“Ndzi Mi Vekele Ntila”

‘Mi fanele ku va vadyondzisi hikwalaho ka nkarhi.’—VAHEVERU 5:12.

1. Ha yini marito ya Vaheveru 5:12 ma nga ha endlaka Mukreste a karhateka?

LOKO u ri karhi u hlaya marito lama huhuteriweke ya ndzimana leyi, leyi xihloko lexi xi sekeriweke eka yona, xana wa karhateka? Loko swi ri tano, a hi wena ntsena. Leswi hi nga valandzeri va Kreste, ha swi tiva leswaku hi fanele hi va vadyondzisi. (Matewu 28:19, 20) Ha swi tiva leswaku enkarhini lowu hi hanyaka eka wona i swa xihatla leswaku hi dyondzisa hi vutshila. Naswona ha swi tiva leswaku leswi hi swi dyondzisaka swi nga vula vutomi kumbe rifu eka lava hi va dyondzisaka! (1 Timotiya 4:16) Xisweswo hi nga ha tivutisa: ‘Xana ndzi dyondzisa hi ndlela leyi faneleke hakunene? Ndzi nga antswisa njhani?’

2, 3. (a) Hi ku ya hi mudyondzisi un’wana, i yini lexi nga xa nkoka eku dyondziseni? (b) Hi wihi ntila lowu Yesu a hi vekeleke wona emhakeni ya ku dyondzisa?

² Ku karhateka ko tano a ku fanelanga ku hi heta matimba. Loko ho anakanya leswaku hi nga va vadyondzisi ntsena loko hi ri ni vutshila byo karhi byo hlawuleka, sweswo swi nga ha hi heta matimba. Hambiswiritano, mhaka leyikulu eku dyondziseni a hi ku va ni vutshila byo hlawuleka, kambe i ku va ni nchumu wun’wana wa nkoka swinene. Xiya leswi mudyondzisi un’wana la nga ni ntokoto a swi tsaleke ebukwini mayelana ni mhaka leyi: “Leswaku munhu a va mudyondzisi lonene a swi kali swi lava leswaku a va ni vutshila byo hlawuleka. . . . Nchumu lowukulu eku dyondziseni i rirhandzu.” Kambe, yena a a tivulavulela ntsena tanihi mudyondzisi wa vana exikolweni. Nilokoswiritano, yinhla yakwe yi nga ha tirha swinene eka ndlela leyi hi dyondzisaka ha yona tanihi Vakreste. Njhani?

³ A ku na mudyondzisi un’wana la nga Xikombiso lexinene eka hina handle ka Yesu Kreste loyi a byeleke valandzeri vakwe a ku: “Ndzi mi vekele ntila.” (Yohane 13:15) A a vulavula hi xikombiso xa yena lexinene xa ku titsongahata, kambe ntila lowu Yesu a hi vekeleke wona a wu katsa ntirho wa nkoka swinene lowu a wu endleke loko a ha ri emisaveni—ku nga ntirho wa ku dyondzisa vanhu mahungu lamanene ya Mfumo wa Xikwembu. (Luka 4:43) Emhakeni leyi, loko a wu fanele u hlawula rito rin’we ro hlamusela vutirheli bya Yesu, swi le rivaleni leswaku a wu ta hlawula rito leri nge “rirhandzu,” a swi tano ke? (Vakolosa 1:15; 1 Yohane 4:8) Yesu a a n’wi rhandza swinene Yehovha, Tata wakwe wa le tilweni. (Yohane 14:31) Kambe, eku dyondziseni ka yena, Yesu u kombise rirhandzu ni hi tindlela tin’wana timbirhi. A a rhandza ntiyiso lowu a wu dyondzisaka swin’we ni vanhu lava a va dyondzisaka wona. A hi kambisiseni tindlela leti timbirhi, leti a hi vekeleke xikombiso ha tona.

