Tekelela Mudyondzisi Lonkulu

“Hikokwalaho fambani mi ya endla vanhu . . . va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.”—MATEWU 28:19, 20.

1, 2. (a) Xana hina hinkwerhu hi vadyondzisi hi ndlela yihi? (b) Loko swi ta emhakeni yo dyondzisa, xana Vakreste va ntiyiso va ni vutihlamuleri byihi byo hlawuleka?

XANA u mudyondzisi? Hinkwerhu ka hina hi vadyondzisi. Nkarhi hinkwawo loko u komba munhu la lahlekeke ndlela, loko u komba mutirhi-kuloni ntirho wo karhi kumbe u hlamusela n’wana leswaku u fanele a ti bohisa ku yini tintanghu takwe, u va u ri eku dyondziseni. Ku pfuna van’wana hi tindlela toleto swa enerisa, a swi tano ke?

² Loko swi ta emhakeni yo dyondzisa, Vakreste va ntiyiso va ni vutihlamuleri byo hlawuleka. Hi lerisiwe ku ‘endla vanhu va va vadyondzisiwa, hi va dyondzisa.’ (Matewu 28:19, 20) Ni le vandlheni hi va ni nkarhi wo dyondzisa. Vavanuna lava fanelekaka va vekiwe leswaku va va “varisi ni vadyondzisi,” lava tiyimiseleke ku aka vandlha. (Vaefesa 4:11-13) Eka mintirho ya vona ya Vukreste ya siku ni siku vavasati lava wupfeke va fanele va va “vadyondzisi va leswi nga swinene” eka vavasati lavatsongo. (Tito 2:3-5) Hinkwerhu hi tsundzuxiwa ku khutaza vapfumeri-kulorhi, naswona hi nga yingisa xitsundzuxo xexo hi ku tirhisa Bibele loko hi aka van’wana. (1 Vatesalonika 5:11) Vona lunghelo leri hi nga na rona ro va vadyondzisi va Rito ra Xikwembu ni ra ku byela van’wana timhaka ta swa moya leti nga ta va pfuna hilaha ku nga heriki!

3. Xana hi nga endla yini leswaku hi va vadyondzisi lava humelelaka?

³ Kambe, xana hi nga endla njhani leswaku hi va vadyondzisi lava humelelaka? Ngopfu-ngopfu sweswo hi nga swi endla hi ku tekelela Yesu Mudyondzisi Lonkulu. Van’wana va nga ha tivutisa, ‘Xana hi nga n’wi tekelela njhani Yesu? A a hetisekile.’ I ntiyiso, leswaku a hi nge vi vadyondzisi lava hetisekeke. Ku nga khathariseki vuswikoti lebyi hi nga na byona, hi nga endla leswi nga ematimbeni ya hina leswaku hi tekelela ndlela leyi Yesu a dyondziseke ha yona. A hi buleni hi ndlela leyi hi nga ti tirhisaka ha yona tindlela ta mune ta madyondziselo yakwe—ku nga ku olovisa, swivutiso leswi pfunaka, nhlamuselo leyi twalaka ni swifaniso leswi fanelaka.

Dyondzisa Hi Ndlela Yo Olova

4, 5. (a) Ha yini ntiyiso wa Bibele wu olova? (b) Leswaku hi dyondzisa hi ndlela yo olova, ha yini swi ri swa nkoka ku xiya ndlela leyi hi vulavulaka ha yona?

⁴ Tidyondzo ta xisekelo ta Rito ra Xikwembu a ti rharhangananga. Yesu u khongele a ku: “Tatana, ndza ku dzunisa erivaleni, . . . hikuva swilo leswi u swi fihlele lavo tlhariha ni lava nga ni ku twisisa kutani u swi hlavutele swihlangi.” (Matewu 11:25) Yehovha u hlavutele swikongomelo swakwe eka lava timbilu letinene. (1 Vakorinto 1:26-28) Xisweswo, ntiyiso wa Bibele wa olova.

