Xana Hi Fanele Hi Yi Languta Njhani Miringo?

MIRINGO! Un’wana ni un’wana u fanele a langutana na yona. Yi nga ha vangiwa hi timholovo, swiphiqo swa timali, vutomi byo lomba, ntshikilelo wa tintangha wa leswaku u endla leswo biha, nxaniso, ku tshama hi ri ni vukala-tlhelo kumbe ku lwisana ni ku gandzela swifaniso ni swilo swin’wana swo tala. Ku nga khathariseki leswaku hi langutana ni miringo ya njhani, hakanyingi yi hi endla hi vilela swinene. Xana hi nga langutana njhani na yona hilaha ku humelelaka? Xana ya hi pfuna?

Nseketelo Lowunene Ngopfu

Hosi Davhida wa khale u langutane ni miringo vutomi bya yena hinkwabyo, kambe u fe a tshembekile. Xana u swi kotise ku yini ku tiyisela? A a vulavula hi loyi a n’wi nyikaka matimba loko a ku: “Yehovha i Murisi wa mina. A ndzi nge pfumali nchumu.” Kutani u ye emahlweni a ku: “Hambiloko ndzi famba enkoveni wa ndzhuti lowukulu, a ndzi chavi nchumu xo biha, hikuva u na mina; nhonga ya wena ni nxongotelo wa wena i swilo leswi swi ndzi chavelelaka.” (Pisalema 23:1, 4) Ina, Yehovha i xihlovo xa nseketelo lowukulu. U sirhelele Davhida eminkarhini ya ntshikilelo lowukulu, naswona u tiyimisele ku hi sirhelela loko swi fanerile.

Hi nga wu kumisa ku yini nseketelo wa Yehovha? Bibele yi hi byela ndlela leyi hi nga wu kumaka ha yona, loko yi ku: “N’wina nantswani mi vona leswaku Yehovha hi lonene.” (Pisalema 34:8) Xolexo i xirhambo xa tintswalo, kambe xi vula yini? I xikhutazo xo tirhela Yehovha ni ku hanya hi ku pfumelelana ni ku rhandza ka yena. Ku hanya hi ndlela yoleyo swi vula ku titsona swin’wana. Minkarhi yin’wana ku nga hi tisela miringo—ku nga nxaniso ni gome. Kambe, lava va amukelaka xirhambo xa Yehovha hi mbilu hinkwayo a va fanelanga va tisola hikwalaho ka sweswo. Yehovha u ta va kombisa musa. U ta va kongomisa a tlhela a va khathalela hi tlhelo ra moya. U ta va tiyisa hi Rito ra yena, moya wa yena lowo kwetsima ni vandlha ra Vukreste loko va langutane ni miringo. Naswona eku heteleleni u ta va nyika vutomi lebyi nga heriki.—Pisalema 23:6; 25:9; Esaya 30:21; Varhoma 15:5.

Lava va endlaka xiboho xa nkoka xo tirhela Yehovha naswona va xi namarhela va kuma leswaku Yehovha u hetisisa switshembiso swa yena hinkwaswo. Leswi swi ve tano eka Vaisrayele lava landzeleke Yoxuwa ku ya eTikweni leri Tshembisiweke. Loko va tsemakanye Yordani, a va ta boheka ku tiyisela miringo, a va ta lwa tinyimpi naswona a va ta vona maxangu. Kambe  xitukulwana xexo xi tshame xi tshembekile ku tlula vatata wa xona, lava humeke aEgipta kutani va ya fela emananga. Hikwalaho, Yehovha u seketele lava tshembekaka naswona Bibele yi vule leswi landzelaka malunghana na vona loko Yoxuwa a fa: “Yehovha a va wisisa hinkwako-nkwako, hi ku landza hinkwaswo leswi a swi hlambanyeleke vatata wa vona . . . Ku hava xitshembiso lexi tsandzekeke eka switshembiso hinkwaswo leswinene leswi Yehovha a swi tshembiseke yindlu ya Israyele; hinkwaswo swi hetisekile.” (Yoxuwa 21:44, 45) Na hina, Yehovha a nga hi seketela minkarhi hinkwayo loko hi titshega hi yena hi ku helela loko hi langutane ni ndzingo.

