‘Ndzi Landzeleni Nkarhi Hinkwawo’

“Mi vitaneriwe endleleni leyi, hikuva hambi Kreste u xanisekele n’wina, a mi siyela ntila leswaku mi landzelerisisa mikondzo yakwe.”—1 PETRO 2:21.

1, 2. Ha yini xikombiso xa Yesu lexi hetisekeke, xa ku va mudyondzisi, swi koteka ku xi tekelela?

YESU KRESTE a a ri Mudyondzisi lonkulu ku tlula vanhu hinkwavo lava nga tshama va hanya emisaveni. Ku tlula kwalaho, a a hetisekile, a nga dyohanga evuton’wini byakwe hinkwabyo loko a ha ri munhu wa nyama. (1 Petro 2:22) Xana sweswo swi vula leswaku xikombiso xa Yesu, tanihi mudyondzisi, a swi nge koteki leswaku hina vanhu lava nga hetisekangiki hi xi tekelela? A swi tano nikatsongo.

² Hilaha hi swi voneke hakona exihlokweni lexi hundzeke, Yesu a a dyondzisa hi ku susumetiwa hi rirhandzu. Naswona rirhandzu i nchumu lowu hinkwerhu ka hina hi nga wu hlakulelaka. Hakanyingi Rito ra Xikwembu ri hi khutaza leswaku hi hlakulela ku rhandza vanhu van’wana. (Vafilipiya 1:9; Vakolosa 3:14) Yehovha a nga langutelanga leswaku swivumbiwa swakwe swi endla swilo leswi swi nga swi kotiki. Entiyisweni, tanihi leswi ‘Xikwembu xi nga rirhandzu’ naswona xi hi endleke hi xifaniso xa xona, ku nga vuriwa leswaku xi hi endle leswaku hi kota ku kombisa rirhandzu. (1 Yohane 4:8; Genesa 1:27) Kutani loko hi hlaya marito ya muapostola Petro, lama nga eka tsalwa leri xihloko xa hina xi sekeriweke eka rona, hi fanele hi tiyiseka leswaku hi ta swi kota. Hi nga swi kota ku landzelerisisa minkondzo ya Kreste. Kahle-kahle hi nga swi kota ku yingisa xileriso xa Yesu lexi nge: ‘Ndzi landzeleni nkarhi hinkwawo.’ (Luka 9:23) A hi xiyeni leswaku hi nga ri tekelela njhani rirhandzu leri Kreste a ri kombiseke, eka tidyondzo leti a ti dyondziseke ni vanhu lava a va dyondziseke.

Ku Hlakulela Rirhandzu Ra Mintiyiso Leyi Hi Yi Dyondzaka

3. Ha yini van’wana swi va tikela ku dyondza, kambe hi xihi xikhutazo lexi kumekaka eka Swivuriso 2:1-5?

³ Leswaku hi rhandza mintiyiso leyi hi yi dyondzisaka van’wana, hi fanele hi swi rhandza ku dyondza mintiyiso yoleyo. Emisaveni ya namuntlha, swa tika ku hlakulela rirhandzu ro tano. Swilo swo tanihi ku nga dyondzeki ni ku ka munhu a nga swi tolovelanga ku hlaya ku sukela evutsongwaneni, swi endla vanhu va nga swi rhandzi  ku dyondza. Hambiswiritano, i swa nkoka leswaku hi dyondza eka Yehovha. Swivuriso 2:1-5 yi ri: “N’wananga, loko wo amukela marito ya mina naswona u teka swileriso swa mina swi ri ni ntikelo, leswaku u yingisa vutlhari hi ndleve ya wena, leswaku u voyamisela mbilu ya wena eku twisiseni; ku tlula kwalaho, loko u vitana ku twisisa naswona u nyikela rito ra wena eku twisiseni, loko u hambeta u ku lava kukota silivhere, naswona u ku lavisisa kukota xuma lexi fihliweke, hi ndlela yoleyo u ta twisisa ku chava Yehovha, u ta kuma vutivi bya Xikwembu.”