Ku Rhandza Tidyondzo Ta Xikwembu Hi Masiku

4. Swi te njhani leswaku Yesu a rhandza dyondzo ya Yehovha?

⁴ Ndlela leyi mudyondzisi a titwaka ha yona hi leswi a swi dyondzisaka, yi tikomba hi madyondziselo yakwe. Loko a nga swi rhandzi leswi a swi dyondzisaka u ta vonaka naswona lava a va dyondzisaka na vona a va nge swi rhandzi. Yesu a a ti rhandza tidyondzo leti a a ti dyondzisa mayelana na  Yehovha ni Mfumo wa Yena. Yesu a a swi rhandza swinene leswi a a swi dyondzisa. Rirhandzu leri ri sungule loko a ha dyondzisiwa. Ku sukela khale a nga si va munhu wa nyama, N’wana la nga yexe a a hitekela ku dyondza. Esaya 50:4, 5 yi ni marito lawa lama fanelaka: “Yehovha, Hosi leyi Lawulaka u ndzi nyike ririmi ra lava dyondzisiweke, leswaku ndzi tiva ku angula loyi a karhaleke. Mixo wun’wana ni wun’wana wa pfuka; u pfuxa ndleve ya mina leswaku yi twa ku fana ni lava dyondzisiweke. Yehovha, Hosi leyi Lawulaka u pfule ndleve ya mina, kutani loko ku ri mina, a ndzi xandzukanga. A ndzi hundzulukelanga eka tlhelo lerin’wana.”

5, 6. (a) Hi wihi nchumu lowu nga ha vaka wu humelele Yesu loko a khuvuriwa, naswona sweswo swi n’wi khumbe njhani? (b) Hi kwihi ku hambana loku hi ku vonaka eka ndlela leyi Yesu na Sathana va ri tirhiseke ha yona Rito ra Xikwembu?

⁵ Loko Yesu a ri karhi a kula laha misaveni, u hambete a rhandza vutlhari bya Xikwembu. (Luka 2:52) Kutani, loko a khuvuriwa, u humeleriwe hi nchumu wo hlamarisa. Luka 3:21 yi ri: “Tilo ri pfuleka.” Swi le rivaleni leswaku Yesu u sungule ku tsundzuka vutomi bya yena a nga si va munhu wa nyama. Endzhaku ka sweswo u hete masiku ya 40 a nga dyi nchumu emananga. U fanele a tiphine ngopfu hi ku anakanyisisa hi swilo swo tala leswi a nga tshama a dyondzisiwa swona etilweni hi Yehovha. Kambe ku nga ri khale, rirhandzu rakwe ro rhandza tidyondzo ta Xikwembu ri ringiwile.

⁶ Loko Yesu a karhele naswona a khomiwe hi ndlala, Sathana u lave tindlela ta ku n’wi ringa. Wa nga vona ku hambana loku nga kona exikarhi ka vana lava vambirhi va Xikwembu! Havambirhi a va tshaha eka Matsalwa ya Xiheveru—kambe langutelo ra vona a ri nga fani nikatsongo. Sathana u soholote Rito ra Xikwembu, hi ku delela a ri tirhisela ku hetisisa swikongomelo swakwe swa vutianakanyi. Hakunene, muxandzuki yoloye a a tivenga tidyondzo ta Xikwembu. Hi hala tlhelo, Yesu u ma tshahe kahle Matsalwa a tirhisa Rito ra Xikwembu hi vukheta eka nhlamulo yin’wana ni yin’wana ya yena. Yesu a a ri kona, marito wolawo lama huhuteriweke ma nga si tsariwa, kambe a a ma xixima swinene. A ma ri tidyondzo ta risima leti humaka eka Tata wakwe wa le tilweni! U byele Sathana leswaku marito wolawo lama humaka eka Yehovha a ma ri ya nkoka ngopfu ku tlula swakudya. (Matewu 4:1-11) Ina, Yesu a a rhandza tidyondzo hinkwato leti Yehovha a n’wi dyondziseke tona. Kambe xana u swi kombise njhani leswaku wa ti rhandza tidyondzo leti loko a ri karhi a dyondzisa?