⁵ Loko u fambisa dyondzo ya le kaya ya Bibele kumbe u endla maendzo yo vuyela eka lava tsakelaka, xana u nga dyondzisa njhani hi ndlela yo olova? Kutani, xana hi dyondze yini eka Mudyondzisi Lonkulu? Yesu u tirhise marito yo olova leswaku vayingiseri va yena va n’wi twisisa, tanihi leswi vo tala va vona a va ri vanhu lava nga “dyondzekangiki, lava tolovelekeke.” (Mintirho 4:13) Kutani, leswaku hi dyondzisa hi ndlela yo olova, hi fanele hi rhanga hi ku languta ndlela leyi hi vulavulaka ha yona. Leswaku hi khorwisa vanhu hi ntiyiso wa Rito ra Xikwembu, a hi fanelanga hi  tirhisa marito kumbe swiga swo tika. ‘Mavulavulelo yo tano yo hlamarisa’ ma nga kavanyeta, ngopfu-ngopfu eka lava nga dyondzekangiki kumbe lava nga riki na vuswikoti. (1 Vakorinto 2:1, 2) Xikombiso xa Yesu xi komba leswaku marito yo olova lama hlawuriweke kahle ma endla ntiyiso wu twisiseka kahle.

6. Hi nga swi papalata njhani ku hlohlela xichudeni xa Bibele hi rungula ro tala?

⁶ Leswaku hi dyondzisa hi ndlela yo olova, hi fanele hi papalata ku hlohlela xichudeni xa Bibele hi rungula ro tala. Yesu a a ku xiya ku tsana ka vadyondzisiwa vakwe. (Yohane 16:12) Na hina hi fanele hi xiya ku tsana ka xichudeni. Hi xikombiso, loko hi fambisa dyondzo hi buku leyi nge Vutivi Lebyi Yisaka eVuton’wini Lebyi Nga Heriki, a hi fanelanga hi hlamusela yinhla yin’wana ni yin’wana. * Naswona a hi swinene ku hatlisela ku hlanganisa rungula ro tala, onge ku dyondza rungula ro tala hi swona swi nga swa nkoka. Ematshan’weni ya sweswo, i vutlhari ku tiva swilaveko ni vuswikoti bya xichudeni. Pakani ya hina i ku pfuna xichudeni leswaku xi va mudyondzisiwa wa Kreste naswona xi gandzela Yehovha. Hi fanele hi tirhisa nkarhi lowu hi nga na wona leswaku hi pfuna xichudeni lexi tsakelaka leswaku xi swi twisisa kahle leswi xi swi dyondzaka. Xisweswo, ntiyiso wu nga ha khumba mbilu ya xona kutani wu xi susumetela ku teka goza.—Varhoma 12:2.

7. Hi swihi swiringanyeto leswi nga hi pfunaka ku dyondzisa hi ndlela yo olova loko hi nyikela tinkulumo evandlheni?

⁷ Loko hi nyikela tinkulumo evandlheni, ngopfu-ngopfu loko ku ri ni vanhu lavantshwa, xana hi nga vulavula njhani hi ndlela leyi “twisisiwaka hi ku olova”? (1 Vakorinto 14:9) Xiya swiringanyeto swinharhu leswi nga pfunaka. Xo sungula, hlamusela marito wahi ni wahi lama nga tolovelekangiki lawa u nga ta ma tirhisa. Leswi hi twisisaka Rito ra Xikwembu swi hi endla hi kota ku vulavula hi ndlela yo hlawuleka. Loko hi tirhisa swiga swo tanihi “hlonga ro tshembeka ni ro tlhariha,” “tinyimpfu tin’wana” na “Babilona Lonkulu,” hi nga boheka ku swi hlamusela hi marito yo olova lama vekaka nhlamuselo ya kona erivaleni. Xa vumbirhi, papalata ku tata marito. Ku tata marito, na ku lehisa, swi nga endla vayingiseri va wena va nga ha tsakeli. Ku olovisa marito ni ku susa swiga leswi nga lavekiki swi endla leswaku mhaka yi twisiseka. Xa vunharhu, u nga ringeti ku hlanganisa rungula ro tala ngopfu. Loko hi endla ndzavisiso hi nga kuma rungula ro tala leri tsakisaka. Kambe i swinene ku hlela rungula hi tinhla-nkulu leti nga talangiki, hi tirhisa ntsena rungula leri seketelaka tinhla teto ni leti nga hlamuseriwaka kahle hi nkarhi lowu vekiweke.

