Swivutiso Swa Vahlayi

Hi wihi nkongomiso lowu Matsalwa ma wu nyikelaka malunghana ni ku dyondzisa vana loko mutswari un’we a ri Mbhoni ya Yehovha naswona loyi un’wana a nga ri yona?

Misinya mimbirhi ya milawu ya Matsalwa yi nyika nkongomiso wo dyondzisa n’wana eka mutswari loyi a nga Mbhoni loyi munghana wakwe wa vukati a nga riki Mbhoni. Wun’wana wu ri: “Hi fanele ku yingisa Xikwembu tanihi mufumi ku tlula vanhu.” (Mintirho 5:29) Kasi lowun’wana wu ri: “Wanuna i nhloko ya nsati wakwe tanihi leswi Kreste na yena a nga nhloko ya vandlha.” (Vaefesa 5:23) Lowo hetelelela a wu tirhi ntsena eka vavasati lava nga ni vavanuna lava nga Timbhoni kambe wu tirha ni le ka lava vavanuna va vona va nga riki Timbhoni. (1 Petro 3:1) Xana mutswari loyi a nga Mbhoni a nga yi ringanisela hi ndlela yihi misinya leyi ya milawu loko a dyondzisa vana vakwe?

Loko wanuna a ri Mbhoni ya Yehovha, u ni vutihlamuleri byo khathalela swilaveko swa moya ni swa nyama swa ndyangu wakwe. (1 Timotiya 5:8) Hambileswi manana loyi a nga riki mupfumeri a nga ha hetaka nkarhi wo tala ni vana vakwe, tatana loyi a nga Mbhoni u fanele a dyondzisa vana vakwe timhaka ta vukhongeri ekaya a tlhela a ya na vona eminhlanganweni ya Vukreste, laha va nga ta vuyeriwa hi ndzetelo wa mahanyelo ni vunakulobye lebyinene.

Ku vuriwa yini hi loko wansati loyi a nga riki mupfumeri a sindzisa ku famba ni vana ekerekeni ya yena kumbe a va dyondzisa leswi yena a pfumelaka eka swona? Nawu wa tiko wu nga ha n’wi nyika mpfumelelo wa leswaku a endla sweswo. Leswaku vana va vona va nga yengiwi hi swiendlo swa le kerekeni swi ta ya hi ntikelo wa leswi tata wa vona a va dyondziseke swona mayelana ni ntiyiso. Loko vana va ri karhi va kula, dyondzo ya Matsalwa leyi va yi kumeke eka tata wa vona yi fanele yi va pfuna ku landzela ntiyiso wa Rito ra Xikwembu. Wa nga vona ndlela leyi tatana la nga mupfumeri a nga ta tsaka ha yona loko vana va yena va tiyimisela ku landzela ntiyiso!

Loko manana a ri Mbhoni ya Yehovha, u fanele a xixima nsinya wa nawu wa vunhloko loko a ri karhi a tikarhatela vumoya bya vana va yena. (1 Vakorinto 11:3) Hakanyingi, nuna wa yena la nga riki mupfumeri a nge vi na mhaka loko nsati wa yena la nga Mbhoni a dyondzisa vana va vona mahanyelo lamanene ni dyondzo ya swa moya, naswona mpfuno wolowo va nga wu kuma eminhlanganweni ya vanhu va Yehovha. Manana a nga pfuna nuna wa yena la nga riki mupfumeri leswaku a vona vuyelo bya dyondzo leyi akaka leyi vana va vona va yi kumaka enhlengeletanweni ya Yehovha. A nga wu kandziyisa hi vutlhari ntikelo wa ku dyondzisa vana va vona misinya ya milawu ya mahanyelo ya le Bibeleni hi ku phindha-phindha, tanihi leswi va hanyaka emisaveni leyi nga riki na mahanyelo.

