ya khume, Yesu a tlhandlukele etilweni. Hi yena loyi a chululeke moya lowo kwetsima eka vadyondzisiwa va yena. Xana leswi a swi vula swo karhi eka vanhu lava va tlangelaka Pentekosta? Ina. Rifu ra Yesu ri va lunghiselele ndlela ya leswaku va rivaleriwa swidyoho swa vona ni ku tlhela va kuma “nyiko ya mahala ya moya lowo kwetsima,” loko va kombisa ripfumelo eka yena. (Mintirho 2:22-24, 32, 33, 38) Kutani ke, xana vahlaleri lava va titwise ku yini hi “swilo leswikulu swa Xikwembu” leswi va swi tweke? Naswona xana xiendlakalo lexi xi nga hi pfuna njhani leswaku hi kambisisa ntirho lowu hi wu endlelaka Yehovha?

Va Susumeteleka Ku Teka Goza!

4. Hi byihi vuprofeta bya Yuwele lebyi hetisekeke hi siku ra Pentekosta ya 33 C.E.?

⁴ Loko se va amukele moya lowo kwetsima, vadyondzisiwa lava a va ri eYerusalema a va ha yima-yimanga, va chumayele mahungu lamanene ya ku ponisa eka vanhu van’wana, va sungule hi ntshungu lowu a wu hlengeletanile mixo wolowo hi Pentekosta. Ku chumayela ka vona ku hetisise vuprofeta lebyi xiyekaka, lebyi rhekhodiweke eka malembe-xidzana ya nhungu lama hundzeke, hi Yuwele n’wana wa Petuwele: “Ndzi ta chululela moya wa mina ehenhla ka nyama ya muxaka wun’wana ni wun’wana, kunene vana va n’wina va majaha ni va vanhwanyana va ta profeta. Loko ku ri vavanuna lava kuleke eka n’wina, va ta lorha milorho. Loko ku ri majaha ya n’wina, ma ta vona swivono. Naswona ndzi ta chululela moya wa mina eka malandza ya xinuna ni ya xisati emasikwini wolawo . . . ku nga si fika siku lerikulu ni leri chavisaka ra Yehovha.”—Yuwele 1:1; 2:28, 29, 31; Mintirho 2:17, 18, 20.

5. Xana Vakreste va lembe-xidzana ro sungula a va ri vaprofeta hi ndlela yihi? (Vona nhlamuselo ya le hansi.)

⁵ Xana leswi a swi vula leswaku Xikwembu a xi ta veka vaprofeta va xinuna ni va xisati, ku fana na Davhida, Yuwele na Debora kutani xi va tirhisela ku vula swilo leswi nga ta endleka enkarhini lowu taka? Doo! ‘Majaha ni vanhwanyana, malandza ya xinuna ni ya xisati,’ lama nga Vakreste, ma ta profeta, leswi vulaka leswaku va ta susumetiwa hi moya wa Yehovha leswaku va chumayela hi “swilo leswikulu” leswi Yehovha a swi endleke nileswi a nga ta swi endla. Kutani va ta va vavulavuleri va La nge Henhla-henhla. * Kambe, xana ntshungu wu angule njhani?—Vaheveru 1:1, 2.

