Nchavelelo Hi Minkarhi Ya Nkitsikitsi

MASIKU lawa mahungu a ya chaveleli nikatsongo. Munhu un’wana u tsarile: “Swiendlakalo swa masiku lawa swi chavisa ngopfu lerova munhu u fanele a kanya mbilu loko a lava ku languta mahungu ya awara ya tsevu.” Misava yi taleriwe hi nyimpi, swiendlo swo chavisa, ku xaniseka, vugevenga ni vuvabyi—ku nga swilo swo biha leswi nga hi hlaselaka ku nga ri khale, kumbe leswi se swi hi hlaseleke.

Bibele yi xi boxe hi ku kongoma xiyimo lexi ka ha ri emahlweni. Loko a vulavula hi nkarhi wa hina, Yesu u vule leswaku ku ta va ni tinyimpi letikulu, mintungu, ku kayivela ka swakudya ni ku tsekatseka ka misava. (Luka 21:10, 11) Hilaha ku fanaka, muapostola Pawulo u tsale malunghana ni “minkarhi ya mangava leyi swi nonon’hwaka ku langutana na yona,” laha vanhu va nga ta va ni tihanyi, va rhandza mali naswona va ri lava nga rhandziki vunene. Nkarhi wolowo u wu vitane ‘masiku yo hetelela.’—2 Timotiya 3:1-5.

Xisweswo, leswi mahungu ma swi hlamuselaka swa fana ni leswi profetiweke eBibeleni. Kambe ku fana ka kona ko helela eka mahungu wolawo yo biha ntsena. Bibele yi hlamusela ni leswi mahungu ma nga swi hlamuseriki. Hi ku tirhisa Rito ra Xikwembu leri huhuteriweke, hi kota ku twisisa leswaku ha yini ku ri ni vubihi byo tarisa xileswi swin’we ni leswaku vumundzuku byi ta va byi ri njhani.

 Ndlela Leyi Xikwembu Xi Byi Langutaka Ha Yona Vubihi

Bibele yi hlamusela ndlela leyi Xikwembu xi swi langutaka ha yona swiyimo leswi hlomulaka mbilu swa le sikwini ra hina. Hambileswi xi swi voneke ka ha ri emahlweni swiphiqo leswi nga kona sweswi, a xi swi tsakeli naswona a xi nge swi pfumeleli leswaku swi va kona hilaha ku nga heriki. Muapostola Yohane u tsarile: “Xikwembu i rirhandzu.” (1 Yohane 4:8) Yehovha wa khathala swinene hi vanhu naswona u venga vubihi hinkwabyo. Swi fanerile swinene leswaku hi lava nchavelelo eka Xikwembu, hikuva i xinene xi tlhela xi va ni ntwela-vusiwana ni matimba naswona xi tiyimiserile ku herisa vubihi emisaveni. Mupisalema u tsarile: “[Hosi leyi vekiweke hi Xikwembu etilweni] yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya yona.”—Pisalema 72:12-14.

Xana u va twela-vusiwana lava xanisekaka? Kumbexana wa va twela. Yehovha u hi nyike mfanelo ya ntwela-vusiwana hikuva hi vumbiwe hi xifaniso xa yena. (Genesa 1:26, 27) Hikwalaho, hi nga tiyiseka leswaku Yehovha wa khathala hi ku xaniseka ka vanhu. Yesu, loyi a a n’wi tiva swinene Yehovha ku tlula munhu un’wana, u dyondzise leswaku Yehovha wa khathala swinene hi hina naswona u ni ntwela-vusiwana lowukulu.—Matewu 10:29, 31.

Ntumbuluko hi woxe wu kombisa leswaku Xikwembu xa khathala hi vanhu. Yesu u vule leswaku Xikwembu xi ‘tsuvukisa dyambu ra xona eka vanhu vo homboloka ni lavanene naswona xi nisa mpfula ya xona ehenhla ka vanhu lava lulameke ni lava nga lulamangiki.’ (Matewu 5:45) Eka vanhu va le mutini wa Listra, muapostola Pawulo u te: “[Leswi Xikwembu] xi nga titshikangiki xi nga ri na vumbhoni bya leswaku xi endle leswinene, xi mi nyika timpfula ta le tilweni ni tinguva ta mihandzu, xi tata timbilu ta n’wina hi ku helela hi swakudya ni ku khana lokukulu.”—Mintirho 14:17.

I Mani La Vangaka Vubihi Lebyi?

I swa nkoka ku xiya leswaku Pawulo u tlhele a byela vanhu va le Listra a ku: “Eka switukulwana leswi hundzeke [Xikwembu] xi pfumelele matiko hinkwawo leswaku ma famba hi tindlela ta wona.” Xisweswo, matiko—kumbe vanhu hi voxe—hi vona va tivangelaka swiphiqo swo tala leswi va tikumaka va ri eka swona. Xikwembu a xi na nandzu.—Mintirho 14:16.

Ha yini Yehovha a pfumelela swilo leswo biha leswaku swi humelela? Xana u ta kala a teka goza ro karhi malunghana na swona? Nhlamulo ya swivutiso leswi yi nga kumeka ntsena eRitweni ra Xikwembu. Xivangelo xa kona hileswaku nhlamulo ya kona yi katsa munhu un’wana wa moya swin’we ni mphikamakaneta ya yena leyi a yi endleke endhawini leyi nga vonakiki ya moya.

[Swifaniso leswi nga eka tluka 4]

Vanhu va ni ntwela-vusiwana. Xana Xikwembu na xona xi ni ntwela-vusiwana?

 [Laha Swifaniso Swi Humaka Kona eka tluka 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Laha Xifaniso Xi Humaka Kona eka tluka 3]

Ehenhla eximatsini, Croatia: UN PHOTO 159208/S. Whitehouse; n’wana la sikaka: UN PHOTO 146150 BY O. MONSEN