Yingisa Vulawuri Bya Xikwembu Hi Ku Titsongahata

“Yehovha i Muavanyisi wa hina, Yehovha i Munyiki wa nawu wa hina, Yehovha i Hosi ya hina.”—Esaya 33:22.

1. Hi swihi swilo leswi endleke leswaku tiko ra khale ra Israyele ri va leri hlawulekeke eka matiko man’wana?

TIKO ra Israyele ri simekiwe hi 1513 B.C.E. Hi nkarhi wolowo a ri ri hava ntsindza, a a ri ri hava tiko-xikaya hambi ku ri hosi ya laha misaveni. Tiko leri a ra ha ku ntshunxiwa evuhlongeni. Hambiswiritano, tiko rero lerintshwa a ri hlawulekile hi ndlela yo karhi. Yehovha Xikwembu a a ri Muavanyisi wa rona, Munyiki wa rona wa nawu naswona a ri Hosi ya rona leyi nga vonakiki. (Eksoda 19:5, 6; Esaya 33:22) Ku hava tiko rin’wana leri a ri ta vula leswi handle ka rona!

2. I xivutiso xihi lexi tlakukaka mayelana ni ndlela leyi tiko ra Israyele a ri hleriwe ha yona, naswona ha yini nhlamulo ya kona yi ri ya nkoka eka hina?

² Tanihi leswi Yehovha a nga Xikwembu lexi hlelekeke, ni leswi a nga Xikwembu xa ku rhula, hi nga langutela leswaku tiko rin’wana ni rin’wana leri a ri fumaka, ri va leri hlelekeke. (1 Vakorinto 14:33) Tiko ra Israyele a ri ri tano. Kambe, swi nga koteka njhani leswaku nhlengeletano leyi vonakaka ya laha misaveni, yi kongomisiwa hi Xikwembu lexi nga vonakiki? I swinene ku kambisisa ndlela leyi Yehovha a a lawula tiko rero ra Israyele wa khale ha yona, hi ri karhi hi xiyisisa swinene leswaku ndlela leyi a tirhisaneke ha yona ni tiko ra Israyele, yi wu kandziyisa njhani nkoka wa ku yingisa vulawuri bya Xikwembu hi ku titsongahata.

Ndlela Leyi Tiko Ra Khale Ra Israyele A Ri Lawuriwa Ha Yona

3. Hi wahi malunghiselelo lama pfunaka lawa Yehovha a ma endleke leswaku a kongomisa vanhu vakwe?

³ Hambileswi Yehovha a a ri Hosi leyi nga vonakiki ya tiko ra Israyele, u hlawule vavanuna vo tshembeka leswaku va va vayimeri vakwe lava vonakaka. A ku ri ni tindhuna, tinhloko ta mindyangu ni vavanuna lava kuleke lava a va ri vatsundzuxi ni vaavanyisi. (Eksoda 18:25, 26; Deteronoma 1:15) Kambe a hi fanelanga hi gimeta hi leswaku vavanuna volavo lava nga ni vutihlamuleri, a va ta swi kota ku avanyisa timhaka hi vutlhari ni hi ku twisisa handle ko kongomisiwa hi Xikwembu. A va nga hetisekanga naswona a va nga swi koti ku tiva leswi nga etimbilwini ta vagandzeri-kulobye. Hambiswiritano, vaavanyisi lava chavaka Xikwembu, a va ta swi kota ku nyika vapfumeri-kulobye ndzayo leyi pfunaka hikuva a yi sekeriwe  eNawini wa Yehovha.—Deteronoma 19:15; Pisalema 119:97-100.