6. Endzhaku ka loko vanhu vo tala entshungwini va yingise Petro, xana va susumeteleke ku endla yini?

⁶ Endzhaku ka loko ntshungu wu twe nhlamuselo ya Petro, vo tala va teke goza. Va “amukel[e] rito rakwe hi mbilu hinkwayo” kutani “va khuvuriw[a], naswona hi siku rero ku engeteriwe mimoya-xiviri ya kwalomu ka 3000.” (Mintirho 2:41) Leswi van’wana a va ri Vayuda hi ntumbuluko naswona van’wana a va ri vamatiko lava amukeleke Xiyuda, hinkwavo a va ri ni vutivi byo karhi bya Matsalwa. Sweswo, swin’we ni ku susumetiwa hi leswi va swi dyondzeke eka Petro, swi endle leswaku va fanelekela ku khuvuriwa “hi vito ra Tatana ni ra N’wana ni ra moya lowo kwetsima.”  (Matewu 28:19) Endzhaku ka loko va khuvuriwile “va hambet[e] va tinyiketela edyondzweni ya vaapostola.” Hi nkarhi lowu fanaka, va sungule ku byela van’wana hi dyondzo leyi va ha ku yi kumaka. Hakunene “siku ni siku a va tshama va ri kona etempeleni hi mianakanyo yin’we . . . va vonga Xikwembu ni ku tsakeriwa hi vanhu hinkwavo.” Hikwalaho ka ntirho lowu wa ku chumayela, “Yehovha a a hambeta a va tisela lava ponisiwaka, siku ni siku.” (Mintirho 2:42, 46, 47) Ku simekiwe mavandlha yo tala ya Vukreste eka matiko lawa vapfumeri lava lavantshwa a va tshama eka wona. Handle ko kanakana xin’wana lexi vangeleke ku andza loku, a ku ri ku hiseka ka vona entirhweni wo chumayela ‘mahungu lamanene,’ loko va tlhelele ekaya.—Vakolosa 1:23.

Rito Ra Xikwembu Ri Ni Matimba

7. (a) I yini lexi kokelaka vanhu va matiko hinkwawo enhlengeletanweni ya Yehovha namuntlha? (b) Hi kwihi ku engeteleka loku u ku vonaka emisaveni hinkwayo ni le vandlheni ra ka n’wina? (Vona nhlamuselo ya le hansi.)

⁷ Ku vuriwa yini hi lava navelaka ku va malandza ya Xikwembu namuntlha? Na vona va fanele va kambisisa Rito ra Xikwembu hi vukheta. Loko va ri karhi va endla sweswo, va kuma leswaku Yehovha i Xikwembu “xa tintswalo ni nsovo, [lexi] hlwelaka ku hlundzuka, [lexi] teleke musa wa rirhandzu ni ntiyiso.” (Eksoda 34:6; Mintirho 13:48) Va sungula ku tiva leswaku Yehovha u va kombe tintswalo hi ku lunghiselela nkutsulo ha Yesu Kreste, loyi ngati yakwe leyi halatiweke yi nga swi kotaka ku susa swidyoho swa vona hinkwaswo. (1 Yohane 1:7) Naswona va tsaka leswi va tivaka xikongomelo xa Xikwembu xa “ku pfux[a] lava lulameke ni . . . lava nga lulamangiki.” (Mintirho 24:15) Va ya va xi rhandza ngopfu Xihlovo xa “swilo [leswi] leswikulu” naswona va susumeteleka ku chumayela ntiyiso lowu wa risima. Kutani va va malandza ya Xikwembu lama tinyiketeleke ivi ma khuvuriwa naswona va hambeta va “kula eku tiveni ka Xikwembu hi ku kongoma.” *—Vakolosa 1:10b; 2 Vakorinto 5:14.

8-10. (a) Xana ntokoto wa wansati un’wana la nga Mukreste wu swi kombisa njhani leswaku Rito ra Xikwembu “ri ni matimba”? (b) Xana ntokoto lowu wu ku dyondzise yini ha Yehovha ni ndlela leyi a seketelaka malandza yakwe ha yona? (Eksoda 4:12)

⁸ Vutivi lebyi malandza ya Xikwembu ma byi kumaka loko ma kambisisa Bibele, byi ni matimba. Vutivi byo tano byi susumeta timbilu ta vona, byi cinca ndlela leyi va ehleketaka ha yona naswona byi kongomisa vutomi bya vona. (Vaheveru 4:12) Hi xikombiso, wansati la vitaniwaka Camille a a tirha ku khathalela vanhu lava dyuhaleke. Un’wana wa vadyuhari lava a a va khathalela a ku ri Martha, la nga Mbhoni ya Yehovha. Leswi Martha a a karhatiwa swinene hi vuvabyi bya mianakanyo, a a fanele a tshama a vekiwe tihlo. A a tsundzuxiwa ku dya—hambi ku ri ku mita swakudya. Hambiswiritano, a ku ri ni nchumu lowu a wu dzikile emianakanyweni ya Martha, hilaha hi nga ta vona hakona.