A A Rhandza Tidyondzo Leti A Ti Dyondzisaka

7. Ha yini Yesu a papalate ku tisungulela tidyondzo ta yena n’wini?

⁷ Ndlela leyi Yesu a a ti rhandza ha yona tidyondzo leti a ti dyondzisaka a yi ri erivaleni minkarhi hinkwayo. Phela, a swi nga ta n’wi tsandza ku tisungulela tidyondzo ta yena n’wini. A a ri ni vutivi byo enta ni vutlhari. (Vakolosa 2:3) Nilokoswiritano, u tsundzuxe vayingiseri va yena hi ku phindha-phindha leswaku hinkwaswo leswi a swi dyondzisaka a swi nga humi eka yena kambe a swi huma eka Tatana wakwe wa le tilweni. (Yohane 7:16; 8:28; 12:49; 14:10) A a ti rhandza ngopfu tidyondzo ta Xikwembu lerova a nga ta ti siva hi leswi a swi ri emiehleketweni yakwe.

8. Loko a sungula vutirheli byakwe, xana Yesu u wu veke njhani ntila wo titshega hi Rito ra Xikwembu?

⁸ Loko Yesu a sungula ntirho wa yena wo chumayela, a nga hlwelanga ku veka ntila. Xiya ndlela leyi a yi tirhiseke ku byela vanhu va Xikwembu leswaku a a ri Mesiya la tshembisiweke. Xana u lo swi pfuketana a humelela emahlweni ka mintshungu, a tivula leswaku hi yena Kreste, kutani a sungula ku endla masingita leswaku vanhu va n’wi vona? Doo! U ye esinagogeni, laha hi ntolovelo Matsalwa a ma hlayiwa kona hi vanhu va Xikwembu. Loko a ri kwalaho u hlaye vuprofeta bya Esaya 61:1, 2 hi rito leri tlakukeke kutani a hlamusela leswaku leswi vuprofeta lebyi byi vulavulaka ha swona swi hetiseka eka yena. (Luka 4:16-22) Masingita yo tala lawa a ma endleke ma kombise leswaku hakunene a a seketeriwa hi Yehovha. Hambiswiritano, minkarhi hinkwayo a a titshega hi Rito ra Xikwembu loko a dyondzisa.

9. Loko a vulavula ni Vafarisi, xana Yesu u ri kombise njhani rirhandzu rakwe ro tshembeka eka Rito ra Xikwembu?

⁹ Loko Yesu a kanetiwa hi varhangeri va vukhongeri, a nga phikizananga na vona, hambileswi a a ta va a va hlurile loko a a lo hlamulana na vona. Ematshan’weni ya sweswo, u tshike Rito ra Xikwembu ku va rona ri va kanetaka. Hi xikombiso, tsundzuka nkarhi lowu Vafarisi va nga hehla valandzeri va Yesu, va vula leswaku va tlule nawu wa Savata hi ku kha swichocho va dya loko va ri karhi va tsemakanya masimu. Yesu u va hlamule a ku: “Xana a  mi hlayanga leswi Davhida a nga swi endla loko yena ni vavanuna lava a va ri na yena va khomiwa hi ndlala?” (Matewu 12:1-5) Ina, vavanuna volavo lava nga tiendlaka valulami, swi nga ha endleka a va ri hlayile rungula leri huhuteriweke, leri nga eka 1 Samuwele 21:1-6. Loko swi ri tano, a va nga yi twisisanga dyondzo ya nkoka ya tsalwa rero. Hambiswiritano, Yesu a nga hlayanga mhaka yoleyo swi helela kwalaho. U anakanye ha yona kutani a yi tirhisa. A a rhandza misinya ya milawu leyi Yehovha a a yi dyondzisa hi ku tirhisa tsalwa rero. Kutani u tirhise mhaka yoleyo swin’we ni xikombiso lexi humaka eka Nawu wa Muxe, leswaku a kombisa ndlela leyi Nawu wolowo wu tirhaka ha yona. Hilaha ku fanaka, rirhandzu ra Yesu ro tshembeka ri n’wi susumetele ku lwela Rito ra Xikwembu loko varhangeri va vukhongeri va ringeta ku ri soholota leswaku ri pfumelelana ni mianakanyo ya vona kumbe ku ri mphimphela hi mikhuva ya vanhu.