Ku Tirhisa Swivutiso Leswi Pfunaka

8, 9. Xana hi nga xi hlawula njhani xivutiso lexi fambelanaka ni leswi tsakeriwaka hi n’wini wa muti? Nyika swikombiso.

⁸ Tsundzuka leswaku Yesu a a ri ni vutshila byo tirhisa swivutiso leswaku a endla vadyondzisiwa vakwe va phofula leswi nga emianakanyweni ya vona ni ku va xalamukisa ni ku letela mianakanyo ya vona. Hi swivutiso swa yena, Yesu u fikelele timbilu ta vona. (Matewu 16:13, 15; Yohane 11:26) Xana hi nga swi tirhisa njhani swivutiso leswi pfunaka ku fana na Yesu?

⁹ Loko hi chumayela hi yindlu ni yindlu, hi nga tirhisa swivutiso leswaku hi pfuxa ku tsakela, hi pfula ndlela yo vulavula hi Mfumo wa Xikwembu. Hi nga xi hlawula njhani xivutiso lexi fambelanaka ni leswi tsakeriwaka hi n’wini wa muti? Vana ni vuxiyaxiya. Loko u nghena emutini xiyisisa leswi nga ejarateni. Xana ku ni tithoyi, leswi kombisaka leswaku ku ni vana emutini wolowo? Loko ti ri kona, hi nga ha vutisa, ‘Xana u tshame u tivutisa  leswaku misava yi ta va yi ri njhani loko vana va wena va kurile?’ (Pisalema 37:10, 11) Xana ku na swo goga nyangwa kumbe ku ni tialamu? Hi nga ha vutisa: ‘Xana u ehleketa leswaku wu ta kala wu fika nkarhi lowu hi nga ta titwa hi sirhelelekile emakaya ya hina ni le switarateni?’ (Mikiya 4:3, 4) Xana ku ni xitulu xa swigulana? Hi nga ha vutisa: ‘Xana wu ta kala wu va kona nkarhi lowu un’wana ni un’wana loyi a hanyaka a nga ta tiphina hi rihanyo lerinene?’ (Esaya 33:24) Swiringanyeto swo tala swi nga kumiwa ebukwini leyi nge Ku Hlamulana Hi Matsalwa. *

10. Xana hi nga swi tirhisa njhani swivutiso leswaku hi “humesa” mianakanyo ni mintlhaveko ya mbilu ya xichudeni xa Bibele, kambe hi fanele hi tsundzuka yini?

¹⁰ Hi nga swi tirhisa njhani swivutiso leswi tirhaka loko hi fambisa tidyondzo ta Bibele? Ku hambana na Yesu, hina a hi nge swi koti ku vona timbilu ta vanhu. Hambiswiritano, loko hi vutisa swivutiso swa vutlhari ni leswi endlaka hi twisisa swi nga hi pfuna leswaku hi “humesa” mianakanyo ni mintlhaveko ya mbilu ya xichudeni. (Swivuriso 20:5) Hi xikombiso, a hi nge hi dyondza ndzima leyi nge “Lexi Endlaka Leswaku Ku Hanya Vutomi Bya Ku Chava Xikwembu Swi Tisa Ntsako,” ebukwini leyi nge Vutivi. Yi hlamusela ndlela leyi Xikwembu xi ku langutaka ha yona ku nga tshembeki, vumbhisa ni timhaka tin’wana. Xichudeni xi nga ha swi hlamula kahle swivutiso leswi nga ebukwini, kambe xana xa pfumelelana ni leswi xi swi dyondzaka? Hi nga ha vutisa: ‘Xana langutelo ra Yehovha etimhakeni to tano ri vonaka ri twala eka wena?’ U nga yi tirhisa njhani misinya leyi ya milawu ya Bibele evuton’wini bya wena?’ Kambe, tsundzuka leswaku u fanele u xixima xindzhuti xa xichudeni. A hi nge vutisi swivutiso leswi khomisaka xichudeni xa Bibele tingana kumbe leswi xi susaka xindzhuti.—Swivuriso 12:18.

