Va Tsakisiwe Hi Leswi Va Dyondzeke Ku Hlaya!

ETINDHAWINI tin’wana ta le Solomon Islands, vanhu va tiphesente ta 80 lava sweswi va nga Timbhoni ta Yehovha a va ri ni xiphiqo xa ku nga koti ku hlaya. Leswi swi va endle va tsandzeka ku hlanganyela eminhlanganweni ya vandlha ya vhiki ni vhiki, swi tlhela swi va endla va tsandzeka ku dyondzisa van’wana mintiyiso ya Mfumo. Xana swi nga koteka leswaku vanhu lavakulu lava nga si tshamaka va tsala ni vito ra vona va kota ku hlaya?

Broxara leyi nge Titolovete Ku Hlaya Ni Ku Tsala, leyi kandziyisiweke hi Timbhoni ta Yehovha, a yi tirhisiwa eka titlilasi to dyondzisa ku hlaya ta kwalomu ka mavandlha hinkwawo ya Timbhoni ta Yehovha eSolomon Islands. Mintokoto leyi landzelaka yi kombisa ndlela leyi madzana ya vanhu ma pfuniweke ha yona ku hlaya ni ku tsala hikwalaho ka lunghiselelo leri. Xa nkoka ngopfu, ku dyondza ku hlaya ku va endle va kota ku nyikela vumbhoni hi ndlela yo antswa malunghana ni ripfumelo ra vona.—1 Petro 3:15.

Murhumiwa loyi a a averiwe evandlheni leri nga ni vahuweleri va Mfumo vo tlula dzana u xiye leswaku eka dyondzo ya Bibele ya vhiki ni vhiki ya Xihondzo xo Rindza i vatsongo lava a va ri ni kopi ya magazini lowu naswona a va nga talanga lava a va hlamula. Xana xivangelo xa kona a ku ri yini? A va nga swi koti ku hlaya. Loko vandlha ri tivisa leswaku ku ta va ni xikolo xo dyondzisa ku hlaya ni ku tsala, murhumiwa u tsakele ku va mudyondzisi hi ku tirhandzela. Eku sunguleni, ku te swichudeni swi nga ri swingani ntsena, kambe hi ku hatlisa ku te vanhu lavakulu ni lavatsongo vo tlula 40.

Vuyelo byi ve byihi? Murhumiwa u te: “Endzhakunyana ka loko tlilasi yo dyondzisa ku hlaya ni ku tsala yi sungurile, ndzi ye emakete hi awara ya tsevu nimixo ndzi ya xava swakudya swa  le kaya ra varhumiwa. Kutani loko ndzi ri kwale ndzi vone swichudeni swin’wana ku katsa ni vana, va ri eku xaviseni ka tikhokhonati ni matsavu. Ha yini? Hikuva a va lava mali yo xava xitsalo ni buku leswi va nga ta swi tirhisa etlilasini! Nakambe ku ya etlilasini yoleyo swi va susumetele ku va ni kopi ya magazini wa Xihondzo xo Rindza.” U engeterile: “Sweswi, eka Dyondzo ya vandlha ya Xihondzo xo Rindza, ku hlamula lavakulu ni lavatsongo naswona mabulo ya hina ma tsakisa.” Murhumiwa loyi a a tsake ngopfu loko vanhu va mune lava a va ri etlilasini va vutisa leswaku xana va nga chumayela erivaleni, hikuva va te a va “ha chavi.”

Swichudeni a swi dyondzanga ku hlaya ni ku tsala ntsena. Hi xikombiso, a ku ri ni nsati wa Mbhoni yin’wana loyi a nga riki mupfumeri, loyi a karhateke vandlha hi malembe yo tala. Loko vanhu va n’wi khunguvanyisanyana a va hoxetela hi maribye hambi ku ri ku ba vavasati-kulobye hi nhonga. Loko minkarhi yin’wana o ya eminhlanganweni ya Vukreste ni nuna wakwe, a a n’wi vondzoka lerova nuna wakwe a kala a ambala manghilazi ya ntima leswaku a nga ha n’wi hehli hileswaku u languta vavasati van’wana.

Hambiswiritano, endzhakunyana ka loko titlilasi leti ti sungurile, wansati loyi u vutise kahle a ku: “Xana na mina ndzi nga nghena etlilasini?” Va te, ina. Ku sukela kwalaho a nga xwanga etlilasini ni le minhlanganweni ya vandlha. A tikarhata swinene ku dyondza ku hlaya naswona u endle nhluvuko hi ndlela yo hlamarisa, leswi swi n’wi tsakise ngopfu. U tlhele a kombela a ku: “Ndzi kombela dyondzo ya Bibele.” Nuna wakwe u sungule ku dyondza na yena, naswona u hambeta a endla nhluvuko eka vuswikoti bya yena byo hlaya ni ku tsala ni le ka vutivi byakwe bya Bibele.

Munhu la nga ni malembe ya 50 hi vukhale loyi a nga si tshamaka a tirhisa xitsalo swi nga ha n’wi tikela ngopfu ku tsala maletere. Van’wana va tshwumuka ni tintiho hikwalaho ko tshikilela xitsalo ehenhla ka phepha loko va ha ku sungula ku dyondza ku tsala. Endzhaku ka mavhiki va ri karhi va kayakaya ku khoma xitsalo leswaku va kota ku tsala, swichudeni swin’wana swi tihleka swi ku: “Se a ndza ha tshikileli phepha loko ndzi ri eku tsaleni!” Wa tsaka mudyondzisi loko a vona nhluvuko wa swichudeni swakwe. Muleteri un’wana u te: “Ku dyondzisa swa tsakisa swinene naswona hakanyingi swichudeni swi ri tlangela swinene lunghiselelo leri ri humaka eka Yehovha hi ku ba mavoko loko swi heta ku dyondza.”

Timbhoni leti kotaka ku hlaya swin’we ni varhumiwa ta tsaka. Ha yini? Hikuva sweswi ti nga tirhisa vuswikoti bya tona byo hlaya ni ku tsala leswaku ti dzunisa Yehovha.

[Swifaniso leswi nga eka tluka 8, 9]

Lavakulu ni lavatsongo va tlangela titlilasi to dyondzisa ku tsala ni ku hlaya