4. Swi vula yini ku “voyamisela” mbilu, naswona i langutelo rihi leri nga ta hi pfuna leswaku hi yi voyamisa?

⁴ Xiya leswaku eka ndzimana 1 ku ya eka 4, hi khutaziwa hi ku phindha-phindha leswaku hi endla matshalatshala ya ku ‘hambeta hi ku lava’ ni ku “ku lavisisa,” ku nga ri ku “amukela” ni ku “teka” ntsena. I yini lexi faneleke xi hi susumetela ku endla leswi hinkwaswo? Xiya xivulwa lexi nge, “voyamisela mbilu ya wena eku twisiseni.” Buku yin’wana yi vula leswaku xitsundzuxo lexi “a hi xikombelo xa leswaku u yingisa ntsena; kambe ku laveka nchumu wo karhi: ku nga ku tsakela swinene leswi u dyondzisiwaka swona.” Kutani ke, xana i yini lexi nga hi endlaka hi tsakela ni ku hitekela ku dyondza leswi Yehovha a hi dyondzisaka swona? I langutelo ra hina. Hi fanele hi teka “vutivi bya Xikwembu” byi ri lebyi fanaka ni “silivhere” ni “xuma lexi fihliweke.”

5, 6. (a) I yini lexi nga humelelaka hi ku famba ka nkarhi, naswona hi nga endla yini leswaku sweswo swi nga humeleli? (b) Ha yini hi fanele hi hambeta hi engetela xuma xa vutivi lebyi hi byi kumeke eBibeleni?

⁵ A swi tiki ku va ni langutelo rero. Hi xikombiso, “vutivi bya Xikwembu” lebyi u byi ngheniseke handle ko kanakana byi katsa ntiyiso wa leswaku xikongomelo xa Yehovha hi leswaku vanhu lava tshembekaka va hanya hilaha ku nga heriki eParadeyisini emisaveni. (Pisalema 37:28, 29) Loko u dyondza ntiyiso wolowo ro sungula, a swi kanakanisi leswaku a wu wu languta tanihi xuma xa nkoka, ku ri vutivi lebyi tataka mianakanyo ni mbilu ya wena hi ntshembo ni ntsako. Ku vuriwa yini sweswi? Hi ku famba ka nkarhi xana ku tlangela ka wena xuma xexo ku hungutekile? Kutani ke, ringeta ku endla swilo swimbirhi. Xo sungula, tlhela u pfuxeta ku tlangela ka wena, leswi vulaka leswaku u fanele u hambeta u titsundzuxa leswaku ha yini u tlangela ntiyiso wun’wana ni wun’wana lowu Yehovha a ku dyondziseke wona, hambi ku ri lowu u wu dyondzeke malembe yo tala lama hundzeke.

⁶ Xa vumbirhi, hambeta u engetela xuma xa wena. Loko swo endleka leswaku u cela u lava maribye ya risima, xana loko u kuma rin’we a wu to ri teka u tifambela? Kumbe a wu ta hambeta u cela u vona loko u ta kuma rin’wana? Rito ra Xikwembu ri lo mphaa, hi maribye ya risima yo hambana-hambana  kumbe ntiyiso. Ku nga khathariseki leswaku se u kume mangani, u nga ha tlhela u kuma man’wana. (Varhoma 11:33) Loko u ri karhi u kuma ribye ra risima kumbe ntiyiso, tivutise: ‘Xana i yini lexi ri endlaka ri va ra risima? Xana ri ndzi nyika vutlharhi lebyi enteke mayelana ni vumunhu bya Yehovha kumbe swikongomelo swa yena? Xana ri ndzi nyika nkongomiso lowu twisisekaka lowu nga ta ndzi pfuna ku landzela minkondzo ya Yesu?’ Ku anakanyisisa hi swivutiso leswi, swi ta ku pfuna leswaku u hlakulela ku rhandza mintiyiso leyi Yehovha a ku dyondziseke yona.

