Yehovha U Katekisa Ni Ku Sirhelela Lava Yingisaka
Yehovha U Katekisa Ni Ku Sirhelela Lava Yingisaka
“Loko ku ri loyi a ndzi yingisaka, u ta tshama a sirhelelekile naswona a nge kavanyetiwi hi ku chava khombo.”—SWIVURISO 1:33.
1, 2. Ha yini ku yingisa Xikwembu swi ri swa nkoka? Kombisa.
SWIKUKWANA swa xitshopana swi karhi swi jovolotela swakudya ebyanyini, a swi xi voni xikhozana lexi hahaka le henhla. Hi ku hatlisa, mbhaha wa kokola, wu vitana swikukwana wu phurumula timpapa. Swikukwana swi tsutsumela eka wona, kutani swi nghena ehansi ka timpapa swi tumbela. Xikhozana xa tlhela. * Hi dyondza yini emhakeni leyi? Ku yingisa ku ponisa vutomi!
2 Dyondzo yoleyo i ya nkoka, ngopfu-ngopfu eka Vakreste namuntlha, hikuva Sathana u endla matshalatshala hinkwawo yo hlasela vanhu va Xikwembu. (Nhlavutelo 12:9, 12, 17) Xikongomelo xa yena i ku herisa ripfumelo ra hina leswaku hi nga ha amukeleki eka Yehovha naswona hi lahlekeriwa hi ntshembo wa vutomi lebyi nga heriki. (1 Petro 5:8) Kambe loko hi tshama hi ri ekusuhi ni Xikwembu naswona hi wu amukela hi ku hatlisa nkongomiso wa xona lowu hi wu kumaka eRitweni ra xona ni le nhlengeletanweni ya xona, hi nga tiyiseka leswaku xi ta hi sirhelela. Mupisalema u tsarile: “U ta ku sirhelela hi timpapa takwe, u ta tumbela ehansi ka timpapa takwe.”—Pisalema 91:4.
Tiko Leri Nga Yingisiki Ra Hlaseriwa
3. Byi ve byihi vuyelo bya ku tshamela ku nga yingisi ka Israyele?
3 Loko tiko ra Israyele ri yingisa Yehovha, a a ta tshama a ri sirhelerile. Kambe, lexi vavisaka, minkarhi yo tala vanhu a va fularhela Muvumbi wa vona va hundzukela eka swikwembu leswi endliweke hi mhandzi ni ribye—“swilo leswi nga riki swa xiviri, leswi nga vuyerisiki, leswi nga kutsuriki.” (1 Samuwele 12:21) Endzhaku ka malembe-xidzana ya ku xandzuka koloko, tiko hinkwaro a ri nghene hi nhloko evugwinehini lerova a ku nga ha ri na ntshembo wa leswaku ri ta hlakarhela. Hikwalaho Yesu u ri rilerile a ku: “Yerusalema, Yerusalema, mudlayi wa vaprofeta ni loyi a va khandleke hi maribye lava rhumiweke eka yena,—i ko tala ndzi lava ku hlengeleta vana va wena, hi ndlela leyi mbhaha wu hlengeletaka ha yona swiciwana swa wona ehansi ka timpapa ta wona! Kambe n’wina a mi swi lavanga. Maswivo! Yindlu ya n’wina yi tshikeriwa n’wina.”—Matewu 23:37, 38.
4. Leswaku Yehovha u wu fularherile Yerusalema swi tikombe njhani hi 70 C.E.?
4 Leswaku Yehovha u va fularherile Vaisrayele lava gwineheke swi tikombe hi ndlela yo vava hi 70 C.E. Hi lembe rero mavuthu ya Varhoma lawa a ma rhwele mijeko ya wona, leyi a yi ri ni xifaniso xa gama, ma rhangisanile ma ya hlasela Yerusalema ma dlayetela vanhu vo tala. Enkarhini wolowo muti a wu lo mphaa, hi vanhu lava a va tele ku ta tlangela Paseka. Magandzelo ya vona yo tala a ma endlanga leswaku va amukeriwa hi Xikwembu. Sweswo a ku ri xitsundzuxo lexi vavisaka xa marito ya Samuwele lama a ma byeleke Hosi Sawulo loyi a a nga yingisi: “Xana Yehovha u tsakisiwa hi magandzelo yo hisiwa ni switlhavelo ku fana ni ku yingisa rito ra Yehovha? Waswivo! Ku yingisa swa antswa ku ri ni xitlhavelo, ku nyikela nyingiso ku ri ni mafurha ya makhuna.”—1 Samuwele 15:22.