4. Hi yihi mimboyamelo leyi vaavanyisi vo tshembeka va tiko ra Israyele a va fanele va yi papalata, naswona ha yini?

⁴ Hambiswiritano, leswaku munhu a va muavanyisi, a swi nga lavi leswaku a tiva Nawu ntsena. Leswi a va nga hetisekanga, vavanuna lava, lava kuleke, a va fanele va lwa ni mboyamelo wa vona wo biha—wo tanihi vutianakanyi, xihlawuhlawu ni makwanga—ku nga swilo leswi nga endlaka leswaku va nga avanyisi hi mfanelo. Muxe u va byele a ku: “Mi nga tshuki mi ya hi nghohe loko mi avanyisa. Mi fanele mi yingisa lontsongo ku fana ni lonkulu. Mi nga tshuki mi chavisiwa hi munhu, hikuva ku avanyisa i ka Xikwembu.” Ina, vaavanyisi va tiko ra Israyele a va avanyisela Xikwembu. Mawaku lunghelo leri a va ri na rona!—Deteronoma 1:16, 17.

5. Ku engetela eka vaavanyisi lava a va vekeke, xana i malunghiselo wahi man’wana lawa Yehovha a ma endleke leswaku a khathalela vanhu va yena?

⁵ Yehovha u tlhele a endla malunghiselelo man’wana leswaku a khathalela vanhu vakwe hi tlhelo ra moya. Niloko va nga si fika eTikweni leri Tshembisiweke, u va lerise leswaku va aka tabernakela, leyi a yi ta va ntsindza wa vugandzeri bya ntiyiso. U tlhele a veka vaprista leswaku va dyondzisa Nawu, va endla magandzelo ya swiharhi ni ku hisa mirhi ya risuna loko dyambu ri xa ni loko ri pela. Xikwembu xi veke makwavo wa Muxe, ku nga Aroni, leswaku a va muprista lonkulu wo sungula wa tiko ra Israyele, xi tlhela xi hlawula vana va Aroni leswaku va pfuna tata wa vona eka mintirho yakwe.—Eksoda 28:1; Tinhlayo 3:10; 2 Tikronika 13:10, 11.

6, 7. (a) Hi byihi vuxaka lebyi a byi ri kona exikarhi ka vaprista, ni Valevhi lava a va nga ri vaprista? (b) Xana mhaka ya leswaku Valevhi a va endla mintirho yo hambana-hambana, yi hi dyondzisa yini? (Vakolosa 3:23)

⁶ Ku khathalela timiliyoni ta vanhu vo tala hi swilaveko swa moya a ku nga ri matlangwana, naswona vaprista a va nga talanga. Kutani ku endliwe lunghiselelo ra leswaku va pfuniwa hi swirho swin’wana swa nyimba ya Levhi. Yehovha u byele Muxe a ku: “U fanele u nyiketa Valevhi eka Aroni ni vana vakwe. Hi lava va nyiketiweke, va nyiketiwe yena va huma eka vana va Israyele.”—Tinhlayo 3:9, 39.

⁷ Valevhi a a va hlelekile swinene. A va avanyisiwe hi mindyangu yinharhu—Vagerixoni, Vakohata ni Vamerari—ndyangu ha wun’we a wu ri ni ntirho wa wona. (Tinhlayo 3:14-17, 23-37) Swi nga ha endleka leswaku mintirho yin’wana a yi vonaka yi ri ya nkoka ku tlula yin’wana, kambe hinkwayo a yi laveka. Ntirho wa Valevhi lava va nga Vakohata a wu lava leswaku va tirha eka areka yo kwetsima ya ntwanano ni ku khavisa tabernakele. Hambiswiritano, Mulevhi un’wana ni un’wana, ku nga khathariseki leswaku i Mukohata kumbe e-e, a a ri ni malunghelo lamakulu. (Tinhlayo 1:51, 53) Lexi twisaka ku vava, van’wana a va nga ma tlangeli malunghelo ya vona. Ematshan’weni ya ku yingisa vulawuri bya Xikwembu hi ku titsongahata, a va enerisekanga naswona va tikukumuxile, va navela swikhundla swa le henhla va tlhela va va ni mavondzo. Un’wana wa vona a ku ri Kora, loyi a ri Mulevhi.

“Xana Na N’wina Mi Fanele Mi Kuma Vuprista?”