⁹ Siku rin’wana, Martha u vone Camille a ri karhi a rila hikwalaho ka swiphiqo leswi a a ri na swona. Hiloko Martha a angarha Camille kutani a n’wi rhamba leswaku va hlaya swin’we Bibele. Xana munhu wo fana na Martha a a ta swi kota ku fambisa dyondzo ya Bibele? Ina, u swi kotile! Hambileswi swilo swo tala a nga ha kotiki ku swi tsundzuka, Martha a nga xi rivalanga Xikwembu xakwe lexi hlamarisaka; naswona a a nga wu rivalanga ntiyiso wa risima lowu a wu dyondzeke eBibeleni. Hi nkarhi wa dyondzo, Martha u kombele Camille leswaku a hlaya ndzimana yin’wana ni yin’wana, a hlaya Matsalwa lama kombisiweke, a hlaya xivutiso lexi nga emakumu ka tluka kutani a xi hlamula. Ku hundze nkarhi wo leha va ri karhi va hlaya, naswona vutivi bya Camille bya Bibele byi engetelekile hambileswi Martha a a nga hanyanga swona. Martha u swi vonile leswaku Camille u fanele a tolovelana ni vanhu lava tiyimiseleke ku tirhela Xikwembu. Hiloko a teka rhoko ni tintangu a swi nyika xichudeni xakwe Camille, leswaku a ta languteka loko a ya enhlanganweni ro sungula, eHolweni ya Mfumo.

¹⁰ Xikombiso lexinene xa Martha, ku khorwiseka kakwe ni ndlela leyi a a n’wi khathalela ha yona, swi tsakise Camille. Mhaka ya leswaku Martha u rivale swilo swo tala leswi a a swi tiva kambe a nga swi rivali leswi a swi dyondzeke eMatsalweni,  yi n’wi endle a vona leswaku leswi Martha a a ringeta ku n’wi dyondzisa swona eBibeleni, a swi ri swa nkoka. Hi ku famba ka nkarhi, loko Camille a susiwa a ya tirha eka ndhawu yin’wana, u swi xiyile leswaku a ku ri nkarhi wa leswaku a teka goza. Loko a fika kona a nga ha yima-yimanga, u lo namba a ya eHolweni ya Mfumo, a ambale rhoko ni tintangu leti Martha a a n’wi nyike tona kutani a kombela dyondzo ya Bibele. Camille u endle nhluvuko lowunene kutani a khuvuriwa.

Va Navele Ku Hanya Hi Misinya Ya Milawu Ya Yehovha

11. Hambileswi hi wu hisekelaka ntirho wo chumayela, xana hi nga swi kombisa njhani leswaku rungula ra Mfumo hi rona ri hi nyikaka matimba?

¹¹ Namuntlha, ku ni Timbhoni ta Yehovha leti tlulaka tsevu wa timiliyoni, leti ku fana na Martha na Camille, ti chumayelaka “mahungu lamanene . . . ya mfumo” emisaveni hinkwayo. (Matewu 24:14; 28:19, 20) Ku fana ni Vakreste va lembe-xidzana ro sungula, ti tsakisiwa swinene hi “swilo leswikulu swa Xikwembu.” Ti tsakile hikuva ti ni lunghelo ra ku byarha vito ra Yehovha, nileswi a chululeleke moya wa yena eka tona. Hikwalaho, ti endla matshalatshala yo “famba hi mukhuva lowu fanelaka eka Yehovha leswaku [ti] n’wi tsakisa hi ku helela,” ti hanya hi ku pfumelelana ni misinya ya yena ya milawu. Swilo swin’wana leswi katsekaka i ku xixima milawu ya Xikwembu mayelana ni ku ambala ni ku tilunghisa.—Vakolosa 1:10a; Tito 2:10.