5. Yehovha u lava ku yingisa ka muxaka muni naswona hi swi tivisa ku yini leswaku swa koteka ku n’wi yingisa hi ndlela yoleyo?
5 Ku nga khathariseki leswi a lavaka ku tshama a ri karhi a yingisiwa, Yehovha wa swi tiva leswi hi tsandzekaka ku swi endla tanihi vanhu lava nga hetisekangiki. (Pisalema 130:3, 4) Leswi a swi languteleke i mbilu leyi tshembekaka ni ku yingisa hikwalaho ka ripfumelo, rirhandzu ni ku chava ku n’wi hlundzukisa. (Deteronoma 10:12, 13; Swivuriso 16:6; Esaya 43:10; Mikiya 6:8; Varhoma 6:17) Leswaku swa koteka ku n’wi yingisa hi ndlela yoleyo swi vonake eka ‘papa lerikulu swinene ra timbhoni ta le mahlweni ka Vukreste,’ leti tshameke ti tshembekile loko ti langutane ni miringo yo tika, hambi ku ri rifu. (Vaheveru 11:36, 37; 12:1) Hakunene lava va tsakise mbilu ya Yehovha! (Swivuriso 27:11) Hambiswiritano, van’wana lava eku sunguleni a va yingisa va hetelele va nga ha yingisi. Un’wana wa vona a ku ri Hosi Yehowaxi wa le Yuda wa khale.
Hosi Leyi Onhiweke Hi Vanghana Lavo Biha
6, 7. Loko Yoyada a ha hanya, Yehowaxi a a ri hosi ya muxaka muni?
6 Hosi Yehowaxi u pone ri ahlamile loko a ha ri ricece. Loko Yehowaxi a ri ni malembe ya nkombo hi vukhale, Muprista Lonkulu Yoyada u kanye mbilu a n’wi humesa laha a tumbetiwe kona kutani a n’wi veka ku va hosi. Leswi Yoyada loyi a a chava Xikwembu a a fana ni tatana tlhelo mutsundzuxi eka Yehowaxi, mufumi loyi lontsongo ‘u hambete a endla leswi lulameke ematihlweni ya Yehovha emasikwini hinkwawo ya Yoyada lowa muprista.’—2 Tikronika 22:10–23:1, 11; 24:1, 2.
7 Swin’wana swa swiendlo leswinene swa Yehowaxi a ku ri ku pfuxeta tempele ya Yehovha—ku nga xiendlo lexi a xi ri “embilwini ya Yehowaxi.” U tsundzuxe Muprista Lonkulu Yoyada malunghana ni ku hlengeleta xibalo xa le tempeleni eka vanhu va le Yuda ni va le Yerusalema, “lexi lerisiweke hi Muxe,” leswaku ku ta hakeleriwa ntirho wo pfuxeta. Handle ko kanakana, Yoyada u swi kotile ku khutaza hosi leyi a ya ha ri muntshwa leswaku yi dyondza yi tlhela yi yingisa Nawu wa Xikwembu. Hikwalaho, ntirho wa le tempeleni ni wa swibya swa le tempeleni wu hatle wu hetiwa.—2 Tikronika 24:4, 6, 13, 14; Deteronoma 17:18.
8. (a) I yini lexi ngopfu-ngopfu xi endleke leswaku Yehowaxi a fa hi tlhelo ra moya? (b) Ku nga yingisi ka hosi ku yi vangele leswaku yi hetelela yi endle yini?
