Hlakulela Ku Yingisa Tanihi Leswi Makumu Ma Tshinelaka
Hlakulela Ku Yingisa Tanihi Leswi Makumu Ma Tshinelaka
“Vanhu va ta yingisa [Xilo].”—GENESA 49:10.
1. (a) Enkarhini lowu hundzeke, xana hakanyingi ku yingisa Yehovha a swi vula yini? (b) Hi byihi vuprofeta lebyi Yakobe a byi vuleke malunghana ni ku yingisa?
KU YINGISA Yehovha hakanyingi swi vula ku yingisa varhumiwa va yena. Van’wana va varhumiwa va kona a ku ri tintsumi, vapatriyaka, vaavanyisi, vaprista, vaprofeta ni tihosi. Xiluvelo xa tihosi ta Israyele a xi vitaniwa xiluvelo xa Yehovha. (1 Tikronika 29:23) Kambe khombo ra kona, vafumi vo tala va le Israyele a va xi yingisanga Xikwembu, va tivangele makhombo swin’we ni tiko. Kambe Yehovha a nga tshikanga vanhu va yena lava tshembekaka va nga ri na ntshembo; u va chavelele hi ku va tshembisa leswaku u ta veka Hosi leyi tshembekaka, leyi lavo lulama va nga ta tsakela ku yi yingisa. (Esaya 9:6, 7) Mupatriyaka Yakobe loyi a a ri ekusuhi ni ku fa, u profete hi mufumi loyi a a ta vekiwa a ku: “Nhonga ya vuhosi a yi nge hambukisiwi eka Yuda hambi ku ri nhonga ya ndhuna emilengeni yakwe, kukondza ku fika Xilo; naswona vanhu va ta yingisa yena.”—Genesa 49:10.
2. Xana “Xilo” swi vula yini, naswona u ta fuma vamani?
2 “Xilo” i rito ra Xiheveru leri vulaka leswaku “Loyi Swi Humaka Eka Yena.” Ina, Xilo u ta va ni mfanelo ya vuhosi, leyi fanekiseriwaka hi nhonga ya vuhosi, ni matimba yo lerisa lama yimeriwaka hi nhonga ya ndhuna. Ku tlula kwalaho, a nge fumi vatukulu va Yakobe ntsena kambe u ta fuma ni “vanhu” hinkwavo. Leswi swi pfumelelana ni xitshembiso xa Yehovha eka Abrahama lexi nge: “Mbewu ya wena yi ta lawula nyangwa ya valala va yona. Tinxaka hinkwato ta misava ti ta tikatekisa hi mbewu ya wena.” (Genesa 22:17, 18) Hi 29 C.E. Yehovha u kombise leswaku “mbewu” leyi i mani, loko a tote Yesu wa Nazareta hi moya lowo kwetsima.—Luka 3:21-23, 34; Vagalatiya 3:16.
Mfumo Wo Sungula Wa Yesu
3. Xana Yesu u kume vulawuri byihi loko a tlhandlukela etilweni?
3 Loko Yesu a tlhandlukela etilweni, a nga fikanga hi ku teka nhonga ya vuhosi kutani a sungula ku fuma vanhu emisaveni. (Pisalema 110:1) Hambiswiritano, u amukele “mfumo” swin’we ni lava n’wi yingisaka. Muapostola Pawulo u hlamusele mfumo wolowo loko a tsala a ku: “[Xikwembu xi] kutsule [Vakreste lava totiweke] eka vulawuri bya munyama kutani [xi] hi hundzisela emfun’weni wa N’wana wa [xo]na loyi [xi] n’wi rhandzaka.” (Vakolosa 1:13) Ku ponisiwa loku ku sungule hi Pentekosta ya 33 C.E. loko valandzeri va Yesu vo tshembeka va chululeriwe moya lowo kwetsima.—Mintirho 2:1-4; 1 Petro 2:9.
4. Xana vadyondzisiwa va Yesu vo sungula va ku kombise hi tindlela tihi ku tshembeka ka vona, naswona Yesu u va vitana yini tanihi ntlawa?
