“Xana Ma Swi Tiva Leswaku Ha Yini Ndzi Tise Mali Ya N’wina?”

‘WA TIVA, ndzi lava mali,’ ku vule Nana, manana la nga swakwe la nga ni vafana vanharhu la tshamaka eKaspi le Republic of Georgia. Mixo wun’wana ku navela ka yena ku hetisekile. U thumbe mali yo ringana ti-lari ta 300 ekusuhi ni xitici xa maphorisa. A a ku nga ri na munhu la n’wi vonaka. A a ku ri mali yo tala swinene. Entiyisweni, Nana a a nga si tshama a vona mali ya phepha yo ringana ti-lari ta 100 eka malembe ya ntlhanu lama hundzeke hi mpfhuka ku sungule ku tirhisiwa ti-lari etikweni. Vaxavisi va kwalaho a va nga yi kumi mali yoleyo hambiloko va tirhe malembe yo hlaya.

Nana u tivutise leswi, ‘Xana ndzi yi lavela yini mali yoleyo loko ku ri leswaku ndzi ta lahlekeriwa hi ripfumelo ra mina, ku chava Xikwembu ni ku fa emoyeni?’ A a hlakulele timfanelo teto ta Vukreste, naswona u tiyisele nxaniso wa tihanyi ni ku biwa hikwalaho ka ripfumelo rakwe.

Loko a ri karhi a ya exitichini xa maphorisa, Nana u vone ntlhanu wa maphorisa ma ri karhi ma lavalava xanchumu. U swi xiyile leswaku a a ma lavalava mali, kutani a ku eka wona: “Xana mi lahlekele hi xo karhi?”

Ma te: “Hi lahlekele hi mali.”

“I mali muni?”

“I ti-lari ta 300!”

Nana u te: “Ndzi thumbe mali ya n’wina.” A tlhela a ma vutisa a ku: “Xana ma swi tiva leswaku ha yini ndzi tise mali ya n’wina?” A ma nga swi tivi.

U ye emahlweni a ku: “Hikuva ndzi un’wana wa Timbhoni ta Yehovha. I nge ndzi nga yi tisanga loko a ndzi nga ri Mbhoni.”

Ndhuna ya maphorisa leyi a yi lahlekele hi mali yi nkhense Nana hi ti-lari ta 20 hikwalaho ka ku tshembeka ka yena.

Mhaka leyi yi hangalake hi ku hatlisa emugangeni hinkwawo wa Kaspi. Hi xa mundzuku xa kona, wansati loyi a tirhaka ku basisa exitichini xa maphorisa u humile kutani a byela Nana a ku: “[Phorisa leri] ri tshama ri ri ni tibuku ta n’wina ehofisini ya rona. Kumbexana sweswi ri ta ti rhandza ngopfu.” Phorisa rin’wana na rona ri te: “Loko vanhu hinkwavo a va ri Timbhoni ta Yehovha, a ku nga ta va ni swigevenga.”