Ndlela Leyi Swiyilayila Swi Lawulaka Vutomi Bya Vanhu Ha Yona

KU KOTLANA ni munhu loko wa ha ku huma ekaya, swa hlola. Ku khudlunya hi ribye exikunwanini, swa hlola. Loko ku rila xinyenyana xo karhi ni vusiku, swa yila. Ku tshamela ku lorha norho wun’we, swa yila. Vo tala va humelela hi swiendlakalo swo tala leswi swi nga vuliki nchumu. Kambe eka vanhu van’wana va le Afrika Vupela-dyambu, leswi swi nga ha tekiwa swi ri ku hlola, mabadi, kumbe marungula lama humaka etikweni ra moya. Swi nga ha vula leswaku munhu u ta humeleriwa hi leswinene kumbe u ta weriwa hi khombo, swi ya hi xikombiso xa kona ni leswi xi vulaka swona.

Ina, vanhu va swi kholwa swiyilayila ni le matikweni ya le handle ka Afrika. Hambiloko va hanye malembe ni vanhu lava nga pfumeliki leswaku Xikwembu xi kona, vanhu vo tala va le Chayina ni le matikweni ya le khale ka Soviet Union va namarhele swiyilayila. Ematikweni ya le Vupela-dyambu, vo tala va lava mpfuno eka nchumu lowu tirhiseriwaka ku vhumbha, va chava siku ra ti-13 loko ri wela eka Ravuntlhanu, naswona va papalata swimanga swa ntima. Vanhu van’wana va le N’walungwini va languta xikwembu-kati xa le n’walungwini xi ri nchumu lowu hlolaka nyimpi ni ntungu. Le Indiya, AIDS (SIDA) yi haxiwa hi vachayeri va tilori lava kholwaka leswaku va fanele va va ni vuxaka bya rimbewu leswaku va ta timuleka loko ku hisa. EJapani, lava tirhaka ku endla muhocho va kholwa leswaku loko wansati o nghena emuhochweni wu nga si hela swi vanga badi. Nakambe swiyilayila swi tele emintlangweni. Mutlangi un’wana wa volleyball u kholwa leswaku u winisa hi ku ambala masokisi ya ntima ematshan’weni yo ambala yo basa. Ku hlaya swona i ku xurha.

Xana wena wa swi kholwa? Xana ku na swiyilayila swa le xihundleni leswi u swi chavaka? Xana u “pfumela eka swilo, kumbe mikhuva leyi nga riki na xisekelo”? Nhlamulo ya wena yi ta kombisa loko vutomi bya wena byi lawuriwa hi swiyilayila kumbe loko byi nga lawuriwi hi swona, hikuva leyi i ndlela leyi buku yin’wana yi ri hlamuselaka ha yona rito leri nge “swiyilayila.”

Munhu loyi a pfumelaka leswaku swiyilayila swi khumba swiboho swakwe siku na siku, u pfumela ku lawuriwa hi nchumu lowu a nga wu twisisiki nikatsongo. Xana i vutlhari ku endla tano? Xana hi fanele hi pfumela ku kuceteriwa hi swilo leswi nga twisisekiki naswona swi nga ni khombo? Xana swiyilayila ko va nchumu lowu nga riki na khombo kumbe swi hlola mabadi?