8 Lexi vavisaka, Yehowaxi a nga n’wi yingisanga ku ya kwihi Yehovha. Ha yini? Rito ra Xikwembu ra hi byela: “Endzhaku ka rifu ra Yoyada, tihosana ta Yuda ti fika, ti nkhinsamela hosi. Hi nkarhi wolowo hosi yi ti yingisa. Hakatsongo-tsongo ti tshika yindlu ya Yehovha Xikwembu xa vatata wa tona, ti sungula ku tirhela timhandzi to kwetsima ni swifaniso swa hava, lerova Yuda na Yerusalema yi hlundzukeriwa hikwalaho ka nandzu wa tona.” Nkucetelo lowo biha wa tihosana ta le Yuda wu tlhele wu endla leswaku hosi leyi yi nga va yingisi vaprofeta va Xikwembu, un’wana wa vona a ku ri Zakariya n’wana wa Yoyada, loyi a kanyeke mbilu a tshinya Yehowaxi ni vanhu lavan’wana hikwalaho ka leswi a va nga yingisi. Ematshan’weni yo hundzuka, Yehowaxi u lerise leswaku Zakariya a khandliwa hi maribye. Hikwalaho ka leswi Yehowaxi a pfumeleke ku kuceteriwa hi vanghana lavo biha, u ve ni tihanyi a tlhela a nga yingisi.—2 Tikronika 24:17-22; 1 Vakorinto 15:33.
9. Xana leswi swi heteleleke swi humelele Yehowaxi ni tihosana swi byi kombisa njhani vuphukuphuku bya ku nga yingisi?
9 Xana ku humelele yini hi Yehowaxi ni vanghana va yena lava tihosana leto homboloka, leswi va fularheleke Yehovha? Vuthu ra Vasiriya—leri a “ri ri ritsongo”—ri hlasele Yuda kutani ri “herisa tihosana hinkwato ta tiko exikarhi ka vanhu.” Vahlaseri va tlhele va sindzisa hosi leswaku yi va nyika nhundzu ya yona swin’we ni nsuku ni silivhere leswi a swi ri exikwetsimisisweni. Hambileswi Yehowaxi a poneke, va n’wi siye a nga ha ri na matimba naswona a vabya. Endzhaku ka sweswo, man’wana ya malandza ya yena ma endle xikhiri kutani ma n’wi dlaya. (2 Tikronika 24:23-25; 2 Tihosi 12:17, 18) Hakunene marito ya Yehovha lawa a ma ya eka Vaisrayele a ma ri ntiyiso: “Loko u nga yingisi rito ra Yehovha Xikwembu xa wena hi ku khathalela ku endla swileriso hinkwaswo ni milawu . . . mindzhukano leyi hinkwayo yi fanele yi ta ehenhla ka wena yi ku rhangela”!—Deteronoma 28:15.
Matsalana Loyi A Poniseke Hi Ku Yingisa
10, 11. (a) Ha yini swi pfuna ku anakanyisisa hi ndzayo leyi Yehovha a yi nyikeke Baruku? (b) Hi yihi ndzayo leyi Yehovha a yi nyikeke Baruku?
10 Xana minkarhi yin’wana u titwa u hela matimba hi leswi va nga talangiki vanhu lava tsakelaka mahungu lamanene ensin’wini? Xana nkarhi wun’wana u titwa u vondzoka vanhu lava nga ni swilo swa vona ni lava va hanyelaka ku titlonya hi vutomi? Loko swi ri tano, anakanya hi Baruku, matsalana wa Yeremiya ni ndzayo ya rirhandzu leyi Yehovha a n’wi nyikeke yona.