Ku Kombisa Leswaku Ha Yi Rhandza Mintiyiso Leyi Hi Yi Dyondzisaka

7, 8. Hi tihi tindlela tin’wana leti hi nga kombisaka van’wana ha tona leswaku ha yi rhandza mintiyiso leyi hi yi dyondzeke eBibeleni? Nyika xikombiso.

⁷ Loko hi ri karhi hi dyondzisa van’wana, xana hi nga swi kombisa njhani leswaku ha yi rhandza mintiyiso leyi hi yi dyondzeke eRitweni ra Xikwembu? Hi landzelela xikombiso xa Yesu hi ku yi tirhisa swinene Bibele loko hi chumayela ni loko hi dyondzisa. Eminkarhini ya sweswinyana, vanhu va Xikwembu emisaveni hinkwayo va khutaziwe ku tirhisa Bibele swinene ensin’wini. Loko u ri karhi u tirhisa xiringanyeto xexo, lava tindlela leti u nga endlaka n’wini wa muti a swi vona leswaku na wena wa swi rhandza leswi u n’wi hlayelaka swona eBibeleni.—Matewu 13:52.

⁸ Hi xikombiso, endzhakunyana ka nhlaselo wa vutherorisi eDorobeni ra New York, Mukreste un’wana wa xisati a a hlayela vanhu lava a vulavulaka na vona ensin’wini tsalwa ra Pisalema 46:1, 11. A a sungula hi ku va vutisa leswaku va titwa njhani hi khombo rero. A a rhiya ndleve loko va hlamula, a pfumelelana na vona, kutani a ku: “Xana ndzi nga ku hlayela tsalwa leri hakunene ri ndzi chaveleleke enkarhini lowu wa mangava?” Vo tala va n’wi pfumelerile, naswona u kote ku bula ni vanhu vo tala. Loko a bula ni vantshwa, makwerhu loyi, hakanyingi a a vula leswi: “Sweswi ndzi ni malembe ya 50 ndzi ri karhi ndzi dyondzisa Bibele, kambe a ndzi si tshama ndzi hlangana ni xiphiqo lexi buku leyi yi nga kotiki ku xi tlhantlha.” Loko hi hiseka swi humaka embilwini, hi kombisa vanhu leswaku ha swi rhandza leswi hi swi dyondzeke eRitweni ra Xikwembu naswona hi swi teka swi ri swa risima.—Pisalema 119:97, 105.

9, 10. Ha yini swi ri swa nkoka ku tirhisa Bibele loko hi hlamula swivutiso leswi khumbaka leswi hi swi pfumelaka?

 ⁹ Loko vanhu va hi vutisa mayelana ni tidyondzo ta hina, hi kuma nkarhi wa kahle wo va komba leswaku ha ri rhandza Rito ra Xikwembu. Leswi hi landzelaka xikombiso xa Yesu, a hi hlamuli hi mavonelo ya hina. (Swivuriso 3:5, 6) Ematshan’weni ya sweswo, hi tirhisa Bibele loko hi hlamula. Xana minkarhi yin’wana wa chava leswaku munhu a nga ha ku vutisa xivutiso lexi nga ku tsandzaka ku xi hlamula? Hi lawa magoza mambirhi lamanene lawa u nga ma tekaka.

¹⁰ Endla leswi u nga swi kotaka leswaku u tshama u lunghekile. Muapostola Petro u tsarile: “Kwetsimisani Kreste tanihi Hosi etimbilwini ta n’wina, nkarhi hinkwawo mi lunghekela ku tihlamulela emahlweni ka mani na mani la lavaka ku tiva hi ta ntshembo lowu mi nga na wona, kambe mi swi endla hi moya wo rhula ni xichavo lexi enteke.” (1 Petro 3:15) Xana u swi lunghekerile ku lwela leswi u swi pfumelaka? Hi xikombiso, loko un’wana a lava ku tiva leswaku ha yini u nga hlanganyeli eka mukhuva kumbe swiendlo swo karhi leswi nga pfumelelaniki ni Matsalwa, u nga tsakisiwi hi ku hlamula ntsena u ku, “A swi fambisani ni vukhongeri bya mina.” Nhlamulo yoleyo yi nga ha endla vanhu va anakanya leswaku u endleriwa swiboho hi vanhu van’wana naswona u fanele u ri xirho xa mpambukwa wo karhi. Swi nga antswa loko wo hlamula u ku, “Bibele ku nga Rito ra Xikwembu, a yi swi pfumeleli sweswo,” kumbe u ku, “Swi ta hlundzukisa Xikwembu xanga.” Kutani u hlamusela xivangelo xa kona kahle.—Varhoma 12:1.