8. (a) Xana Kora a a ri mani? (b) Ku nga ha va ku ri yini lexi vangeleke Kora leswaku a sungula ku languta vaprista hi tihlo ra nyama?

⁸ Kora a a nga ri nhloko ya yindlu ya Levhi naswona a a nga ri nhloko ya mindyangu ya Vakohata. (Tinhlayo 3:30, 32) Hambiswiritano,  a a ri ndhuna leyi xiximiwaka eIsrayele. Swi nga ha endleka leswaku ntirho lowu Kora a a averiwe wona, a wu lava leswaku a tirhisana swinene na Aroni swin’we ni vana vakwe. (Tinhlayo 4:18, 19) Leswi Kora a a swi vona hi mahlo yakwe, swihoxo swa vanhu lava, swi nga ha endleka a ehlekete hi ndlela leyi: ‘Vaprista lava a va hetisekanga, kambe ku languteriwe leswaku ndzi titsongahata eka vona! A hi khale Aroni a endle rhole ra nsuku. Ku gandzela rhole rero swi endle leswaku vanhu va ka hina va gandzela swikwembu swa hava. Sweswi Aroni, lowa makwavo wa Muxe, i muprista lonkulu! Lexi i xin’wana-manana! Naswona ku vuriwa yini hi Nadabu na Abihu, vana va Aroni? Phela, a va ma xiximanga malunghelo lawa Yehovha a va nyikeke wona lerova a hetelela a va lovisile!’ * (Eksoda 32:1-5; Levhitika 10:1, 2) Ku nga khathariseki leswaku Kora a a swi vonisa ku yini, kambe swi le rivaleni leswaku a a sungule ku languta vaprista hi tihlo ra nyama. Sweswo swi endle leswaku a xandzukela Muxe na Aroni naswona u hetelele a xandzukele na Yehovha.—1 Samuwele 15:23; Yakobo 1:14, 15.

9, 10. I xihehlo xihi lexi Kora ni vaxandzuki-kulobye va hehleke Muxe ha xona, naswona hikwalaho ka yini a va nga fanelanga va swi endlile sweswo?

⁹ Leswi Kora a a ri ni vuswikoti byo kucetela vanhu, swi n’wi oloverile ku tikumela vanhu van’wana lava nga ni langutelo leri fanaka ni ra yena. Yena swin’we na Dathani na Abirama, va kume vanhu van’wana va 250 lava nga ni langutelo leri fanaka ni ra vona—vanhu lava hinkwavo a va ri tindhuna ta nhlengeletano. Hiloko va famba swin’we va ya eka Muxe na Aroni kutani va fika va ku: “Ntshungu hinkwawo ka wona wa kwetsima naswona Yehovha u le xikarhi ka wona. Kutani, ha yini mi titlakusa ehenhla ka nhlengeletano ya Yehovha?”—Tinhlayo 16:1-3.

¹⁰ Hi ku ya hi leswi vaxandzuki lava va swi tivaka, a va fanele va nga byi tlhontlhanga vulawuri bya Muxe. Phela a ku nga si hundza nkarhi wo leha ku sukela loko Aroni na Meriyamu va endle leswi fanaka. Phela, na vona va vule marito lama yelanaka ni ya Kora! Hi ku ya hi Tinhlayo 12:1, 2, va vutisile va ku: “Xana Yehovha u vulavule hi Muxe ntsena? Xana a nga vulavulanga na hina?” Kambe, Yehovha a a yingisile. U lerise Muxe, Aroni na Meriyamu leswaku va hlengeletana enyangweni wa tende ra nhlangano leswaku A ta va kombisa murhangeri loyi a hlawuriweke hi yena. Hiloko Yehovha a va byela hi ku kongoma a ku: “Loko ku tshame ku va ni muprofeta wa Yehovha eka n’wina, a ndzi ta titivisa eka yena hi xivono. A ndzi ta vulavula na yena enorhweni. A swi tano hi nandza wa mina Muxe! U tamerisiwe yindlu ya mina hinkwayo.” Endzhaku ka sweswo, Yehovha u be Meriyamu hi nhlokonho swa nkarhinyana.—Tinhlayo 12:4-7, 10.