11 Baruku a a ri karhi a tsala rungula ra vuprofeta loko Yehovha a sungula ku vulavula ha yena. Ha yini? Hikuva Baruku a a tisola hikwalaho ka ntirho lowu a a wu endla naswona a a navela swilo swo antswa ku tlula ntirho wa yena wo hlawuleka lowu a a wu endlela Xikwembu. Loko a xiya ku hundzuka ka langutelo leri ra Baruku, Yehovha u n’wi nyike ndzayo leyi twisisekaka ya musa, a ku: “U tshamela ku lava swilo leswikulu. U nga tshameli ku swi lava. Hikuva ndzi tisa khombo ehenhla ka nyama hinkwayo, . . . naswona ndzi ta ku nyika moya-xiviri wa wena kukota leswi phangiweke etindhawini hinkwato leti u nga ta ya eka tona.”—Yeremiya 36:4; 45:5.
12. Ha yini hi fanele hi papalata ku tilavela “swilo leswikulu” emafambiselweni lawa ya swilo?
12 Xana wa swi xiya leswaku marito lawa Yehovha a ma byeleke Baruku a ma kombisa leswaku Wa khathala swinene hi wanuna loyi lonene, loyi a n’wi tirheleke swin’we na Yeremiya hi ku tshembeka na hi xivindzi? Hilaha ku fanaka namuntlha, Yehovha wa khathala swinene hi lava va ringiwaka leswaku va hlongorisa swilo leswi vonakaka onge i swinene emafambiselweni lawa ya swilo. Lexi tsakisaka, ku fana na Baruku, vo tala va vanhu volavo va amukele ndzayo ya rirhandzu ya vamakwerhu va moya lava wupfeke. (Luka 15:4-7) Ina, onge hinkwerhu ka hina hi nga swi xiya leswaku lava va tilavelaka “swilo leswikulu” emafambiselweni lawa a va na vumundzuku. Vanhu volavo va tsandzeka ku kuma ntsako wa xiviri naswona khombo ra kona, ku nga ri khale va ta lovisiwa emisaveni leyi ni ku navela ka yona hinkwako.—Matewu 6:19, 20; 1 Yohane 2:15-17.
13. Hi yihi dyondzo ya ku titsongahata leyi mhaka ya Baruku yi hi dyondzisaka yona?
13 Rungula leri vulavulaka hi Baruku ri tlhela ri hi dyondzisa dyondzo leyinene ya ku titsongahata. Xiya leswaku Yehovha a nga vulavulanga na Baruku hi ku kongoma kambe u vulavule na yena hi ku tirhisa Yeremiya, loyi Baruku a a swi tiva kahle swihoxo swa yena ni mikhuva yakwe leyi nga n’wi tsakisiki. (Yeremiya 45:1, 2) Kambe, Baruku a nga tikukumuxanga; hi ku titsongahata u swi xiyile leswaku ndzayo leyi yi huma eka Yehovha. (2 Tikronika 26:3, 4, 16; Swivuriso 18:12; 19:20) Kutani, loko hi ‘teka goza leri hoxeke hi nga si swi lemuka,’ ivi hi kuma ndzayo leyi humaka eRitweni ra Xikwembu, a hi tekeleleni ndlela ya Baruku, hi twisisa hi tlhelo ra moya naswona hi titsongahata.—Vagalatiya 6:1.
14. Ha yini hi vuyeriwa loko hi yingisa lava va hi rhangelaka?
14 Langutelo rero ra ku titsongahata, nakambe eka hina ri pfuna lava va nyikaka ndzayo. Vaheveru 13:17 yi ri: “Yingisani lava rhangelaka exikarhi ka n’wina naswona mi titsongahata, hikuva va tshama va rindze mimoya-xiviri ya n’wina hikuva hi vona va nga ta hlamusela; leswaku va endla leswi hi ntsako ku nga ri hi ku vilela, hikuva leswi swi nga mi vavisa.” Hakanyingi vakulu va khongela hi mbilu hinkwayo eka Yehovha, va khongelela xivindzi, vutlhari ni vuxiyaxiya loko va ri karhi va hetisisa xiyenge lexi xa ntirho wa vurisi. A hi ‘xiyeni vanhu va muxaka wolowo.’—1 Vakorinto 16:18.