4 Tanihi “vayimeri lava khomelaka Kreste,” hi ku yingisa, vadyondzisiwa lava totiweke hi moya va sungule ku hlengeleta van’wana lava va nga ta va “vaaki-kulobye” eka mfumo wolowo wa moya. (2 Vakorinto 5:20; Vaefesa 2:19; Mintirho 1:8) Ku engetela kwalaho, va fanele va tshama va ri karhi va “hlangana hilaha ku faneleke emianakanyweni yin’we ni le ndleleni yin’we ya ku ehleketa” leswaku va ta amukeriwa hi Hosi ya vona Yesu Kreste. (1 Vakorinto 1:10) Tanihi ntlawa, va vumbe “hlonga ro tshembeka ni ro tlhariha” kumbe ntlawa wa mulanguteri wo tshembaka.—Matewu 24:45; Luka 12:42.
Ku Katekisiwa Hikwalaho Ko Yingisa “Mulanguteri” Wa Xikwembu
5. Xana Yehovha u va dyondzise njhani vanhu vakwe ku sukela khale ka khaleni?
5 Minkarhi hinkwayo Yehovha u nyika vanhu va yena vadyondzisi. Hi xikombiso, loko Vayuda va vuyile eBabilona, Ezra ni vavanuna van’wana lava fanelekaka va hlayele vanhu Nawu wa Xikwembu va tlhela va veka nawu wolowo ‘erivaleni, va wu hlamusela va endla leswaku Rito ra Xikwembu ri twisisiwa.’—Nehemiya 8:8.
6, 7. Xana ntlawa wa hlonga wu swi phamela njhani swakudya swa moya leswi nga enkarhini hi ku tirhisa Huvo leyi Fumaka, naswona ha yini swi fanela ku titsongahatela ntlawa lowu wa hlonga?
6 Hi lembe-xidzana ro sungula, loko ku vutisiwa mhaka ya ku yimba hi 49 C.E., huvo leyi fumaka ya ntlawa wolowo wo sungula wa hlonga, yi khongelele nkongomiso loko yi ri karhi yi kambisisa mhaka yoleyo, naswona yi fikelele xiboho lexi sekeriweke eMatsalweni. Loko va tivisa xiboho xa vona hi papila, mavandlha ma landzele nkongomiso wolowo kutani Xikwembu xi ma katekisa swinene. (Mintirho 15:6-15, 22-29; 16:4, 5) Ku fana ni le minkarhini ya manguva lawa, hlonga ro tshembeka ri tirhise Huvo leyi Fumaka leswaku yi hlamusela timhaka ta nkoka to tanihi vukala-tlhelo bya Vukreste, ku kwetsima ka ngati ni ku tirhisiwa ka swidzidzirisi ni fole. (Esaya 2:4; Mintirho 21:25; 2 Vakorinto 7:1) Yehovha u katekise vanhu vakwe hikwalaho ka leswi va yingisaka Rito ra yena swin’we ni hlonga ro tshembeka.
7 Hi ku titsongahatela ntlawa wa hlonga, vanhu va Xikwembu va tlhela va kombisa ku titsongahata ka vona eka N’wini, ku nga Yesu Kreste. Ku titsongahata ko tano i ka nkoka swinene ni le minkarhini ya manguva lawa hikwalaho ka leswi Yesu a lawulaka hinkwako, hilaha Yakobe a profeteke hakona loko a ri kusuhi ni ku fa.
Xilo U Hundzuka Mufumi La Fanelekaka Wa Misava
8. Xana vulawuri bya Kreste byi ndlandlamuxiwe njhani naswona rini?
8 Vuprofeta bya Yakobe byi vule leswaku Xilo u ta ‘yingisiwa hi vanhu.’ Swi le rivaleni leswaku Kreste a nge fumi Vaisrayele va moya ntsena. Xana i vamani van’wana lava a nga ta va fuma? Nhlavutelo 11:15 ya hlamula: “Mfumo wa misava se i mfumo wa Hosi ya hina ni wa Kreste wa yona, kutani u ta va hosi hi masiku ni masiku.” Bibele yi paluxa leswaku Yesu u amukele vulawuri byebyo eku heleni ka “minkarhi ya nkombo” leyi ku profetiweke ha yona—ku nga “nkarhi lowu vekiweke wa matiko”—hi 1914. * (Daniyele 4:16, 17; Luka 21:24) Hi lembe rero, “vukona” bya Kreste lebyi nga vonakiki tanihi Hosi ya Vumesiya byi sungurile, swin’we ni nkarhi wa yena wo “famba [a] ya hlula exikarhi ka valala va [yena].”—Matewu 24:3; Pisalema 110:2.
9. Xana Yesu u endle yini loko a kuma Mfumo wakwe, naswona leswi swi endle leswaku vanhu va langutana na yini, ngopfu-ngopfu vadyondzisiwa vakwe?