11. Xana Muxe u hlangavetane njhani ni mhaka leyi khumbaka Kora?

¹¹ Handle ko kanakana, Kora swin’we ni vaxandzuki-kulobye a va yi tiva mhaka leyi. Va xandzuke hi vomu, va ri karhi va swi tiva. Hambiswiritano, Muxe u ringetile ku kombisana na vona. U va khutaze leswaku va tlangela malunghelo lawa va nyikiweke wona, a ku: “Xana i nchumu wutsongo eka n’wina leswi Xikwembu xa Israyele xi mi hambaniseke ni ntshungu wa Israyele leswaku xi mi nyikela eka xona?” Doo, a ku nga ri “nchumu wutsongo”! Loko ku ri Valevhi, a a va nyikiwe malunghelo lamakulu. Xana a va ha lava yini swo tlula sweswo? Marito lama landzelaka ya Muxe ma paluxa leswi a swi ri etimbilwini ta vona: “Xana na n’wina mi fanele mi kuma vuprista?” * (Tinhlayo 12:3; 16:9, 10) Kambe, xana Yehovha u titwise ku yini hi vaxandzuki lava, lava xandzukelaka vulawuri bya yena?

Muavanyisi Wa Israyele A Nghenelela

12. Xana a a ku laveka yini leswaku tiko ra Israyele ri ya emahlweni ri ri ni vuxaka lebyinene ni Xikwembu?

¹² Loko Yehovha a nyika Israyele Nawu, u byele vanhu leswaku loko vo n’wi yingisa, va ta va “tiko ro kwetsima” naswona tiko rero a ri ta tshama ri ri karhi ri kwetsima ntsena loko ri amukela lunghiselelo ra Yehovha. (Eksoda 19:5, 6) Leswi ku xandzuka ka vona se a ku tinyike matimba, a ku ri nkarhi wa leswaku Muavanyisi tlhelo Munyiki  wa nawu wa Israyele, a nghenelela! Muxe u byele Kora a ku: “Wena ni ntshungu hinkwawo wa wena, tanani emahlweni ka Yehovha, wena na vona na Aroni, mundzuku. Un’wana ni un’wana wa n’wina a a teke xo tamela ndzilo xakwe, mi chela murhi wa risuna ehenhla ka swona kutani un’wana ni un’wana a nyikela xo tamela ndzilo xakwe emahlweni ka Yehovha, swo tamela ndzilo swa 250, na wena na Aroni, un’wana ni un’wana a ri ni xo tamela ndzilo xakwe.”—Tinhlayo 16:16, 17.

13. (a) Ha yini a swi nga fanelanga leswaku vaxandzuki lava va hisela Yehovha murhi wa risuna? (b) Xana Yehovha u endle yini hi vaxandzuki lava?

¹³ Hi ku ya hi Nawu wa Xikwembu, i vaprista ntsena lava a va fanele va hisa murhi wa risuna. Mhaka ya leswaku Valevhi lava nga riki vaprista, va hisela Yehovha murhi wa risuna, a a yi fanele yi endle vaxandzuki volavo va tiehleketa kahle. (Eksoda 30:7; Tinhlayo 4:16) Kambe a swi vanga tano eka Kora ni vanghana va yena! Hi siku leri landzelaka a “endla leswaku ntshungu hinkwawo wu va pfukela [Muxe na Aroni] enyangweni ya ntsonga wa nhlangano.” Rungula ra kona ri ri: “Kutani Yehovha a byela Muxe na Aroni a ku: ‘Tihambaniseni mi suka exikarhi ka ntshungu lowu, leswaku ndzi wu lovisa hi xitshuketa.’” Kambe Muxe na Aroni va kombela leswaku vanhu lava va nga dlayiwi. Yehovha u amukele xikombelo xa vona. Loko ku ri Kora ni ntshungu wakwe, “ndzilo wu hum[e] eka Yehovha kutani wu herisa vavanuna lava va 250 lava a va nyikela murhi wa risuna.”—Tinhlayo 16:19-22, 35. *