15. (a) Xana Yeremiya u swi kombise njhani leswaku wa n’wi tshemba Baruku? (b) Xana Baruku u hakeriwe njhani hikwalaho ka ku yingisa kakwe hi ku titsongahata?
15 Swi le rivaleni leswaku Baruku a a antswise mianakanyo ya yena, hikuva Yeremiya u tlhele a n’wi nyika xiavelo xo tika swinene—xa ku ya etempeleni a ya hlaya rungula ra vuavanyisi hi rito ra le henhla, leri yena hi yexe a ri tsaleke ri huma enon’wini wa Yeremiya. Xana Baruku u yingisile? Ina, u endle “hinkwaswo leswi Yeremiya lowa muprofeta a n’wi leriseke swona.” Entiyisweni, u tlhele a hlaya rungula leri fanaka eka tihosana ta Yerusalema, leswi a swi lava leswaku a va ni xivindzi. (Yeremiya 36:1-6, 8, 14, 15) Loko muti wu wela emavokweni ya Vababilona endzhaku ka malembe ya 18, ehleketa ndlela leyi Baruku a a tsake ha yona loko a tsetseleriwile hikwalaho ka leswi a yingiseke xitsundzuxo xa Yehovha ni ku tshika ku tilavela “swilo leswikulu”!—Yeremiya 39:1, 2, 11, 12; 43:6.
Ku Yingisa Swi Ponise Vutomi Loko Muti Wu Rhendzeriwile
16. Xana Yehovha u wu kombise njhani ntwela-vusiwana eka Vayuda va le Yerusalema loko Vababilona va rhendzele muti hi 607 B.C.E.?
16 Loko muti wa Yerusalema wu lovisiwa hi 607 B.C.E., Xikwembu xi tlhele xi kombisa ntwela-vusiwana wa xona eka lava yingisaka. Loko se timhaka ti yime hi nhloko, Yehovha u byele Vayuda a ku: “Ndzi veka emahlweni ka n’wina ndlela ya vutomi ni ndlela ya rifu. Loyi a tshamisekaka emutini lowu u ta dlayiwa hi banga ni hi ndlala ni hi ntungu; kambe loyi a humaka kutani a wela eka Vakalidiya lava va mi rhendzeleke u ta hanya, kunene moya-xiviri wakwe wu ta va wa yena ku fana ni nchumu lowu phangiweke.” (Yeremiya 21:8, 9) Hambileswi vaaki va Yerusalema a va faneriwe hi ku lovisiwa, Yehovha u kombise ntwela-vusiwana eka lava va n’wi yingisaka, hambi ku ri enkarhini wolowo wo tika. *
17. (a) Xana ku yingisa ka Yeremiya ku ringiwe hi tindlela tihi timbirhi loko Yehovha a n’wi lerisa ku ya byela Vayuda lava rhendzeriweke leswaku va ‘tinyikela eka Vakalidiya’? (b) Hi nga vuyeriwa njhani eka xikombiso xa Yeremiya xo yingisa hi xivindzi?
17 Loko Yeremiya a byela Vayuda leswaku va tinyiketa a swi kanakanisi leswaku swi ringe ku yingisa ka yena. Hikuva, a a hisekela vito ra Xikwembu. A a nga swi lavi leswaku ri sandziwa hi valala lava a va ta vula leswaku va hlule hikwalaho ko seketeriwa hi swikwembu leswi nga hanyiki. (Yeremiya 50:2, 11; Swirilo 2:16) Ku engetela kwalaho, Yeremiya a a swi tiva leswaku loko a byela vanhu leswaku va tinyikela, a a hoxa vutomi bya yena ekhombyeni lerikulu, hikuva vo tala a va ta teka marito ya yena ma ri ya vuxengi. Kambe, a nga kalanga a chava, u twarise swileriso swa Yehovha hi ku tshembeka. (Yeremiya 38:4, 17, 18) Ku fana na Yeremiya, na hina hi twarisa rungula leri vanhu va nga ri rhandziki. I rungula leri fanaka ni leri Yesu a sandziweke hikwalaho ka rona. (Esaya 53:3; Matewu 24:9) Hikwalaho, hi nga ‘chavi vanhu,’ kambe ku fana na Yeremiya, a hi yingiseni Yehovha hi xivindzi hi tlhela hi n’wi tshemba hi ku helela.—Swivuriso 29:25.
