“U Ndzi Yisa eMatini Yo Rhula”

LESWI etindhawini leti Bibele yi tsariweke eka tona a ku hisa swinene, tinyimpfu a ti fanele ti nwa mati siku rin’wana ni rin’wana. Hikwalaho, ntirho lowukulu wa murisi a ku ri ku nyika swifuwo swakwe mati. Minkarhi yin’wana varisi a va nyika swifuwo mati lama kiweke exihlobyeni, va ma chela eswitsengeleni leswaku tinyimpfu ti ta nwela eka swona. (Genesa 29:1-3) Kambe, hi nkarhi wa timpfula, laha ku nga ni swinambyana ni milambu leyikulu a ku ri ni ‘tindhawu to wisela leti nga ni mati yo tala.’—Pisalema 23:2.

Murisi lonene a a fanele a tiva tindhawu leti nga ni mati ti tlhela ti va ni madyelo lamanene ya ntlhambi wakwe. Loko a yi tiva kahle ndhawu, tinyimpfu takwe a ti nga ta sika. Davhida, loyi a heteke malembe yo tala a ri karhi a risa tinyimpfu eswitsungeni swa le Yudiya, u fanise nkongomiso wa Xikwembu wa moya ni wa murisi loyi a yisaka tinyimpfu takwe eka madyelo lamanene ni le matini lama hanyisaka. Hi ku ya hi vuhundzuluxeri byin’wana, Davhida u te: “U ndzi yisa ematini yo rhula.”—Pisalema 23:1-3, New International Version.

Endzhaku ka malembe yo tala, Yehovha u tirhise xifaniso lexi fanaka hi ku tirhisa muprofeta Ezekiyele. U tshembise ku hlengeleta vanhu va yena ematikweni lawa va hangalakeleke eka wona, ku fana ni murisi la hlengeletaka tinyimpfu takwe. U va tiyisekisile a ku: “Ndzi ta ti humesa . . . ndzi ti tisa emisaveni ya tona, ndzi ti wundlela etintshaveni ta Israyele, eswinambyanini.”—Ezekiyele 34:13.

Yehovha Xikwembu na yena u tiyimiserile ku nyika vanhu mati ya moya. Buku ya Nhlavutelo yi hlamusela “nambu wa mati ya vutomi,” lowu khulukaka wu huma exiluvelweni xa Xikwembu. (Nhlavutelo 22:1) Xirhambo xo nwa mati ya nambu lowu xi yisiwa eka vanhu hinkwavo. “Mani na mani la swi navelaka a [nga nwa] mati ya vutomi mahala.”—Nhlavutelo 22:17.

Mati lawa ya vutomi yo fanekisela ma yimela malunghiselelo ya Xikwembu yo nyika vanhu vutomi lebyi nga heriki. Un’wana ni un’wana a nga sungula ku nwa mati lawa hi ‘ku nghenisa vutivi bya Xikwembu xi ri xin’we ntsena xa ntiyiso ni hi loyi xi n’wi rhumeke, Yesu Kreste.’—Yohane 17:3.