Xana i yini lexi nga tsanisaka ku tshemba ka hina eka Yehovha? Yesu u boxe xin’wana xa swona a ku: “Ku hava loyi a nga vaka hlonga ra tihosi timbirhi . . . A mi nge vi hlonga ra Xikwembu ni ra Rifuwo.” (Matewu 6:24) Loko hi tshemba Yehovha, a hi nge lavi nsirhelelo laha vo tala emisaveni va wu lavaka kona, eka swilo leswi vonakaka. Yesu u laye valandzeri vakwe a ku: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana [swilo leswi vonakaka leswi bohaka] hinkwaswo mi ta engeteleriwa swona.” (Matewu 6:33) Mukreste loyi a tshamaka a ri ni vonelo ro ringanisela eka swilo leswi vonakaka naswona a rhangisaka Mfumo wa Xikwembu evuton’wini bya yena, u endla kahle. (Eklesiasta 7:12) A nga ha lahlekeriwa hi swo karhi. A nga ha boheka ku titsona swilo swin’wana leswi vonakaka. Kambe u ta vuyeriwa swinene. Naswona Yehovha u ta n’wi seketela.—Esaya 48:17, 18.

Leswi Miringo Yi Hi Dyondzisaka Swona

Ku hlawula ku ‘nantswa u vona leswaku Yehovha hi lonene,’ a swi vuli swona leswaku swi ta ku sirhelela eka swiyimo leswi nga rindzeriwangiki swa vutomi; kumbe ku hi sirhelela hi ku helela eka minhlaselo ya Sathana ni vanhu vakwe. (Eklesiasta 9:11) Hikwalaho, ku tshembeka ka Mukreste ni ku tiyimisela ka yena ku nga ha ringiwa. Ha yini Yehovha a tshika vagandzeri va yena va ringiwa? Muapostola Petro u nyike xivangelo xin’wana loko a tsala leswi: “Hambileswi sweswi mi vangeriweke gome hi miringo leyi hambaneke ku ringana nkarhinyana, loko swi fanerile, leswaku mfanelo leyi ringiweke ya ripfumelo ra n’wina, leyi nga ya risima lerikulu swinene ku tlula nsuku lowu lovaka hambiloko wu kamberiwe hi ndzilo, yi kumeka yi ri xivangelo xa ku vongiwa, ku vangamisiwa ni ku xiximiwa eku hlavuteriweni ka Yesu Kreste.” (1 Petro 1:6, 7) Ina, miringo yi hi nyika nkarhi wo kombisa ku tiya ka ripfumelo ra hina ni rirhandzu ra hina eka Yehovha. Naswona yi pfuna ku hlamula swihehlo ni mintlhontlho ya Sathana Diyavulosi.—Swivuriso 27:11; Nhlavutelo 12:10.

Miringo yi tlhela yi hi pfuna ku hlakulela timfanelo tin’wana ta Vukreste. Hi xikombiso, xiya marito ya mupisalema lama nge: “[Yehovha] wa n’wi vona la titsongahata; kambe la titlakusaka u n’wi tivela ekule.” (Pisalema 138:6) Vo tala va hina a va titsongahati hi ntumbuluko, kambe miringo yi nga hi pfuna leswaku hi hlakulela mfanelo yoleyo ya nkoka. Tsundzuka xiendlakalo xa le sikwini ra Muxe loko Vaisrayele van’wana va titwe va karhele hi ku dya manna siku ni siku. Entiyisweni, wolowo a ku ri ndzingo eka vona, hambileswi manna a ku ri swakudya swa singita. Xikongomelo xa ndzingo wolowo a ku ri yini? Muxe u va byele leswaku: ‘Yehovha u ku dyise manna emananga leswaku a ku tsongahata, nileswaku a ku ringa.’—Deteronoma 8:16.

Ku titsongahata ka hina na kona ku nga ha ringiwa. Njhani? Hi xikombiso, xana hi yi languta njhani mindzulamiso leyi endliwaka hi nhlengeletano? (Esaya 60:17) Xana hi wu seketela hi mbilu hinkwayo ntirho wo chumayela ni wo dyondzisa? (Matewu 24:14; 28:19, 20) Xana hi  hisekela ku amukela tinhlamuselo ta ntiyiso wa Bibele hilaha ti vekiwaka ha kona hi “hlonga ro tshembeka ni ro tlhariha”? (Matewu 24:45-47; Swivuriso 4:18) Xana hi lwisana ni ntshikilelo wo va ni nhundzu ni swiambalo leswi nga efexenini, kumbe ku va ni movha lowu nga efexenini? Munhu la titsongahataka u ta swi kota ku hlamula a ku ina, eka swivutiso leswi.—1 Petro 1:14-16; 2 Petro 3:11.