10. Yesu u byi hetisise njhani vuprofeta hi ndlela leyi a a dyondzisa ha yona?

¹⁰ Ndlela leyi Yesu a swi rhandza ha yona leswi a swi dyondzisaka, a yi nga ta n’wi pfumelela leswaku a dyondzisa hi ndlela leyi phirhaka onge hiloko a lo nhlokohata dyondzo ya kona. Vuprofeta lebyi huhuteriweke byi vula leswaku Mesiya a a ta vulavula hi ‘vuxongi emilon’wini yakwe,’ a tirhisa “marito yo xonga.” (Pisalema 45:2; Genesa 49:21) Yesu u hetisise vuprofeta byebyo hi ku endla leswaku rungula ra yena ri tshama ri ri karhi ri tsakisa naswona ri hanya. Phela, a a tirhisa “marito lamanene” loko a ri karhi a dyondzisa tidyondzo leti a ti rhandza ngopfu. (Luka 4:22) A swi kanakanisi leswaku ku hiseka ka yena a ku vonaka enghoheni yakwe, naswona a swi tikomba ematihlweni ya yena leswaku wa swi rhandza leswi a swi dyondzisaka. Handle ko kanakana a swi tsakisa ku n’wi yingisa, naswona wa nga vona ntila lowunene swonghasi lowu hi nga wu landzelaka loko hi vulavula ni van’wana hi leswi hi swi dyondzeke!

11. Ha yini vuswikoti bya Yesu bya ku dyondzisa byi nga n’wi endlanga leswaku a tikukumuxa?

¹¹ Ndlela leyi Yesu a a twisisa tidyondzo ta Xikwembu ha yona swin’we ni mavulavulelo ya yena lama tsakisaka, xana swi n’wi endle leswaku a tikukumuxa? Hakanyingi vadyondzisi lava nga vanhu va tikukumuxa. Kambe, tsundzuka leswaku vutlhari bya Yesu a byi fambisana ni ku chava Xikwembu. Vutlhari byo tano a byi endli leswaku munhu a tikukumuxa, hikuva “vutlhari byi ni lava va titsongahataka.” (Swivuriso 11:2) A a ku ri ni swin’wana leswi a swi endla leswaku Yesu a nga tikukumuxi kumbe ku tikurisa.

Yesu A A Rhandza Vanhu Lava A Va Dyondzisaka

12. Yesu u swi kombise njhani leswaku a a nga lavi leswaku valandzeri va yena va n’wi chava ku tlula mpimo?

¹² Ndlela leyi Yesu a a dyondzisa ha yona, minkarhi hinkwayo a yi kombisa leswaku wa va rhandza swinene vanhu. Ndlela leyi a a dyondzisa ha yona a yi nga endli leswaku vanhu va titwa va nga ri nchumu, hilaha vanhu lava tikukumuxaka va endlaka ha kona. (Eklesiasta 8:9) Endzhaku ko vona singita rin’wana ra Yesu, Petro u hlamale swinene lerova a wela emilengeni ya Yesu. Kambe Yesu a a nga lavi leswaku valandzeri va yena va n’wi chava ku tlula mpimo. Hi musa u byele Petro a ku, “Tshika ku chava,” kutani a n’wi byela hi ntirho wo tsakisa wa ku endla vadyondzisiwa lowu Petro a a fanele a wu endla. (Luka 5:8-10) Yesu a a lava leswaku rirhandzu ra vadyondzisiwa vakwe ku va rona ri va susumetelaka ku rhandza tidyondzo ta risima ta Xikwembu, ku nga ri hi ku chava mudyondzisi wa vona.