11. Hi yihi buku leyi nga hi pfunaka leswaku hi tshama hi lunghekele ku hlamula swivutiso malunghana ni mintiyiso ya Rito ra Xikwembu?

¹¹ Loko u vona onge a wu lunghekanga, ha yini u nga tinyiki nkarhi wo hlaya buku leyi nge Ku Hlamulana Hi Matsalwa loko yi ri kona hi ririmi ra wena? * Hlawula swivutiso swi nga ri swingani leswi vanhu va talaka ku swi vutisa, kutani u nhlokohata Matsalwa yo karhi. Tshama u ri na buku leyi nge Ku Hlamulana swin’we ni Bibele ya wena. U nga kanakani ku swi tirhisa ha swimbirhi, u nga n’wi byela leswaku u na buku leyi u lavaka ku yi tirhisa leswaku u n’wi hlamula swivutiso swa yena hi ku tirhisa Bibele.

12. Xana hi nga hlamula njhani loko hi nga yi tivi nhlamulo ya xivutiso xa Bibele?

¹² Ringeta leswaku u nga karhateki ngopfu. Ku hava munhu la nga hetisekangiki, loyi a nga ni tinhlamulo hinkwato. Kutani ke, loko u vutisiwa xivutiso xa Bibele lexi ku tsandzaka ku xi hlamula, minkarhi hinkwayo u nga ha hlamula hi ndlela leyi: “U endle kahle u vutisa mhaka leyi, leyi tsakisaka. Ku vula ntiyiso, a ndzi na nhlamulo, kambe ndza tshemba leswaku nhlamulo yi kona eBibeleni. Ndza swi rhandza ku kambisisa timhaka ta Bibele, ndzi ta yi kambisisa mhaka ya wena kutani ndzi ta tlhela ndzi vuya ndzi ta ku hlamula.” Ku hlamula hi ndlela yoleyo yo tshembeka swi nga ha pfula ndlela ya leswaku mi tlhela mi bula enkarhini lowu taka.—Swivuriso 11:2.

Ku Rhandza Vanhu Lava Hi Va Dyondzisaka

13. Ha yini hi fanele hi va ni langutelo lerinene hi vanhu lava hi va chumayelaka?

¹³ Yesu a a va rhandza vanhu lava a va dyondzisaka. Xana hi nga n’wi tekelela njhani emhakeni  leyi? A hi fanelanga hi va helela mbilu vanhu lava hi hlanganaka na vona. Handle ko kanakana “nyimpi ya siku lerikulu ra Xikwembu xa Matimba Hinkwawo” yi kwala nyongeni, naswona magidi-gidi ya vanhu ma ta lovisiwa. (Nhlavutelo 16:14; Yeremiya 25:33) Kambe, a hi swi tivi leswaku i vamani lava nga ta pona ni leswaku i vamani lava nga ta lovisiwa. Nkarhi wo avanyisa a wu si fika naswona ku ta avanyisa loyi a vekiweke hi Yehovha, ku nga Yesu Kreste. Loko ku avanyisa ku nga si hundza, hi languta munhu un’wana ni un’wana a ri loyi a nga hundzukaka nandza wa Yehovha.—Matewu 19:24-26; 25:31-33; Mintirho 17:31.

14. (a) Hi nga tikambisisa njhani ku vona loko hi va twela-vusiwana vanhu? (b) Hi tihi tindlela leti ha tona hi nga ha kombisaka vanhu ntwela-vusiwana?