Ku Yingisa Loko U Langutane Ni Nhlaselo Wa Gogo
18. Hi yihi miringo leyi malandza ya Yehovha lama yingisaka ma nga ta langutana na yona?
18 Ku nga ri khale, mafambiselo hinkwawo yo homboloka ya Sathana ma ta herisiwa eka “nhlomulo lowukulu” lowu nga si tshamaka wu va kona. (Matewu 24:21) A swi kanakanisi leswaku loko nhlomulo wolowo wu nga si sungula kumbe loko se wu sungurile, ripfumelo ni ku tshembeka ka vanhu va Xikwembu ku ta ringiwa ngopfu. Hi xikombiso, Bibele yi hi byela leswaku Sathana, tanihi “Gogo wa tiko ra Magogo” u ta hlasela malandza ya Yehovha hi matimba ya yena hinkwawo, a lunghiselela mavuthu lama hlamuseriwaka tanihi ‘nhlengeletano leyikulu swinene ya nyimpi kukota mapapa lama funengetaka tiko.’ (Ezekiyele 38:2, 14-16) Vanhu va Xikwembu va ntsandza-vahlayi, lava nga hlomangiki va ta lava nsirhelelo ehansi ka “timpapa” ta Yehovha, leti a ti phurumulaka leswaku a sirhelela lava yingisaka.
19, 20. (a) Ha yini a swi ri swa nkoka swinene leswaku Vaisrayele va yingisa loko va ri eLwandle ro Tshwuka? (b) Xana ku anakanyisisa hi mhaka ya le Lwandle ro Tshwuka ku nga hi pfuna njhani namuntlha?
19 Xiyimo lexi xi hi tsundzuxa hi ku Rhurha ka Vaisrayele aEgipta. Endzhaku ko hlasela tiko ra Egipta hi makhombo ya khume lama chavisaka, Yehovha a nga fambisanga vanhu vakwe hi ndlela yo koma loko va ya eTikweni leri Tshembisiweke, kambe u va fambise hi ndlela ya le Lwandle ro Tshwuka, laha a va ta phasiwa hi ku olova kutani va hlaseriwa. Hi ku ya hi langutelo ra vuthu, yoleyo a ku ri ndlela ya khombo. Loko a wu ri kwalaho, xana a wu ta va u yingise rito ra Yehovha leri vuriweke hi Muxe kutani u famba hi ndlela ya le Lwandle ro Tshwuka u nga chavi nchumu, u ri karhi u swi tiva leswaku Tiko leri Tshembisiweke ri le ka tlhelo lerin’wana?—Eksoda 14:1-4.
20 Loko hi ri karhi hi hlaya Eksoda ndzima 14, hi vona ndlela leyi Yehovha a kutsuleke vanhu vakwe ha yona hi matimba yo chavisa. Hakunene timhaka toleto ti nga tiyisa ripfumelo ra hina loko hi tinyika nkarhi wo ti hlaya ni ku anakanyisisa ha tona! (2 Petro 2:9) Hilaha ku fanaka, ripfumelo leri tiyeke ri hi pfuna leswaku hi yingisa Yehovha, hambiloko vanhu va vona onge milawu ya yena ya tika. (Swivuriso 3:5, 6) Kutani tivutise, ‘Xana ndzi lwela ku tiyisa ripfumelo ra mina hi ku dyondza Bibele hi ku hiseka, hi ku khongela ni hi ku anakanyisisa swin’we ni ku hlangana nkarhi ni nkarhi ni vanhu va Xikwembu?’—Vaheveru 10:24, 25; 12:1-3.