13, 14. Yesu u wu kombise hi tindlela tihi ntwela-vusiwana eka vanhu?

¹³ Rirhandzu leri Yesu a a ri na rona eka vanhu lava a va dyondzisaka nakambe a ri vonaka hi ndlela leyi a a va twela vusiwana ha yona. “Loko a vona  mintshungu a yi twela vusiwana, hikuva a yi vavisiwile ni ku tsalangana ku fana ni tinyimpfu leti nga riki na murisi.” (Matewu 9:36) A a va twela vusiwana hikwalaho ka xiyimo xa vona lexi hlomulaka mbilu, naswona sweswo swi n’wi susumetele leswaku a va pfuna.

¹⁴ Xiya ntwela-vusiwana wa Yesu eka xiendlakalo xin’wana. Loko wansati loyi a a ri na vuvabyi byo khuluka ngati a manyukute exikarhi ka ntshungu a ya khumba madziva ya nguvu yakwe, u hanyisiwile hi singita. Yesu u twe leswaku matimba ya yena ma humile, kambe a a nga swi voni leswaku i mani loyi a hanyisiweke. Hiloko a hlotana ni wansati loyi. Ha yini? A nga n’wi laveli ku n’wi holovela hikwalaho ko tlula Nawu kumbe milawu ya vatsari ni Vafarisi, ku nga leswi wansati loyi a a chava swona. Ematshan’weni ya sweswo, u te: “N’wananga, ripfumelo ra wena ri ku hanyisile. Famba hi ku rhula, naswona u hanya swinene evuvabyini bya wena bya khombo.” (Marka 5:25-34) Xiya ntwela-vusiwana lowu nga kona eka marito lawa. A nga lo vula ntsena leswaku, “Hanyisiwa.” Ku ri na sweswo, u te: “Hanya swinene evuvabyini bya wena bya khombo.” Laha Marka u tirhisa rito leri hi ku kongoma ri vulaka “ku xupula,” leri vulaka ku ba munhu leswaku u n’wi khawurisa. Xisweswo, marito ya Yesu ma kombisa leswaku vuvabyi bya wansati loyi byi n’wi xanisile, kumbexana byi n’wi twise ku vava enyameni ni le mintlhavekweni. A a n’wi twela-vusiwana.

15, 16. Hi swihi swiendlakalo swa vutirheli bya Yesu leswi kombisaka leswaku a a languta leswi nga swinene eka vanhu?

¹⁵ Yesu u tlhele a kombisa vanhu rirhandzu, hi ku languta timfanelo letinene eka vona. Xiya leswi endlekeke loko a hlangane na Nataniyele, loyi endzhakunyana a nga va muapostola. “Yesu a vona Nataniyele a ta eka yena kutani a vula leswi malunghana na yena: ‘Vonani, i Muisrayele hakunene, loyi a nga riki na vuxisi.’” Hi singita, Yesu u langute mbilu ya Nataniyele, kutani a dyondza swo tala hi yena. Ina, Nataniyele a a nga hetisekanga nikatsongo. A ri ni swihoxo swa yena, ku fana na hina hinkwerhu. Kahle-kahle, loko a twa hi ta Yesu, u monyile a ku: “Xana ku nga huma nchumu lowunene eNazareta?” (Yohane 1:45-51) Hambiswiritano, eka swilo hinkwaswo leswi nga vuriwaka mayelana na Nataniyele, Yesu u hlawule ku vulavula hi leswinene swa kona, ku nga ku tshembeka ka yena.

