“Tanani Eka Mina, . . . Ndzi Ta Mi Phyuphyisa”

Vantshwa Lava Fanaka Ni Mathonsi Ya Mberha Lama Phyuphyisaka

HANDLE ko kanakana, Yesu Kreste a a katsa ni valandzeri vakwe lavatsongo loko a ku: “Tanani eka mina, . . . ndzi ta mi phyuphyisa.” (Matewu 11:28) Loko vanhu va sungula ku tisa vana va vona eka yena, vadyondzisiwa va yena va ringete ku va sivela. Kambe Yesu u te: “Tshikani vana lavatsongo va ta eka mina; mi nga ringeti ku va sivela.” Hiloko Yesu “a angarha vana, a va katekisa.” (Marka 10:14-16) Swi le rivaleni leswaku Yesu a a teka vana va ri va risima.

Bibele yi vulavula hi majaha ni tintombhi to tshembeka, swin’we ni vantshwa ni vana lavatsongo, lava vekeke xikombiso lexinene emhakeni yo tirhela Xikwembu. Ebukwini ya Tipisalema ku vulavuriwa hi “ntlawa wa majaha” lowu phyuphyisaka ku fana ni mathonsi ya mberha. Ku tlhela ku vulavuriwa hi “majaha” ni “vanhwana” lava dzunisaka vito ra Yehovha.—Pisalema 110:3; 148:12, 13.

Ndhawu Leyi Vantshwa Va Nga Kulelaka Eka Yona

Swa fanela leswaku vantshwa va fanisiwa ni mathonsi ya mberha hikuva mberha yi fanisiwa ni ndzalo kumbe mikateko. (Genesa 27:28) Mathonsi ya mberha ma wa khwatsi, naswona ma phyuphyisa. Enkarhini lowu wa vukona bya Kreste, va tele vantshwa lava nga Vakreste lava tinyiketelaka hi ku swi rhandza. Ku fana ni mathonsi ya mberha lama phyuphyisaka, majaha ni tintombhi to tala, va tirhela Xikwembu va tlhela va pfuna vagandzeri-kulobye hi ku swi rhandza.—Pisalema 71:17.

Vantshwa lava nga Vakreste a va phyuphyisi vanhu van’wana ntsena; na vona va phyuphya loko va endla ntirho lowu. Nhlengeletano ya Xikwembu yi endla leswaku va kula kahle. Loko va tikhoma kahle, majaha ni tintombhi, va va ni vuxaka lebyikulu ni Xikwembu. (Pisalema 119:9) Evandlheni, va endla mintirho leyinene naswona va kuma vanghana lavanene—ku nga swilo leswi endlaka vutomi byi enerisa byi tlhela byi va ni xikongomelo.

‘Ku Hanyisa Ni Ku Phyuphyisa’

Xana vantshwa lava nga Vakreste va tivona va ri “mathonsi ya mberha”? Tania i wanhwana la hisekelaka mintirho ya le vandlheni naswona u heta tiawara to tlula 70 n’hweti na n’hweti entirhweni wo chumayela. Xana u titwa njhani yena? U ri: “Ndzi titwa ndzi phyuphyile naswona ndzi tsakile. Ku tiva Yehovha ni ku va exikarhi ka nhlengeletano yakwe swa ndzi ‘hanyisa ni ku ndzi phyuphyisa.’”—Swivuriso 3:8.

Ariel, muntshwa un’wana la nga mutirheli wa nkarhi hinkwawo, wa swi tlangela swakudya swa moya leswi a swi kumaka evandlheni. U ri: “Loko ndzi ya eminhlanganweni ya Vukreste, emintsombanweni ni le tinhlengeletanweni ndza tiphina hi ku dya etafuleni ra moya ra  Yehovha, leswi swa ndzi phyuphyisa emoyeni. Naswona swa ndzi tsakisa ku tiva leswaku emisaveni hinkwayo, ndzi ni vatirhi-kulorhi.” Loko a hlamusela xihlovo-nkulu xa ku enerisaka ka yena u ri: “Swa phyuphyisa ku va munghana wa Yehovha, ngopfu-ngopfu loko ndzi vona kumbe ku twa ndlela leyi mafambiselo lawa ma va vavisaka ha yona vanhu.”—Yakobo 2:23.