Ku Yingisa Swi Tiyisa Ntshembo
21. Hi yihi mikateko ya sweswi ni ya nkarhi lowu taka leyi nga ta kumiwa hi lava yingisaka Yehovha?
21 Lava va hanyaka hi ku yingisa Yehovha va vona ntiyiso wa Swivuriso 1:33 leyi nge: “Loko ku ri loyi a ndzi yingisaka [hi ku tshembeka], u ta tshama a sirhelelekile naswona a nge kavanyetiwi hi ku chava khombo.” Vona ndlela leyi marito lawa ma chavelelaka ma nga ta hetiseka ha yona loko siku ra Yehovha ro tirihisela ri fika! Entiyisweni, Yesu u byele vadyondzisiwa vakwe a ku: “Loko swilo leswi swi sungula ku humelela, yimani mi ololoka ivi mi tlakusa tinhloko ta n’wina, hikuva ku kutsuriwa ka n’wina ka tshinela.” (Luka 21:28) Kahle-kahle hi lava yingisaka Xikwembu ntsena lava nga ta va ni xivindzi xo yingisa marito lawa.—Matewu 7:21.
22. (a) Hi xihi xivangelo xa leswaku vanhu va Yehovha va va ni xivindzi? (b) Hi tihi timhaka leti ku nga ta buriwa ha tona exihlokweni lexi landzelaka?
22 Xivangelo xin’wana xa ku va ni xivindzi hileswaku “Yehovha, Hosi leyi Lawulaka a nge endli nchumu a nga si hlavutela mhaka ya yena leyi nga xihundla eka malandza ya yena ku nga vaprofeta.” (Amosi 3:7) Namuntlha, Yehovha a nga huhuteli vaprofeta ku fana ni le nkarhini wa khale; ku ri na sweswo u lerise ntlawa wa hlonga ro tshembeka leswaku wu phamela va yindlu ya yena swakudya swa moya hi nkarhi lowu faneleke. (Matewu 24:45-47) Hikwalaho i swa nkoka leswaku hi yingisa “hlonga” rolero. Hilaha xihloko lexi landzelaka xi nga ta kombisa hakona, ku yingisa ko tano ku tlhela ku kombisa langutelo leri hi nga na rona eka Yesu, loyi a nga n’wini wa “hlonga.” Hi yena Loyi ‘vanhu va nga ta yingisa yena.’—Genesa 49:10.
[Tinhlamuselo ta le hansi]
^ par. 1 Nhlangano lowu khathalelaka swiharhi wu vula leswaku hambileswi hakanyingi ku vuriwaka leswaku i toya, “mbhaha wu ta lwa hi matimba leswaku wu sirhelela swikukwana leswaku swi nga vavisiwi.”
^ par. 16 Yeremiya 38:19 yi kombisa leswaku Vayuda vo hlaya va ‘wele’ eka Vakalidiya naswona a va dlayiwanga kambe va yisiwe evuhlongeni. A hi byeriwi leswaku va lo tinyiketa hi ku landza marito ya Yeremiya kumbe a va tinyiketanga. Nilokoswiritano, ku pona ka vona ku tiyisekise marito ya muprofeta.
Wa Tsundzuka Xana?
• Ku humelele yini eka Vaisrayele leswi a va tshamela ku tlula nawu?
• Hosi Yehowaxi u khumbiwe njhani hi vanhu lava a a tolovelane na vona, loko a ha ri ntsongo niloko se a kurile?
• Hi nga dyondza yini eka Baruku?
• Ha yini vanhu va Yehovha lava yingisaka va nga ri na xivangelo xo chava leswi mafambiselo ya sweswi ma yaka eku heleni?
[Swivutiso Swa Dyondzo]
[Xifaniso lexi nga eka tluka 13]
Ehansi ka nkongomiso wa Yoyada, Yehowaxi lontsongo a a yingisa Yehovha
[Xifaniso lexi nga eka tluka 15]
Vanghana vo biha va kucetele Yehowaxi ku dlaya muprofeta wa Xikwembu
[Xifaniso lexi nga eka tluka 16]
Xana a wu ta va u yingise Yehovha kutani u ponisiwa hi matimba ya yena yo hlamarisa?