¹⁶ Hilaha ku fanaka, loko ndhuna ya vuthu—kumbexana leyi nga munhu wa Matiko, Murhoma—yi te eka Yesu yi n’wi kombela leswaku a hanyisa hlonga ra yona leri vabyaka, Yesu a a swi tiva leswaku ndhuna yoleyo na yona a yi ri ni swihoxo. Ndhuna ya vuthu ya le minkarhini yoleyo handle ko kanakana yi fanele yi tshame hi khoma vanhu hi tihanyi, yi dlaya vanhu ni ku katseka eka vugandzeri bya mavunwa. Kambe Yesu u langute leswinene ntsena—ku nga ripfumelo lerikulu ra ndhuna yoleyo. (Matewu 8:5-13) Endzhakunyana, loko Yesu a vulavula ni mudyohi loyi a a hayekiwe emhandzini ya nxaniso etlhelo ka yena, Yesu a nga n’wi holovelanga hikwalaho ka swidyoho swa yena leswi a swi endleke kambe u lo n’wi khutaza hi ku n’wi nyika ntshembo. (Luka 23:43) Yesu a a swi tiva kahle leswaku ku sola van’wana swi nga va heta matimba. A swi kanakanisi leswaku matshalatshala ya yena yo kuma leswi nga swinene eka van’wana, ya khutaze vo tala leswaku va antswisa vutomi bya vona.

A A Tsakela Ku Pfuna Vanhu

17, 18. Loko a amukela xiavelo xo ta laha misaveni, xana Yesu u swi kombise njhani leswaku wa swi rhandza ku tirhela van’wana?

¹⁷ Vumbhoni byin’wana lebyikulu bya leswaku Yesu a a rhandza vanhu lava a va dyondzisaka, a ku ri leswi a a tsakela ku va pfuna. Niloko a nga si va munhu wa nyama, N’wana wa Xikwembu a a va rhandza vanhu. (Swivuriso 8:30, 31) Leswi a a ri “Rito” ra Yehovha kumbe muvulavuleri wa yena, swi nga ha endleka a pfune vanhu hi tindlela to  tala. (Yohane 1:1) Hambiswiritano, leswaku a dyondzisa vanhu hi ku kongoma, “u tichulurile kutani a teka xivumbeko xa hlonga,” a siya xikhundlha xakwe lexi tlakukeke etilweni. (Vafilipiya 2:7; 2 Vakorinto 8:9) Loko a ri laha misaveni, Yesu a a nga langutelanga ku tirheriwa. Ematshan’weni ya sweswo u te: “N’wana wa munhu a nga [telanga] ku tirheriwa, kambe a [tele] ku tirhela ni ku nyikela moya-xiviri wakwe wu va nkutsulo wa lavo tala.” (Matewu 20:28) Yesu u hanye hi ku pfumelelana ni marito wolawo.

¹⁸ Yesu u titsongahatile a khathalela swilaveko swa vanhu lava a va dyondzisaka, a va tirhela a nga vileli. U fambe mimpfhuka yo leha swinene, a rhendzeleka eTikweni leri Tshembisiweke, leswaku a fikelela vanhu vo tala hi laha a ta kota hakona a va chumayela. Ku hambana ni Vafarisi ni vatsari lava tikukumuxaka, yena a a titsongahata minkarhi hinkwayo naswona a a tshineleleka. Vanhu va mixaka hinkwayo—vachaviseki, masocha, magqweta, vavasati, vana, swisiwana, vavabyi hambi ku ri vanhu lava nyenyiwaka—va n’wi tshinelerile, va nga chavi nchumu. Hambileswi Yesu a a ri munhu la hetisekeke, a a karhala ni ku khomiwa hi ndlala. Hambiloko a karhele, a lava ku wisa kumbe nkarhi wo khongela, a a rhangisa swilaveko swa van’wana.—Marka 1:35-39.