14. Hikwalaho ka yini Yehovha a xupule nhlengeletano ya Israyele?

¹⁴ Lexi hlamarisaka, hambileswi Vaisrayele va voneke leswi Yehovha a swi endleke eka vaxandzuki lava, kambe a va dyondzanga nchumu. “Hi siku leri tlhandlamaka, ntshungu hinkwawo wa vana va Israyele wu sungula ku gungulela Muxe na Aroni wu ku: ‘N’wina mi dlaye vanhu va Yehovha.’” Vaisrayele a va yima ni vaxandzuki! Eku heteleleni, Yehovha a nga ha va lehiselanga mbilu. Sweswi ku hava ni un’we—hambi ku ri Muxe kumbe Aroni—la ta kombelela vanhu lava. Yehovha u be vanhu lava nga yingisiki hi ntungu naswona “lava va feke va dlayiwa hi ntungu a va ri 14 700, ku nga hlayiwi lava va feke hikwalaho ka Kora.”—Tinhlayo 16:41-49.

15. (a) Hi swihi swivangelo leswi a swi fanele swi endle leswaku Vaisrayele va nga kanakani ku amukela vurhangeri bya Muxe na Aroni? (b) Xana mhaka leyi yi ku dyondzise yini mayelana na Yehovha?

¹⁵ Vanhu lava hinkwavo a va ta va va swi papalatile ku lahlekeriwa hi vutomi bya vona. Loko a va tinyike nkarhi wa ku anakanyisisa hi mhaka leyi. A va fanele va tivutise swivutiso swo fana ni leswi: ‘I vamani lava yimeke emahlweni ka Faro va veka vutomi bya vona ekhombyeni? I vamani lava sindziseke leswaku Vaisrayele va ntshunxiwa? I mani loyi ku rhambiweke yena ntsena leswaku a tlhandlukela eNtshaveni ya Horebe endzhaku ka loko tiko ra Israyele ri ntshunxiwile, leswaku a ya vulavula ni ntsumi ya Xikwembu hi ku kongoma?’ Hakunene rhekhodo leyi xiyekaka ya Muxe na Aroni yi kombisa kahle leswaku a va tshembekile eka Yehovha naswona a va va rhandza vanhu. (Eksoda 10:28; 19:24; 24:12-15) Yehovha a a swi nga n’wi tsakisi ku dlaya vaxandzuki lava. Hambiswiritano, loko a swi vonile leswaku vanhu volavo va ta ya emahlweni va xandzuka, u va herisile. (Ezekiyele 33:11) Swilo leswi hinkwaswo i swa nkoka ngopfu eka hina. Hikwalaho ka yini?

Ku Vona Nkongomiso Lowu Nga Kona Namuntlha

16. (a) Hi byihi vumbhoni lebyi a byi fanele byi tiyisekise Vayuda va lembe-xidzana ro sungula leswaku Yesu a a ri muyimeri wa Yehovha? (b) Ha yini Yehovha a sive vaprista va Valevhi naswona u va sive hi vamani?