12. Hi yihi ndzayo leyi faneleke ya maambalelo ni ku tilunghisa leyi hi yi kumaka eka 1 Timotiya 2:9, 10?

¹² Ina, Yehovha u veke milawu mayelana ni ndlela leyi hi faneleke hi languteka ha yona. Muapostola Pawulo u boxe swilaveko swin’wana swa Xikwembu mayelana ni mhaka leyi. “Ndzi navela leswaku vavasati va tisasekisa hi swiambalo leswi langutekaka, hi xichavo ni mianakanyo yo hluteka, ku nga ri hi tindlela to horha misisi ni nsuku kumbe tiperela kumbe swiambalo leswi durhaka ngopfu, kambe hi ndlela leyi fanelaka vavasati lava vulaka leswaku va chava Xikwembu, hi mintirho  leyinene.” * Xana hi dyondza yini eka marito lawa?—1 Timotiya 2:9, 10.

13. (a) Xana swi vula yini ku “tisasekisa hi swiambalo leswi langutekaka”? (b) Ha yini hi nga vulaka leswaku milawu ya Yehovha a yi tiki?

¹³ Marito ya Pawulo ma kombisa leswaku Vakreste va fanele “va tisasekisa hi swiambalo leswi langutekaka.” Swiambalo swa kona swi fanele ku va leswi langutekaka nileswi baseke. Munhu un’wana ni un’wana, hambi ku ri vanhu lava sweleke, va nga yi fikelela misinya leyi ya milawu hi ku tiyiseka leswaku swiambalo swa vona swa languteka, swi basile naswona swa faneleka. Hi xikombiso, lembe ni lembe Timbhoni ta le tikweni rin’wana ra le Amerika Dzonga ti famba tikhilomitara to tala ekhwatini ti tlhela ti famba tiawara to hlaya hi byatso loko ti ya entsombanweni wa muganga. Swi tolovelekile leswaku loko munhu a ri eriendzweni leri, a wela ematini loko a tsemakanya nambu kumbe a handzukeriwa hi swiambalo swa yena loko a ri karhi a famba ekhwatini. Kutani loko lava taka entsombanweni va fika laha wu nga ta khomeriwa kona, minkarhi yo tala va va va nga languteki. Hikwalaho va heta nkarhi wo leha va ri karhi va rhungelela tikunupu, tizipi, va hlantswa va tlhela va ayina swiambalo leswi va nga ta swi ambala entsombanweni. Va xi tlangela xirhambo xa ku dya etafuleni ra Yehovha naswona va lava ku ambala hi ndlela leyi faneleke.

14. (a) Swi vula yini ku ambala “hi xichavo ni mianakanyo yo hluteka”? (b) Xana swi katsa yini ku ambala tanihi ‘vanhu lava chavaka Xikwembu’?

¹⁴ Pawulo u tlhele a kombisa leswaku hi fanele hi ambala “hi xichavo ni mianakanyo yo hluteka.” Leswi swi vula leswaku ku languteka ka hina a ku fanelanga ku koka ngopfu mahlo, ku chavisa naswona swiambalo swa hina a swi fanelanga swi pfuxa nyanyuko wa rimbewu, swi vonikela kumbe swi kombisa leswaku hi hlongorisa fexeni. Ku engetela kwalaho, hi fanele hi ambala hi ndlela leyi kombisaka leswaku hi “chava Xikwembu.” Leyi i mhaka yo anakanyisisa ha yona, a swi tano ke? A hi fanelanga hi ambala kahle ntsena loko hi ya eminhlanganweni ya vandlha kambe loko hi ri kun’wana hi ambala hi ndlela leyi humeke endleleni. Minkarhi hinkwayo ku languteka ka hina ku fanele ku va loku xiximekaka, hikuva hi Vakreste siku hinkwaro. Swi le rivaleni leswaku swiambalo swa ntirho ni yunifomo ya hina ya xikolo, swi fanele swi pfumelelana ni ntirho lowu hi wu endlaka. Hambiswiritano, hi fanele hi ambala hi ndlela leyi xiximekaka. Loko hi ambala hi ndlela leyi xiximaka Xikwembu minkarhi hinkwayo, a hi nge chavi ku chumayela hi xitshuketa hikwalaho ka leswi hi nga langutekiki kahle.—1 Petro 3:15.