11. Xana swivulavuri swa le rivaleni swi nga swi tirhisa hi tindlela tihi swivutiso leswi pfunaka?

¹¹ Swivulavuri swa le rivaleni swi nga ha tirhisa swivutiso leswi pfunaka. Swivutiso leswi nga laviki nhlamulo—ku nga swivutiso leswi hi nga langutelangiki leswaku vayingiseri va hina va swi hlamula hi rito leri twakalaka—swi nga pfuna vayingiseri leswaku va anakanyisisa. Minkarhi yin’wana Yesu a a tirhisa swivutiso swo tano. (Matewu 11:7-9) Ku tlula kwalaho, loko xivulavuri xi hete xingheniso, xi nga ha vutisa swivutiso leswaku xi boxa tinhla-nkulu leti xi nga ta vulavula ha tona. Xi nga ha ku: “Namuntlha hi ta hlamula swivutiso leswi landzelaka . . . ” Kutani loko xi gimeta, xi nga ha tlhela xi boxa swivutiso sweswo loko xi pfuxeta tinhla-nkulu.

12. Nyika xikombiso lexi kombisaka ndlela leyi vakulu lava nga Vakreste va nga tirhisaka swivutiso ha yona leswaku va pfuna mupfumeri-kulobye leswaku a kuma nchavelelo eRitweni ra Xikwembu.

¹² Eka maendzo ya vona ya vurisi, vakulu lava nga Vakreste va nga ha tirhisa swivutiso ku pfuna ‘moya-xiviri lowu karhatekeke’ leswaku wu chaveleriwa hi Rito ra Yehovha. (1 Vatesalonika 5:14) Hi xikombiso, loko nkulu a pfuna munhu loyi a titwaka a tshikilelekile, a nga ha vulavula hi Pisalema 34:18. Yi ri: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” Loko nkulu a lava ku tiyiseka leswaku munhu loyi a heleke matimba wa yi twisisa ndlela leyi ri tirhaka ha yona eka yena, a nga ha vutisa: ‘Yehovha u le kusuhi na mani? Xana minkarhi yin’wana u titwa ‘u tshoveke mbilu’ naswona u ‘pfotlokile emoyeni’? Loko Bibele yi ku, Yehovha u le kusuhi ni vanhu vo tano, xana sweswo a swi vuli swona leswaku u le kusuhi na wena?’ Nchavelelo wo tano wu nga hanyanyisa moya lowu pfotlokeke.—Esaya 57:15.

 Nhlamuselo Leyi Twisisekaka

13, 14. (a) Hi nga n’wi khorwisa njhani munhu loyi a vulaka leswaku a nga pfumeli eka Xikwembu lexi a nga xi voniki? (b) Ha yini hi nga fanelanga hi langutela leswaku vanhu hinkwavo va ta khorwiseka?

¹³ Loko hi ri ensin’wini hi lava ku fikelela timbilu ta vanhu hi nhlamuselo leyi khorwisaka. (Mintirho 19:8; 28:23, 24) Xana sweswo swi vula leswaku hi fanele hi hlamusela hi ndlela leyi rharhanganeke leswaku hi ta khorwisa van’wana hi ntiyiso wa Rito ra Xikwembu? Doo! Nhlamuselo leyi khorwisaka a yi fanelanga yi rharhangana. Timhaka to tika leti hlamuseriwaka hi ndlela yo olova hakanyingi ta pfuna swinene. Xiya xikombiso.

¹⁴ Xana hi nga hlamula njhani loko un’wana a vula leswaku a nga pfumeli eka Xikwembu lexi a nga si tshamaka a xi vona? Hi nga ha hlamusela ndlela leyi swilo swi endlekaka ha yona hi ntumbuluko. Loko ku endleka nchumu wo karhi, ha swi tiva leswaku ku na lexi xi wu endleke. Hi nga ha ku: ‘Loko a wo va wexe endhawini yo karhi kutani u vona yindlu leyi akiweke kahle leyi yi nga lo mphaa, hi swakudya, u ta swi vona xikan’we-kan’we leswaku ku ni un’wana loyi a akeke yindlu yoleyo a tlhela a tata tikhabodo ta yona hi swakudya. Kutani ke, na hina loko hi vona ntumbuluko ni swakudya swo tala leswi nga emisaveni, xana a swi vonaki swi twala ku pfumela leswaku ku ni Un’wana loyi a swi endleke?’ Bibele yi yi hlamusela kahle mhaka leyi: “Ina, yindlu yin’wana ni yin’wana yi akiwa hi munhu, kambe loyi a akeke swilo hinkwaswo i Xikwembu.” (Vaheveru 3:4) Hambiswiritano, ku nga khathariseki leswaku nhlamuselo ya hina yi twala ku fikela kwihi, a hi vanhu hinkwavo lava nga ta khorwiseka. Bibele ya hi tsundzuxa leswaku ko va ntsena lava nga ni “mboyamelo lowunene” lava nga ta va vapfumeri.—Mintirho 13:48; 2 Vatesalonika 3:2.

