‘Rivalelanani Hi Ku Ntshunxeka’

XANA wa tshemba leswaku Xikwembu xi ku rivalele swidyoho swa wena? Le United States, vanhu vo tala lavakulu va tshemba tano. Dok. Loren Toussaint, mutsari wo sungula wa dyondzo leyi a yi dyondzisiwa eYunivhesiti ya Michigan Institute for Social Research, u vike leswaku loko ku endliwa nkambisiso, Maamerika yo ringana 1 423 ku nga kwalomu ka tiphesente ta 80 ta vanhu lavakulu lava nga ni malembe yo tlula 45, va vule leswaku Xikwembu xi va rivalele swidyoho swa vona.

Kambe swa hlamarisa leswaku ko va vanhu va 57 wa tiphesente ntsena eka lava vutisiweke, lava vuleke leswaku na vona va rivalele van’wana. Nhlayo yoleyo yi hi tsundzuxa hi marito ya Yesu ya Dyondzo ya le Ntshaveni lama nge: “Loko mi rivalela vanhu swivi swa vona, Tata wa n’wina wa le tilweni na yena u ta mi rivalela; kasi loko mi nga va rivaleli vanhu swivi swa vona, na yena Tata wa n’wina a nge mi rivaleli swivi swa n’wina.” (Matewu 6:14, 15) Ina, leswaku Xikwembu xi hi rivalela swidyoho swa hina swi ya hiloko na hina hi tiyimisele ku rivalela van’wana.

Muapostola Pawulo u tsundzuxe Vakreste va le Kolosa hi nsinya lowu wa nawu. U va khutaze a ku: “Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana. Tanihi leswi Yehovha a mi rivaleleke hi ku ntshunxeka, na n’wina endlani sweswo.” (Vakolosa 3:13) I ntiyiso leswaku a hi minkarhi hinkwayo swi olovaka ku rivalela. Hi xikombiso, loko wo byeriwa marito yo tlhava, swi nga ha ku tikela ku ma rivala.

Hambiswiritano, loko u rivalela u ta vuyeriwa swinene. Dok. David R. Williams, mutivi wa ntshamisano u vule leswi malunghana ni ndzavisiso wakwe: “Ku rivalela van’wana swi engetela rihanyo lerinene ra Maamerika ya malembe ya le xikarhi ni lama dyuhaleke.” Leswi swi pfumelelana ni marito ya Hosi Solomoni wo tlhariha, loyi eka malembe ya 3 000 lama hundzuke a tsaleke a ku: “Mbilu yo rhula i vutomi bya xivumbiwa xa nyama lexi hanyaka.” (Swivuriso 14:30) Leswi moya wo rivalela wu kondletelaka vuxaka lebyinene na Xikwembu ni vaakelani va hina, hi ni xivangelo lexi twalaka xo rivalelana hi ku ntshunxeka swi suka embilwini.—Matewu 18:35.