¹⁶ Namuntlha ku ni “tiko” lerintshwa leri Yehovha a nga Muavanyisi wa rona, Munyiki wa rona wa nawu ni Hosi ya rona leyi nga vonakiki. (Matewu 21:43) “Tiko” rero ri simekiwe hi lembe-xidzana ro sungula C.E. Hi nkarhi wolowo, tabernakela ya le sikwini ra Muxe yi siviwe hi tempele yo saseka ya le Yerusalema, leyi Valevhi va tlheleke va tirha eka yona. (Luka 1:5, 8, 9) Kambe, hi lembe ra 29 C.E., ku simekiwe tempele yin’wana, ku nga tempele ya moya, Yesu Kreste hi yena Muprista Lonkulu eka yona. (Vaheveru 9:9, 11) Ku tlhele ku  tlakuka mhaka leyi khumbaka vulawuri bya Xikwembu. I mani loyi Yehovha a nga ta n’wi tirhisa leswaku a rhangela “tiko” leri lerintshwa? Yesu hi yena a tshameke a tshembekile eka Xikwembu minkarhi hinkwayo. A a rhandza vanhu. U tlhele a endla masingita yo tala yo hlamarisa. Hambiswiritano, ku fana ni vakokwa wa vona lava omeke tinhloko, Valevhi vo tala a va n’wi amukelanga Yesu. (Matewu 26:63-68; Mintirho 4:5, 6, 18; 5:17) Eku heteleleni, Yehovha u sive vaprista va Valevhi hi vaprista van’wana lava hambaneke swinene na vona—ku nga vaprista lava nga tihosi. Vaprista volavo lava nga tihosi va ha ri kona ni namuntlha.

17. (a) Hi wihi ntlawa lowu vumbaka vaprista lava nga tihosi namuntlha? (b) Xana Yehovha u va tirhisa njhani vaprista lava nga tihosi?

¹⁷ I vamani vaprista volavo lava nga tihosi namuntlha? Muapostola Petro u hlamula xivutiso xexo eka papila ra yena ro sungula leri huhuteriweke. Loko Petro a tsalela swirho leswi totiweke leswi nga ta fuma na Kreste, u te: “N’wina mi ‘rixaka leri hlawuriweke, vaprista va vuhosi, tiko ro kwetsima, tiko leri nga nhundzu yo hlawuleka, leswaku mi byi twarisa hinkwako-nkwako vunene’ bya loyi a mi vitaneke mi huma emunyameni mi nghena eku vonakaleni kakwe loku hlamarisaka.” (1 Petro 2:9) Marito lawa ma swi veka erivaleni leswaku, valandzeri lava nga vatotiwa va Yesu, tanihi ntlawa, i “vaprista lava nga tihosi,” lava Petro a tlhelaka a va vitana “tiko ro kwetsima.” Hi vona Yehovha a va tirhisaka ku nyika vanhu va yena ndzayo ni nkongomiso hi tlhelo ra moya.—Matewu 24:45-47.

18. Xana vakulu lava vekiweke swin’we ni vaprista lava nga tihosi, va tirhisana hi ndlela yihi?

¹⁸ Vakulu lava vekiweke, lava nga ni vutihlamuleri emavandlheni ya vanhu va Yehovha emisaveni hinkwayo, va pfuna vaprista lava nga tihosi. Vavanuna lava hi fanele hi va xixima ni ku va seketela hi timbilu ta hina hinkwato, ku nga khathariseki leswaku i va totiwa kumbe e-e. Hikwalaho ka yini? Hikuva Yehovha u veke vakulu lava hi ku tirhisa moya wa yena lowo kwetsima. (Vaheveru 13:7, 17) Xana u swi endlisa ku yini?

19. Xana vakulu va vekiwa njhani hi moya lowo kwetsima?

¹⁹ Vavanuna lava va fikelela swilaveko leswi nga eRitweni ra Xikwembu, leri huhuteriweke hi moya wa Xikwembu. (1 Timotiya 3:1-7; Tito 1:5-9) Hi yona mhaka leyi ku vuriwaka leswaku va vekiwa hi moya lowo kwetsima. (Mintirho 20:28) Vavanuna lava kumbe vakulu, va fanele va ri tiva kahle Rito ra Xikwembu. Ku fana ni Muavanyisi la Tlakukeke loyi a va vekaka, vakulu na vona va fanele va venga ku avanyisa hi ku ya hi nghohe.—Deteronoma 10:17, 18.