¹⁴ Ku fana na Yesu, hi lwela ku twela vanhu vusiwana. Hi nga tivutisa: ‘Xana ndzi va twela vusiwana vanhu lava kanganyisiweke hi mavunwa ya vukhongeri, ya politiki ni ya mabindzu ya misava leyi? Loko va vonaka va nga ri tsakeli rungula leri hi va byelaka rona, xana ndzi ringeta ku twisisa leswaku ha yini va titwa hi ndlela yoleyo? Xana ndza swi xiya leswaku mina, kumbe van’wana lava va tirhelaka Yehovha sweswi hi ku tshembeka, na vona va tshame va titwa hi ndlela leyi fanaka? Xana ndzi yi antswisile ndlela leyi ndzi chumayelaka ha yona? Kumbe xana ndzi tibyela leswaku vanhu lava a va nge he lunghi, va homboloke ngopfu?’ (Nhlavutelo 12:9) Loko vanhu va vona ntwela-vusiwana lowu hi nga na wona, va swi tsakela ku yingisela rungula ra hina. (1 Petro 3:8) Ntwela-vusiwana wu nga tlhela wu hi susumetela ku antswisa ndlela leyi hi va langutaka ha yona vanhu lava hi hlanganaka na vona ensin’wini. Hi nga ha tsala swivutiso swa vona ni leswi swi va karhataka. Loko hi tlhelela, hi nga ha va byela leswaku a hi ri karhi hi ehleketa hi leswi va swi vuleke enkarhini lowu nga hundza. Va byele leswaku loko va lava mpfuno wo karhi hi xihatla, hi tiyimiserile ku va pfuna.

15. Ha yini hi fanele hi languta leswinene eka vanhu, naswona hi nga swi endla njhani?

¹⁵ Ku fana na Yesu, hi languta leswinene eka vanhu. Kumbexana ku ni mutswari la nga yexe loyi a tikarhataka leswaku a kurisa vana vakwe hi ndlela leyinene. Kumbexana ku ni wanuna loyi a waka a pfuka a ringeta ku wundla ndyangu wakwe. Munhu la dyuhaleke la kombisaka ku tsakela timhaka ta swa moya. Xana ha ti xiya timfanelo teto eka vanhu lava hi hlanganaka na vona kutani hi va bumabumela? Loko hi endla tano, hi tiyisa vuxaka naswona hi pfula ndlela yo va chumayela hi Mfumo.—Mintirho 26:2, 3.

Ku Titsongahata I Ka Nkoka Eku Kombiseni Ka Rirhandzu

16. Ha yini swi ri swa koka ku va ni moya wo rhula ni ku xixima lava hi va chumayelaka?

¹⁶ Ku rhandza vanhu lava hi va dyondzisaka swi ta hi susumetela ku yingisa xitsundzuxo xa Bibele xa vutlhari lexi nge: “Vutivi bya tikukumuxa, kambe rirhandzu ra aka.” (1 Vakorinto 8:1) Yesu a a ri ni vutivi byo enta, kambe a a nga tikukumuxi. Kutani loko u ri karhi u vulavula hi leswi u swi pfumelaka, papalata moya wo phikizana ni van’wana kumbe ku tikukumuxa. Pakani ya hina i ku fikelela timbilu ta vanhu ni ku va kokela emintiyisweni leyi nga ya risima eka hina. (Vakolosa 4:6) Tsundzuka, loko Petro a tsundzuxa Vakreste leswaku va lunghekela ku tihlamulela, u tlhele a tsundzuxa leswaku hi fanele hi tihlamulela “hi moya wo rhula ni xichavo lexi enteke.” (1 Petro 3:15) Loko hi rhurile naswona hi ri ni xichavo, swi ta hi olovela ku kokela vanhu eka Xikwembu lexi hi xi tirhelaka.

17, 18. (a) Xana hi fanele hi titwa njhani loko vanhu va sola ku faneleka ka hina tanihi vatirheli? (b) Ha yini swi nga bohi leswaku swichudeni swa Bibele swi tiva tindzimi ta khale ta Bibele ?