15. Hi tihi tinhlamuselo leti hi nga ti tirhisaka leswaku hi kandziyisa timfanelo ni tindlela ta Yehovha, naswona hi swihi swikombiso swimbirhi leswi kombisaka ndlela leyi hi nga tirhisaka tinhlamuselo teto ha yona?

¹⁵ Loko hi dyondzisa, ku nga ha va ensin’wini kumbe evandlheni, hi nga tirhisa tinhlamuselo leti twisisekaka leswaku hi kandziyisa timfanelo ni tindlela ta Yehovha. Xa nkoka swinene i ku tirhisa marito lama nge ‘ngopfu-ngopfu swi tano’ lawa Yesu a a pfa a ma tirhisa. (Luka 11:13; 12:24) Loko hi lava ku kombisa ku hambana, nhlamuselo ya muxaka lowu yi nga n’wi khumba swinene munhu. Loko hi lava ku kombisa leswaku dyondzo ya ndzilo wa tihele a yi twali, hi nga ha ku: ‘Ku hava tatana la nga ni rirhandzu loyi a nga xupulaka n’wana wa yena hi ku teka voko ra n’wana wa yena a ri veka endzilweni. Kutani dyondzo ya ndzilo wa tihele yi n’wi nyangatsa swinene Tata wa hina wa le tilweni la nga ni rirhandzu!’ (Yeremiya 7:31) Loko hi dyondzisa leswaku Yehovha u khathalela un’wana ni un’wana wa malandza ya yena, hi nga ha ku: ‘Loko Yehovha a tiva tinyeleti ta magidi ya timiliyoni hi mavito, swi le rivaleni leswaku u va khathalela swinene vanhu lava n’wi rhandzaka naswona va xaviweke hi ngati ya risima ya N’wana wa yena!’ (Esaya 40:26; Mintirho 20:28) Nhlamuselo yo tano leyi khorwisaka yi nga hi pfuna ku fikelela timbilu ta van’wana.

Swifaniso Leswi Fanelekaka

16. Ha yini swifaniso swi ri swa nkoka eku dyondziseni?

¹⁶ Swifaniso leswi pfunaka swi nga endla leswaku dyondzo ya hina yi tsakisa van’wana. Ha yini swifaniso swi ri swa nkoka loko hi dyondzisa? Mudyondzisi un’wana u te: “Vuswikoti byo anakanya u nga ri na xifaniso i nchumu wun’wana wo tika eka munhu.” Swifaniso swi endla leswaku hi kota ku vona leswi ku vulavuriwaka ha swona hi mahlo ya mianakanyo, naswona swi hi pfuna ku ti twisisa kahle tidyondzo letintshwa. Yesu a a nga fani na munhu hi ndlela leyi a a tirhisa swifaniso ha yona. (Marka 4:33, 34) A hi voneni ndlela leyi hi nga tirhisaka madyondziselo lawa ha yona.

17. Hi tihi tinhla ta mune leti endlaka leswaku xifaniso xi pfuna?

¹⁷ I yini leswi endlaka xifaniso xi pfuna? Xo sungula, xi fanele xi fanela vayingiseri va hina, hi tirhisa timhaka leti vayingiseri va hina va ti toloveleke. Ha tsundzuka leswaku Yesu u endle swifaniso swa yena hi ku tirhisa timhaka ta siku ni siku leti vayingiseri vakwe va ti tivaka. Xa vumbirhi, xifaniso xi fanele xi fambelana kahle ni yinhla leyi kandziyisiwaka. Loko u ringanisa swilo leswi nga fambelaniki, xifaniso xa wena xi nga ha pfilunganya vayingiseri va wena. Xa vunharhu, loko u endla xifaniso a wu fanelanga u tata vuxokoxoko lebyi nga bohiki. Tsundzuka leswaku Yesu u vule vuxokoxoko lebyi faneleke ntsena kambe a tshika lebyi swi nga bohiki ku byi vula. Xa vumune, loko hi tirhisa xifaniso, hi fanele hi tiyiseka  leswaku xa twisiseka ni leswaku xi nghena njhani. Loko swi nga ri tano, van’wana a va nge yi twisisi yinhla ya wena.

