Xiviko Xa Vahuweleri Va Mfumo

Holo Ya Mfumo Yi Nyikiwa Mendlele

VAHOLOBYE va Mbango va le Finland, va vitane lembe ra 2000 leswaku i “Lembe ra ku Lunghisa Rivala.” Un’wana wa vahleri u vule leswaku “xikongomelo xa ku va ku hlawuriwe nhloko-mhaka ya ku lunghisa rivala hileswaku hinkwerhu hi tsundzuxiwa hi ndlela leyi tindhawu ta rihlaza ti byi khumbaka ha yona vutomi bya hina bya siku ni siku swin’we ni ku hi nyika ntsako.”

Hi January 12, 2001, hofisi ya rhavi ya Timbhoni ta Yehovha ya le Finland yi kume papila leri humaka eka Finnish Association of Landscape Industries. Papila leri ri hlamusele leswaku Holo ya Mfumo ya Timbhoni ta Yehovha ya le Tikkurila yi nyikiwe yin’wana ya timendlele ta ku lunghisiwa ka rivala hikwalaho ka ndlela leyi ti ri lunghiseke ha yona. Papila ri tlhele ri vula leswaku “rivala ra kona ra tsakisa naswona ri tshama ri sasekile swinene hi ximumu na hi vuxika.”

Timbhoni ta Yehovha ti nyikiwe mendlele leyi le Hotela ya Rosendahl eTampere, le Finland, laha a ku ri ni swidyondzeki ni van’wamabindzu va 400. Eka swiviko swa mahungu, Finnish Association of Landscape Industries yi tlhele yi humesa xihloko lexi nga te: “Etindhawini to hambana-hambana laha tikweni, Tiholo ta Mfumo ta Timbhoni ta Yehovha minkarhi hinkwayo ti akiwe hi ndlela yo saseka. Ndlela leyi rivala ri khathaleriwaka ha yona ri koka mahlo ya un’wana ni un’wana la hundzaka hi ndlela. Holo ya Mfumo ya le Tikkurila hi yin’wana ya swikombiso swa rivala ro xonga. Muako wa holo ni rivala ra kona swi komba ku rhula ni ku ringanisela ka vona.”

Le Finland ku ni Tiholo ta Mfumo ta 233, to tala ta tona ti ni rivala ro xonga. Kambe, lexi sasekisaka tindhawu leti hakunene, hileswi ti nga xivindzi xa vugandzeri bya ntiyiso ni xa laha ku dyondziwaka kona Bibele. Eka Timbhoni ta Yehovha to tlula tsevu wa timiliyoni emisaveni hinkwayo, Holo ya Mfumo—ya xiyimo xa le henhla kumbe ya xiyimo xa le hansi—i ndhawu leyi rhandzekaka hakunene. Hi swona swi endlaka ti hisekelaka ku yi khathalela swinene. Tinyangwa ta Tiholo ta Mfumo ti pfulekele mani na mani endhawini ya ka n’wina!