Hambiswiritano, wanuna la nga riki mupfumeri a nga ha sindzisa leswaku vana va yena va famba na yena ekerekeni a tlhela a va dyondzisa tidyondzo ta vukhongeri bya yena. Kumbe wanuna a nga ha venga vukhongeri hinkwabyo naswona a sindzisa leswaku vana va yena va nga dyondzisiwi timhaka ta vukhongeri. Leswi a nga nhloko ya ndyangu, hi yena a nga ni vutihlamuleri lebyikulu bya ku endla xiboho. *

Hambileswi a xiximaka vunhloko bya nuna wa yena, leswi wansati a nga Mukreste la tinyiketeleke u fanele a tsundzuka langutelo ra muapostola Petro na Yohane, lava nga te: “Loko ku ri hina, a hi nge tshiki ku vulavula hi swilo leswi hi swi voneke ni leswi hi swi tweke.” (Mintirho 4:19, 20) Hikwalaho ka  leswi a khathalaka hi vumoya bya vana va yena, manana la nga Mbhoni u ta tinyika nkarhi wa ku dyondzisa vana va yena mahanyelo lamanene. U ni vutihlamuleri eka Yehovha byo dyondzisa van’wana ntiyiso, ku katsa ni vana va yena. (Swivuriso 1:8; Matewu 28:19, 20) Xana manana la nga Mbhoni a nga langutana njhani ni xiphiqo lexi?

Hi xikombiso, anakanya hi mhaka ya ku pfumela eka Xikwembu. Wansati la nga Mbhoni swi nga ha endleka a nga swi koti ku khoma dyondzo ya Bibele ni vana va yena, hileswi nuna wa yena a nga swi laviki. Xana u fanele a tshika ku dyondzisa vana va yena hi Yehovha hikwalaho ka xivangelo xexo? Doo! Marito ya yena ni swiendlo swa yena swi ta kombisa ripfumelo ra yena eka Muvumbi. Swi le rivaleni leswaku vana va yena va ta va ni swivutiso emhakeni leyi. U fanele a titwa a ntshunxekile ku tirhisa ntshunxeko wa yena wa vukhongeri hi ku phofula ripfumelo ra yena eka Muvumbi, ku katsa ni le ka vana va yena. Hambiloko a nga taka a nga swi koti ku khoma dyondzo ya Bibele ni vana vakwe kumbe ku famba na vona eminhlanganweni nkarhi hinkwawo, a nga nghenisa vutivi bya Yehovha Xikwembu eka vana va yena.—Deteronoma 6:7.

Loko Pawulo a hlamusela vuxaka lebyi nga kona exikarhi ka Mbhoni ni munghana wa yona wa vukati la nga pfumeriki, u tsale leswi: “Wanuna loyi a nga pfumelangiki u kwetsimisiwa hikwalaho ka nsati wa yena, naswona wansati loyi a nga pfumelangiki u kwetsimisiwa hikwalaho ka makwerhu; loko swi nga ri tano, vana va n’wina kunene a va ta va lava nga basangiki, kambe sweswi va kwetsima.” (1 Vakorinto 7:14) Yehovha u languta vuxaka bya vukati byi ri lebyi kwetsimaka hikwalaho ka loyi a nga mupfumeri, naswona vana va tekiwa va ri lava kwetsimaka emahlweni ka Yehovha. Wansati la nga Mbhoni u fanele a endla leswi kotekaka leswaku a pfuna vana va yena ku twisisa ntiyiso, a tshika vuyelo bya kona emavokweni ya Yehovha.

Loko vana va kula, va fanele va tiendlela xiboho xa leswaku va yime kwihi hi ku ya hi leswi va dyondzisiweke swona hi vatswari va vona. Va nga ha kunguhata ku endla hi ku pfumelelana ni marito ya Yesu lama nge: “Loyi a nga ni xinakulobye lexikulu eka tata wakwe kumbe mana wakwe ku tlula eka mina a nga ndzi faneli.” (Matewu 10:37) Na vona va lerisiwa leswi: “Vana, yingisani vatswari va n’wina evun’weni ni Hosi.” (Vaefesa 6:1) Vantshwa vo tala va kunguhate ku “yingisa Xikwembu tanihi mufumi” ematshan’weni ya mutswari loyi a nga riki Mbhoni, hambiloko mutswari yoloye o va xanisa hikwalaho ka sweswo. Vona ndlela leyi mutswari loyi a nga Mbhoni a nga ta tsaka ha yona ku vona vana va tikunguhatela ku tirhela Yehovha hambiloko va kanetiwa!

[Nhlamuselo ya le hansi]