¹⁷ A swi bohi leswaku hi bombisela vanhu vutivi kumbe dyondzo leyi hi nga na yona. Loko van’wana ensin’wini ya ka n’wina va ala ku yingisa mani na mani loyi a nga riki na tona tidigri kumbe swithopo swo karhi, u nga pfumeleli langutelo ra yena ri ku heta matimba. Yesu a nga vanga na mhaka na swona loko vanhu va vula leswaku a nga nghenaka swikolo swa le henhla swa varhabi swa le sikwini rakwe; naswona a nga ringetanga ku bombisela vanhu vutivi lebyikulu lebyi a a ri na byona hambileswi a va n’wi tekela ehansi.—Yohane 7:15.

¹⁸ Ku titsongahata ni rirhandzu i swa nkoka ngopfu eka vatirheli lava nga Vakreste ku tlula dyondzo yihi ni yihi ya misava. Yehovha, Mudyondzisi Lonkulu, u hi endla hi fanelekela vutirheli. (2 Vakorinto 3:5, 6) Ku nga khathariseki leswi vafundhisi va Vujagana va swi vulaka, a hi boheki ku dyondza tindzimi ta khale ta le minkarhini ya Bibele leswaku hi ta kota ku va vadyondzisi va Rito ra Xikwembu. Yehovha u huhutele leswaku Bibele yi  tsariwa hi ndlela leyi twisisekaka, hi marito yo olova lerova mintiyiso ya yona ya risima yi nga twisisiwa hi mani na mani. Mintiyiso yoleyo a yi cinci hambiloko yi hundzuluxeriwa yi ya eka tindzimi to tala. Kutani ke, a swi bohi, ku tiva tindzimi ta khale, hambileswi minkarhi yin’wana swi pfunaka. Ku tlula kwalaho, ku tibuma hi ku tiva tindzimi ku nga endla leswaku munhu a nga ha yi voni mfanelo leyi nga ya nkoka eka Vakreste va ntiyiso—ku nga ku dyondziseka.—1 Timotiya 6:4.

19. Ha yini hi nga vulaka leswaku loko hi endla ntirho wa hina wo chumayela wa Vukreste, hi tirhela van’wana?

¹⁹ A swi kanakanisi leswaku vutirheli bya hina bya Vukreste i ntirho lowu lavaka leswaku munhu a titsongahata. Nkarhi hinkwawo hi hlangana ni vakaneti, vanhu lava nga hi laviki ni lava va hi xanisaka. (Yohane 15:20) Kambe, hi endla kahle loko hi hambeta hi endla ntirho wa hina wa ku chumayela hi ku tshembeka. Loko hi hambeta hi tirhela van’wana hi ku titsongahata, hi va hi tekelela rirhandzu leri Yesu Kreste a ri kombiseke vanhu. Xiya leswi: Loko hi fanele hi chumayela magidi ya vanhu lava hi langutelaka ehansi kumbe lava hi kanetaka, kambe hi kuma munhu un’we la fanaka ni nyimpfu, xana hi ta va hi nga tirhanga? Hi ta va hi tirhile! Loko hi hambeta hi tirha, hi nga tshiki, hi va hi pfuna lava fanaka ni tinyimpfu lava hi nga si va fikelelaka. A swi kanakanisi leswaku Yehovha na Yesu va ta endla leswaku vanhu vo tala va risima vo fana ni volavo, va kumiwa ni ku pfuniwa makumu ma nga si fika.—Hagayi 2:7.