“Mi Nga Rhandzi Misava”

15, 16. (a) Ha yini swi ri swa nkoka leswaku hi papalata ku tekelela misava loko swi ta emhakeni ya maambalelo ni ku tilunghisa? (1 Yohane 5:19) (b) Hi vuyeriwa hi ndlela yihi hi ku papalata ku landzela tifexeni loko hi xava swiambalo niloko hi tilunghisa?

¹⁵ Ndzayo leyi kumekaka eka 1 Yohane 2:15, 16 yi tlhela yi hi kongomisa emhakeni yo hlawula swiambalo ni ndlela leyi hi tilunghisaka ha yona. Yi ri: “Mi nga rhandzi misava kumbe swilo leswi nga emisaveni. Loko mani na mani a rhandza misava, rirhandzu ra Tatana a ri kona eka yena; hikuva hinkwaswo leswi nga emisaveni—ku navela ka nyama ni ku navela ka mahlo ni ku bombisa rifuwo  ra munhu ra vutomi—a swi humi eka Tatana, kambe swi huma emisaveni.”

¹⁶ Hakunene ndzayo leyi ya ha tirha ninamuntlha! Loko hi ri emalembeni lawa eka wona ntshikilelo wa tintangha wu tinyikeke matimba, a hi fanelanga hi pfumelela misava yi lawula ndlela leyi hi ambalaka ha yona. Switayele swa maambalelo ni ku tilunghisa swi hohlokile emalembeni ya sweswinyana. Hambi ku ri ndlela leyi vanhu va mabindzu ni lava dyondzekeke va ambalaka ha yona a hi minkarhi hinkwayo yi nga xikombiso xa maambalelo ya Vukreste. Lexi i xivangelo xin’wana xa ku va minkarhi hinkwayo hi xalamukela xilaveko xa ku ‘tshika ku titwananisa ni mafambiselo lawa ya swilo’ loko hi ta hanya hi ku ya hi milawu ya Xikwembu kutani hi “sasekisa dyondzo ya Muponisi wa hina, Xikwembu, eka swilo hinkwaswo.”—Varhoma 12:2; Tito 2:10.

17. (a) Hi swihi swivutiso leswi hi faneleke hi anakanya hi swona loko hi xava swiambalo? (b) Ha yini tinhloko ta mindyangu ti fanele ti kambisisa ndlela leyi swirho swa mindyangu ya tona swi langutekaka ha yona?

¹⁷ Loko u nga si xava xiambalo xo karhi, i swa nkoka leswaku u sungula hi ku tivutisa: ‘Ha yini ndzi kokiwa hi xiambalo lexi? Xana xi ambariwa hi munhu wo karhi loyi a dumeke, loyi ndzi n’wi xiximaka? Xana xi ambariwa hi swigevenga kumbe hi ntlawa wa vanhu lava khutazaka moya wo xandzuka?’ Nakambe hi fanele hi xi nyangisisa xiambalo xa kona. Loko ku ri rhoko kumbe xiketi, xi njhani? Xi endliwe njhani? Xana xa languteka, xa faneleka naswona xa xiximeka kumbe xa ku manya, xi pfuxa nyanyuko wa rimbewu kumbe xi ku endla u nga languteki? Tivutise, ‘Xana vanhu va ta khunguvanyeka loko ndzi xi ambarile?’ (2 Vakorinto 6:3, 4) Ha yini hi fanele hi tivutisa swivutiso leswi? Hikuva Bibele yi ri: “Hambi a ri Kreste a nga titsakisanga.” (Varhoma 15:3) Tinhloko ta mindyangu leyi nga Vakreste ti fanele ti kambisisa ndlela leyi swirho swa mindyangu ya tona swi langutekaka ha yona. Leswi ti xiximaka Xikwembu lexi vangamaka lexi ti xi gandzelaka, tinhloko ta mindyangu ti fanele ti nyika ndzayo hi ku hatlisa loko yi laveka.—Yakobo 3:13.