9 Xo sungula lexi Yesu a xi endleke loko a kume matimba ya vuhosi a ku ri ku cukumeta munhu loyi a nga yingisiki ku tlula vanhu hinkwavo—ku nga Sathana—swin’we ni madimona yakwe “ehansi emisaveni.” Ku sukela kwalaho, mimoya leyi yo homboloka yi endle leswaku swi tika swinene ku yingisa Yehovha naswona yi tlhele yi vangela vanhu makhombo lamakulu. (Nhlavutelo 12:7-12; 2 Timotiya 3:1-5) Kahle-kahle, lava Sathana a lwaka swinene na vona i vatotiwa va Yehovha, “lava hlayisaka swileriso swa Xikwembu naswona va nga ni ntirho wa ku nyikela vumbhoni mayelana na Yesu” swin’we ni vanghana va vona va “tinyimpfu tin’wana.”—Nhlavutelo 12:17; Yohane 10:16.
10. I vuprofeta byihi bya Bibele lebyi hetisekaka, lebyi tiyisekisaka leswaku Sathana u ta tsandzeka ku lwisana ni Vakreste va ntiyiso?
10 Hambiswiritano, Sathana u ta tsandzeka hikuva leri i ‘siku ra Hosi’ naswona a xi kona lexi nga sivelaka Yesu leswaku a “hetisa ku hlula ka yena.” (Nhlavutelo 1:10; 6:2) Hi xikombiso, u ta tiyisekisa ku funghiwa ka Vaisrayele va moya vo hetelela va 144 000. U ta tlhela a sirhelela “ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlavutelo 7:1-4, 9, 14-16) Hambiswiritano, ku hambana ni vanghana va wona lava totiweke, ntshungu lowukulu wu ta fumiwa hi Yesu wu ri laha misaveni. (Daniyele 7:13, 14) Vukona bya vona laha misaveni namuntlha byi nyikela vumbhoni lebyi tiyeke bya leswaku Xilo i Mufumi hakunene ehenhla ka “mfumo wa misava.”—Nhlavutelo 11:15.
Sweswi I Nkarhi Wo “Yingisa Mahungu Lamanene”
11, 12. (a) Xana ku ta pona vamani ntsena loko ku lovisiwa mafambiselo lawa ya swilo? (b) Hi yihi mikhuva leyi lava kokaka “moya wa misava” va vaka na yona?
11 Hinkwavo lava lavaka vutomi lebyi nga heriki va fanele va dyondza ku yingisa, hikuva Bibele yi swi veka erivaleni leswaku “lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu” a va nge ri poni siku ra Xikwembu ro rihisela. (2 Vatesalonika 1:8) Hambiswiritano, xiyimo xa sweswi xo homboloka ni moya wa xona wo xandzukela milawu ni misinya ya milawu ya Bibele xi endla leswaku swi tika ku yingisa mahungu lamanene.
12 Moya lowu wo lwisana ni Xikwembu, Bibele yi wu vula “moya wa misava.” (1 Vakorinto 2:12) Loko a hlamusela vuyelo bya wona evanhwini, muapostola Pawulo u tsalele Vakreste va lembe-xidzana ro sungula va le Efesa, a ku: “Leswi mi tshameke mi famba eka swona hi ku ya hi mafambiselo ya swilo ya misava leyi, hi ku ya hi mufumi wa vulawuri bya moya, moya lowu sweswi wu tirhaka eka vana lava nga yingisiki. Ina, exikarhi ka vona hinkwerhu hi tshame hi tikhoma hi ku pfumelelana ni ku navela ka nyama ya hina, hi endla swilo leswi rhandziwaka hi nyama ni miehleketo, naswona hi ntumbuluko a hi ri vana va ku kombisiwa vukarhi ku fana ni lavan’wana hinkwavo.”—Vaefesa 2:2, 3.
13. Xana Vakreste va nga wu hlula njhani moya wa misava, naswona vuyelo bya kona lebyinene ku ta va byihi?
13 Lexi tsakisaka, Vakreste va le Efesa a va hambetanga va ri mahlonga ya moya wolowo wa ku nga yingisi. Ku ri na sweswo, va hundzuke vana va Xikwembu lava yingisaka hi ku titsongahatela moya wa xona kutani va tshovela mihandzu ya wona yo tala leyinene. (Vagalatiya 5:22, 23) Hilaha ku fanaka namuntlha, moya wa Xikwembu—ku nga matimba lamakulu swinene evuakweni hinkwabyo—wu pfuna vanhu va timiliyoni leswaku va yingisa Yehovha, leswaku va ta “va ni ku tiyiseka loku heleleke ka ntshembo ku fika emakumu.”—Vaheveru 6:11; Zakariya 4:6.