20. Hi tihi tindlela tin’wana leti hi nga dyondzisaka ha tona hi ku veka xikombiso lexinene?

²⁰ Ku dyondzisa hi ku vekela vanhu xikombiso lexinene i ndlela yin’wana yo kombisa leswaku ha swi tsakela ku pfuna van’wana. Hi xikombiso, hi lava ku dyondzisa vanhu leswaku ku tirhela Yehovha, “Xikwembu lexi tsakeke,” hi yona ndlela yo antswa evuton’wini. (1 Timotiya 1:11) Loko va vona ndlela leyi hi tikhomaka ha yona ni ndlela leyi hi hanyisanaka ha yona ni vaakelani va hina, ni lava hi nghenaka na vona xikolo ni lava hi tirhaka na vona, xana va nga swi vona leswaku hi tsakile ni leswaku hi enerisekile? Hilaha ku fanaka, hi dyondzisa swichudeni swa Bibele leswaku vandlha ra Vukreste i xihlovo xa rirhandzu emisaveni leyi yo biha, yo pfumala rirhandzu. Xana swichudeni swa hina swi nga swi vona hi ku olova leswaku hi rhandza vanhu hinkwavo evandlheni, nileswaku hi tirha hi matimba leswaku ku tshama ku ri ni ku rhula exikarhi ka hina ni van’wana?—1 Petro 4:8.

21, 22. (a) Ku kambisisa vutirheli bya hina swi nga hi pfuna leswaku hi nghenela ntirho wihi? (b) I yini leswi ku nga ta vulavuriwa ha swona eswihlokweni swa nkandziyiso lowu landzelaka wa Xihondzo xo Rindza?

²¹ Minkarhi yin’wana, ku rhandza vutirheli bya hina, swi nga hi susumetela ku tlhela hi tikambisisa. Loko vo tala va tikambisisa hi ku tshembeka, va kuma leswaku va nga swi kota ku ndlandlamuxa ntirho wa vona hi ku nghenela ntirho wa nkarhi hinkwawo kumbe hi ku rhurhela laha ku nga ni xilaveko lexikulu. Van’wana va kunguhate ku dyondza tindzimi timbe leswaku va ta dyondzisa vanhu lava rhurheleke ensin’wini ya ka vona. Loko malunghelo yo tano ma ku pfulekerile, ehleketa kahle ha wona u tlhela u khongela ha wona. Ku tirhela vanhu swi nyika munhu ntsako lowukulu, ku eneriseka ni ku rhula ka mianakanyo.—Eklesiasta 5:12.

²² Kutani ke, a hi hambeteni hi endla leswi nga ematimbeni ya hina leswaku hi tekelela Yesu Kreste hi ku hlakulela ku rhandza mintiyiso leyi hi yi dyondzisaka ni vanhu lava hi va dyondzisaka. Loko hi hlakulela ni ku kombisa rirhandzu etimhakeni leti timbirhi, swi ta hi pfuna leswaku hi simeka masungulo lamanene yo va vadyondzisi lava fanaka na Kreste. Kambe, i yini lexi hi nga xi endlaka leswaku hi aka ehenhla ka masungulo wolawo? Enkandziyisweni lowu landzelaka wa Xihondzo xo Rindza, swihloko leswi tlhandlamanaka swi ta vulavula hi tindlela tin’wana leti Yesu a ti tirhiseke loko a dyondzisa.

[Nhlamuselo ya le hansi]

A Wu Ta Hlamurisa Ku Yini?

• Hi xihi xitiyisekiso lexi hi nga na xona lexi kombisaka leswaku hi ta swi kota ku tekelela xikombiso xa Yesu la nga mudyondzisi?

• Hi nga swi kombisa njhani leswaku ha yi rhandza mintiyiso leyi hi yi dyondzeke eBibeleni?

• Ha yini swi ri swa nkoka ku tshama hi tshembekile loko vutivi bya hina byi ri karhi byi engeteleka?

• Hi tihi tindlela tin’wana leti ha tona hi nga kombisaka rirhandzu eka vanhu lava hi va dyondzisaka?

[Swivutiso Swa Dyondzo]

[Swifaniso leswi nga eka tluka 16]

Endla leswi u nga swi kotaka leswaku u tshama u lunghekile

[Swifaniso leswi nga eka tluka 17]

Loko u byi teka byi ri bya risima “vutivi bya Xikwembu,” u nga tirhisa Bibele hilaha ku humelelaka

[Xifaniso lexi nga eka tluka 18]

Hi kombisa vanhu leswaku ha va rhandza hi ku va byela mahungu lamanene