Miringo yi hi pfuna ku kombisa mfanelo yin’wana ya nkoka—ku nga ku tiyisela. Mudyondzisiwa Yakobo u te: “Swi tekeni hinkwaswo swi ri ntsako, vamakwerhu, loko mi langutana ni miringo yo hambana-hambana, hilaha mi tivaka hakona leswaku mfanelo leyi yi ringiweke ya ripfumelo ra n’wina yi vanga ku tiyisela.” (Yakobo 1:2, 3) Ku hlula miringo yo hlayanyana hi ndlela leyi humelelaka hi ku titshega swinene hi Yehovha swi endla leswaku munhu a tserhama ni ku tshembeka. Ka hi tiyisa leswaku hi lwisana ni minhlaselo ya nkarhi lowu taka ya Sathana, xikwembu lexi hlundzukeke xa misava leyi.—1 Petro 5:8-10; 1 Yohane 5:19; Nhlavutelo 12:12.

Hambeta U Va Ni Langutelo Leri Faneleke Hi Miringo

N’wana wa Xikwembu la hetisekeke, Yesu Kreste, u langutane ni miringo yo tala loko a ha ri laha misaveni naswona u vuyeriwe swinene leswi a yi tiyiseleke. Pawulo u tsale leswaku Yesu “u dyondze ku yingisa eka swilo leswi a xanisekeke ha swona.” (Vaheveru 5:8) Ku tshembeka ka yena ku kondza a fa ku tise ku dzuneka evitweni ra Yehovha naswona ku endle leswaku Yesu a kota ku nyikela nkoka wa vutomi byakwe lebyi hetisekeke byi va nkutsulo wa vanhu. Sweswo swi pfule ndlela eka lava nga ni ripfumelo eka Yesu leswaku va va ni ntshembo wa vutomi lebyi nga heriki. (Yohane 3:16) Leswi Yesu a tshameke a tshembekile ehansi ka ndzingo, sweswi i Muprista wa hina Lonkulu naswona i Hosi.—Vaheveru 7:26-28; 12:2.

Xana na hina hi ta vuyeriwa? Loko hi langutana ni miringo hi ku tshembeka hi ta kuma mikateko leyikulu. Eka lava nga ni ntshembo wa le tilweni, Bibele yi ri: “Wa tsaka munhu la hambetaka a tiyisela ndzingo, hikuva eku amukeriweni kakwe u ta kuma harhi ya vutomi, leyi Yehovha a yi tshembiseke lava hambetaka va n’wi rhandza.” (Yakobo 1:12) Lava nga ni ntshembo wa laha misaveni va tiyiseka leswaku loko va tiyisela hi ku tshembeka, va ta dya ndzhaka ya vutomi lebyi nga heriki laha misaveni eparadeyisini. (Nhlavutelo 21:3-6) Naswona xa nkoka swinene, ku tiyisela ka vona hi ku tshembeka swi tisa ku dzuneka evitweni ra Yehovha.

Loko hi ri karhi hi landzela minkondzo ya Yesu, hi nga tiyiseka leswaku miringo hinkwayo leyi hi langutanaka na yona eka mafambiselo lawa ya swilo hi ta yi hlula. (1 Vakorinto 10:13; 1 Petro 2:21) Njhani? Hi ku titshega hi Yehovha, loyi a nyikaka lava titshegaka hi yena “matimba lama tlulaka lama tolovelekeke.” (2 Vakorinto 4:7) Onge ripfumelo ra hina ri nga fana ni ra Yobo loyi hambi loko a tiyisele miringo yo tika a vuleke hi ku tiyiseka a ku: “Endzhaku ka loko xi ndzi ringile, ndzi ta huma ku fana ni nsuku.”—Yobo 23:10.

[Xifaniso lexi nga eka tluka 31]

Ku tshembeka ka Yesu loko a ringiwa ku tise ku dzuneka evitweni ra Yehovha. Onge na hina hi nga endla tano