14. Xana Yesu u va xalamukise njhani Vakreste hinkwavo lava hanyaka emasikwini yo hetelela malunghana ni swilo swo karhi leswi a swi ta ringa ku yingisa ka vona?
14 Nakambe tsundzuka leswaku hi ni nseketelo lowukulu wa Xilo, loyi yena ni Tata wakwe va nga ta ka va nga pfumeleli nala—dimona kumbe munhu wa nyama—leswaku a ringa ku yingisa ka hina ku tlula leswi hi nga swi tiyiselaka. (1 Vakorinto 10:13) Entiyisweni, leswaku a hi pfuna enyimpini ya hina ya moya, Yesu u hlamusele swiphiqo swo karhi swo hlayanyana leswi hi nga ta langutana na swona emasikwini lawa ya makumu. Sweswo u swi hlamusele hi ku tirhisa mapapila ya nkombo, lawa a ma hundziseleke eka muapostola Yohane hi xivono. (Nhlavutelo 1:10, 11) Entiyisweni, a ma tamele ndzayo ya nkoka leyi yaka eka Vakreste va le nkarhini wolowo, kambe wona ma tirha ngopfu “esikwini ra Hosi” leri sunguleke hi 1914. Hikwalaho, swa fanela leswaku hi nyikela nyingiso eka marungula lawa! *
Papalata Ku Honisa Swilo, Mahanyelo Yo Biha Ni Ku Hlongorisa Swilo Leswi Vonakaka
15. Ha yini hi fanele hi tivonela eka xiphiqo lexi weleke vandlha ra le Efesa, naswona sweswo hi nga swi endlisa ku yini? (2 Petro 1:5-8)
15 Papila ro sungula ra Yesu a ri ya evandlheni ra le Efesa. Endzhaku ko bumabumela vandlha hikwalaho ka ku tiyisela ka rona, Yesu u te: “Nilokoswiritano, ndzi ni mhaka na wena, ya leswaku u lahle rirhandzu leri a wu ri na rona eku sunguleni.” (Nhlavutelo 2:1-4) Namuntlha,Vakreste van’wana lava tshameke va hiseka a va ha rhandzi Xikwembu hilaha va tshameke va xi rhandza hakona. Ku hela ka rirhandzu rolero ku nga tsanisa vuxaka bya munhu ni Xikwembu naswona ku fanele ku hatla ku lulamisiwa. Xana rirhandzu rolero ri nga tlhela ri pfuxetiwa njhani? Hi ku dyondza Bibele nkarhi na nkarhi, ku ya eminhlanganweni, ku khongela ni ku anakanyisisa. (1 Yohane 5:3) I ntiyiso, leswi swi lava ‘matshalatshala ya ku gingiriteka,’ kambe swi fanerile hakunene. (2 Petro 1:5-8) Loko u tikambisise hi ku tshembeka ivi u kuma leswaku rirhandzu ra wena ri horile, kutani lunghisa xiyimo hi ku hatlisa, u yingisa xikhutazo xa Yesu lexi nge: “Tsundzuka lomu u weke kona, kutani u hundzuka, u endla swiendlo swo sungula.”—Nhlavutelo 2:5.
16. I minkucetelo yihi leyi a yi ri ni khombo hi tlhelo ra moya leyi a yi ri kona evandlheni ra le Pergamo ni ra le Tiyatira, naswona ha yini marito ya Yesu lawa a ma tsaleleke mavandlha wolawo ma fanerile namuntlha?
16 Vakreste va le Pergamo ni le Tiyatira va bumabumeriwile hikwalaho ka vutshembeki, ku tiyisela ni ku hiseka ka vona. (Nhlavutelo 2:12, 13, 18, 19) Kambe, a va kuceteriwa hi van’wana lava a va ri ni moya wo biha wa Balama na Yezabele, lava hikwalaho ko tikhoma loko biha hi tlhelo ra rimbewu na hi ku gandzela Bali va veke ni nkucetelo wo biha eka Vaisrayele va khale. (Tinhlayo 31:16; 1 Tihosi 16:30, 31; Nhlavutelo 2:14, 16, 20-23) Kambe ku vuriwa yini hi nkarhi wa hina—“esikwini ra Hosi”? Xana minkucetelo leyi fanaka yo biha ya ha ri kona? Ina, hikuva ku tikhoma loko biha hi kona ku vangelaka leswaku vanhu vo tala va susiwa evandlheni exikarhi ka vanhu va Xikwembu. Hikwalaho, i swa nkoka swinene leswaku hi papalata ku endla xinghana ni vanhu hinkwavo—endzeni ni le handle ka vandlha—lava nga ni nkucetelo wo biha wa mahanyelo. (1 Vakorinto 5:9-11; 15:33) Lava va lavaka ku va vafumiwa va Xilo lava yingisaka, va ta tlhela va papalata vuhungasi lebyi kanakanisaka ni swifaniso swo naveta rimbewu leswi nga etibukwini ni leswi nga eka Internet.—Amosi 5:15; Matewu 5:28, 29.