18. I yini lexi ku susumetelaka leswaku u xiyisisa ndlela leyi u ambalaka ni ku tilunghisa ha yona?

¹⁸ Rungula leri hi ri tameleke ri huma eka Yehovha, loyi xichavo ni ku kwetsima swi humaka eka yena. (Esaya 6:3) Bibele yi hi khutaza leswaku hi n’wi tekelela “leswi [hi] nga vana lava rhandzekaka.” (Vaefesa 5:1) Maambalelo ya hina ni ndlela leyi hi tilunghisaka ha yona swi nga endla leswaku Tata wa hina la nge matilweni a xiximiwa kumbe a sandziwa. Entiyisweni hi lava ku n’wi tsakisa!—Swivuriso 27:11.

19. Hi pfuneka njhani hi ku byela van’wana “swilo leswikulu ngopfu swa Xikwembu”?

¹⁹ Xana u titwisa ku yini hi “swilo leswikulu ngopfu swa Xikwembu” leswi u dyondzeke ha swona? Hakunene hi katekile leswi hi tivaka ntiyiso! Swidyoho swa hina swa rivaleriwa hi leswi hi kombisaka ripfumelo engatini leyi halatiweke ya Yesu Kreste. (Mintirho 2:38) Leswi swi endla leswaku hi va ni ripfalo leri tengeke emahlweni ka Xikwembu. A hi ri chavi rifu hilaha vanhu lava nga riki na ntshembo va ri chavaka hakona. Ematshan’weni ya sweswo, Yesu wa hi tiyisekisa leswaku siku rin’wana “hinkwavo lava nga eka masirha-bako ya xitsundzuxo va [ta] twa rito ra yena kutani va huma.” (Yohane 5:28, 29) Yehovha u hi kombise nsovo hi ku hi paluxela swilo leswi hinkwaswo. Ku tlula kwalaho, u hi chululele moya wa yena lowo kwetsima. Hikwalaho, hi ta kombisa ku nkhensa tinyiko leti letinene hinkwato hi ku xixima milawu ya yena leyi tlakukeke ni ku hisekela ku n’wi dzunisa, hi byela van’wana “swilo [leswi] leswikulu ngopfu.”

[Tinhlamuselo ta le hansi]

A Wu Ta Hlamurisa Ku Yini?

• Hi swihi “swilo leswikulu ngopfu” leswi vanhu va swi tweke hi Pentekosta ya 33 C.E. naswona va angurise ku yini?

• Swi tisa ku yini leswaku munhu a va mudyondzisiwa wa Yesu Kreste naswona i yini leswi katsekaka loko munhu a ri mudyondzisiwa?

• Ha yini swi ri swa nkoka leswaku hi xiyisisa ndlela leyi hi ambalaka ha yona ni ku tilunghisa ka hina?

• Hi swihi swilo leswi ku faneleke ku anakanyiwa ha swona ku vona loko xiambalo xi fanerile kumbe xi nga fanelanga?

[Swivutiso Swa Dyondzo]

[Xifaniso lexi nga eka tluka 15]

Petro u vike leswaku Yesu u pfuxiwile eka lava feke

[Swifaniso leswi nga eka tluka 17]

Xana ndlela leyi u langutekaka ha yona yi endla leswaku Xikwembu lexi u xi gandzelaka xi xiximiwa?

[Swifaniso leswi nga eka tluka 18]

Vatswari lava nga Vakreste va fanele va kambisisa ndlela leyi swirho swa mindyangu ya vona swi langutekaka ha yona