19. Yesu u wu veke njhani ntila wo titsongahata, wo lehisa mbilu ni wa ku kombisa musa eka vadyondzisiwa vakwe?

¹⁹ Yesu a a swi tsakela ku tirhela vadyondzisiwa vakwe. Sweswo u swi endle hi ku va dyondzisa hi musa ni ku va lehisela mbilu. Loko va hlwela ku twisisa tidyondzo tin’wana ta nkoka leti a va dyondzisaka tona, a nga va helelanga mbilu, a va hlundzukela kumbe a va holovela. U hambete a lava tindlela tin’wana ta ku va pfuna leswaku va twisisa leswi a va dyondzisaka swona. Hi xikombiso, wa nga ehleketa leswaku i kangani vadyondzisiwa va ri karhi va phikizana hi leswaku i mani lonkulu exikarhi ka vona. Hi ku phindha-phindha ku fikela eka vusiku lebyi a nga fa ha byona, Yesu u kume tindlela tintshwa ta ku va dyondzisa leswaku va xiximana. Emhakeni leyi ya ku titsongahata, ni le ka timhaka tin’wana hinkwato, Yesu u swi kotile ku vula a ku: “Ndzi mi vekele ntila.”—Yohane 13:5-15; Matewu 20:25; Marka 9:34-37.

20. Hi yihi ndlela yo dyondzisa leyi a yi endla Yesu a nga fani ni Vafarisi, naswona ha yini ndlela yoleyo a yi tirha?

²⁰ Xiya leswaku Yesu a nga lo byela vadyondzisiwa vakwe ntsena leswaku ntila i yini; kambe u va “vekele ntila.” U va dyondzise hi ku va vekela xikombiso lexinene. A nga vulavulanga na vona hi ndlela yo va kombisa leswaku wa va tlula, onge hiloko yena swi nga n’wi faneli ku endla swilo leswi a a va byela swona. Leswi hi leswi Vafarisi a va endlisa swona. Yesu u vule leswi mayelana na vona, “va vula, kambe a va endli.” (Matewu 23:3) Hi ku titsongahata Yesu u kombise vadyondzisiwa va yena leswi tidyondzo ta yena a ti vula swona, hi ku hanya hi ku pfumelelana na tona, a ti tirhisa evuton’wini bya yena. Kutani loko a khutaza valandzeri vakwe ku hanya vutomi byo olova, va nga hlongorisi swilo leswi vonakaka, a swi kalanga swi lava va mbambela leswaku a a vula yini. A a va vona ntiyiso wa marito yakwe lama nge: “Timhungubye ti ni micele ni tinyenyana ta tilo ti ni byetlelo, kambe N’wana wa munhu a nga na ndhawu yo veka nhloko yakwe.” (Matewu 8:20) Yesu u tirhele vadyondzisiwa vakwe hi ku va vekela ntila hi ku titsongahata.

21. I yini leswi ku nga ta buriwa ha swona exihlokweni lexi landzelaka?

²¹ Swi le rivaleni leswaku Yesu a a ri Mudyondzisi lonkulu ku tlula hinkwavo lava nga tshama va hanya emisaveni! Rirhandzu leri a a ri na rona hi leswi a swi dyondzisaka swin’we ni vanhu lava a va dyondzisaka, a ri voniwa hi vanhu hinkwavo va timbilu letinene, lava va n’wi voneke va tlhela va n’wi twa loko a vulavula. Rirhandzu ra yena ra vonaka ni namuntlha eka hina lava hi dyondzaka ntila lowu a wu vekeke. Kambe, xana hi nga xi landzela njhani xikombiso lexinene xa Kreste lexi hetisekeke? Xihloko lexi landzelaka xi ta hlamula xivutiso lexi.

U Nga Hlamurisa Ku Yini?

• Hi yihi mhaka-nkulu eku dyondziseni lokunene, naswona i mani loyi a hi vekeleke xikombiso lexinene?

• Xana Yesu u swi kombise njhani leswaku a a rhandza tidyondzo leti a a ti dyondzisa?

• Yesu u ri kombise njhani rirhandzu eka vanhu lava a a va dyondzisa?

• Hi swihi swikombiso leswi kombisaka leswaku Yesu a a swi rhandza ku pfuna lava a va dyondzisaka?

[Swivutiso Swa Dyondzo]

[Xifaniso lexi nga eka tluka 12]

Yesu u swi kombise njhani leswaku a a yi rhandza misinya ya milawu leyi nga eRitweni ra Xikwembu?