18. Xana hi nga swi endla njhani swifaniso leswi fanelaka mhaka?

¹⁸ Xana hi nga swi endla njhani swifaniso leswi fanelaka mhaka? A hi fanelanga hi ehleketa hi switori swo leha. Swifaniso swo koma swi nga pfuna swinene. Ringeta ku ehleketa hi swikombiso leswi fambisanaka ni yinhla leyi ku buriwaka ha yona. Hi xikombiso, a hi nge hi bula hi mhaka ya ku rivalela ka Xikwembu, kutani hi lava ku kombisa yinhla leyi nga eka Mintirho 3:19, laha yi vulaka leswaku Yehovha u ‘hlangula,’ kumbe ku sula, swidyoho swa hina. Mhaka yoleyo hi yoxe yi le rivaleni, kambe hi xihi xifaniso xa kahle lexi nga tirhisiwaka ku kombisa yinhla leyi—xana ku nga va rhaba? kumbe xiponci? Hi nga ha ku: ‘Loko Yehovha a hi rivalela swidyoho swa hina, swi fana ni loko a teka xiponci (kumbe rhaba) a swi sula swi nga ha vi kona.’ A swi tiki ku twisisa yinhla ya xifaniso xexo xo olova.

19, 20. (a) Hi nga swi kuma kwihi swifaniso swa kahle? (b) Hi swihi swikombiso swin’wana swa swifaniso leswi pfunaka leswi kandziyisiweke etibukwini ta hina? (Nakambe vona bokisi.)

¹⁹ Xana u nga swi kuma kwihi swifaniso leswi fanelaka, leswi katsaka timhaka ta vutomi ta xiviri? U nga swi kuma eka vutomi bya wena n’wini kumbe eka bya van’wana ni le ka mintokoto ya vapfumeri-kuloni. Swifaniso swi nga ha hlawuriwa eka swilo swo tala, eka swilo leswi hanyaka ni leswi nga hanyiki, swilo swa le ndlwini, kumbe swiendlakalo swa sweswinyana leswi vanhu va swi tivaka kahle. Ndlela leyinene yo kuma swifaniso swa kahle i ku swi “xiyisisa hi vukheta” swilo leswi endlekaka siku ni siku laha hi tshamaka kona. (Mintirho 17:22, 23) Buku yin’wana loko yi hlamusela hi ku va xivulavuri yi ri: “Xivulavuri lexi xiyaxiyaka vutomi bya vanhu ni mintirho ya vona yo hambana-hambana, loko xi vulavula ni vanhu va mixaka hinkwayo, loko xi xiyisisa swilo xi tlhela xi vutisa swivutiso kukondza xi swi twisisa, hi ndlela yoleyo xi ta va ni rungula ro tala ra swifaniso leri nga ta xi pfuna swinene loko xi swi lava.”

²⁰ Ku ni tibuku tin’wana ta swifaniso swo tala leswi pfunaka—Xihondzo xo Rindza, Xalamuka!, ni tibuku tin’wana leti kandziyisiweke hi Timbhoni ta Yehovha. U nga dyondza swo tala hi ku xiya ndlela leyi tibuku leti ti swi tirhisaka ha yona swifaniso. * Hi xikombiso, vona xifaniso lexi tirhisiweke eka ndzimana 11 ya ndzima 17 eka buku leyi nge Vutivi. Xi fanisa vumunhu byo hambana-hambana evandlheni ni mimovha yo hambana-hambana leyi fambaka etlhelo ka wena epatwini. I yini lexi xi endlaka xi pfuna? Xiya leswaku xi sekeriwe eka swilo leswi endlekaka siku ni siku, xi fambelana swinene ni yinhla leyi vuriwaka naswona swa twisiseka leswaku xi nghena njhani emhakeni leyi. Loko hi dyondzisa hi nga tirhisa swifaniso leswi kumekaka etibukwini ta hina, kumbexana hi swi twananisa ni swilaveko swa xichudeni xa Bibele kumbe hi ya swi tirhisa enkulumeni.