Abishai u ni malembe ya 20 naswona i muchumayeri wa mahungu lamanene wa nkarhi hinkwawo, hi hala tlhelo i nandza wa vutirheli evandlheni. Yena u hlamusela mhaka yakwe hi ndlela leyi: “Ndza tsaka leswi ndzi tivaka ndlela yo langutana ni swiphiqo leswi vantshwa va hlangavetanaka na swona namuntlha. Ntiyiso wa Bibele wu ndzi pfunile leswaku ndzi tiva leswi ndzi faneleke ndzi swi endla leswaku ndzi kota ku tirhela Yehovha hi mbilu hinkwayo.”

Loko a ha ku nghena emalembeni ya kondlo-a-ndzi-dyi, Antoine a a ri ni ximbilwa-mbilwana. U tshame a ba xichudeni-kulobye hi xitulu, naswona a tlhava un’wana hi penisele. Antoine a a nga ri munhu wo tolovelana na yena! Kambe ndzetelo wa Bibele wu byi cincile vumunhu byakwe. Leswi sweswi a nga ni malembe ya 19 naswona a nga nandza wa vutirheli evandlheni, u ri: “Ndzi nkhensa Yehovha hi ku ndzi pfumelela leswaku ndzi n’wi tiva ni ku ndzi pfuna leswaku ndzi tikhoma ni ku cinca mahanyelo ya mina. Leswi swi ndzi pfune leswaku ndzi papalata swiphiqo swo tala.”

Vanhu van’wana va ri xiya langutelo lerinene leri vantshwa lava nga Vakreste va nga na rona. Matteo i muntshwa la nga Mbhoni wa le Italiya. Mudyondzisi wakwe u endle xiboho xa leswaku un’wana ni un’wana la nga ta rhukana etlilasini u fanele a hakerisiwa mali yo karhi. Hi ku famba ka nkarhi, vana va kombele leswaku nawu lowu wu herisiwa, hikuva va vule leswaku a “swi koteki leswaku munhu a nga vulavuli nhlambha.” Matteo wa hlamusela: “Kambe thicara u vule leswaku swa koteka, naswona u boxe vito ra mina, tanihi leswi ndzi nga un’wana wa Timbhoni ta Yehovha, a ndzi bumabumela emahlweni ka tlilasi hinkwayo hikwalaho ka leswi ndzi nga yi hoxiki nhlambha loko ndzi vulavula.”

Etlilasini leyi nga lawulekiki ya le Thailand, mudyondzisi u vitane Racha wa malembe ya 11 hi vukhale a ya yima emahlweni ka tlilasi kutani a n’wi bumabumela hikwalaho ka mahanyelo yakwe, a ku: “Hikwalaho ka yini hinkwenu mi nga tekeleli yena? Wa ti hisekela tidyondzo takwe naswona u tikhoma kahle.” Hiloko a byela swichudeni leswi a ku: “Ndzi anakanya leswaku mi fanele mi va Timbhoni ta Yehovha ku fana na Racha, leswaku mi ta dyondza ku tikhoma kahle.”

Swa tsakisa ku vona vantshwa va magidi-gidi lava nga Vakreste, va hambeta va dyondza ha Yehovha ni ku endla ku rhandza kakwe. Vantshwa vo tano lavanene va va ni vutlhari onge i vanhu lavakulu. Xikwembu xi nga va pfuna leswaku swilo swi va fambela kahle evuton’wini sweswi, xi tlhela xi va nyika vumundzuku lebyi vangamaka emisaveni leyintshwa leyi taka. (1 Timotiya 4:8) Exikarhi ka mafambiselo lawa ya swilo lama sweleke hi tlhelo ra moya, lama nga ni vantshwa lava nga enerisekiki nikatsongo ni lava pfilunganyekeke, vantshwa lava va endla leswaku vutomi byi tsakisa!