17. Xana langutelo ra vanhu va le Sarda ni va le Lawodikiya a ri hambana njhani ni leswi Yesu a a xi languta ha yona xiyimo xa vona xa moya?
17 Evandlheni ra le Sarda ku lo bumabumeriwa vanhu va nga ri vangani. A ri ri ni “vito,” kumbe xivumbeko xa leswaku ra hanya, kambe a ri nga ri na mhaka na swilo swa moya lerova eka Yesu a ri “file.” Mahungu lamanene a va ma yingiselela ku hetisa nawu ntsena. Xolexo a xi ri xihehlo hakunene! (Nhlavutelo 3:1-3) Vandlha ra le Lawodikiya na rona a ri ri exiyin’weni lexi fanaka. A ri tibuma hi rifuwo ra rona ra swilo leswi vonakaka, ri ku “ndzi fuwile,” kambe eka Kreste a ri ‘dyisa mbitsi ni ku twisa vusiwana naswona a ri ri xisiwana, ri fe mahlo naswona ri swerile.’—Nhlavutelo 3:14-17.
18. Hi nga swi papalata njhani ku va lava kufumelaka hi tlhelo ra moya ematihlweni ya Xikwembu?
18 Namuntlha, Vakreste van’wana lava tshameke va tshembeka a va ha yingisi. Kumbexana va pfumelele moya wa misava leswaku wu heta ku hiseka ka vona, xisweswo va va ni langutelo ro kufumela hi tlhelo ra moya eka dyondzo ya Bibele, xikhongelo, minhlangano ya Vukreste ni le nsin’wini. (2 Petro 3:3, 4, 11, 12) I swa nkoka swinene leswaku vanhu vo tano va yingisa Kreste hi ku tivekela rifuwo ra moya—ina, va “xava nsuku lowu tengisiweke hi ndzilo eka [Kreste]”! (Nhlavutelo 3:18) Rifuwo ro tano ra xiviri ri katsa ku va la ‘fuweke hi mintirho leyinene, u hanana u tlhela u tiyimisela ku avelana ni van’wana.’ Loko hi veka xuma eka swilo leswi swa risima, hi “tivekela hi ku hlayiseka masungulo lamanene ya nkarhi lowu taka, leswaku [hi] ta khomelela swinene evuton’wini bya xiviri.”—1 Timotiya 6:17-19.
Va Bumabumeriwile Hikwalaho Ka Ku Yingisa Ka Vona
19. I swibumabumelo ni swikhutazo swihi leswi Yesu a swi nyikeke Vakreste va le Smirna ni va le Filadelfiya?
19 Vandlha ra le Smirna ni ra le Filadelfiya a ma ri xikombiso lexinene xa ku yingisa, hikuva Yesu a nga ma tshinyanga loko a ma tsalela mapapila. Va le Smirna u va byele leswi: “Ndzi tiva nhlomulo ni vusiwana bya wena—kambe u fuwile.” (Nhlavutelo 2:9) A va hambana ni va le Lawodikiya lava a va tibuma hi rifuwo ra misava kasi kahle-kahle a va ri swisiwana. Ina, Diyavulosi a a nga tsaki loko a vona munhu a tshembeka a tlhela a yingisa Kreste. Hikwalaho, Yesu u tsundzuxile: “Mi nga chavi swilo leswi mi nga ta xaniseka ha swona ku nga ri khale. Maswivo! Diyavulosi u ta tama a hoxa van’wana va n’wina ekhotsweni leswaku mi ringiwa hi ku helela, ni leswaku mi va ni nhlomulo ku ringana masiku ya khume. Tikombiseni mi tshembekile ku ya fikela eku feni, kutani ndzi ta mi nyika harhi ya vutomi.” (Nhlavutelo 2:10) Hilaha ku fanaka, Yesu u bumabumele va le Filadelfiya a ku: “U hlayise rito ra mina [kumbe u ndzi yingisile], a wu tiendlanga la nga tshembekangiki evitweni ra mina. Ndza ta hi ku hatlisa. Tama u khoma swi tiya leswi u nga na swona, leswaku harhi ya wena yi nga tekiwi hi munhu.”—Nhlavutelo 3:8, 11.