21. Hi byihi vuyelo lebyi u byi kumaka loko u ri mudyondzisi wa Rito ra Xikwembu?

²¹ Vuyelo byo va mudyondzisi loyi a humelelaka byi tele ngopfu. Loko hi dyondzisa, hi avelana ni van’wana; ha va pfuna. Ku nyika ko tano ku tisa ntsako, hi ku va Bibele yi ri: “Ku nyika swi tisa ntsako lowukulu ku tlula ku amukela.” (Mintirho 20:35) Eka vadyondzisi va Rito ra Xikwembu, ntsako wolowo va wu kuma hi ku tiva leswaku va nyika van’wana nchumu wa risima lowu tshamaka hi masiku—ku nga ntiyiso wa Yehovha. Hi nga ha tlhela hi eneriseka hi ku tiva leswaku hi tekelela Yesu Kreste, Mudyondzisi Lonkulu.

[Tinhlamuselo ta le hansi]

Wa Tsundzuka Xana?

• Hi nga dyondzisa njhani hi ku olova loko hi fambisa dyondzo ya le kaya ya Bibele? loko hi nyikela nkulumo evandlheni?

• Hi nga swi tirhisa njhani swivutiso leswi pfunaka loko hi chumayela hi yindlu ni yindlu?

• Hi nga ti tirhisa njhani tinhlamuselo leti twisisekaka leswaku hi kandziyisa timfanelo ni tindlela ta Yehovha?

• Hi nga swi kuma kwihi swifaniso leswi fanelekaka?

[Swivutiso Swa Dyondzo]

 [Bokisi/Xifaniso lexi nga eka tluka 23]

Xana Wa Swi Tsundzuka Swifaniso Leswi?

Laha hansi ku ni swifaniso swi nga ri swingani leswi pfunaka. Ha yini u nga languti minkandziyiso leyi kutani u xiya ndlela leyi xifaniso xi yi kandziyiseke ha yona yinhla leyi ku buriwaka ha yona?

• Ku fana ni vachayi va swigubu kumbe vanhu lava chikisaka mabokisi elorini, leswaku vanhu va va ni vukati lebyinene swi ta titshega hi loko va ri ni munghana lonene wa vukati.—Xihondzo xo Rindza, May 15, 2001, tluka 16.

• Ku phofula mintlhaveko swi fana ni ku hoxa bolo. U nga yi hoxa kahle kumbe u yi hoxa hi matimba lerova yi vavisa munhu.—Xalamuka!, January 8, 2001, tluka 10.

• Ku dyondza ku kombisa rirhandzu swi fana ni ku dyondza ririmi lerintshwa.—Xihondzo xo Rindza, February 15, 1999, matluka 18, 22-3.

• Vungoma byi endla leswi fanaka ni leswi xinavetisi xi va tirhelaka ha yona vahloti. Xi koka nchumu lowu phasiwaka.—Vutivi Lebyi Yisaka eVuton’wini Lebyi Nga Heriki, tluka 111.

• Ndlela leyi Yesu a kutsulaka vatukulu va Adamu yi nga fanisiwa ni munhu la fuweke loyi a hakelaka xikweleti xa fektri (lexi endliweke hi mufambisi la nga tshembekiki) kutani a tlhela a pfula fektri, xisweswo ku vuyeriwa vathoriwa va yona vo tala.—Xihondzo xo Rindza, February 15, 1991, tluka 13.

• Leswi vanhu lava rhandzaka mintirho ya ntivo-vuxongi va endlaka matshalatshala lamakulu leswaku va lunghisa xifaniso lexi onhakeke ngopfu, Yehovha a nga hi rivalela hambi hi nga hetisekanga, u vona leswinene eka hina, kutani u ta hi vuyisela eka xiyimo xa ku va lava hetisekeke lexi lahliweke hi Adamu.—Xihondzo xo Rindza, February 15, 1990, tluka 22.

[Swifaniso leswi nga eka tluka 20]

Vakreste va ntiyiso i vadyondzisi va Rito ra Xikwembu

[Xifaniso lexi nga eka tluka 21]

Vakulu va nga ha tirhisa swivutiso ku pfuna vapfumeri-kulobye leswaku va kuma nchavelelo eRitweni ra Xikwembu