20. I yini leswi u swi tlangelaka ngopfu eka vakulu lava tirhaka hi matimba?

²⁰ Ematshan’weni ya ku byi tekela ehansi vulawuri bya vona, hi fanele hi tlangela vakulu va hina lava tirhaka hi matimba! Nkarhi lowu va wu heteke va ri karhi va tirha hi ku tshembeka, wu endla leswaku hi va tshemba, van’wana va  vona va ni makume ya malembe va ri karhi va tirha. Va lunghiselela ni ku fambisa minhlangano ya vandlha hi ku tshembeka, va tirha na hina eka ntirho wo chumayela ‘mahungu lamanene ya Mfumo’ naswona va hi nyika ndzayo leyi humaka eMatsalweni loko swi fanerile. (Matewu 24:14; Vaheveru 10:23, 25; 1 Petro 5:2) Va hi endzela loko hi vabya va tlhela va hi chavelela loko hi ri ni gome. Va seketela swilaveko swa Mfumo hi ku tshembeka handle ka vutianakanyi. Moya va Yehovha wu na vona; wa va amukela.—Vagalatiya 5:22, 23.

21. I yini lexi vakulu va faneleke va xi tsundzuka minkarhi hinkwayo, naswona hikwalaho ka yini?

²¹ Ina, vakulu a va hetisekanga. Leswi va swi tivaka leswaku a va hetisekanga, a va wu tikiseli ntlhambi hikuva i “ndzhaka ya Xikwembu.” Ematshan’weni ya sweswo, va titeka va ri ‘vatirhi-kulobye leswaku vamakwavo va ta tsaka.’ (1 Petro 5:3; 2 Vakorinto 1:24) Vakulu lava titsongahataka ni lava tirhaka hi matimba, va n’wi rhandza Yehovha, naswona loko va n’wi tekelela swinene, va ta va mpfuno lowukulu evandlheni. Hi yona mhaka leyi, va hambetaka va hlakulela timfanelo letinene to tanihi rirhandzu, ntwela-vusiwana ni ku lehisa mbilu.

22. Xana ku pfuxeta mhaka ya Kora, swi ku pfune njhani leswaku u hambeta u tshemba nhlengeletano ya Yehovha leyi vonakaka?

²² Hi fanele hi tsaka swinene leswi Yehovha a nga Mufumi wa hina la nga vonakiki, Yesu Kreste a nga Muprista wa hina Lonkulu, leswi hi dyondzisiwaka hi swirho swa ntlawa wa vatotiwa lava nga vaprista ni leswi vakulu lava tshembekaka va Vakreste va nga vatsundzuxi va hina! Hambileswi yi nga riki kona nhlengeletano leyi kongomisiwaka hi munhu leyi nga vaka leyi hetisekeke, ha tsaka leswi hi tirhelaka Xikwembu swin’we ni vapfumeri-kulorhi vo tshembeka, lava titsongahataka ehansi ka vulawuri bya Xikwembu hi ntsako!

[Tinhlamuselo ta le hansi]

Xana U Dyondze Yini?

• Hi wahi malunghiselelo ya rirhandzu lawa Yehovha a ma endleke leswaku a khathalela Vaisrayele?

• Hikwalaho ka yini hi nga vulaka leswaku loko Kora a xandzukela Muxe na Aroni, a endla hi vomu?

• Xana hi dyondza yini eka leswi Yehovha a swi endleke eka vaxandzuki?

• Xana hi nga swi kombisa njhani leswaku ha ma tlangela malunghiselelo ya Yehovha namuntlha?

[Swivutiso Swa Dyondzo]

[Xifaniso lexi nga eka tluka 9]

Xana xiavelo xin’wana ni xin’wana xa ku tirhela Yehovha u xi teka xi ri lunghelo?

[Xifaniso lexi nga eka tluka 10]

“Kutani, ha yini mi titlakusa ehenhla ka nhlengeletano ya Yehovha?”

[Xifaniso lexi nga eka tluka 13]

Vakulu lava vekiweke va pfuna vaprista lava nga tihosi