20. Vanhu va timiliyoni namuntlha va ri hlayise njhani rito ra Yesu, naswona va ri hlayise ehansi ka swiyimo swa njhani?
20 “Esikwini ra Hosi” leri sunguleke hi 1914, masalela lama tshembekaka ni vanakulobye va wona va tinyimpfu tin’wana, lava sweswi va fikaka eka timiliyoni, na vona va hlayise rito ra Yesu hi ku hiseka evutirhelini na hi ku tshama va tshembekile. Ku fana ni vamakwavo va vona va lembe-xidzana ro sungula, van’wana va xanisiwile hikwalaho ko yingisa Kreste va tlhela va pfaleriwa emakhotsweni ni le tikampeni. Van’wana va hlayise rito ra Yesu hi ku tshama va ri ni ‘tihlo ro olova,’ hambiloko va ri karhi va vona vanhu va ri karhi va fuwa ni ku va ni makwanga. (Matewu 6:22, 23) Ina, minkarhi hinkwayo, Vakreste va ntiyiso va hambeta va tsakisa mbilu ya Yehovha hikwalaho ka leswi va n’wi yingisaka.—Swivuriso 27:11.
21. (a) Hi byihi vutihlamuleri bya moya lebyi ntlawa wa hlonga wu nga ta hambeta wu byi hetisisa? (b) Hi nga swi kombisa njhani leswaku ha swi lava hakunene ku yingisa Xilo?
21 Leswi se hi tshinelelaka nhlomulo lowukulu, “hlonga ro tshembeka ni ro tlhariha” ri tshama ri tiyimisele ku yingisa N’wini wa rona Kreste. Ku yingisa koloko ku katsa ku lunghiselela vandyangu wa Xikwembu swakudya swa moya leswi nga enkarhini. Hikwalaho a hi hambeteni hi tlangela nhlengeletano leyinene leyi kongomisiwaka hi Yehovha ni leswi yi hi phamelaka swona. Loko hi endla tano, hi ta va hi kombisa leswaku ha titsongahata eka Xilo, loyi a nga ta nyika vanhu hinkwavo lava n’wi yingisaka vutomi lebyi nga heriki.—Matewu 24:45-47; 25:40; Yohane 5:22-24.
[Tinhlamuselo ta le hansi]
^ par. 8 Leswaku u kuma nhlamuselo ya “minkarhi ya nkombo,” vona ndzima 10 ya buku leyi nge Vutivi Lebyi Yisaka eVuton’wini Lebyi Nga Heriki, leyi kandziyisiweke hi Timbhoni ta Yehovha.
^ par. 14 Leswaku u kuma vuxokoxoko byo tala malunghana ni mapapila hinkwawo ya nkombo, hi kombela u vona buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! leyi kandziyisiweke hi Timbhoni ta Yehovha, u sukela eka tluka 33.
Wa Tsundzuka Xana?
• Hi ku ya hi vuprofeta lebyi vuriweke hi Yakobe loko a ri kusuhi ni ku fa, xana Yesu a a ta endla yini?
• Hi nga swi kombisa njhani leswaku hi teka Yesu a ri Xilo, naswona i moya wihi lowu hi faneleke hi wu papalata?
• Hi yihi ndzayo leyi tirhaka esikwini ra hina leyi kumekaka emapapileni lama yaka emavandlheni ya nkombo ya le ka Nhlavutelo?
• Hi nga va tekelela hi tindlela tihi vanhu lava a va ri evandlheni ra le Smirna ni ra le Filadelfiya wa khale?
[Swivutiso Swa Dyondzo]
[Swifaniso leswi nga eka tluka 18]
Yehovha wa va katekisa vanhu vakwe loko va yingisa “mulanguteri” la tshembekaka
[Xifaniso lexi nga eka tluka 19]
Nkucetelo wa Sathana wu endla leswaku swi tika ku yingisa Xikwembu
[Swifaniso leswi nga eka tluka 21]
Vuxaka lebyi tiyeke na Yehovha bya hi pfuna leswaku hi n’wi yingisa